美濃客家語寶典-02

美濃客家語寶典-02：

編號	例句	六堆客語拼音	華譯
lbk02_001	無出來社會項行，就毋知「在家千日好，出門半朝難」个道理喲！	moˇ cudˋ loiˇ sa fi hong hangˇ ， qiu mˇ diˊ 「 cai gaˊ qienˊ ngidˋ hoˋ ， cudˋ munˇ ban zeuˊ nanˇ 」 ge to liˊ ioˊ ！	不出來社會闖蕩，就不知道「在家千日好，出門半日難」的道理呢！
lbk02_002	安冷氣定著愛鏨壁空。	onˊ langˊ hi tin cog oi cam biagˋ kangˊ 。	安裝冷氣機一定要在牆壁上打洞。
lbk02_003	頭擺，蓋好同人多事个人，會分人喊「綻脧仔」。	teuˇ baiˋ ， goi hau tungˇ nginˇ doˊ sii ge nginˇ ， voi bunˊ nginˇ ham 「 can zoiˊ eˋ 」。	以前，很喜歡跟人打架鬧事的人，就會被人稱「綻脧仔」。
lbk02_004	頭擺過苦个人家，正會做「撐船扛轎」个事頭。	teuˇ baiˋ go kuˋ ge nginˇ gaˊ ， nang voi zo 「 cang sonˇ gongˊ kieu 」 ge se teuˇ 。	以前貧困的人，才會做撐船、扛轎的苦工作。
lbk02_005	吾姆蓋拿爪，屋下大細事情都係佢在該撐頭撐尾。	ngaˊ meˊ goi naˊ zauˋ ， lugˋ kaˊ tai se sii qinˇ duˊ he iˇ teˊ geˋ cang teuˇ cang miˊ 。	我母親聰明伶俐又勤奮，家裡大大小小的事情都是她在打點。
lbk02_006	頭前該台車仔後背个玻璃蓋晟目珠。	teuˇ qienˇ ge toiˇ caˊ eˋ heu boi ge boˊ liˇ goi cangˇ mugˋ zuˊ 。	前面那部車子的後方玻璃很刺眼。
lbk02_007	這賊仔䀯著日時頭屋主去上班，就趖入屋仔裡背操東西。	iaˋ ced eˋ pu doˋ ngidˋ siiˇ teuˇ vugˋ zuˋ hi songˊ banˊ ， qiu soˇ ngib vugˋ eˋ diˊ boi cau dungˊ xiˊ 。	這小偷趁白天屋主上班，偷溜到屋裡搜尋財物。
lbk02_008	佢做法院个書記，每日都愛抄抄寫寫，盡清苦。	iˇ zo fabˋ ian ge suˊ gi ， miˊ ngidˋ duˊ oi cauˊ cauˊ xiaˋ xiaˋ ， qin qinˊ kuˋ 。	他當法院的書記官，每天都要不斷的抄寫，實在很辛苦。
lbk02_009	這隻狗仔今晡日毋知哪仔無堵好，歸日仔都將把該隻雞仔抄上抄下。	iaˋ zagˋ gieuˋ eˋ ginˊ buˊ ngidˋ mˇ diˊ naiˋ eˋ moˇ duˋ hoˋ ， guiˊ ngidˋ eˋ duˊ jiongˊ baˋ ge zagˋ gieˊ eˋ cauˊ songˊ cauˊ haˊ 。	這隻狗今天不知道哪根筋不對，整天都在追那隻雞。
lbk02_010	阿爸在裡背睡目，你等兩兄弟莫在這吵吵鬧鬧。	aˊ baˊ teˊ diˊ boi soi mugˋ ， ngˇ denˊ liongˋ hiungˊ ti mog teˊ iaˋ cauˇ cauˇ nau nau 。	爸爸在房內睡覺，你們兩兄弟不要在這裡吵鬧。
lbk02_011	人想愛靜下來愐一下事情，拜託你莫在脣口吵耳吵鼻好無？	nginˇ xiongˋ oi qin haˊ loiˇ menˋ idˋ ha sii qinˇ ， bai togˋ ngˇ mog teˊ siinˇ heuˋ cauˇ ngiˋ cauˇ pi hoˋ moˇ ？	我想靜下心來想些事情，拜託你不要在旁邊吵鬧好嗎？
lbk02_012	隔壁起火吔，大家共快擐水來救火，係無驚怕遰著屋。	gagˋ biagˋ hiˋ foˋ eˇ ， tai gaˊ kiung kuai kuan suiˋ loiˇ giu foˋ ， he moˇ giangˊ pa ce cog vugˋ 。	隔壁發生火災了，大家趕緊提水來滅火，否則恐怕火勢會漫延。
lbk02_013	你這下還在該感冒，出去愛戴嘴落仔，正毋會遰著抹人。	ngˇ iaˋ ha hanˇ teˊ geˋ gamˋ mo ， cudˋ hi oi dai zoi labˋ eˋ ， nang mˇ voi ce doˋ madˋ nginˇ 。	你正在感冒，出去時要帶口罩，才不會傳染給他人。
lbk02_014	這下在該流行感冒，係無注意衛生管理，就會一哪仔遰上遰下。	iaˋ ha teˊ geˋ liuˇ hangˇ gamˋ mo ， he moˇ zu i vi senˊ gonˋ liˊ ， qiu voi idˋ naiˋ eˋ ce songˊ ce haˊ 。	現在正在流行感冒，若不注意衛生管理，就會到處互相傳染。
lbk02_015	今晡日阿公生日請人客，屋下準備請人客个菜色齊齊操操。	ginˊ buˊ ngidˋ aˊ gungˊ sangˊ ngidˋ qiangˋ nginˇ hagˋ ， lugˋ kaˊ zunˋ pi qiangˋ nginˇ hagˋ ge coi sedˋ ceˇ ceˇ cau cau 。	今天爺爺生日請客，家中準備了豐盛的菜餚待客。
lbk02_016	你莫看佢細罔細，還曉得同這兜鉛筆排啊齊齊仔呢！	ngˇ mog kon iˇ se mongˋ se ， hanˇ hiauˋ dedˋ tungˇ iaˋ deuˊ ianˇ bidˋ paiˇ a ceˇ ceˇ eˊ neˊ ！	你不要看他年紀雖小，卻知道將這些鉛筆排整齊呢！
lbk02_017	人蔘粉盡貴，頭家秤个時節，會撮撮仔加足斤兩。	nginˇ semˊ funˋ qin gui ， teuˇ gaˊ ciin ge siiˇ jiedˋ ， voi cebˋ cebˋ eˊ gaˊ jiugˋ ginˊ liongˊ 。	人蔘粉很貴，老闆在稱重時，會慢慢加足斤兩。
lbk02_018	這隻猴哥盡毋像人，做毋著事還賊過惡人，動手打人。	iaˋ zagˋ heuˇ goˊ qin mˇ qiong nginˇ ， zo mˇ cog sii hanˇ ced go ogˋ nginˇ ， tungˊ suˋ daˋ nginˇ 。	這傢伙真不是人，做錯事還兇人、動手打人。
lbk02_019	該人賊手賊腳，愛過注意兜仔。	ge nginˇ ced suˋ ced giogˋ ， oi go zu i deuˊ eˊ 。	那個人賊手賊腳的，要稍微注意些。
lbk02_020	佢這恁久襯瘍癧，今嘎還在屋下休息呢！	iˇ iaˋ anˋ giuˋ cen iongˇ lag ， ginˊ ga hanˇ teˊ lugˋ kaˊ hiuˊ xidˋ neˊ ！	他最近得淋巴腺腫，現在還在家裡休養呢！
lbk02_021	後生人愛錢就自家賺，毋好在屋下同爺哀呻生呻死。	heu sangˊ nginˇ oi qienˇ qiu qid gaˊ con ， mˇ hoˋ teˊ lugˋ kaˊ tungˇ iaˇ oiˊ cenˊ sangˊ cenˊ xiˋ 。	年輕人要錢就自己賺，不要在家中向父母叫窮。
lbk02_022	一息仔痛就呻上呻下，你知見笑無？	idˋ xidˋ eˊ tung qiu cenˊ songˊ cenˊ haˊ ， ngˇ diˊ gian seu moˇ ？	一點小痛就呻吟個不停，你害不害臊？
lbk02_023	阿炳哥恁久賺著錢吔，在該層樓棚吔唷！	aˊ biangˋ goˊ anˋ giuˋ con doˋ qienˇ eˇ ， teˊ geˋ cenˇ leuˇ pangˇ eˇ ioˊ ！	阿炳哥最近賺了錢，正在蓋樓房了呢！
lbk02_024	你這兜東西共快收揫好勢，莫恁呢層三矺四，打塵灰。	ngˇ iaˋ deuˊ dungˊ xiˊ kiung kuai suˊ qiuˊ hoˋ se ， mog anˋ neˊ cenˇ samˊ zagˋ xi ， daˋ ciinˇ foiˊ 。	你這些東西趕快收拾好，不要亂堆亂疊，蒙上灰塵。
lbk02_025	佢人恁細隻毋認分，不時頸偏偏，大家就㖸佢「瘦狗多火」。	iˇ nginˇ anˋ se zagˋ mˇ ngin fun ， budˋ siiˇ giangˋ pienˊ pienˊ ， tai gaˊ qiu nagˋ iˇ 「 ceu gieuˋ doˊ foˋ 」。	他雖瘦小卻不認分，動不動就發脾氣，大家就笑他「瘦狗多火」。
lbk02_026	你愛食加兜仔，係無瘦夾夾仔會分風吹走喔！	ngˇ oi siid gaˊ deuˊ eˊ ， he moˇ ceu giab giab eˊ voi bunˊ fungˊ coiˊ zeuˋ oˊ ！	你要多吃些東西，要不然太瘦了會被風吹走呢！
lbk02_027	佢身仔無好，瘦夾夾仔，故所大家喊佢「瘦薑膦」。	iˇ siinˊ eˋ moˇ hoˋ ， ceu giab giab eˊ ， gu soˋ tai gaˊ hemˊ iˇ 「 ceu giongˊ linˋ 」。	他身體不好，瘦巴巴的，所以大家叫他「瘦薑膦」。
lbk02_028	人瘦又好多事，生成係「瘦牛角大」个樣式。	nginˇ ceu iu hau doˊ sii ， sangˊ sangˇ he 「 ceu ngiuˇ gogˋ tai 」 ge iong siidˋ 。	人瘦又愛管閒事，真的是「瘦牛角大」的樣子。
lbk02_029	人莫取笑他人無用，老古人言講：「瘦山也有肥牛」。	nginˇ mog qiˋ seu taˊ nginˇ moˇ iung ， loˋ guˋ nginˇ ngianˇ gongˋ ：「 ceu sanˊ iaˊ iuˊ piˇ ngiuˇ 」。	我們不要取笑他人沒用，古語說：「再貧瘠的草山，也有養出肥牛的可能」。
lbk02_030	身仔忒瘦縮，無發病个本錢。	siinˊ eˋ tedˋ ceu sogˋ ， moˇ bodˋ piang ge bunˋ qienˇ 。	身體太瘦弱，沒有生病的本錢。
lbk02_031	頭擺人愛生活，定著愛拈樵樵杈杈來煮飯暖水。	teuˇ baiˋ nginˇ oi senˊ fad ， tin cog oi ngiamˊ ceuˇ ceuˇ ca ca loiˇ zuˋ fan nonˊ suiˋ 。	以前人要生活，一定要撿樹枝來煮飯、燒開水。
lbk02_032	你無關係人面，莫恁好事，無聽過人講「朝上無人莫望官，廚下無人莫亂鑽」吓？	ngˇ moˇ guanˊ hen nginˇ mien ， mog anˋ hau sii ， moˇ tangˊ go nginˇ gongˋ 「 ceuˇ song moˇ nginˇ mog mong gonˊ , cuˇ haˊ moˇ nginˇ mog lon zon 」 haˋ ？	你沒有太好的人際關係，就別那麼喜歡惹事，沒聽過人說「朝上無人莫望官，廚下無人莫亂鑽」嗎？
lbk02_033	𠊎無蓋多錢，但係屋下樵燥米白還過得日得。	ngaiˇ moˇ goi doˊ qienˇ ， danˋ he lugˋ kaˊ ceuˇ zauˊ miˋ pag hanˇ go dedˋ ngidˋ dedˋ 。	我並不富有，但是家裡柴乾米白，日子還過得去。
lbk02_034	做麼个事情莫著急，愛試試仔做。	zo maˋ ge sii qinˇ mog cog gibˋ ， oi cii cii eˊ zo 。	做事不要急，要小心的做。
lbk02_035	做生理愛同人參詳，毋好自自義義。	zo senˊ liˊ oi tungˇ nginˇ camˊ xiongˇ ， mˇ hoˋ cii cii ngi ngi 。	做生意要跟人商量，不要擅作主張。
lbk02_036	做事無用腦筋，登常自主自張定著會踢腳趾。	zo sii moˇ iung noˋ ginˊ ， denˊ songˇ cii zuˋ cii zongˊ tin cog voi tedˋ giogˋ ziiˋ 。	做事不用腦筋，又常常自作主張，一定會踢到鐵板。
lbk02_037	該兜毋做人个，歸堆仔持刀擛斧，蓋像愛去相打吔！	ge deuˊ mˇ zo nginˇ ge ， guiˊ doiˊ eˋ ciiˇ doˊ iag buˋ ， goi qiong oi hi xiongˊ daˋ eˇ ！	那些不良份子，整群人在拿刀揮劍，很像要去打架了。
lbk02_038	人講：「一等人㓾雞煠鴨，中等人蘿蔔角罔夾」，這就係現實。	nginˇ gongˋ ：「 idˋ denˋ nginˇ ciiˇ gieˊ sab abˋ ， zungˊ denˋ nginˇ loˇ ped gogˋ mongˋ giabˋ 」， iaˋ qiu he hian siid 。	常言道：「貴賓來就殺雞殺鴨，普通朋友來，有蘿蔔乾得吃就好」，這就是現實。
lbk02_039	阿伯登常會講「㓾膦剮生」來請人，毋過𠊎吂看過佢請過人客。	aˊ bagˋ denˊ songˇ voi gongˋ 「 ciiˇ linˋ guaˋ sangˊ 」 loiˇ qiangˋ nginˇ ， mˇ go ngaiˇ mangˇ kon go iˇ qiangˋ go nginˇ hagˋ 。	伯父常說要準備「㓾膦剮生」這道菜來請客，但我還不曾見他請過客。
lbk02_040	做阿姆个毋好忒縱細人仔，老人家講：「慈母多害子」，愛細義正好。	zo aˊ meˊ ge mˇ hoˋ tedˋ jiungˋ se nginˇ eˋ ， loˋ nginˇ gaˊ gongˋ ：「 ciiˇ muˊ doˊ hoi ziiˋ 」， oi se ngi nang hoˋ 。	當媽媽的不要太寵小孩，老人家講：「慈母多害子」，要小心才好。
lbk02_041	做阿姆个係蓋縱細人仔，走毋得會敗家。「慈母多敗子」這句話，書項有寫喔！	zo aˊ meˊ ge he goi jiungˋ se nginˇ eˋ ， zeuˋ mˇ dedˋ voi pai gaˊ 。「 ciiˇ muˊ doˊ pai ziiˋ 」 iaˋ gi fa ， suˊ hong iuˊ xiaˋ oˊ ！	當媽媽的如果很寵小孩，敗家是無可避免的。「慈母多敗子」這句話，書上有寫喔！
lbk02_042	「慈母害子」，就係勸話做阿姆个人毋好忒縱細人仔。	「 ciiˇ muˊ hoi ziiˋ 」， qiu he kian va zo aˊ meˊ ge nginˇ mˇ hoˋ tedˋ jiungˋ se nginˇ eˋ 。	「慈母害子」，就是奉勸當媽媽的不要太寵小孩子。
lbk02_043	做人愛篤實守本分，莫做㓾人放火个事。	zo nginˇ oi dugˋ siid suˋ bunˋ fun ， mog zo ciiˇ nginˇ biong foˋ ge sii 。	做人要老實守本分，不要做殺人放火的事。
lbk02_044	講話愛有要領，毋好直直仔講出去。	gongˋ fa oi iuˊ ieu liangˋ ， mˇ hoˋ ciid ciid eˊ gongˋ cudˋ hi 。	講話要有技巧，不要直接講。
lbk02_045	同人來去，錢財愛分明，愛直直別別。	tungˇ nginˇ loiˇ hi ， qienˇ coiˇ oi funˊ minˇ ， oi ciid ciid ped ped 。	跟人交往，金錢、帳目要處理得很清楚。
lbk02_046	直腸直肚个人，老實斯老實，毋過到尾定著會食虧。	ciid congˇ ciid duˋ ge nginˇ ， loˋ siid siiˇ loˋ siid ， mˇ go do miˊ tin cog voi siid kuiˊ 。	老實正直的人，最終還是會吃虧的。
lbk02_047	你做巡查莫忒硬直，係無斯會變做「直腸直肚，洗鑊無米煮」哦！	ngˇ zo siinˇ caˇ mog tedˋ ngang ciid ， he moˇ siiˇ voi bien zo 「 ciid congˇ ciid duˋ ， seˋ vog moˇ miˋ zuˋ 」 oˊ ！	你當警察不要太耿直，否則一定會吃虧。
lbk02_048	該人蓋奸雄，見堵著事情，就直落瀉走吔。	ge nginˇ goi gianˊ hiungˇ ， gian duˇ doˋ sii qinˇ ， qiu ciid lod xia zeuˋ eˇ 。	那個人很奸詐，每次遇到事情，跑得比誰都快。
lbk02_049	你就係恁呢直人直槌，見有麼个就講，正會分人惱。	ngˇ qiu he anˋ neˊ ciid nginˇ ciid cuiˇ ， gian iuˊ maˋ ge qiu gongˋ ， nang voi bunˊ nginˇ nauˊ 。	你就是這種直來直往的個性，每次有什麼就說，才會被人家討厭。
lbk02_050	佢講話生成就恁呢直人打直槌，你莫𢯭佢，過核吔就無事吔。	iˇ gongˋ fa sangˊ sangˇ qiu anˋ neˊ ciid nginˇ daˋ ciid cuiˇ ， ngˇ mog ten iˇ ， go hedˋ eˇ qiu moˇ sii eˇ 。	他說話本來就這樣直話直說，你不要在意，過了就沒事了。
lbk02_051	你見講話就直人打直鼓，害𠊎每擺都愛跈若尸背尾同你捽尸胐。	ngˇ gian gongˋ fa qiu ciid nginˇ daˋ ciid guˋ ， hoi ngaiˇ miˊ baiˋ duˊ oi tenˇ ngiaˊ sii boi miˊ tungˇ ngˇ cud sii fudˋ 。	你每次說話都直話直說，害我每次都要在你後面幫你收拾殘局。
lbk02_052	這條路直透到杉林。	iaˋ tiauˇ lu ciid teu do samˊ naˇ 。	這條路直通到杉林。
lbk02_053	這條河壩深深仔，你行過去愛過注意兜仔。	iaˋ tiauˇ hoˇ ba ciimˊ ciimˊ eˊ ， ngˇ hangˇ go hi oi go zu i deuˊ eˊ 。	這條河有點深，你走過去要小心哦。
lbk02_054	你這個人蓋過分，陣陣腦上搣吔幾下遍，還嶄然翕人哦！	ngˇ iaˋ ge nginˇ goi go fun ， ciin ciin noˋ songˊ miedˋ eˇ giˋ haˊ bien ， hanˇ zamˋ manˇ hibˋ nginˇ oˊ ！	你這個人很過分，接二連三做了好幾次，實在欺人太甚哦！
lbk02_055	簷頭項个絲愛搓淨來，係無斯會蹴橫人。	iamˇ teuˇ hong ge seˊ oi co qiang loiˇ ， he moˇ siiˇ voi co vang nginˇ 。	走廊上的青苔要刷乾淨，要不然會讓人滑倒。
lbk02_056	紮稈人仔，係造死銅板尺个簡單事頭，你肯學就會。	zadˋ gonˋ nginˇ eˋ ， he co xiˋ tungˇ banˋ cagˋ ge gianˋ danˊ se teuˇ ， ngˇ henˋ hog qiu voi 。	紮稻草人，是很簡單的工作，你肯學就學得來。
lbk02_057	老古人講：「坐北向南，無食都清閒；坐南向北，神仙都歇毋得（賺毋著來揜）」，故所以𠊎等一般起屋仔都會考慮著愛坐北向南。	loˋ guˋ nginˇ gongˋ ：「 coˊ bedˋ hiong namˇ ， moˇ siid duˊ qinˊ hanˇ ； coˊ namˇ hiong bedˋ ， siinˇ xienˊ duˊ hed mˇ dedˋ （ con mˇ doˋ loiˇ kiebˋ ）」， gu soˋ iˊ ngaiˇ nenˊ idˋ banˊ hiˋ vugˋ eˋ duˊ voi kauˋ li doˋ oi coˊ bedˋ hiong namˇ 。	前人說：「坐北朝南，一生清閒不愁吃穿；坐南朝北，神仙都待不下去（賺的錢都不夠用）」，所以我們一般蓋房子都會考慮要坐北朝南。
lbk02_058	𠊎等既然有緣共下打拚，就愛坐船望船走，大家共心盡力。	ngaiˇ nenˊ gi ianˇ iuˊ ianˇ kiung ha daˋ bia ， qiu oi coˊ sonˇ mong sonˇ zeuˋ ， tai gaˊ kiung ximˊ qin lid 。	我們既然有緣一起共事，就要有同心同德、利害與共的信念，大家同心協力。
lbk02_059	你毋使恁哀哉，下到認為他人比你過輕鬆，坐儕毋知企儕苦，你就過認分兜仔好好仔做。	ngˇ mˇ siiˋ anˋ oiˊ zoiˇ ， ha do ngin viˇ taˊ nginˇ biˋ ngˇ go kiangˊ sungˊ ， coˊ saˇ mˇ diˊ kiˊ saˇ kuˋ ， ngˇ qiu go ngin fun deuˊ eˊ hoˋ hoˋ eˊ zo 。	你不用老是自以為可憐，總認為別人比你更輕鬆，坐著的人不知站著的人的辛苦，你就認分些好好的做。
lbk02_060	你仰恁閒一哪仔坐上坐下呢？	ngˇ ngiongˋ anˋ hanˇ idˋ naiˋ eˋ coˊ songˊ coˊ haˊ noˋ ？	你怎麼這麼悠閒到處串門子呢？
lbk02_061	你食吔忒閒吔麼？仰一哪仔曹搓人哪！	ngˇ siid eˇ tedˋ hanˇ eˇ meˇ ？ ngiongˋ idˋ naiˋ eˋ coˇ co nginˇ naˇ ！	你是吃飽太閒嗎？怎麼到處打擾人家呀！
lbk02_062	你就留下來同𠊎𢯭手賣麵，人講「草竇裡毋會餓死蛇」，硬仰仔都毋會分你餓著啦！	ngˇ qiu liuˇ haˊ loiˇ tungˇ ngaiˇ ten suˋ mai mien ， nginˇ gongˋ 「 coˋ deu liˊ mˇ voi ngo xiˋ saˇ 」， ang ngiongˋ eˊ duˊ mˇ voi bunˊ ngˇ ngo doˋ laˋ ！	你就留下來幫我賣麵，俗話說「草堆中的蛇不會餓死」，無論如何都不會讓你餓著啦！
lbk02_063	你蓋毋堪身分呢！敢去校長室碰桌仔，斷真係草蜢撩雞公—毋知死。	ngˇ goi mˇ kamˊ siinˊ fun neˊ ！ gamˋ hi gauˋ zongˋ siidˋ pongˊ zogˋ eˋ ， don ziinˊ he coˋ magˋ liauˇ gieˊ gungˊ — mˇ diˊ xiˋ 。	你很不知輕重喔！敢跑去校長室拍桌子，真的是蚱蜢逗公雞—不知死活。
lbk02_064	佢兩儕蓋逆，動啊著就撮撮𢱤𢱤愛相打樣仔。	iˇ liongˋ saˇ goi ngiag ， tungˊ a doˋ qiu codˋ codˋ sungˋ sungˋ oi xiongˊ daˋ iong eˊ 。	他倆很不合，動不動就推推擠擠，要打架的樣子。
lbk02_065	該隻猴仔好手好腳麼个都毋做，一哪仔撮來㘔。	ge zagˋ heuˇ eˋ hoˋ suˋ hoˋ giogˋ maˋ ge duˊ mˇ zo ， idˋ naiˋ eˋ codˋ loiˇ saiˊ 。	那個人好手好腳什麼都不做，到處騙吃騙喝。
lbk02_066	該人麼个都毋曉得，就撮手花蓋會。	ge nginˇ maˋ ge duˊ mˇ hiauˋ dedˋ ， qiu codˋ suˋ faˊ goi voi 。	那個人什麼都不會，就會耍手段騙人。
lbk02_067	佢逐賊仔毋著，就撮竹篙仔擋佢。	iˇ giugˋ ced eˋ mˇ doˋ ， qiu codˋ zugˋ goˊ eˋ dongˋ iˇ 。	他追不到小偷，就丟竹竿來擋他。
lbk02_068	頭擺个木匠師傅盡厲害，鑿空鬥榫，完全毋使用著番釘。	teuˇ baiˋ ge mugˋ xiong siiˊ fu qin li hoi ， cog kangˊ deu sunˋ ， vanˇ qionˇ mˇ siiˋ iung doˋ fanˊ dangˊ 。	以前的木匠真利害，鑿孔接榫，完全不需使用鐵釘。
lbk02_069	你愛著命吔麼？車仔駛啊恁遽。	ngˇ oi cog miang eˇ meˇ ？ caˊ eˋ siiˋ a anˋ giagˋ 。	你不想活了嗎？車子開得這麼快。
lbk02_070	騎車仔無定啊哩，就會撞著人。	kiˇ caˊ eˋ moˇ tin a leˊ ， qiu voi cong doˋ nginˇ 。	騎車不小心，就會撞到人。
lbk02_071	暗晡夜閒閒，大家就出來去亍街尞。	am buˊ ia hanˇ hanˇ ， tai gaˊ qiu cudˋ loiˇ hi cogˋ giaiˊ liau 。	晚上沒事，大家就去逛街吧。
lbk02_072	佢畢業吔無出去食頭路，就一哪仔亍上亍下。	iˇ bidˋ ngiab eˇ moˇ cudˋ hi siid teuˇ lu ， qiu idˋ naiˋ eˋ cogˋ songˊ cogˋ haˊ 。	他畢業後不出去工作，到處遊蕩。
lbk02_073	這男仔人怕發酒顛吔，騎等腳踏車一哪仔撞上撞下。	iaˋ namˇ eˋ nginˇ pa bodˋ jiuˋ dienˊ eˇ ， kiˇ nenˋ giogˋ tab caˊ idˋ naiˋ eˋ cong songˊ cong haˊ 。	這男人恐怕喝醉了，騎著腳踏車到處亂撞。
lbk02_074	菜嘔嘔表示無萋頭，莫買過好。	coi euˋ euˋ beuˋ sii moˇ qiˊ teuˇ ， mog maiˊ go hoˋ 。	凋萎的菜表示不新鮮，不要買比較好。
lbk02_075	老古人講：「菜瓜仔吊啊大，細人仔橫啊大。」細人仔係有息把仔傷毋怕，莫忒惜。	loˋ guˋ nginˇ gongˋ ：「 coi guaˊ eˋ diau a tai ， se nginˇ eˋ vang a tai 。」 se nginˇ eˋ he iuˊ xidˋ baˋ eˊ songˊ mˇ pa ， mog tedˋ xiagˋ 。	古人說：「絲瓜是吊著長大的，小孩子則是跌跌撞撞長大的。」小孩若受一點小傷沒關係，不要太過保護。
lbk02_076	頭擺人講：「菜毒番瓜，魚毒鯉蝦，肉毒死豬嫲，人毒就係學老嫲」，你認為哪項最毒？	teuˇ baiˋ nginˇ gongˋ ：「 coi tug fanˊ guaˊ ， ngˇ tug liˊ haˇ ， ngiugˋ tug xiˋ zuˊ maˇ ， nginˇ tug qiu he ho loˋ maˇ 」， ngˇ ngin viˇ naiˋ hong zuiˋ tug ？	以前人說：「菜中最毒的是南瓜，魚類中最毒的鯉魚和蝦，肉類最毒的是死母豬肉，人類最毒的則是小老婆」，你認為哪種最毒呢？
lbk02_077	人做好事个時節，不時會聽著祝福主人家「財丁兩旺」个金言。	nginˇ zo hoˋ sii ge siiˇ jiedˋ ， budˋ siiˇ voi tangˊ doˋ zugˋ fugˋ zuˋ nginˇ gaˊ 「 coiˇ denˊ liongˋ vong 」 ge gimˊ ngianˇ 。	家有喜事時，常會聽到祝福主人「財丁兩旺」的金言。
lbk02_078	你毋好顧賺錢，身仔乜愛過注意兜仔，你無聽過「財多身弱」个話麼？	ngˇ mˇ hoˋ gu con qienˇ ， siinˊ eˋ me oi go zu i deuˊ eˊ ， ngˇ moˇ tangˊ go 「 coiˇ doˊ siinˊ ngiog 」 ge fa meˇ ？	你不要只顧著賺錢，身體也要稍為注意些，你沒聽過「財多身弱」的俗諺嗎？
lbk02_079	你等莫恁好事哪，人家毋想選，你等嗄在這唆弄，正式係「才仔無恁緪，瘍癧過緪」。	ngˇ denˊ mog anˋ hau sii naˊ ， nginˇ gaˊ mˇ xiongˋ xienˋ ， ngˇ denˊ sa teˊ iaˋ soˊ nung ， ziin siidˋ he 「 coiˇ eˋ moˇ anˋ henˇ ， iongˇ lag go henˇ 」。	你們不要這麼好事，人家不想出來選，你們卻猛在一旁敲邊鼓，真是「當事者無心，旁觀者有意」。
lbk02_080	佢毋曾讀小學就無爺哀吔，實在盡衰過。	iˇ mˇ qienˇ tug seuˋ hog qiu moˇ iaˇ oiˊ eˇ ， siid cai qin coiˇ go 。	他還沒讀小學就失去父母了，真可憐。
lbk02_081	人講「財去人安樂」，這擺雖然分朋友騙核毋會少个資金，但係人做得平安對國外歸來，也算盡好吔。	nginˇ gongˋ 「 coiˇ hi nginˇ onˊ log 」， iaˋ baiˋ suiˊ ianˇ bunˊ penˇ iuˊ pien hedˋ mˇ voi seuˋ ge ziiˊ gimˊ ， danˋ he nginˇ zo dedˋ pinˇ onˊ dui guedˋ ngoi guiˊ loiˇ ， iaˊ son qin hoˋ eˇ 。	俗話說「財去人安樂」，這次雖被朋友騙去不少資金，但人能平安歸國，已屬不錯了。
lbk02_082	錢係身外物，毋使看啊恁重，你無聽人講過「財散人聚」吓？愛有捨正會有得呢！	qienˇ he siinˊ ngoi vud ， mˇ siiˋ kon a anˋ cungˊ ， ngˇ moˇ tangˊ nginˇ gongˋ go 「 coiˇ san nginˇ qi 」 haˋ ？ oi iuˊ saˋ nang voi iuˊ dedˋ neˊ ！	錢是身外物，不必看得太重，你沒聽過「財散人聚」嗎？要有捨才能有得呢！
lbk02_083	雖然你等兩儕交情盡好，毋過大家還係愛財上分明，正行得久。	suiˊ ianˇ nenˊ liongˋ saˇ gauˊ qinˇ qin hoˋ ， mˇ go tai gaˊ hanˇ he oi coiˇ song funˊ minˇ ， nang hangˇ dedˋ giuˋ 。	雖然你們交情很好，但大家還是要帳上分明，友誼才走得長久。
lbk02_084	壞勢！老弟才疏學淺，頭到你講麼个，𠊎完全聽毋識。	faiˋ se ！ loˋ taiˊ coiˇ suˊ hog qienˋ ， teuˇ do ngˇ gongˋ maˋ ge ， ngaiˇ vanˇ qionˇ tangˊ mˇ siidˋ 。	抱歉！小弟才疏學淺，剛剛你講什麼，我完全聽不懂。
lbk02_085	做生理本成就賺賺了了，這擺淨蝕核一息本定定，毋使愁恁多。	zo senˊ liˊ bunˋ sangˇ qiu con con liauˋ liauˋ ， iaˋ baiˋ qiang sad hedˋ idˋ xidˋ bunˋ tin tin ， mˇ siiˋ seuˇ anˋ doˊ 。	做生意本來就有賺有賠，這次只損失一些本錢而已，不必太憂慮了。
lbk02_086	頭擺人講：「賺有錢莫緊買田，正有穀莫緊起屋。」就係話人做事情愛先愐好正來行動哪！	teuˇ baiˋ nginˇ gongˋ ：「 con iuˊ qienˇ mog ginˋ maiˊ tienˇ ， nang iuˊ gugˋ mog ginˋ hiˋ vugˋ 。」 qiu he va nginˇ zo sii qinˇ oi xienˊ menˋ hoˋ nang loiˇ hangˇ tung naˊ ！	古人說：「才剛開始賺錢不要急著買田，才剛收了稻穀別急著蓋房子。」就是勸人凡事謀定而後動。
lbk02_087	佢手罅蓋開，毋知「賺無省恁遽發」這个道理。	iˇ suˋ la goi koiˊ ， mˇ diˊ 「 con moˇ sangˋ anˋ giagˋ bodˋ 」 iaˋ ge to liˊ 。	他花費很大，不知「節儉比賺錢容易致富」的道理。
lbk02_088	頭擺老人家會講：「賺錢親像針挑竻，生理就像針削鐵」，意思係講生理壞做，錢壞賺。	teuˇ baiˋ loˋ nginˇ gaˊ voi gongˋ ：「 con qienˇ qinˊ qiong ziimˊ tiauˊ nedˋ ， senˊ liˊ qiu qiong ziimˊ xiogˋ tiedˋ 」， i sii he gongˋ senˊ liˊ faiˋ zo ， qienˇ faiˋ con 。	以前的人會說：「賺錢、做生意就像拿針挑刺、削鐵一樣困難」，意思是說生意不好做，錢難賺。
lbk02_089	這恁久賊仔蓋多，定著愛閂好門，正毋會分賊仔入來。	iaˋ anˋ giuˋ ced eˋ goi doˊ ， tin cog oi conˊ hoˋ munˇ ， nang mˇ voi bunˊ ced eˋ ngib loiˇ 。	最近很多小偷，一定要把門閂好，才不會讓小偷進來。
lbk02_090	愛同人打官司，狀仔就愛寫啊比人過惡，頭擺人講：「狀仔愛橫，官司正會贏」，蓋有道理。	oi tungˇ nginˇ daˋ gonˊ siiˊ ， cong eˋ qiu oi xiaˋ a biˋ nginˇ go ogˋ ， teuˇ baiˋ nginˇ gongˋ ：「 cong eˋ oi vangˇ ， gonˊ siiˊ nang voi iangˇ 」， goi iuˊ to liˊ 。	要與人打官司，訴狀就要寫得比人還狠，以前人說：「狀子要狠，官司才會贏」，很有道理。
lbk02_091	百番生理百番難，人講：「狀元子好畜，生理子難降。」正式有道理。	bagˋ fanˊ senˊ liˊ bagˋ fanˊ nanˇ ， nginˇ gongˋ ：「 cong ngianˇ ziiˋ hoˋ hiugˋ ， senˊ liˊ ziiˋ nanˇ giung 。」 ziin siidˋ iuˊ to liˊ 。	各種生意都很難做，俗話說：「狀元兒子好栽培，要生個成功的生意人那可就難了。」真的有道理。
lbk02_092	細人仔愛渡好，毋好畀撞上撞下。	se nginˇ eˋ oi tu hoˋ ， mˇ hoˋ biˋ cong songˊ cong haˊ 。	小孩子要照顧好，不要讓他到處亂走。
lbk02_093	去看鬧熱，愛牽好細人仔，無斯會撞走。	hi kon nau ngiad ， oi kianˊ hoˋ se nginˇ eˋ ， moˇ siiˇ voi cong zeuˋ 。	去看熱鬧，小孩子要牽好，不然會走失。
lbk02_094	同人來去愛分明，毋好長長短短。	tungˇ nginˇ loiˇ hi oi funˊ minˇ ， mˇ hoˋ congˇ congˇ donˋ donˋ 。	跟人生意往來，財務要清楚，不宜帳目不清。
lbk02_095	切芹菜來炒，愛切長長仔過好，忒短蓋壞炒。	qiedˋ kiunˇ coi loiˇ cauˋ ， oi qiedˋ congˇ congˇ eˊ go hoˋ ， tedˋ donˋ goi faiˋ cauˋ 。	炒芹菜，要切長長的比較好，太短很難炒。
lbk02_096	頭擺人開埤作圳無簡單，愛長長久久仔艱耐過日仔。	teuˇ baiˋ nginˇ koiˊ biˊ zogˋ zun moˇ gianˋ danˊ ， oi congˇ congˇ giuˋ giuˋ eˊ gianˊ ngai go ngidˋ eˋ 。	以前的人開墾水路非常不簡單，要長時間過艱苦的日子。
lbk02_097	厥耳公蓋長，有長命富貴个樣式。	iaˊ ngiˋ gungˊ goi congˇ ， iuˊ congˇ miang fu gui ge iong siidˋ 。	他的耳垂很長，有長命富貴的樣子。
lbk02_098	頭那毛恁長吔還毋剃，生到長纜纜著，會驚死人!	teuˇ naˇ moˊ anˋ congˇ eˇ hanˇ mˇ ti ， sangˊ do congˇ namˇ namˇ doˋ ， voi giangˊ xiˋ nginˇ !	頭髮長了還不去剪，這麼長又不整理，會嚇死人！
lbk02_099	佢長年透天都蓋懶尸，愛討一個姐仔怕難喔!	iˇ congˇ ngianˇ teu tienˊ duˊ goi nanˊ siiˊ ， oi toˋ idˋ ge jiaˋ eˋ pa nanˇ oˊ ！	他長久以來都非常的懶惰，恐怕很難娶到老婆。
lbk02_100	古老言語講「長病無孝子」，自家身仔愛顧好。	guˋ loˋ ngianˇ ngiˊ gongˋ 「 congˇ piang moˇ hau ziiˋ 」， qid gaˊ siinˊ eˋ oi gu hoˋ 。	古人說「久病無孝子」，自己的身體要照顧好！
lbk02_101	冬天頭到吔，長衫短襖愛準備好。	dungˊ tienˊ teuˇ do eˇ ， congˇ samˊ donˋ oˋ oi zunˋ pi hoˋ 。	冬天到了，長衫和短棉襖要準備好。
lbk02_102	這個細人仔無規矩，長聲扭敨亂喊，吵死人!	iaˋ ge se nginˇ eˋ moˇ guiˊ giˋ ， congˇ sangˊ neuˋ teuˋ non hemˊ ， cauˇ xiˋ nginˇ !	這個小孩沒規矩，大喊大叫，吵死人。
lbk02_103	老人家愛有老本，人講：「床頭有籮糠，死吔有人扛」，蓋有道理。	loˋ nginˇ gaˊ oi iuˊ loˋ bunˋ ， nginˇ gongˋ ：「 congˇ teuˇ iuˊ loˇ hongˊ ， xiˋ eˇ iuˊ nginˇ gongˊ 」， goi iuˊ to liˊ 。	老人家要有老本，有人說：「床頭有積蓄，後事有人會辦理」，很有道理。
lbk02_104	天后宮對吾公創辦到今，已經經過幾下個主持人，到今無麼个發展，人講「創廟容易守廟難」，管理宮廟真實無恁簡單。	tienˊ heu giungˊ dui ngaˊ gungˊ congˋ pan do ginˊ ， iˋ ginˊ ginˊ go giˋ haˊ ge zuˋ ciiˇ nginˇ ， do ginˊ moˇ maˋ ge fadˋ zanˋ ， nginˇ gongˋ 「 congˋ meu iungˇ i suˋ meu nanˇ 」， gonˋ liˊ giungˊ meu ziinˊ siid moˇ anˋ gianˋ danˊ 。	天后宮從我爺爺創辦至今，已經經過好幾位主持人，到現在沒有什麼發展，常言道「創廟容易守廟難」，管理宮廟確實不簡單。
lbk02_105	煎魚仔毋好忒大火，係無會臭火𤊶。	jienˊ ngˇ eˋ mˇ hoˋ tedˋ tai foˋ ， he moˇ voi cu foˋ ladˋ 。	煎魚時火不要太大，不然會燒焦。
lbk02_106	細妹仔吂成人，就媱汀汀著想嫁老公，會分人罵「臭雞腥」。	se moi eˋ mangˇ siinˇ nginˇ ， qiu hieuˇ din din doˋ xiongˋ ga loˋ gungˊ ， voi bunˊ nginˇ ma 「 cu gieˊ xiangˊ 」。	女孩子尚未成年就想要嫁人，會被人罵「臭雞腥」。
lbk02_107	老古人講：「臭魚爛蝦，害命冤家。」這兜毋萋頭个海產俗罔俗，食吔毋堵好斯會入院个呢！	loˋ guˋ nginˇ gongˋ ：「 cu ngˇ nan haˇ ， hoi miang ianˊ gaˊ 。」 iaˋ deuˊ mˇ qiˊ teuˇ ge hoiˋ sanˋ xiog mongˋ xiog ， siid eˇ mˇ duˋ hoˋ siiˇ voi ngib ian ge neˊ ！	老祖先說過：「臭魚爛蝦，害命冤家。」這些不新鮮的海產雖然便宜，吃了以後可能會生病住院喲！
lbk02_108	阿姆哀！榴槤臭蓬蓬著，你仰會敢食呢？	aˊ meˊ oiˊ ！ liuˇ lienˇ cu pangˇ pangˇ doˋ ， ngˇ ngiongˋ voi gamˋ siid noˋ ？	我的媽呀！榴槤這麼臭，你怎麼敢吃呢？
lbk02_109	豆菜無炒好，就會有臭淨味。	teu coi moˇ cauˋ hoˋ ， qiu voi iuˊ cu qiang mi 。	豆芽菜沒炒好，就會有特殊的青草味。
lbk02_110	連落幾日个雨過後，菜係無隨挷，就會臭水隔。	lienˇ log giˋ ngidˋ ge iˋ go heu ， coi he moˇ suiˇ bangˊ ， qiu voi cu suiˋ gagˋ 。	連續下了幾天的大雨，菜如果沒有馬上採收，就會產生異味。
lbk02_111	佢退休過後就搬去山下歇吔，每日粗茶淡飯過日仔。	iˇ tui hiuˊ go heu qiu banˊ hi sanˊ haˊ hed leˇ ， miˊ ngidˋ cuˊ caˇ tamˊ fan go ngidˋ eˋ 。	他退休之後就搬到山下住了，生活過得很簡單。
lbk02_112	佢兩儕相打蓋粗殘，打啊頭破耳滑。	iˇ liongˋ saˇ xiongˊ daˋ goi cuˊ canˇ ， daˋ a teuˇ po ngiˋ vad 。	他們兩個打架打得很凶狠，打到頭破血流。
lbk02_113	你做事蓋粗糙呢！買啊著个鑊鏟，兩禮拜柄就斷核吔。	ngˇ zo sii goi cuˊ co neˊ ！ maiˊ a doˋ ge vog canˋ ， liongˋ liˊ bai biang qiu tonˊ hedˋ leˇ 。	你做事很粗魯呢！剛買的鍋鏟，兩個星期柄就斷了。
lbk02_114	該細妹仔蓋投，見喚佢做麼个就抽抽扯扯，蓋毋甘願。	ge se moi eˋ goi dauˇ ， gian vonˋ iˇ zo maˋ ge qiu cuˊ cuˊ cadˋ cadˋ ， goi mˇ gamˊ ngian 。	那女孩子脾氣不好，每次要他做什麼就耍脾氣，很不甘願。
lbk02_115	若壁粉啊粗粗糙糙無半息平，看得吓？	ngiaˊ biagˋ funˋ a cuˊ cuˊ co co moˇ ban xidˋ piangˇ ， kon dedˋ haˋ ？	你的牆壁粉刷的這麼粗糙，一點都不平，能看嗎？
lbk02_116	「粗貨半年糧」係講：頭擺人生活清苦，飯裡背不時都愛攞番薯籤同雜糧。	「 cuˊ fo ban ngianˇ liongˇ 」 he gongˋ ： teuˇ baiˋ nginˇ senˊ fad qinˊ kuˋ ， fan diˊ boi budˋ siiˇ duˊ oi loˊ fanˊ suˇ qiamˊ tungˇ cab liongˇ 。	「粗貨半年糧」是說：以前的人生活困苦，飯裡面經常會加些地瓜籤和雜糧。
lbk02_117	這兜粗傢硬伙用毋得吔，就丟淨來，毋好塞啊一哪仔狼狼賴賴。	iaˋ deuˊ cuˊ gaˊ ngang foˋ iung mˇ dedˋ leˇ ， qiu tiuˋ qiang loiˇ ， mˇ hoˋ sedˋ a idˋ lai eˋ nongˇ nongˇ lai lai 。	這些不好的東西已經不能用了，就拿去丟掉，不要塞得到處凌亂不堪。
lbk02_118	佢做事一等抽驚，絕對毋會濫糝來。	iˇ zo sii idˋ denˋ cuˊ giangˊ ， qied dui mˇ voi namˋ samˋ loiˇ 。	他做事非常謹慎，絕對不會亂來。
lbk02_119	佢平常時無運動、無保養，故所以這下身仔蓋會抽筋縮脈，多病痛。	iˇ pinˇ songˇ siiˇ moˇ iun tung 、 moˇ boˋ iongˊ ， gu soˋ iˊ iaˋ ha siinˊ eˋ goi voi cuˊ ginˊ sugˋ magˋ ， doˊ piang tung 。	佢平常不運動、不保養，所以現在常常全身酸痛、抽筋，病痛多。
lbk02_120	厥姆毋帶佢去食酒，佢就打潑賴緊噭眵，噭啊抽胲攝氣，看起來還冤枉。	iaˊ meˊ mˇ dai iˇ hi siid jiuˋ ， iˇ qiu daˋ padˋ lai ginˋ gieu ziiˊ ， gieu a cuˊ goiˊ ngiabˋ hi ， kon hiˋ loiˇ hanˇ ianˊ vongˋ 。	他媽媽不帶他去喝喜酒，他就耍脾氣哭鬧，哭得上氣不接下氣，看起來還真是可憐。
lbk02_121	你還毋歸去寫功課，等下斯會分若爸抽猴筋喔！	ngˇ hanˇ mˇ guiˊ hi xiaˋ gungˊ ko ， denˋ ha siiˊ voi bunˊ ngiaˊ baˊ cuˊ heuˇ ginˊ oˊ ！	你還不趕緊回家寫功課，等會兒會被你爸爸修理喲！
lbk02_122	該人講話動啊著就粗魯怪醒，蓋得人惱！	ge nginˇ gongˋ fa tungˊ a doˋ qiu cuˊ luˇ guai xiangˋ ， goi dedˋ nginˇ nauˊ ！	那個人說話動作粗魯，很惹人厭！
lbk02_123	阿姆無閒洎杈，日日做到兩頭烏，兩隻手都粗皮𤊶耐，看吔盡毋盼得。	aˊ meˊ moˇ hanˇ qi ca ngidˋ ngidˋ zo do liongˋ teuˇ vuˊ ， liongˋ zagˋ suˋ duˊ cuˊ piˇ ladˋ ngai ， kon eˇ qin mˇ pan dedˋ 。	媽媽忙得不可開交，每天天未亮就出去工作，太陽下山才回來，兩隻手皮膚都做得很粗糙，看得我很心疼。
lbk02_124	該人生著鼠頭蛇眼，蓋無人緣。	ge nginˇ sangˊ doˋ cuˋ teuˇ saˇ ngianˋ ， goi moˇ nginˇ ianˇ 。	那個人長得獐頭鼠目，很不得人緣。
lbk02_125	𠊎愛唱喏吔，嗄尋毋著捽來火點香。	ngaiˇ oi cong iaˊ eˇ ， sa qimˇ mˇ doˋ cud loiˇ foˋ diamˋ hiongˊ 。	我要拜拜了，卻找不到火柴點香。
lbk02_126	你將把該凳仔捽上捽下做麼个？	ngˇ jiongˊ baˋ ge den eˋ cud songˊ cud haˊ zo maˋ ge ？	你拼命擦那張椅子做什麼？
lbk02_127	無麼个事情毋好恁呢出出入入，係無蚊仔會飛入來。	moˇ maˋ ge sii qinˇ mˇ hoˋ anˋ neˊ cudˋ cudˋ ngib ngib ， he moˇ munˊ eˋ voi biˊ ngib loiˇ 。	沒事不要這樣進進出出，否則蚊子會飛進來。
lbk02_128	該男仔人蓋會逐身裝，事實係「出門有官樣，歸來無米放」个人。	ge namˇ eˋ nginˇ goi voi giugˋ siinˊ zongˊ ， sii siid he 「 cudˋ munˇ iuˊ gonˊ iong ， guiˊ loiˇ moˇ miˋ biong 」 ge nginˇ 。	那男人很注重裝扮，實際上是「出門一副官樣，家裡卻窮得沒有米可放米缸」虛有其表的人。
lbk02_129	人係衰，「出門看著狗溜胎，親朋好友面𢳆開」，蓋現實啦！	nginˇ he soiˊ ，「 cudˋ munˇ kon doˋ gieuˋ liu toiˊ ， qinˊ penˇ hoˋ iuˊ mien ngau koiˊ 」， goi hian siid laˋ ！	人若走霉運，「出門看到母狗流產，親朋好友見到你臉都會閃一邊去」，這是很現實的事！
lbk02_130	你恁大人吔，愛曉得「出門看天時，入門看人事」，今哪正毋會食虧。	ngˇ anˋ tai nginˇ eˇ ， oi hiauˋ dedˋ 「 cudˋ munˇ kon tienˊ siiˇ ， ngib munˇ kon nginˇ sii 」， ginˊ na nang mˇ voi siid kuiˊ 。	你都長這麼大了，應該知道「出門看天候，進門看人事」的道理，往後才不會吃虧。
lbk02_131	你毋趕後生時節盡拚，到時就會像頭擺人講个「出門毋彎腰，入門無樵燒」喔！	ngˇ mˇ gonˋ heu sangˊ siiˇ jiedˋ qin bia ， do siiˇ qiu voi qiong teuˇ baiˋ nginˇ gongˋ ge 「 cudˋ munˇ mˇ vanˊ ieuˊ ， ngib munˇ moˇ ceuˇ seuˊ 」 oˊ ！	你不趁年輕時趕緊努力，以後就會出現前人所說「出門不彎腰，進門無柴燒」的窘境呢！
lbk02_132	你去哪仔搣啊一身泥？門口先搐淨來正入屋。	ngˇ hi lai eˋ miedˋ a idˋ siinˊ naiˇ ？ munˇ heuˋ xienˊ cug qiang loiˇ nang ngib vugˋ 。	你在哪兒弄得滿身泥？先在門口抖乾淨再進來。
lbk02_133	該人講話盡毒，見擺聽佢講話都會促死人。	ge nginˇ gongˋ fa qin tug ， gian baiˋ tangˊ iˇ gongˋ fa duˊ voi cugˋ xiˋ nginˇ 。	那人說話很毒，每次聽他說話都會被氣死。
lbk02_134	阿明牯想愛摘牛眼仔，人又無恁高，將就墜樹桍過遽。	aˊ minˇ guˋ xiongˋ oi zagˋ ngiuˇ ngianˋ eˋ ， nginˇ iu moˇ anˋ goˊ ， jiongˊ qiu cui su paˋ go giagˋ 。	阿明想摘龍眼，人卻不夠高，乾脆把樹枝垂下來比較快。
lbk02_135	厥事情喚你毋好搭，你就死命牯去鑽，𠊎看斯搥背食屁就有哪。	iaˊ sii qinˇ vonˋ ngˇ mˇ hoˋ dabˋ ， ngˇ qiu xiˋ miang guˋ hi zon ， ngaiˇ kon siiˇ cuiˇ boi siid pi qiu iuˊ naˊ 。	叫你不要去理他的事，你卻死命去鑽，我看只會吃力不討好呢！
lbk02_136	選舉个事情你無內行，莫緊想愛𢯭手，係無搥背食屁卵就有。	xienˋ giˋ ge sii qinˇ ngˇ moˇ nui hongˇ ， mog ginˋ xiongˋ oi ten suˋ ， he moˇ cuiˇ boi siid pi nonˋ qiu iuˊ 。	選舉的事情你不懂，別老是想幫忙，否則會吃力不討好。
lbk02_137	該後生仔毋知做毋著麼个事，分厥爸逐等仔搥搥打打。	ge heu sangˊ eˋ mˇ diˊ zo mˇ cog maˋ ge sii ， bunˊ iaˊ baˊ giugˋ nenˋ eˊ cuiˇ cuiˇ daˋ daˋ 。	那年輕人不知犯了什麼錯，被他父親追著猛打。
lbk02_138	該猴哥無才調，搥膦毋腫，莫插佢。	ge heuˇ goˊ moˇ coiˇ tiau ， cuiˇ linˋ mˇ zungˋ ， mog cabˋ iˇ 。	那傢伙沒本事，搞不出什麼名堂，不用理他。
lbk02_139	這細倈仔頭到橫著，敋著膝頭，厥姆一下在該同佢寸烏青。	iaˋ se lai eˋ teuˇ do vang doˋ ， gog doˋ qidˋ teuˇ ， iaˊ meˊ idˋ ha teˊ geˋ tungˇ iˇ cun vuˊ qiangˊ 。	這小男孩剛才跌倒，撞到膝蓋，他媽媽正在幫他推淤血。
lbk02_140	人讓你一息，你就寸租尺用，會忒翕人無？	nginˇ ngiong ngˇ idˋ xidˋ ， ngˇ qiu cun zuˊ cagˋ iung ， voi tedˋ hibˋ nginˇ moˇ ？	別人讓你一點，你就得寸進尺，會不會太欺負人了？
lbk02_141	佢歸日仔做生理、掌店，完全無休息，一下食飽飯就在該伸腰打哈吔喲！	iˇ guiˊ ngidˋ eˋ zo senˊ liˊ 、 zongˋ diam ， vanˇ qionˇ moˇ hiuˊ xidˋ ， idˋ ha siid bauˋ fan qiu teˊ geˋ cunˊ ieuˊ daˋ haiˋ eˇ ioˊ ！	他整天在做生意、顧店，完全沒時間休息，現在吃飽飯就在伸懶腰、打呵欠了呢！
lbk02_142	蔥蒜韭藠，這幾種食材係食齋人食毋得个。	cungˊ son giuˋ kieuˊ ， iaˋ giˋ zungˋ siid coiˇ he siid zaiˊ nginˇ siid mˇ dedˋ ge 。	蔥、蒜、韭、蕎，這幾種食材是素食者不能吃的。
lbk02_143	這兜蓮霧重重輕輕，係愛價數好，最好同佢擇好分級來賣。	iaˋ deuˊ lienˊ fuˇ cungˊ cungˊ kiangˊ kiangˊ ， he oi ga sii hoˋ ， zuiˋ hoˋ tungˇ iˇ tog hoˋ funˊ gibˋ loiˇ mai 。	這些蓮霧輕重不一，若想價格好，最好將它挑選、分級來賣。
lbk02_144	做麼个事都愛先準備好勢，毋好匆匆忙忙，正毋會出差錯。	zo maˋ ge sii duˊ oi xienˊ zunˋ pi hoˋ se ， mˇ hoˋ cungˊ cungˊ mongˇ mongˇ ， nang mˇ voi cudˋ caˊ co 。	做任何事都要事先準備好，不可太過匆忙，才不會出錯。
lbk02_145	你擐个麼个呢？看去重鈂鈂著。	ngˇ kuan ge maˋ ge noˋ ？ kon hi cungˊ demˇ demˇ doˋ 。	你提的是什麼？看起來還滿重的。
lbk02_146	聽講這婦人家命中沖天剋地，毋知算命仙愛仰仔去同佢化解？	tangˊ gongˋ iaˋ fu nginˇ gaˊ miang zungˊ cungˊ tienˊ kedˋ ti ， mˇ diˊ son miang xienˊ oi ngiongˋ eˊ hi tungˇ iˇ fa giaiˋ ？	聽說這婦人命帶沖剋煞氣，不知命相師該怎麼去化解呢？
lbk02_147	佢等兄弟本成蓋好个，這下為著錢財打詏翹吔。	ienˊ hiungˊ ti bunˋ sangˇ goi hoˋ ge ， iaˋ ha vi doˋ qienˇ coiˇ daˋ au kieu eˇ 。	他們兄弟本來很要好，現在為了金錢翻臉了。
lbk02_148	𠊎搬毋動个東西，打幫你𢯭手，無斯𠊎一個人無才情。	ngaiˇ banˊ mˇ tungˊ ge dungˊ xiˊ ， daˋ bongˊ ngˇ ten suˋ ， moˇ siiˇ ngaiˇ idˋ ge nginˇ moˇ coiˇ qinˇ 。	這東西我搬不動，還好有你幫忙，不然我一個人沒辦法。
lbk02_149	耕田種菜愛煞猛打糞淋肥，正有好食。	gangˊ tienˇ zung coi oi sadˋ mangˊ daˋ bun limˇ piˇ ， nang iuˊ hoˋ siid 。	耕田種菜要勤奮耕耘、施肥，才會有收成。
lbk02_150	𠊎講恁多遍，你都毋聽，𠊎會打分你無耳公拍蚊仔喲！	ngaiˇ gongˋ anˋ doˊ bien ， ngˇ duˊ mˇ tangˊ ， ngaiˇ voi daˋ bunˊ ngˇ moˇ ngiˋ gungˊ pad munˊ eˋ ioˊ ！	我說了這多遍你都不聽，我會重重的處罰你喲！
lbk02_151	兄弟分家成鄰舍，定著愛打廚肇灶个。	hiungˊ ti bunˊ gaˊ siinˇ linˇ sa ， tin cog oi daˋ cuˇ seu zo ge 。	兄弟分家成為鄰居，一定要新建廚房的啦！
lbk02_152	佢頭擺蓋會打獵，一有好貨色，就會喊大家來打鬥敘。	iˇ teuˇ baiˋ goi voi daˋ liab ， idˋ iuˊ hoˋ fo sedˋ ， qiu voi hemˊ tai gaˊ loiˇ daˋ deu xi 。	他以前很會打獵，一有好吃的東西，就會叫大家一起來打牙祭。
lbk02_153	酸楊桃吂曾好食，一食就會酸啊打丟。	sonˊ iongˇ toˇ mangˇ qienˇ hoˋ siid ， idˋ siid qiu voi sonˊ a daˋ diu 。	酸楊桃還沒成熟，一吃就會酸得皺緊眉頭。
lbk02_154	師傅狗打獵，蓋會打倒弓。	siiˊ fu gieuˋ daˋ liab ， goi voi daˋ do giungˊ 。	經驗老道的獵狗，很知道在關鍵時刻要閃躲。
lbk02_155	竹凳仔愛放畀正，無斯一坐會打倒𢫦。	zugˋ den eˋ oi biong biˋ zang ， moˇ siiˇ idˋ coˊ voi daˋ do mag 。	椅子要放好，不然一坐就會摔倒。
lbk02_156	頭擺做撮把戲个人，定著蓋會唱山歌同打翻車。	teuˇ baiˋ zo codˋ baˋ hi ge nginˇ ， tin cog goi voi cong sanˊ goˊ tungˇ daˋ fanˊ caˊ 。	以前表演野台戲的人，一定很會唱山歌和側翻。
lbk02_157	老古言語就有講：「打虎愛親兄弟，相戰愛父子兵」，故所兄弟同子爺愛慈和。	loˋ guˋ ngianˇ ngiˊ qiu iuˊ gongˋ ：「 daˋ fuˋ oi qinˊ hiungˊ ti ， xiongˊ zan oi fu ziiˋ binˊ 」， gu soˋ hiungˊ ti tungˇ ziiˋ iaˇ oi ciiˇ foˇ 。	古人說：「打虎要親兄弟，相戰要父子兵」，所以兄弟和父子彼此要相親相愛。
lbk02_158	佢等兩儕本成蓋好个，這下嗄為著細事情打合挖吔。	ienˊ liongˋ saˇ bunˋ sangˇ goi hoˋ ge ， iaˋ ha sa vi doˋ se sii qinˇ daˋ gabˋ iadˋ eˇ 。	他們兩人本來很要好，現在卻為了小事反目成仇。
lbk02_159	為著愛畜大細，𠊎就打合耐去同人做苦工。	vi doˋ oi hiugˋ tai se ， ngaiˇ qiu daˋ gabˋ ngai hi tungˇ nginˇ zo kuˋ gungˊ 。	為了要養家活口，我就忍耐去幫人做苦工。
lbk02_160	他人賭博，做毋得坐啊脣口打更。	taˊ nginˇ duˋ bogˋ ， zo mˇ dedˋ coˊ a siinˇ hieuˋ daˋ gangˊ 。	別人賭博，不可以坐在他旁邊打瞌睡。
lbk02_161	這隻狗仔毋係厥，佢無理由打這隻狗仔，打吔會分人講「打狗欺主」。	iaˋ zagˋ gieuˋ eˋ mˇ he iaˊ ， iˇ moˇ liˊ iuˇ daˋ iaˋ zagˋ gieuˋ eˋ ， daˋ eˇ voi bunˊ nginˇ gongˋ 「 daˋ gieuˋ kiˊ zuˋ 」。	這隻狗不是他的，他沒有理由打這隻狗，打了會被人家說「打狗欺主」。
lbk02_162	人講：「打金仔愛攞銅，無攞，食吔會屙膿」，生理人个話聽毋得一多！	nginˇ gongˋ ：「 daˋ gimˊ eˋ oi loˊ tungˇ ， moˇ loˊ ， siid eˇ voi oˊ nungˇ 」， senˊ liˊ nginˇ ge fa tangˊ mˇ dedˋ idˋ doˊ ！	人說：「製作金飾一定要摻銅，如果說沒摻的話，那一定是騙人的」，生意人的話不可盡信。
lbk02_163	「打金攞銅」就係打金仔多少都愛攞銅。	「 daˋ gimˊ loˊ tungˇ 」 qiu he daˋ gimˊ eˋ doˊ seuˋ duˊ oi loˊ tungˇ 。	「打金摻銅」是指製作金飾多多少少都要摻銅。
lbk02_164	酒食忒多，行路會打腳偏。	jiuˋ siid tedˋ doˊ ， hangˇ lu voi daˋ giogˋ pienˊ 。	酒喝太多，走路會東倒西歪。
lbk02_165	佢一生人好食懶做，走毋得會打晃槓。	iˇ idˋ senˊ nginˇ hau siid nanˊ zo ， zeuˋ mˇ dedˋ voi daˋ gongˇ gong 。	他一生好吃懶做，最後必將打光棍過一生。
lbk02_166	這個人「打鼓買田暗葬地」，盡會算。	iaˋ ge nginˇ 「 daˋ guˋ maiˊ tienˇ am zong ti 」， qin voi son 。	這個人喜事會跟人分享，喪事則低調處理，很會精打細算。
lbk02_167	年下時節愛摘加了蜜，需要蓋多人手，細人仔帶揫來去打鼓𢯭拜乜好。	ngianˇ haˊ siiˇ jiedˋ oi zagˋ gaˊ laˊ med ， xiˊ ieu goi doˊ nginˇ suˋ ， se nginˇ eˋ dai qiuˊ loiˇ hi daˋ guˋ ten bai me hoˋ 。	年底的時候要採番茄，需要很多人力，小孩子通通帶去一起幫忙也不錯。
lbk02_168	春天到吔，農家人開始無閒打秧蒔禾个事頭。	cunˊ tienˊ do eˇ ， nungˇ gaˊ nginˇ koiˊ siiˋ moˇ hanˇ daˋ iongˊ sii voˇ ge se teuˇ 。	春天到了，農家開始忙著育秧苗、插秧的工作。
lbk02_169	這兜索仔打勼股吔，解又毋得開。	iaˋ deuˊ sogˋ eˋ daˋ jiu guˋ eˇ ， kieˋ iu mˇ dedˋ koiˊ 。	這些繩索攪在一起了，解都解不開。
lbk02_170	頭擺人會講：「打拳唱曲，無面無目。」這下時代無共樣吔，做影星係蓋多後生仔个夢想喔！	teuˇ baiˋ nginˇ voi gongˋ ：「 daˋ kianˇ cong kiugˋ ， moˇ mien moˇ mugˋ 。」 iaˋ ha siiˇ toi moˇ kiung iong eˇ ， zo iangˋ senˊ he goi doˊ heu sangˊ eˋ ge mung xiongˋ oˊ ！	從前人會說：「打拳賣唱很沒面子。」現在時代不同了，當藝人是很多年輕人的夢想喔！
lbk02_171	啉酒醉个人行路會打踜蹭。	limˊ jiuˋ zui ge nginˇ hangˇ lu voi daˋ linˇ qinˊ 。	喝酒醉的人走起路來會腳步踉蹌。
lbk02_172	厥伯个倈仔毋做人，伙房裡大家都緊搖頭講厥倈仔係「打毋成个吊菜仔」。	iaˊ bagˋ ge lai eˋ mˇ zo nginˇ ， foˋ fongˇ liˊ tai gaˊ duˊ ginˋ ieuˇ teuˇ gongˋ iaˊ lai eˋ he 「 daˋ mˇ sangˇ ge diau coi eˋ 」。	他伯父的兒子不學好，伙房裡的親戚們都嘆息說他兒子真的是「反種」。
lbk02_173	該人斷真係打毋死煠毋爛，對樹頂項橫下來恁多擺都無事。	ge nginˇ don ziinˊ he daˋ mˇ xiˋ sab mˇ nan ， dui su dangˋ hong vang haˊ loiˇ anˋ doˊ baiˋ duˊ moˇ sii 。	那個人真是命大，從樹上摔下來好幾次都沒事。
lbk02_174	㓾波羅蜜會打衊搵人，𠊎蓋畏。	ciiˇ boˊ loˇ med voi daˋ me vun nginˇ ， ngaiˇ goi vi 。	削波羅蜜會弄得到處都是汁液，我很不喜歡。
lbk02_175	阿伯講愛煮好料請𠊎等食，吂知啊係一盤炒麵大家食，恁呢仰會罅擺，斷真係打衊嘴。	aˊ bagˋ gongˋ oi zuˋ hoˋ liau qiangˋ ngaiˇ nenˊ siid ， mangˇ diˊ a he idˋ panˇ cauˋ mien tai gaˊ siid ， anˋ neˊ ngiongˋ voi la baiˋ ， don ziinˊ he daˋ me zoi 。	伯父說要煮好吃的請我們吃，誰知竟然是一盤炒麵要大家分著吃，這樣怎麼夠吃，真的是吊人胃口。
lbk02_176	厥爸在六龜打林種薑，一隻月正歸來一擺。	iaˊ baˊ teˊ liugˋ guiˊ daˋ naˇ zung giongˊ ， idˋ zagˋ ngiad nang guiˊ loiˇ idˋ baiˋ 。	他爸爸在六龜開墾山林、種薑，一個月才回來一次。
lbk02_177	頭擺，打林種薑係一等清苦个事頭，故所有人會講：「打林種薑，利子難當；秧死薑歿，褲爛膦出。」	teuˇ baiˋ ， daˋ naˇ zung giongˊ he idˋ denˋ qinˊ kuˋ ge se teuˇ ， gu soˋ iuˊ nginˇ voi gongˋ ：「 daˋ naˇ zung giongˊ ， li ziiˋ nanˇ dongˊ ； iongˊ xiˋ giongˊ mudˋ ， fu nan linˋ cudˋ 。」	從前，農民耕山種薑是非常辛苦的農務，風險也很大，所以有人會說：「開山墾林、種薑不僅辛苦，風險也很大，遇到收成不好連利息都拿不出來，甚至三餐不繼。」。
lbk02_178	頭擺，吾太講：「打魚毋當放狗打獵，無兩隻也有一掠。」故所以𠊎等正會歇啊山腳下來。	teuˇ baiˋ ， ngaˊ tai gongˋ ：「 daˋ ngˇ mˇ dong biong gieuˋ daˋ liab ， moˇ liongˋ zagˋ iaˊ iuˊ idˋ liag 。」 gu soˋ iˊ ngaiˇ nenˊ nang voi hed a sanˊ giogˋ haˊ loiˇ 。	從前，我曾祖父說：「打魚不如打獵收穫穩當。」所以我們才會住在山腳下。
lbk02_179	吾嬤講：「打魚毋當上山打獵，無兩碗也有一碟。」佢認為在海項賺食無恁簡單，故所以，正會嫁分兼山个吾公。	ngaˊ ma gongˋ ：「 daˋ ngˇ mˇ dong songˊ sanˊ daˋ liab ， moˇ liongˋ vonˋ iaˊ iuˊ idˋ tiab 。」 iˇ ngin viˇ teˊ hoiˋ hong con siid moˇ anˋ gianˋ danˊ ， gu soˋ iˊ ， nang voi ga bunˊ giamˊ sanˊ ge ngaˊ gungˊ 。	我奶奶說：「打魚不如打獵收穫穩當。」她認為靠海維生不容易，所以，才會嫁給靠山邊的爺爺。
lbk02_180	你做麼个緊對佢打眼拐？	ngˇ zo maˋ ge ginˋ dui iˇ daˋ ngianˋ guaiˋ ？	你為何一直對她拋媚眼？
lbk02_181	舂粢做粄又毋係隨做隨好，哪有可能打卵見黃？	zungˊ qiˇ zo banˋ iu mˇ he suiˇ zo suiˇ hoˋ ， naiˋ iuˊ koˋ nenˇ daˋ nonˋ gian vongˇ ？	做米食又不是馬上做馬上好，哪有可能立竿見影。
lbk02_182	這個細人仔一等會打潑賴，實在難耐。	iaˋ ge se nginˇ eˋ idˋ denˋ voi daˋ padˋ lai ， siid cai nanˇ ngai 。	這孩子很會耍性子，實在難纏。
lbk02_183	你等頭家講，今年个業績係衝得到百分之一百，就有半年个年終獎金，𠊎看該斯怕「打屁安狗心」个。	nenˊ teuˇ gaˊ gongˋ ， ginˊ ngianˇ ge ngiab jidˋ he cungˊ dedˋ do bagˋ fun ziiˊ idˋ bagˋ ， qiu iuˊ ban ngianˇ ge ngianˇ zungˊ jiongˋ gimˊ ， ngaiˇ kon ge siiˇ pa 「 daˋ pi onˊ gieuˋ ximˊ 」 ge 。	你們老闆說，今年的業績如果可以上衝百分百，就會有半年的年終獎金，我看恐怕是口惠不實的。
lbk02_184	佢一等老實，打肥㧡糞都毋敢偷食吔，仰有可能會偷斤兩？	iˇ idˋ denˋ loˋ siid ， daˋ piˇ kaiˊ bun duˊ mˇ gamˋ teuˊ siid eˇ ， ngiongˋ iuˊ koˋ nenˇ voi teuˊ ginˊ liongˊ ？	他非常老實，連挑糞肥都不敢暗中減量了，怎麼可能會偷斤減兩？
lbk02_185	人講「打蛇打七寸」，有打著位跡就會過省力。	nginˇ gongˋ ：「 daˋ saˇ daˋ qidˋ cun 」， iuˊ daˋ cog vi jiagˋ qiu voi go sangˋ lid 。	俗話說：「打蛇要打在七吋部位」，有打對部位就會比較省力。
lbk02_186	你毋好下到緊想愛換頭路，打生不如打熟，位仔坐久吔自然就係若。	ngˇ mˇ hoˋ ha do ginˋ xiongˋ oi von teuˇ lu ， daˋ sangˊ budˋ iˇ daˋ sug ， vi eˋ coˊ giuˋ eˇ cii ianˇ qiu he ngiaˊ 。	你不要老想要換工作，不如盡力做好本行，位子坐久了自然就會是你的。
lbk02_187	佢見堵著人就同人打笑面，正式毋知人惱惜。	iˇ gian duˇ doˋ nginˇ qiu tungˇ nginˇ daˋ seu mien ， ziin siidˋ mˇ diˊ nginˇ nauˊ xiagˋ 。	他每次看到人都皮笑肉不笑，真惹人厭。
lbk02_188	唉喲！還恁好个衫褲就拿來同佢丟核，忒打爽吔！	aiˊ ioˋ ！ hanˇ anˋ hoˋ ge samˊ fu qiu naˊ loiˇ tungˇ iˇ tiuˋ hedˋ ， tedˋ daˋ songˋ eˇ ！	啊！還這麼好的衣服便不要穿了，太浪費了！
lbk02_189	𠊎想愛去尋佢尞，佢嗄出來買飼料，兩儕打宕窿吔。	ngaiˇ xiongˋ oi hi qimˇ iˇ liau ， iˇ sa cudˋ loiˇ maiˊ ciiˇ liau ， liongˋ saˇ daˋ tong nungˇ eˇ 。	我想去找他聊天，他卻剛好出來買飼料，兩人迎面錯過了。
lbk02_190	這屻崗盡竳，無法度直接上，愛打橫排上去正跋得到山頂。	iaˋ in gongˊ qin denˇ ， moˇ fabˋ tu ciid jiabˋ songˊ ， oi daˋ vangˇ paiˇ songˊ hi nang bagˋ dedˋ do sanˊ dangˋ 。	這座山很陡峭，無法直接爬上去，要走斜坡小徑才能到達山頂。
lbk02_191	阿英嫲在該頓屈，打碗打筷，毋知譴麼个？	aˊ inˊ maˇ teˊ geˋ dun kud ， daˋ vonˋ daˋ kuai ， mˇ diˊ kienˋ maˋ ge ？	阿英在那裡耍脾氣，敲碗打筷，不知生什麼氣？
lbk02_192	這種毋做人个，大家都望毋得打死並棍丟喔！	iaˋ zungˋ mˇ zo nginˇ ge ， tai gaˊ duˊ mong mˇ dedˋ daˋ xiˋ bin gun tiauˋ oˊ ！	這種壞蛋，大家巴不得把他打死呢！
lbk02_193	食東西毋好食啊嗒嗒滾，蓋無禮貌。	siid dungˊ xiˊ mˇ hoˋ siid a dab dab gunˋ ， goi moˇ liˊ mau 。	吃東西不要發出太大的聲響，否則很失禮。
lbk02_194	𠊎等都兩子親家吔，你仰還恁嗒蒂膩細呢？	ngaiˇ nenˊ duˊ liongˋ ziiˋ qinˊ gaˊ eˇ ， ngˇ ngiongˋ hanˇ anˋ dab di ne se noˋ ？	我們都已成親家了，你幹麼還這麼客氣呢？
lbk02_195	這頭家娘盡嗒足，做厥承勞仔蓋辛苦。	iaˋ teuˇ gaˊ ngiongˇ qin dab jiugˋ ， zo iaˊ siinˇ loˇ eˋ goi xinˊ kuˋ 。	這老闆娘很囉唆，當他下屬很辛苦。
lbk02_196	這桶番豆糖，分佢嗒嗒仔食淨淨。	iaˋ tungˋ fanˊ teu tongˇ ， bunˊ iˇ dabˋ dabˋ eˊ siid qiang qiang 。	這桶花生糖，讓他不停的吃就吃完了。
lbk02_197	若新書發表會，佢有送花來答識你無？	ngiaˊ xinˊ suˊ fadˋ beuˋ fi ， iˇ iuˊ sung faˊ loiˇ dabˋ siidˋ ngˇ moˇ ？	你的新書發表會，他有送花來捧場嗎？
lbk02_198	三更半夜个時節，淨聽著噠噠滾个時鐘在該陪𠊎讀書。	samˊ gongˊ ban ia ge siiˇ jiedˋ ， qiang tangˊ doˋ dag dag gunˋ ge siiˇ zungˊ tiˊ ge piˇ ngaiˇ tug suˊ 。	半夜時，只有時鐘轉動的滴噠聲陪我讀書。
lbk02_199	這擺考試毋曉得个選擇題，全部分𠊎揣啊的對，正式係行著狗屎運。	iaˋ baiˋ kauˋ sii mˇ hiauˋ dedˋ ge xienˋ zedˋ tiˇ ， qionˇ bu bunˊ ngaiˇ tonˇ a dag dui ， ziin siidˋ he hangˇ doˋ gieuˋ siiˋ iun 。	這次考試不會的選擇題，全部被我猜中，真是幸運。
lbk02_200	大人儕毋好帶壞帶樣，做揫著阿阿巴巴、有个無个事情，這愛仰仔教細人仔？	tai nginˇ saˇ mˇ hoˋ dai fai dai iong ， zo qiuˊ doˋ oˊ oˊ baˇ baˇ 、 iuˊ ge moˇ ge sii qinˇ ， iaˋ oi ngiongˋ eˊ gauˊ se nginˇ eˋ ？	父母不宜做壞榜樣，淨做些不正不當的事情，這要如何教導小孩？