美濃客家語寶典-04

美濃客家語寶典-04：

編號	例句	六堆客語拼音	華譯
lbk04_001	同人共下愛和和氣氣，正會有人緣。	tungˇ nginˇ kiung ha oi foˇ foˇ hi hi ， nang voi iuˊ nginˇ ianˇ 。	人與人相處要和和氣氣，才會有人緣。
lbk04_002	頭擺美濃山下个人生活過清苦，無見過麼个世面，登常會「火燄蟲覺著電火，蛤蟆噭覺著『啦嘰歐』」，盡會分人㖸。	teuˇ baiˋ miˇ nungˇ sanˊ haˊ ge nginˇ senˊ fad go qinˊ kuˋ ， moˇ gian go maˋ ge sii mien ， denˊ songˇ voi 「 foˋ iam cungˇ gogˋ doˋ tien foˋ ， haˇ maˇ gieu godˋ doˋ 『 laˇ ji ioˋ 』」， qin voi bunˊ nginˇ nagˋ 。	以前美濃山下的人生活困苦，沒見過世面，通常將「螢火蟲當作電燈，青蛙叫以為是收音機的聲音」，成為人們的笑話。
lbk04_003	這個人壞心術，會害人、會翕人，蓋多人會咒佢火燒雷打。	iaˋ ge nginˇ faiˋ ximˊ siidˋ ， voi hoi nginˇ 、 voi hibˋ nginˇ ， goi doˊ nginˇ voi zu iˇ foˋ seuˊ luiˇ daˋ 。	這個人心術不正，會害人、欺壓人，有很多人會咒他遭天打雷劈。
lbk04_004	頭擺人講：「火燒山，連累猴」，你係事情搭忒多，同人延延牽牽，發生事情就會分人連累著。	teuˇ baiˋ nginˇ gongˋ ：「 foˋ seuˊ sanˊ ， lienˇ lui heuˇ 」， ngˇ he sii qinˇ dabˋ tedˋ doˊ ， tungˇ nginˇ ianˇ ianˇ kianˊ kianˊ ， fadˋ senˊ sii qinˇ qiu voi bunˊ nginˇ lienˇ lui doˋ 。	以前的人說：「火燒山，連累猴」，你如果事情管太多，跟別人太多牽扯，一旦發生事情會被人連累。
lbk04_005	這隻猴哥火屎綻天，見講話大細聲，麼人都喝得著、罵得著，修養毋好。	iaˋ zagˋ heuˇ goˊ foˋ siiˋ can tienˊ ， gian gongˋ fa tai se sangˊ ， maˋ nginˇ duˊ hodˋ dedˋ doˋ 、 ma dedˋ doˋ ， xiuˊ iongˊ mˇ hoˋ 。	這個人脾氣暴躁，一見人就罵，很沒修養。
lbk04_006	這個人脾氣毋好，動啊著講話大細聲，亂緊緊著蓋緊張，𠊎等就會罵佢「火屎㸐腳」个人。	iaˋ ge nginˇ piˇ hi mˇ hoˋ ， tungˊ a doˋ gongˋ fa tai se sangˊ ， lon ginˋ ginˋ doˋ goi ginˋ zongˊ ， ngaiˇ nenˊ qiu voi ma iˇ 「 foˋ siiˋ nadˋ giogˋ 」 ge nginˇ 。	這個人性子急、脾氣又不好，動不動就大小聲，我們就會罵他是急性子的人。
lbk04_007	頭擺人生活用大灶頭燒樵，燒吔樵盡大灰，該煙囪管有蓋多烏烏个火燂煤。	teuˇ baiˋ nginˇ senˊ fad iung tai zo teuˇ seuˊ ceuˇ ， seuˊ eˇ ceuˇ qin tai foiˊ ， ge ianˊ cungˊ gonˋ iuˊ goi doˊ vuˊ vuˊ ge foˋ tamˇ moiˇ 。	以前的人生活，會用到灶頭燒柴，灰燼造成煙囪覆蓋著一層黑黑的灰。
lbk04_008	在鄉下夏秋時節，每日日頭一落山，就火烏蛤蟆噭吔！	teˊ hiongˊ haˊ kia qiuˊ siiˇ jiedˋ ， miˊ ngidˋ ngidˋ teuˇ idˋ log sanˊ ， qiu foˋ vuˊ haˇ maˇ gieu eˇ ！	在鄉下夏秋交替的季節，每天太陽一下山，就聽到青蛙鳴叫了！
lbk04_009	佢見食吔酒，就灰灰膏膏思量毋得，毋好搭佢。	iˇ gian siid eˇ jiuˋ ， qiu foiˊ foiˊ goˊ goˊ siiˊ liongˇ mˇ dedˋ ， mˇ hoˋ dabˋ iˇ 。	他每次喝了酒就不講理、無理取鬧，不要理他。
lbk04_010	佢做麼个都緩緩仔，會急死人。	iˇ zo maˋ ge duˊ fon fon eˊ ， voi gibˋ xiˋ nginˇ 。	他做什麼都慢吞吞的，會急死人。
lbk04_011	年三十暗晡食飽夜，細人仔就會歡歡喜喜等正吔愛領紅包。	ngianˇ samˊ siib am buˊ siid bauˋ ia ， se nginˇ eˋ qiu voi fonˊ fonˊ hiˋ hiˋ denˋ zang eˇ oi liangˊ fungˇ bauˊ 。	除夕夜吃過年夜飯，小孩子就會高高興興等著要領紅包。
lbk04_012	你就係毋聽大人儕个話走去賭博，正會「荒工廢業錢了核，人格分人來看輕」。	ngˇ qiu he mˇ tangˊ tai nginˇ saˇ ge fa zeuˋ hi duˋ bogˋ ， nang voi 「 fongˊ gungˊ fi ngiab qienˇ liauˋ hedˋ ， nginˇ giedˋ bunˊ nginˇ loiˇ kon kiangˊ 」。	你就是不聽長輩的話跑去賭博，才會落得窮困潦倒，還讓人看不起的下場。
lbk04_013	頭擺田坵無人耕，草生啊哱塞，這下做老弟个整理好吔，嗄全部搶等耕，斷真係「荒田無人耕，有人耕吔就相爭」。	teuˇ baiˋ tienˇ kiuˊ moˇ nginˇ gangˊ ， coˋ sangˊ a bog sedˋ ， iaˋ ha zo loˋ taiˊ ge ziinˋ liˊ hoˋ eˇ ， sa qionˇ pu qiongˋ denˋ gangˊ ， don ziinˊ he 「 fongˊ tienˇ moˇ nginˇ gangˊ ， iuˊ nginˇ gangˊ eˇ qiu xiongˊ zangˊ 」。	以前田沒人耕，雜草叢生，現在弟弟整理好了，卻全都搶著要耕種，真的是「荒田沒人要耕種，有人耕了就搶著要」。
lbk04_014	你恁翕人，𠊎防死無老命同你拚吔！	ngˇ anˋ hibˋ nginˇ ， ngaiˇ fongˇ xiˋ moˇ loˋ miang tungˇ ngˇ bia eˇ ！	你這麼欺侮人，我不要這條老命直接跟你拚了。
lbk04_015	昨暗晡个風呼呼滾，蓋得人驚。	coˊ am buˊ ge fungˊ fu fu gunˋ ， goi dedˋ nginˇ giangˊ 。	昨晚的風吹得呼呼叫，很嚇人
lbk04_016	佢無錢無人愛插，一有錢大家就來緊認親，斷真係「富無別人」。	iˇ moˇ qienˇ moˇ nginˇ oi cabˋ ， idˋ iuˊ qienˇ tai gaˊ qiu loiˇ ginˋ ngin qinˊ ， don ziinˊ he 「 fu moˇ pied nginˇ 」。	他沒錢時沒有人要理，一旦有錢了，大家就趕緊來認親，真的是「一般人都想和有錢人認親」。
lbk04_017	講麼个「婦人家久吔無打，就會上屋拆瓦」，也毋愐看啊斯係毋係男仔人个問題。	gongˋ maˋ ge 「 fu nginˇ gaˊ giuˋ eˇ moˇ daˋ ， qiu voi songˊ vugˋ cagˋ ngaˋ 」， iaˊ mˇ menˋ kon a sii he mˇ he namˇ eˋ nginˇ ge mun tiˇ 。	說什麼「女人被寵溺久了，就會出亂子」，也不想想看是不是男人造成的問題。
lbk04_018	你斯「婦人家屙尿滮竹殼」麼？淋花樹淋啊咇咇啵啵恁大聲。	ngˇ siiˇ 「 fu nginˇ gaˊ oˊ ngiau beuˋ zugˋ hogˋ 」 meˇ ？ limˇ faˊ su limˇ a bi bi bo bo anˋ tai sangˊ 。	你是「婦人家尿尿噴筍殼」嗎？澆花澆得咇咇啵啵這麼大聲。
lbk04_019	人講「婦人家屙尿㓾得雞嫲落」，你絕對愛注意這個細妹仔。	nginˇ gongˋ 「 fu nginˇ gaˊ oˊ ngiau ciiˇ eˋ gieˊ maˇ lod 」， ngˇ qied dui oi zu i iaˋ ge se moi eˋ 。	人家說「女人厲害得很，非比尋常」，你千萬要注意這個女生。
lbk04_020	你覺得「婦人家屙尿，毋上三稉梨」麼？也毋秤看啊自家幾多兩重。	ngˇ gogˋ doˋ 「 fu nginˇ gaˊ oˊ ngiau ， mˇ songˊ samˊ gangˊ liˇ 」 meˇ ？ iaˊ mˇ ciin kon a qid gaˊ idˋ doˊ liongˊ cungˊ 。	你覺得「婦女再厲害，小便也射不到芥菜的高度」嗎？也不秤看看自己有幾兩重。
lbk04_021	頭擺，有兜个男仔人會講「婦人家銅鑼型，久無打就會上塵」，這種會打姐仔个人，實在劣拙。	teuˇ baiˋ ， iuˊ deuˊ ge namˇ eˋ nginˇ voi gongˋ 「 fu nginˇ gaˊ tungˇ loˇ hinˇ ， giuˋ moˇ daˋ qiu voi songˊ ciinˇ 」， iaˋ zungˋ voi daˋ jiaˋ eˋ ge nginˇ ， siid cai lodˋ zodˋ 。	從前，有些男人會說「女人要嚴加管束，否則就會惹事」，這種會打老婆的人，實在差勁。
lbk04_022	人講：「富人有錢錢賺錢，窮人無錢難上前。」這係蓋現實个問題。	nginˇ gongˋ ：「 fu nginˇ iuˊ qienˇ qienˇ con qienˇ ， kiungˇ nginˇ moˇ qienˇ nanˇ songˊ qienˇ 。」 iaˋ he goi hian siid ge mun tiˇ 。	俗話說：「富人有錢錢賺錢，窮人沒錢沒人理會。」這是很現實的問題。
lbk04_023	公婆係煞猛鬥搭，家庭自然就和樂，人講「夫勤無懶地，妻勤無髒衣」，這話毋會差啦！	gungˊ poˇ he sadˋ mangˊ deu dabˋ ， gaˊ tinˇ cii ianˇ qiu foˇ log ， nginˇ gongˋ 「 fuˊ kiunˇ moˇ lanˊ ti ， qiˊ kiunˇ moˇ zongˊ iˊ 」， iaˋ fa mˇ voi caˊ laˋ ！	夫妻若能同心協力，家庭自然和樂，俗話說「夫妻勤勞，自然無荒地或髒衣服」，這話很有道理！
lbk04_024	這隻猴仔胡胡掝掝，不時都分先生𢫦。	iaˋ zagˋ heuˇ eˋ fuˇ fuˇ fagˋ fagˋ ， budˋ siiˇ duˊ bunˊ xinˊ sangˊ mag 。	這傢伙任性又好動，常常都被老師打。
lbk04_025	這條路分砂石車輾啊湖湖窟窟盡壞行。	iaˋ tiauˇ lu bunˊ saˊ sag caˊ zan a fuˇ fuˇ fudˋ fudˋ qin faiˋ hangˇ 。	這條路被砂石車輾得地面坑坑洞洞很難走。
lbk04_026	人講：「狐狸莫罵貓」，愛嫌人个時節自家就愛先照一下鏡仔。	nginˇ gongˋ ：「 fuˇ liˇ mog ma meu 」， oi hiamˇ nginˇ ge siiˇ jiedˋ qid gaˊ qiu oi xienˊ zeu idˋ ha giang eˋ 。	俗話說：「狐狸不要責罵貓，人都有缺失」，要批評他人之前自己就要先照一下鏡子。
lbk04_027	佢這下斯「狐狸愛走狗挷尾」，脫爪毋得吔。	iˇ iaˋ ha siiˇ 「 fuˇ liˇ oi zeuˋ gieuˋ bangˊ miˊ 」， todˋ zauˋ mˇ dedˋ eˇ 。	佢現在可是「狐狸要走卻被狗兒拖住了尾巴」，脫身不得了。
lbk04_028	你正經係「狐狸話貓」，淨看得著他人个缺點，自家个缺點全看毋著。	ngˇ ziin ginˊ he 「 fuˇ liˇ va meu 」， qiang kon dedˋ doˋ taˊ nginˇ ge kiadˋ diamˋ ， qid gaˊ ge kiadˋ diamˋ qionˇ kon mˇ doˋ 。	你真的是「狐狸指責貓」，只看到別人的缺點，自己的缺點全都看不見。
lbk04_029	若數毋共快去拆，就會像鰗鰍搵沙，緊搵緊大條喔！	ngiaˊ seu mˇ kiung kuai hi cagˋ ， qiu voi qiong fuˇ qiuˊ vun saˊ ， ginˋ vun ginˋ tai tiauˇ oˊ ！	你的債務不趕快去清償，就會像泥鰍沾泥沙，越來越嚴重呢！
lbk04_030	你食飯毋食飯，同桌仔搣啊一哪仔鬍鬚麻加，像麼个樣式？	ngˇ siid fan mˇ siid fan ， tungˇ zogˋ eˋ miedˋ a idˋ naiˋ eˋ fuˇ xiˊ maˇ gaˊ ， qiong maˋ ge iong siidˋ ？	你吃飯不吃飯，把桌子弄得亂七八糟，像樣嗎？
lbk04_031	這條苦瓜仔苦丟丟仔，你敢食吓？	iaˋ tiauˇ fuˋ guaˊ eˋ fuˋ diuˊ diuˊ eˊ， ngˇ gamˋ siid haˋ ？	這條苦瓜真是苦，你敢吃嗎？
lbk04_032	老古言語講：「苦瓜無油苦丟丟，菜瓜無油滑溜溜，薑嫲老來好做藥，瓠仔老來好做杓，菜瓜老來好洗鑊，人到老來無落著。」看起來菜係老吔還有用，人老吔嗄毋得結煞。	loˋ guˋ ngianˇ ngiˊ gongˋ ：「 fuˋ guaˊ moˇ iuˇ fuˋ diuˊ diuˊ ， coi guaˊ moˇ iuˇ vad liu liu ， giongˊ maˇ loˋ loiˇ hoˋ zo iog ， puˇ eˋ loˋ loiˇ hoˋ zo sog ， coi guaˊ loˋ loiˇ hoˋ seˋ vog ， nginˇ do loˋ loiˇ moˇ log cog 。」 kon hiˋ loiˇ coi he loˋ eˇ hanˇ iuˊ iung ， nginˇ loˋ eˇ sa mˇ dedˋ gadˋ sadˋ 。	俗話說：「苦瓜沒油還是苦，絲瓜沒油滑溜溜，老薑可以做藥，老瓠瓜可以當杓子，絲瓜老了可以當洗鍋子的絲瓜布，人到老時一無是處。」看起來蔬果雖然不好或太老都還有不同的用途，人老了卻什麼用處都沒了。
lbk04_033	你莫恁想毋開哪，人講「苦瓜連根苦」，你今晡日恁失志，無成若爺哀敢會好過？	ngˇ mog anˋ xiongˋ mˇ koiˊ naˊ ， nginˇ gongˋ 「 fuˋ guaˊ lienˇ ginˊ fuˋ 」， ngˇ ginˊ buˊ ngidˋ anˋ siidˋ zii ， moˇ sangˇ ngiaˊ iaˇ oiˊ gamˋ voi hoˋ go ？	你別那麼想不開，人說「苦瓜連根苦」，你今天這麼傷心難過，難道你父母心情會好過嗎？
lbk04_034	該人講話無實在，每擺都虎膦轟天，盡畏喔！	ge nginˇ gongˋ fa moˇ siid cai ， miˊ baiˋ duˊ fuˋ linˋ bang tienˊ ， qin vi oˊ ！	那人說話不實在，每次都是謊話連篇，真惹人厭！
lbk04_035	你仰恁無責任，事頭做啊半爛燦就放下來，虎頭蛇尾斯愛仰仔同頭家交待？	ngˇ ngiongˋ anˋ moˇ jidˋ ngim ， se teuˇ zo a ban lan can qiu biong haˊ loiˇ ， fuˋ teuˇ saˇ miˊ siiˇ oi ngiongˋ eˊ tungˇ teuˇ gaˊ gauˊ dai ？	你怎會這麼沒責任心，事情做到一半就停下來，有頭無尾該怎樣向老闆交待？
lbk04_036	佢盡好食粄仔，每擺食粄仔都食啊拂拂滾。	iˇ qin hau siid banˋ eˋ ， miˊ baiˋ siid banˋ eˋ duˊ siid a fud fud gunˋ 。	他很喜歡吃粄條，每次吃粄條都吃得「拂拂」作響。
lbk04_037	這擺全國中學運動會，𠊎等學校參加个比賽奮奮仔，成績算毋會差。	iaˋ baiˋ qionˇ guedˋ zungˊ hog iun tung fi ， ngaiˇ nenˊ hog gauˋ camˊ gaˊ ge biˋ soi fun fun eˊ ， siinˇ jidˋ son mˇ voi caˊ 。	這次全中運，我們學校的比賽有好的表現，成績還算不錯。
lbk04_038	今年暑假个洗身仔訓練，雖然無學著蓋多泅法，毋過愛仰仔踢水、敨氣，還分分仔知。	ginˊ ngianˇ cuˋ gaˋ ge seˋ siinˊ eˋ hiun lien ， suiˊ ianˇ moˇ hog doˋ goi doˊ qiuˇ fabˋ ， mˇ go oi ngiongˋ eˊ tedˋ suiˋ 、 teuˋ hi ， hanˇ fun fun eˊ diˊ 。	今年暑假的游泳訓練，雖然沒學到很多游法，但要怎麼踢水、換氣，還是有一點收穫的。
lbk04_039	厥公八十零歲吔，人還分分漿漿，每日都會去田項做事。	iaˊ gungˊ badˋ siib langˇ se eˇ ， nginˇ hanˇ funˊ funˊ jiongˊ jiongˊ ， miˊ ngidˋ duˊ voi hi tienˇ hong zo se 。	他祖父已經八十幾歲了，頭腦還很清楚，每天都會到田裡做農事。
lbk04_040	佢頭先分日頭晒啊昏核，經過休息，一下分漿吔。	iˇ teuˇ xienˊ bunˊ ngidˋ teuˇ sai a funˊ hedˋ ， ginˊ go hiuˊ xidˋ ， idˋ ha funˊ jiongˊ eˇ 。	他剛剛被太陽晒得昏倒，經過休息，現在已經清醒了。
lbk04_041	大家都係共個團隊，愛過鬥搭仔，毋好分彼分此。	tai gaˊ duˊ he kiung ge tonˇ dui ， oi go deu dabˋ eˊ ， mˇ hoˋ funˊ piˋ funˊ ciiˋ 。	大家都是同個團隊，應該團結合作，不宜彼此分得太清楚。
lbk04_042	這兜細人仔情願毋夠，不時做事昏懵做差。	iaˋ deuˊ se nginˇ eˋ qinˇ ngian mˇ gieu ， budˋ siiˇ zo sii funˊ mungˋ zo caˊ 。	這些小孩子不夠認真，做事糊裡糊塗常做錯。
lbk04_043	下晝頭第一節課，大家都還昏昏呆呆，先生上課講麼个聽無麼入去。	haˊ zu teuˇ ti idˋ jiedˋ ko ， tai gaˊ duˊ hanˇ funˇ funˇ deˇ deˇ ， xinˊ sangˊ song ko gongˋ maˋ ge tangˊ moˇ maˋ ngib hi 。	下午第一節課，大家都還精神不濟，老師上課講些什麼聽不太進去。
lbk04_044	𠊎透當晝行路出去買便當歸來食，分日頭晒啊一下昏昏仔。	ngaiˇ teu dongˊ zu hangˇ lu cudˋ hi maiˊ pien dongˊ guiˊ loiˇ siid ， bunˊ ngidˋ teuˇ sai a idˋ ha funˇ funˇ eˊ 。	我正午走路出去買便當回家吃，被太陽晒得現在有點頭暈。
lbk04_045	𠊎看佢這下昏昏尸尸，係毋係昨晡日感冒發燒吔？	ngaiˇ kon iˇ iaˋ ha funˇ funˇ siiˊ siiˊ ， he mˇ he coˊ buˊ ngidˋ gamˋ mo fadˋ seuˊ eˇ ？	我看他現在昏昏沉沉的，是不是昨天感冒發燒了？
lbk04_046	年三十祭祖時，愛焚香請神來享受祭品。	ngianˇ samˊ siib ji zuˋ siiˇ ， oi funˇ hiongˊ qiangˋ siinˇ loiˇ hiongˋ su ji pinˋ 。	除夕祭祖時，要焚香拜請神明下凡享受祭品。
lbk04_047	這頭家昏入無昏出，毋會照顧員工，正式有齧。	iaˋ teuˇ gaˊ funˇ ngib moˇ funˇ cudˋ ， mˇ voi zeu gu ianˇ gungˊ ， ziin siidˋ iuˊ ngadˋ 。	這老闆賺錢只進不出，不會照顧員工，真是吝嗇。
lbk04_048	引擎無騎吔就同佢牽入來，毋好在外背風吹雨打，係無會蓋遽壞核。	enˊ jinˋ moˇ kiˇ eˇ qiu tungˇ iˇ kianˊ ngib loiˇ ， mˇ hoˋ teˊ lo boi fungˊ coiˊ iˋ daˋ ， he moˇ voi goi giagˋ faiˋ hedˋ 。	機車不騎了就牽進來，不要讓它在外面風吹雨打，不然很快便會壞掉。
lbk04_049	阿嬤蓋大聲喊孫仔共快好入來吔，係無風吹日晒，身體會晒壞。	aˊ ma goi tai sangˊ hemˊ sunˊ eˋ kiung kuai hoˋ ngib loiˇ eˇ ， he moˇ fungˊ coiˊ ngidˋ sai ， siinˊ tiˋ voi sai faiˋ 。	奶奶大聲的叫孫子趕快進來，不然風吹日晒，會對身體不好。
lbk04_050	老人家應該在屋下好好尞，不時風吹日炙會傷著身體。	loˋ nginˇ gaˊ in goiˊ teˊ lugˋ kaˊ hoˋ hoˋ liau ， budˋ siiˇ fungˊ coiˊ ngidˋ zagˋ voi songˊ doˋ siinˊ tiˋ 。	老年人應該在家好好休息，常風吹日晒身體會受不了的。
lbk04_051	做人毋好忒多嘴，毋好麼个事情都想搭，頭擺人講：「風打探頭禾，手攉多嘴人」，就係恁呢个道理。	zo nginˇ mˇ hoˋ tedˋ doˊ zoi ， mˇ hoˋ maˋ ge sii qinˇ duˊ xiongˋ dabˋ ， teuˇ baiˋ nginˇ gongˋ ：「 fungˊ daˋ tam teuˇ voˇ ， suˋ vogˋ doˊ zoi nginˇ 」， qiu he anˋ neˊ ge to liˊ 。	人不要太多嘴，不要什麼事都想管，以前的人說：「喜歡強出頭或多話的人，常會招惹麻煩」，就是這個道理。
lbk04_052	佢屋下蓋有錢，食著毋使愁，一生人豐豐富富過日仔。	iˇ lugˋ kaˊ goi iuˊ qienˇ ， siid zogˋ mˇ siiˋ seuˇ ， idˋ senˊ nginˇ fungˊ fungˊ fu fu go ngidˋ eˋ 。	他家很有錢，衣食不缺，一輩子可以養尊處優的過日子。
lbk04_053	這個後生仔出世命蓋好，屋下蓋有口，故所一生人過啊風風光光。	iaˋ ge heu sangˊ eˋ cudˋ se miang goi hoˋ ， lugˋ kaˊ goi iuˊ hieuˋ ， gu soˋ idˋ senˊ nginˇ go a fungˊ fungˊ gongˊ gongˊ 。	這個年輕人一出生就命好，家裡很有錢，所以一輩子過得很風光。
lbk04_054	婦人家無老公吔，毋好隨便尋人个男仔人來去，係無莊頭項會風風雨雨、閒話蓋多。	fu nginˇ gaˊ moˇ loˋ gungˊ eˇ ， mˇ hoˋ suiˇ pien qimˇ nginˇ ge namˇ eˋ nginˇ loiˇ hi ， he moˇ zongˊ teuˇ hong voi fungˊ fungˊ iˋ iˋ 、 hanˇ fa goi doˊ 。	沒有丈夫的婦女，不能隨便與其他男人來往，不然村裡會指指點點說閒話。
lbk04_055	這個老人家在日本時代做過轟轟烈烈个事情，蓋敢同日本人相反。	iaˋ ge loˋ nginˇ gaˊ tiˊ ngidˋ bunˋ siiˇ toi zo go fungˊ fungˊ lied lied ge sii qinˇ ， goi gamˋ tungˇ ngidˋ bunˋ nginˇ xiongˊ fanˋ 。	這個老人在日據時代做過轟轟烈烈的事情，很敢跟日本人對抗。
lbk04_056	美濃人講：「封雞封肉好名聲，毋當三層个半肥腈。」意思係講封雞封肉雖然好名聲，但係愛年節正食得著，恁呢就毋當食三層个半肥腈喔。	miˇ nungˇ nginˇ gongˋ ：「 fungˊ gieˊ fungˊ ngiugˋ hoˋ miangˇ sangˊ ， mˇ dong samˊ cenˇ ge ban piˇ jiangˊ 。」 i sii he gongˋ fungˊ gieˊ fungˊ ngiugˋ suiˊ ianˇ hoˋ miangˇ sangˊ ， danˋ he oi ngianˇ jiedˋ nang siid dedˋ doˋ ， anˋ neˊ qiu mˇ dong siid samˊ cenˇ ge ban piˇ jiangˊ oˊ 。	美濃人說：「封雞封肉雖美味，還是不如吃五花肉。」意思是說封雞封肉雖然美味，但不容易吃到，不如吃五花肉料理簡單、快速又鮮美。
lbk04_057	人毋好忒風神，忒風神會分人講「蓋冇頭」。	nginˇ mˇ hoˋ tedˋ fungˊ siinˇ ， tedˋ fungˊ siinˇ voi bunˊ nginˇ gongˋ 「 goi pang teuˇ 」。	人不要太自以為是，太愛炫會被人說浮誇。
lbk04_058	這個人做事情無底仔，儘儘採採又蓋風流，別人會講「佢屋下風水矺膦管」，表示開始愛敗家吔。	iaˋ ge nginˇ zo sii qinˇ moˇ daiˋ eˋ ， qinˊ qinˊ caiˊ caiˊ iu goi fungˊ liuˇ ， pied nginˇ voi gongˋ 「 iˇ lugˋ kaˊ fungˊ suiˋ zagˋ linˋ gonˋ 」， beuˋ sii koiˊ siiˋ oi pai gaˊ eˇ 。	這個人做事情不實在，不僅很隨便也很風流，別人會說「他家的風水不正常了」，意思是要開始敗家了。
lbk04_059	佢一下在該整廳下，壁漆啊紅丟丟仔，準備討心臼。	iˇ idˋ ha teˊ geiˋ zangˋ tangˊ haˊ ， biagˋ qidˋ a fungˇ diuˊ diuˊ eˊ ， zunˋ pi toˋ ximˊ kiuˊ 。	他現在正在整修客廳，牆壁粉刷鮮豔的紅色，準備娶媳婦。
lbk04_060	這間屋仔做啊好，油漆怕漆毋著吔，漆啊紅歪歪仔，看起來毋係蓋好看。	iaˋ gianˊ vugˋ eˋ zo a hoˋ ， iuˇ qidˋ pa qidˋ mˇ cog eˇ ， qidˋ a fungˇ vaiˊ vaiˊ eˊ ， kon hiˋ loiˇ mˇ he goi hoˋ kon 。	這間房子剛蓋好，油漆可能漆錯了，漆的顏色太過鮮紅，看起來不是很好看。
lbk04_061	這張凳仔毋平，覂覂翹翹，你坐下去愛細義兜仔喲！	iaˋ zongˊ den eˋ mˇ piangˇ ， fungˋ fungˋ kieu kieu ， ngˇ coˊ haˊ hi oi se ngi deuˊ eˊ ioˊ ！	這張椅子不平搖搖晃晃，你坐下去要小心一點喲！
lbk04_062	喚細人仔捧菜愛細義，係一無注意覂淨淨就浪核吔。	vonˋ se nginˇ eˋ mungˋ coi oi se ngi ， he idˋ moˇ zu i fungˋ qiang qiang qiu long hedˋ eˇ 。	叫小孩子端菜要小心，若不小心打翻就可惜了！
lbk04_063	頭擺个細妹仔盡認命持家，故所人會講「婦人家嫁雞跈雞，嫁狗跈狗，嫁狐狸滿山走」。	teuˇ baiˋ ge se moi eˋ qin ngin miang ciiˇ gaˊ ， gu soˋ nginˇ voi gongˋ 「 fu nginˇ gaˊ ga gieˊ tenˇ gieˊ ， ga gieuˋ tenˇ gieuˋ ， ga fuˇ liˇ manˊ sanˊ zeuˋ 」。	以前的女性結婚後很認命持家，所以人家會說「女人嫁雞隨雞，嫁狗隨狗，嫁狐狸滿山跑」。
lbk04_064	「嫁雞跈雞」就係婦人家嫁吔老公，愛歸心跈老公个志願。	「 ga gieˊ tenˇ gieˊ 」 qiu he fu nginˇ gaˊ ga eˇ loˋ gungˊ ， oi guiˊ ximˊ tenˇ loˋ gungˊ ge zii ngian 。	「嫁雞隨雞」就是婦女結婚後，要全心全意的跟隨丈夫的心願。
lbk04_065	兩個人相打吵事，別人毋好加火添炭，講揫著有个無个會害死人。	liongˋ ge nginˇ xiongˊ daˋ cauˇ sii ， pied nginˇ mˇ hoˋ gaˊ foˋ tiamˊ tan ， gongˋ qiuˊ doˋ iuˊ ge moˇ ge voi hoi xiˋ nginˇ 。	兩個人打架互罵，旁人不要再加油添醋，淨說些無關緊要的會害死人。
lbk04_066	入年架吔，家家戶戶愛準備做甜粄過年。	ngib ngianˇ ga eˇ ， gaˊ gaˊ fu fu oi zunˋ pi zo tiamˇ banˋ go ngianˇ 。	農曆十二月二十五日進入春節假期了，家家戶戶要準備蒸年糕。
lbk04_067	發大水，屋下係有損失，政府會加加減減補助兜仔。	bodˋ tai suiˋ ， lugˋ kaˊ he iuˊ sunˋ siidˋ ， ziin fuˋ voi gaˊ gaˊ gamˋ gamˋ buˋ cu deuˊ eˊ 。	若因水災造成家中損失，政府多少會補助一些。
lbk04_068	美濃人講：「加一個神，多一個鬼」，意思係提醒𠊎等做事愛細義，同人來去毋好隨便，因為鬼同神不時會黏共下。	miˇ nungˇ nginˇ gongˋ ：「 gaˊ idˋ ge siinˇ ， doˊ idˋ ge guiˋ 」， i sii he tiˇ xiangˋ ngaiˇ nenˊ zo sii oi se ngi ， tungˇ nginˇ loiˇ hi mˇ hoˋ suiˇ pien ， inˊ vi guiˋ tungˇ siinˇ budˋ siiˇ voi ngiamˇ kiung ha 。	美濃人說：「加一個神，如多一個鬼」，意思是提醒我們做事要謹慎小心，與人交往不要隨隨便便，因為人多口雜事情很難處理。
lbk04_069	雖然講「家有一桌賭，當過做知府」，但係，𠊎測著人還係愛腳踏實地過好。	suiˊ ianˇ gongˋ 「 gaˊ iuˊ idˋ zogˋ duˋ ， dong go zo ziiˊ fuˋ 」， danˋ he ， ngaiˇ zedˋ doˋ nginˇ hanˇ he oi giogˋ tab siid ti go hoˋ 。	雖然說「開賭場抽頭，比做知府的收入還多」，但是，我覺得做人還是要腳踏實地比較好。
lbk04_070	吾姆不時講：「家有糧萬擔，毋丟壞爛衫。」希望𠊎等子子孫孫都毋好折福。	ngaˊ meˊ budˋ siiˇ gongˋ ：「 gaˊ iuˊ liongˇ van damˊ ， mˇ tiuˋ faiˋ lan samˊ 。」 hiˊ mong ngaiˇ nenˊ ziiˋ ziiˋ sunˊ sunˊ duˊ mˇ hoˋ zadˋ fugˋ 。	我母親常說：「即使家境富有，也不要隨便丟棄破舊的衣裳。」希望我們子子孫孫都要懂得惜福。
lbk04_071	老古人講：「家有千兩黃金，毋當朝進一文錢。」意思係勸話𠊎等愛靠自家煞猛過實在。	loˋ guˋ nginˇ gongˋ ：「 gaˊ iuˊ qienˊ liongˊ vongˇ gimˊ ， mˇ dong zeuˊ jin idˋ vunˇ qienˇ 。」 i sii he kian va ngaiˇ nenˊ oi ko qid gaˊ sadˋ mangˊ go siid cai 。	老祖先有句話說：「家境再富有也會坐吃山空，不如每天都有一文錢的收入。」意思是勸我們要靠自己努力最實在。
lbk04_072	厥細人仔全部都蓋有出息，人講：「家有三條龍，任食毋會窮。」蓋好命哦！	iaˊ se nginˇ eˋ qionˇ pu duˊ goi iuˊ cudˋ xidˋ ， nginˇ gongˋ ：「 gaˊ iuˊ samˊ tiauˇ liungˇ ， im siid mˇ voi kiungˇ 。」 goi hoˋ miang oˊ ！	他的小孩全部都很有出息，人家說：「家中如有三個爭氣有成的孩子，就不會貧窮了。」真好命哦！
lbk04_073	講話係加油添醋，意思會走盞。	gongˋ fa he gaˊ iuˇ tiamˊ cii ， i sii voi zeuˋ zanˋ 。	說話如果加油添醋，意思就會偏掉了。
lbk04_074	頭擺，阿公不時會講：「係毋煞猛讀書，將來家濟仔同米筒仔還有好擐。」	teuˇ baiˋ ， aˊ gungˊ budˋ siiˇ voi gongˋ ：「 he mˇ sadˋ mangˊ tug suˊ ， jiongˊ loiˇ gaˊ ji eˋ tungˇ miˋ tungˇ eˋ hanˇ iuˊ hoˋ kuan 。」	以前，爺爺常會說：「如果不用功讀書，將來就會貧窮潦倒、當乞丐。」
lbk04_075	佢講話蓋會加爐添熱，摝啊大家毋和。	iˇ gongˋ fa goi voi gaˊ luˇ tiamˊ ngiad ， lugˋ a tai gaˊ mˇ foˇ 。	他說話很會加油添醋，煽風點火，搞得大家不和諧。
lbk04_076	人講：「家無噥噥公，屋下樣樣空；家無噥噥婆，麼个東西也會無。」你就莫恁譴吔，家有一老像有一寶！	nginˇ gongˋ ：「 gaˊ moˇ nungˇ nung gungˊ ， lugˋ kaˊ iong iong kungˊ ； gaˊ moˇ nungˇ nung poˇ ， maˋ ge dungˊ xiˊ iaˊ voi moˇ 。」 ngˇ qiu mog anˋ kienˋ eˇ ， gaˊ iuˊ idˋ loˋ qiong iuˊ idˋ boˋ 。	俗話說：「家中如果沒有會念人、管人的長輩，就不會有個像樣的家。」你不要那麼生氣，家有一老如有一寶！
lbk04_077	姆姆降吔一個妹仔，阿公蓋歡喜講：「加人加福氣。」	meˊ meˊ miˊ ngiaˊ giung eˇ idˋ ge moi eˋ ， aˊ gungˊ goi fonˊ hiˋ gongˋ ：「 gaˊ nginˇ gaˊ fugˋ hi 。」	嬸嬸生了一個女兒，爺爺高興的說：「多一個人就多一份福氣。」
lbk04_078	阿嫂降吔一個妹仔，阿爸講：「加人添福，細妹仔、細倈仔都係寶。」	aˊ soˋ giung eˇ idˋ ge moi eˋ ， aˊ baˊ gongˋ ：「 gaˊ nginˇ tiamˊ fugˋ ， se moi eˋ 、 se lai eˋ duˊ he boˋ 。」	嫂嫂生了一個女兒，爸爸說：「增加人丁會增添福氣，女孩、男孩都是寶。」
lbk04_079	人講「家娘壞樣，心臼跈樣」，故所做家娘个愛有好樣分心臼跈。	nginˇ gongˋ 「 gaˊ ngiongˇ faiˋ iong ， ximˊ kiuˊ tenˇ iong 」， gu soˋ zo gaˊ ngiongˇ ge oi iuˊ hoˋ iong bunˊ ximˊ kiuˊ tenˇ 。	人家說「當婆婆的沒做好榜樣，媳婦也會一個樣」，所以婆婆要有好榜樣讓媳婦學習。
lbk04_080	這間公司會阿核，就係厥重要幹部家神透外鬼，同佢搣核个。	iaˋ gianˊ gungˊ siiˊ voi oˊ hedˋ ， qiu he iaˊ cung ieu gon pu gaˊ siinˇ teu ngoi guiˋ ， tungˇ iˇ miedˋ hedˋ ge 。	這間公司會倒閉，就是裡面的重要幹部與外人同謀不軌，將它弄倒的。
lbk04_081	該頭家蓋毋老實，不時加水加豆腐，同佢做生理愛蓋細義。	ge teuˇ gaˊ goi mˇ loˋ siid ， budˋ siiˇ gaˊ suiˋ gaˊ teu fu ， tungˇ iˇ zo senˊ liˊ oi goi se ngi 。	那個老闆很不老實，賣的東西不實在，跟他做生意要很小心。
lbk04_082	阿香，共下來食飯，𠊎等加人無加菜，淨加碗添筷，怕麼个呢！	aˊ hiongˊ ， kiung ha loiˇ siid fan ， ngaiˇ nenˊ gaˊ nginˇ moˇ gaˊ coi ， qiang gaˊ vonˋ tiamˊ kuai ， pa maˋ ge noˋ ！	阿香，一起來吃飯，我們只添加碗筷，沒有加菜，沒什麼關係啦！
lbk04_083	該人好賭，賭啊屋下家絲蕩產。	ge nginˇ hau duˋ ， duˋ a lugˋ kaˊ gaˊ xiˊ tong sanˋ 。	那個人好賭成性，把家中財產都賭光光。
lbk04_084	每擺聽著愛加桌添凳，細人仔就會盡暢。	miˊ baiˋ tangˊ doˋ oi gaˊ zogˋ tiamˊ den ， se nginˇ eˋ qiu voi qin tiong 。	每次聽到有客人光臨，小孩子就會很開心。
lbk04_085	半夜格，細老弟嘎上嘎下，嘎啊𠊎睡毋落覺。	ban ia gagˋ ， se loˋ taiˊ gaˇ songˊ gaˇ haˊ ， gaˇ a ngaiˇ soi mˇ log gau 。	半夜裡，小弟弟哭鬧不休，哭得我睡不著覺。
lbk04_086	佢為著去見這間公司个董事長，就假扮記者假花入城。	iˇ vi doˋ hi gian iaˋ gianˊ gungˊ siiˊ ge dungˋ sii zongˋ ， qiu gaˋ ban gi zaˋ gaˋ faˊ ngib sangˇ 。	他為了去見這間公司的董事長，就假扮記者混進公司。
lbk04_087	𠊎等看著豬嫲食東西食啊呷呷滾。	ngaiˇ nenˊ kon doˋ zuˊ maˇ siid dungˊ xiˊ siid a gab gab gunˋ 。	我們看到母豬吃東西吃得呷呷作響。
lbk04_088	你毋好一哪仔呷上呷下摝死人。	ngˇ mˇ hoˋ idˋ naiˋ eˋ gab songˊ gab haˊ lugˋ xiˋ nginˇ 。	你不要到處亂說話窮攪和。
lbk04_089	愛做生理就自家做，毋好望別人，人講「甲字難出頭」，就係講同人合本盡難成功。	oi zo senˊ liˊ qiu qid gaˊ zo ， mˇ hoˋ mong pied nginˇ ， nginˇ gongˋ 「 gabˋ sii nanˇ cudˋ teuˇ 」， qiu he gongˋ tungˇ nginˇ gabˋ bunˋ qin nanˇ siinˇ gungˊ 。	要做生意就自己來，別想指望他人，俗話說：「合夥事業難有成功之日」，就在講合夥生意難做。
lbk04_090	做生理了核吔，正知這甲字難寫呢！	zo senˊ liˊ liauˋ hedˋ eˇ ， nang diˊ iaˋ gabˋ sii nanˇ xiaˋ neˊ ！	生意失敗了，才知道要合夥做生意的確很難呢！
lbk04_091	該婦人家嬈汀汀仔，一哪仔同人个男仔人合上合下，實在還難耐喲！	ge fu nginˇ gaˊ hieuˇ din din eˊ ， idˋ naiˋ eˋ tungˇ nginˇ ge namˇ eˋ nginˇ gabˋ songˊ gabˋ haˊ ， siid cai hanˇ nanˇ ngai ioˊ ！	那婦人打扮妖嬈，到處和有婦之夫相好，實在很不應該。
lbk04_092	𠊎等兩儕還係隔壁鄰舍。	ngaiˇ nenˊ liongˋ saˇ hanˇ he gagˋ biagˋ linˇ sa 。	我們兩人是鄰居。
lbk04_093	頭擺人講「隔夜茶毒過惡蛇」，就係警告𠊎等：過夜个茶盡量莫食。	teuˇ baiˋ nginˇ gongˋ 「 gagˋ ia caˇ tug go ogˋ saˇ 」， qiu he ginˋ go ngaiˇ nenˊ ： go ia ge caˇ qin liong mog siid 。	古人說「隔夜的茶比毒蛇還要毒」，就是警告我們：隔夜的茶盡量不要喝。
lbk04_094	佢頭擺談戀愛个時節，隔日三餐就對美濃騎引擎去高雄尋細妹仔約會。	iˇ teuˇ baiˋ tamˇ lien oi ge siiˇ jiedˋ ， gagˋ ngidˋ samˊ conˊ qiu dui miˇ nungˇ kiˇ enˊ jinˋ hi goˊ hiungˇ qimˇ se moi eˋ iogˋ fi 。	他以前在談戀愛時，每隔一天就從美濃騎機車到高雄和女孩子約會。
lbk04_095	這兜高麗菜乾晒燥吔，就同佢合就集來，毋好這一堆、該一堆。	iaˋ deuˊ goˊ li coi gonˊ sai zauˊ eˇ ， qiu tungˇ iˇ gabˋ qiu qib loiˇ ， mˇ hoˋ iaˋ idˋ doiˊ 、 ge idˋ doiˊ 。	這些高麗菜乾已晒乾了，就全部集中收好，不要散在各地。
lbk04_096	這七層插炒螔螺仔傍酒盡合嘴。	iaˋ qidˋ qienˇ cabˋ cauˋ seˇ loˇ eˋ bongˋ jiuˋ qin gagˋ zoi 。	九層塔炒蝸牛肉下酒很對味。
lbk04_097	吾婆生日該當晝，又堵著結拜兄弟討姐仔，害𠊎尷尷尬尬毋知愛去哪陀正好。	ngaˊ poˇ sangˊ ngidˋ ge dongˊ zu ， iu duˇ doˋ giadˋ bai hiungˊ ti toˋ jiaˋ eˋ ， hoi ngaiˇ gamˊ gamˊ ge ge mˇ diˊ oi hi naiˋ toˇ nang hoˋ 。	我外婆生日那天中午，剛好結拜兄弟結婚，讓我左右為難，不知該去哪邊才好？
lbk04_098	學這手藝盡艱辛，愛你自家甘甘願願个，𠊎正肯教你。	hog iaˋ suˋ ngi qin gianˊ xinˊ ， oi ngˇ qid gaˊ gamˊ gamˊ ngian ngian ge ， ngaiˇ nang henˋ gauˊ ngˇ 。	學這門手藝很辛苦，要你自己心甘情願，我才肯傳授。
lbk04_099	你仰恁尷尬呢，人都來吔，分𠊎請一餐正歸哪！	ngˇ ngiongˋ anˋ gamˊ ge noˋ ， nginˇ duˊ loiˇ eˇ ， bunˊ ngaiˇ qiangˋ idˋ conˊ nang guiˊ naˊ ！	你怎麼這麼客氣，人都來了，讓我請一餐再回去吧！
lbk04_100	厥家官過身還無出門，佢就著等草鞋、孝服出去買冰食，正式係「尷尬無藥醫」喔！	iaˊ gaˊ gonˊ go siinˊ hanˇ moˇ cudˋ munˇ ， iˇ qiu zogˋ nenˋ coˋ haiˇ 、 hau fug cudˋ hi maiˊ benˊ siid ， ziin siidˋ he 「 gamˊ ge moˇ iog iˊ 」 oˊ ！	她的公公過世還未出殯，她就穿著孝服出去買冰吃，真的是很不應該！
lbk04_101	你有聽過人講「甘願同人㧡擔賣鴨春，毋願同人共老公」無？你想愛討細姐仔，若姐仔敢會肯？	ngˇ iuˊ tangˊ go nginˇ gongˋ 「 gamˊ ngian tungˇ nginˇ kaiˊ damˊ mai abˋ cunˊ ， mˇ ngian tungˇ nginˇ kiung loˋ gungˊ 」 moˇ ？ ngˇ xiongˋ oi toˋ se jiaˋ eˋ ， ngiaˊ jiaˋ eˋ gamˋ voi henˋ ？	你有聽過「寧願幫人挑擔賣鴨蛋，不願與人共一夫」嗎？你想娶小老婆，你太太會同意嗎？
lbk04_102	菜雖然毋會差，毋過人都食飽吔，就莫再監人食吔。	coi suiˊ ianˇ mˇ voi caˊ ， mˇ go nginˇ duˊ siid bauˋ eˇ ， qiu mog zai gamˊ nginˇ siid eˇ 。	菜雖然不錯，不過別人已經吃飽了，就不要再強迫人家吃了。
lbk04_103	甘蔗毋會兩頭甜，堵著事情愛曉得取捨，正毋會項項落空。	gamˊ za mˇ voi liongˋ teuˇ tiamˇ ， duˇ doˋ sii qinˇ oi hiauˋ dedˋ qiˋ saˋ ， nang mˇ voi hong hong log kungˊ 。	甘蔗不會兩頭都甜，遇到事情要知道如何取捨，才不會樣樣落空。
lbk04_104	結婚雖然愛取對象，毋過老古人講：「甘蔗無兩頭甜，你莫嫌，𠊎莫擇！恁呢講，就恁呢定著。」兩儕合意過重要啦！	giadˋ funˊ suiˊ ianˇ oi qiˋ dui xiong ， mˇ go loˋ guˋ nginˇ gongˋ ：「 gamˊ za moˇ liongˋ teuˇ tiamˇ ， ngˇ mog hiamˇ ， ngaiˇ mog tog ！ anˋ neˊ gongˋ ， qiu anˋ neˊ tin cog 。」 liongˋ saˇ gagˋ i go cung ieu laˋ ！	結婚雖然要挑對象，但是古人說：「甘蔗沒有兩頭甜，你不要嫌棄我，我不挑剔你！兩人同意，就這樣決定。」二人彼此喜歡比較重要。
lbk04_105	人講：「敢去上山就有樵，毋敢去就屋下愁。」後生人愛肯煞猛打拚，正會有前途。	nginˇ gongˋ ：「 gamˋ hi songˊ sanˊ qiu iuˊ ceuˇ ， mˇ gamˋ hi qiu lugˋ kaˊ seuˇ 。」 heu sangˊ nginˇ oi henˋ sadˋ mangˊ daˋ bia ， nang voi iuˊ qienˇ tuˇ 。	俗話說：「敢上山就有柴火可燒，不敢去就只有在家發愁。」年輕人要肯努力奮鬥，才會有前途。
lbk04_106	你肯拚，無人擋得你得，就像老古言語講个：「敢去死，毋驚無鬼好做。」	ngˇ henˋ bia ， moˇ nginˇ dongˋ eˋ ngˇ dedˋ ， qiu qiong loˋ guˋ ngianˇ ngiˊ gongˋ ge ：「 gamˋ hi xiˋ ， mˇ giangˊ moˇ guiˋ hoˋ zo 。」	你肯努力奮鬥，沒人擋得了你，就像俗諺所說：「只要肯努力，就不怕成不了事。」
lbk04_107	人講：「敢開飯店，毋驚大肚人。」𠊎既然敢答應你，就絕對做得著。	nginˇ gongˋ ：「 gamˋ koiˊ fan diam ， mˇ giangˊ tai duˋ nginˇ 。」 ngaiˇ gi ianˇ gamˋ dabˋ in ngˇ ， qiu qied dui zo dedˋ doˋ 。	俗話說：「敢開飯店，就不怕食量大的客人。」我既然敢答應你，就絕對做得到。
lbk04_108	「敢拿獅頭𠖄，就愛敢過桌棚。」你既然愛接這個社長个位仔，就愛先有克服全社財政困難个擔當。	「 gamˋ naˊ siiˊ teuˇ dungˊ ， qiu oi gamˋ go zogˋ pangˇ 。」 ngˇ gi ianˇ oi jiabˋ iaˋ ge sa zongˋ ge vi eˋ ， qiu oi xienˊ iuˊ kiedˋ fug qionˇ sa coiˇ ziin kun nanˇ ge damˊ dongˊ 。	「敢舞獅頭，就應要敢過桌棚。」你既然要接這個社長職務，就要先有克服全社財政困難的擔當。
lbk04_109	頭擺𠊎還後生，暗晡頭尞蓋夜，第二朝晨跋毋䟘，吾爸蓋譴，就講一句話：「敢食恁多鹽，就愛敢止恁呢个渴。」	teuˇ baiˋ ngaiˇ hanˇ heu sangˊ ， am buˊ teuˇ liau goi ia ， ti ngi zeuˊ siinˇ bagˋ mˇ hong ， ngaˊ baˊ goi kienˋ ， qiu gongˋ idˋ gi fa ：「 gamˋ siid anˋ doˊ iamˇ ， qiu oi gamˋ ziiˋ anˋ neˊ ge hodˋ 。」	以前我年輕時，晚上玩到很晚，結果隔天早上起不來，我爸很生氣，就說：「做人做事要有擔當、負責任。」
lbk04_110	有一日吾姆講道理分老妹聽，佢講：「敢做敢當，敢做笊簍，就毋驚滾飯湯。」意思係話𠊎老妹，做人个心臼愛有志氣、愛堅耐。	iuˊ idˋ ngidˋ ngaˊ meˊ gongˋ to liˊ bunˊ loˋ moi tangˊ ， iˇ gongˋ ：「 gamˋ zo gamˋ dongˊ ， gamˋ zo zau leuˇ ， qiu mˇ giangˊ gunˋ fan tongˊ 。」 i sii he va ngaiˇ loˋ moi ， zo nginˇ ge ximˊ kiuˊ oi iuˊ zii hi 、 oi gianˊ ngai 。	有天我媽媽講道理給妹妹聽，她說：「人一旦選定行業後，就要專心，並且盡力扮演好自己的角色。」意思是勸我妹妹，為人媳婦要有志氣、耐心。
lbk04_111	東西愛囥好勢，毋好亂丟，係無會徑手徑腳。	dungˊ xiˊ oi kong hoˋ se ， mˇ hoˋ lon tiuˋ ， he moˇ voi gang suˋ gang giogˋ 。	東西要放好，不要亂丟，不然會礙手礙腳。
lbk04_112	楯頭仔愛囥正來，係無會徑橫人。	dunˋ teuˇ eˋ oi kong zang loiˇ ， he moˇ voi gang vang nginˇ 。	矮板凳要放好，不然會絆倒人。
lbk04_113	這個細人仔在屋下偷東西，看厥袋仔梗梗鼓鼓，毋知庰麼个東西喲？	iaˋ ge se nginˇ eˋ teˊ lugˋ kaˊ teuˊ dungˊ xiˊ ， kon iaˊ toi eˋ gangˊ gangˊ guˋ guˋ， mˇ diˊ biang maˋ ge dungˊ xiˊ ioˊ ？	這個小孩子在家裡偷東西，他的口袋看起來鼓鼓的，不知偷藏什麼東西喲？
lbk04_114	耕田種作个人，每日愛煞猛、愛小心照顧，故所老古人講：「耕田愛日日到，掃屋愛朝朝掃。」	gangˊ tienˇ zung zogˋ ge nginˇ ， miˊ ngidˋ oi sadˋ mangˊ 、 oi seuˋ ximˊ zeu gu ， gu soˋ loˋ guˋ nginˇ gongˋ ：「 gangˊ tienˇ oi ngidˋ ngidˋ do ， so vugˋ oi zeuˊ zeuˊ so 。」	農夫每天要努力工作，並細心照顧，所以古人說：「田要每天勤耕，房子要每天整理。」
lbk04_115	人講「耕田就愛田鄰儕」，耕田个人毋好同人多事，有事情吔正有好照應。	nginˇ gongˋ 「 gangˊ tienˇ qiu oi tienˇ linˇ saˇ 」， gangˊ tienˇ ge nginˇ mˇ hoˋ tungˇ nginˇ doˊ sii ， iuˊ sii qinˇ eˇ nang iuˊ hoˋ zeu in 。	有人說「耕田要與人和睦相處」，農夫不要與人吵架，有事發生時才能互相協助。
lbk04_116	耕田作習个人乜係人，你做毋得看人毋起。	gangˊ tienˇ zogˋ xib ge nginˇ me he nginˇ ， ngˇ zo mˇ dedˋ kon nginˇ mˇ hiˋ 。	耕田的農夫也是人，你千萬不能輕視他們。
lbk04_117	看著弱者毋好翕佢，因為有可能會因小失大哦，故所頭擺人講「教化賠好人」。	kon doˋ ngiog zaˋ mˇ hoˋ hibˋ iˇ ， inˊ vi iuˊ koˋ nenˇ voi inˊ seuˋ siidˋ tai oˊ ， gu soˋ teuˇ baiˋ nginˇ gongˋ 「 gau fa poiˇ hoˋ nginˇ 」。	看見弱勢的人不要欺侮他，因為有可能會因小失大，所以古人說「以小賠大、以壞賠好，最後是自己得不償失」。
lbk04_118	這個人古古怪怪忒狡猾，做朋友毋得。	iaˋ ge nginˇ guˋ guˋ guai guai tedˋ gauˋ vad ， zo penˇ iuˊ mˇ dedˋ 。	這個人刁鑽古怪不老實，不能當朋友。
lbk04_119	𠊎這下在這做生理，拜託你有機會愛來同𠊎交關。	ngaiˇ iaˋ ha tiˊ iaˋ zo senˊ liˊ ， bai togˋ ngˇ iuˊ giˊ fi oi loiˇ tungˇ ngaiˇ gauˊ gonˊ 。	我現在在這裡做生意，拜託你有機會要來跟我買哦！
lbk04_120	美濃有一句老話講：「交官窮，交鬼死，交著牽牛刮仔蝕了米。」這個意思係講，交朋友愛細義，交著毋好个會了身家。	miˇ nungˇ iuˊ idˋ gi loˋ fa gongˋ ：「 gauˊ gonˊ kiungˇ ， gauˊ guiˋ xiˋ ， gauˊ doˋ kianˊ ngiuˇ guadˋ eˋ sad liauˋ miˋ 。」 iaˋ ge i sii he gongˋ ， gauˊ penˇ iuˊ oi se ngi ， gauˊ doˋ mˇ hoˋ ge voi liauˋ siinˊ gaˊ 。	美濃有句俗語說：「交到官員會窮困，交到損友是自找死路，交到花言巧語的牛販只會讓自己吃大虧。」這個意思是指交朋友要謹慎小心，交到壞朋友會身敗名裂。
lbk04_121	頭擺美濃人講：「教好他人子，教吔好來自家無好使。」故所人毋好忒多嘴、忒雞婆。	teuˇ baiˋ miˇ nungˇ nginˇ gongˋ ：「 gauˊ hoˋ taˊ nginˇ ziiˋ ， gauˊ eˋ hoˋ loiˇ qid gaˊ moˇ hoˋ siiˋ 。」 gu soˋ nginˇ mˇ hoˋ tedˋ doˊ zoi 、 tedˋ gieˇ boˇ 。	以前美濃人說：「教好別人的小孩，即使你教會了，別人未必會感恩。」所以人不需太多嘴或太愛管閒事。
lbk04_122	人講：三年一小運，五年一大運，係一時堵著壞運毋使去愁佢，時間到吔，自然會交運脫運。	nginˇ gongˋ ： samˊ ngianˇ idˋ seuˋ iun ， ngˋ ngianˇ idˋ tai iun ， he idˋ siiˇ duˇ doˋ faiˋ iun mˇ siiˋ hi seuˇ iˇ ， siiˇ gianˊ do eˇ ， cii ianˇ voi gauˊ iun todˋ iun 。	有人說：三年一小運，五年一大運，若一時運氣不好不用煩惱，一段時間後，自然就會轉運了。
lbk04_123	一百零年前，南隆地區係北部人下來開庄个，佢等過苦蓋會計較，美濃在地人會㖸講：「交南毋交北，交北屌毋得」，有息把仔看輕人个意思。	idˋ bagˋ nangˇ ngianˇ qienˇ ， namˇ lungˇ ti kiˊ he bedˋ pu nginˇ haˊ loiˇ koiˊ zongˊ ge ， iˇ denˊ go kuˋ goi voi gie gauˋ ， miˇ nungˇ cai ti nginˇ voi nagˋ gongˋ ：「 gauˊ namˇ mˇ gauˊ bedˋ ， gauˊ bedˋ diauˋ mˇ dedˋ 」， iuˊ xidˋ baˋ eˊ kon kiangˊ nginˇ ge i sii 。	一百多年前，美濃的南隆地區是北客南下開墾的，他們（北客）生活困苦又愛計較，當地的美濃人會笑說：「交南不要交北，交北不可理喻」，有點輕視之意。
lbk04_124	「教你學打獅，拿著被單，就覺著會弄獅頭。」這就係㖸不受教个後生仔，學著一兩項手藝，就覺得自家蓋會吔，想出師吔！	「 gauˊ ngˇ hog daˋ siiˊ ， naˊ doˋ piˊ danˊ ， qiu gogˋ doˋ voi nung siiˊ teuˇ 。」 iaˋ qiu he nagˋ budˋ su gau ge heu sangˊ eˋ ， hog doˋ idˋ liongˋ hong suˋ ngi ， qiu gogˋ doˋ qid gaˊ goi voi eˇ ， xiongˋ cudˋ siiˊ eˇ ！	「才教你如何舞獅，一拿到被單，就覺得自己很厲害，會跳上桌子舞弄獅頭了。」這是譏笑不受教的年輕人，才剛學會一兩項手藝，就覺得自己很厲害，想要開店當老闆了。
lbk04_125	同朋友來去，愛真情真意、交人交心。	tungˇ penˇ iuˊ loiˇ hi ， oi ziinˊ qinˇ ziinˊ i ， gauˊ nginˇ gauˊ ximˊ 。	跟朋友往來，要真誠、真心交往。
lbk04_126	頭擺人有講：「交人愛交心，淋樹愛淋根。」意思係大家交朋友愛真心、有信用。	teuˇ baiˋ nginˇ iuˊ gongˋ ：「 gauˊ nginˇ oi gauˊ ximˊ ， limˇ su oi limˇ ginˊ 。」 i sii he tai gaˊ gauˊ penˇ iuˊ oi ziinˊ ximˊ 、 iuˊ xin iung 。	古人說：「交朋友要真心相待，如同澆樹水要深入根部。」意思是大家交朋友要真誠、講信用。
lbk04_127	做麼个事情都愛同人「交涉打合」，毋好自家大主大意。	zo maˋ ge sii qinˇ duˊ oi tungˇ nginˇ「 gauˊ sab daˋ hab 」， mˇ hoˋ qid gaˊ tai zuˋ tai i 。	做任何事情都要與人洽談，不要自己自作主張。
lbk04_128	厥面帕粄店今晡日開張，嗄一下仔來吔五六張桌个人客，害佢無閒啊交手亂造。	iaˊ mien pa banˋ diam ginˊ buˊ ngidˋ koiˊ zongˊ ， sa idˋ ha eˊ loiˇ eˇ ngˋ liugˋ zongˊ zogˋ ge nginˇ hagˋ ， hoi iˇ moˇ hanˇ a gauˊ suˋ lon co 。	他的粄條店今天開張，卻一下子來了五六桌的客人，她忙到手忙腳亂。
lbk04_129	這隻猴仔搞搞怪怪，摝啊𠊎腦轉。	iaˋ zagˋ heuˇ eˋ gauˋ gauˋ guai guai ， lugˋ a ngaiˇ dinˊ dinˊ noˋ zonˋ 。	這個小鬼調皮搗蛋，喜歡捉弄人，把我搞得團團轉。
lbk04_130	佢恁大將，你恁細隻，還想愛同人相打，搞膦好！	iˇ anˋ tai jiongˋ ， ngˇ anˋ se zagˋ ， hanˇ xiongˋ oi tungˇ nginˇ xiongˊ daˋ ， gauˋ linˋ hoˋ ！	他這麼高大，你個子這麼小，還想跟人打架，真不自量力！
lbk04_131	𠊎等還細盡好搞泥團。	ngaiˇ nenˊ hanˇ se qin hau gauˋ naiˇ tonˇ 。	我們小時候很喜歡玩泥巴。
lbk04_132	你一入屋就嘓無停，毋會𤸁吓？	ngˇ idˋ ngib vugˋ qiu ged moˇ tinˇ ， mˇ voi kioi haˋ ？	你一回到家就說個不停，不累嗎？。
lbk04_133	人在該睡當晝目，你等細人仔毋好在伙房裡鋸鋸嘵嘵。	nginˇ teˊ ge soi dongˊ zu mugˋ ， ngˇ nenˊ se nginˇ eˋ mˇ hoˋ teˊ foˋ fongˇ liˇ gi gi giau giau 。	別人在睡午覺，你們小孩子不要在伙房中大聲吵鬧。
lbk04_134	外背毋知發生麼个事，仰會有鋸鋸滾个聲音呢？	lo boi mˇ diˊ fadˋ senˊ maˋ ge sii ， ngiongˋ voi iuˊ gi gi gunˋ ge sangˊ imˊ noˋ ？	外面發生了什麼事，怎會有這麼尖銳刺耳的聲音呢？
lbk04_135	頭擺細妹仔嫁人，都會隨身帶等髻索、茶箍。	teuˇ baiˋ se moi eˋ ga nginˇ ， duˊ voi suiˇ siinˊ dai nenˋ gi sogˋ 、 caˇ guˊ 。	以前女子出嫁，都會隨身攜帶髮繩和肥皂。
lbk04_136	鋸樹倒樵，對頭擺个客家人來講，係盡清苦个事頭。	gi su doˋ ceuˇ ， dui teuˇ baiˋ ge hagˋ gaˊ nginˇ loiˇ gongˋ ， he qin qinˊ kuˋ ge se teuˇ 。	鋸木砍柴，對早期的客家人來說，是很辛苦的事。
lbk04_137	這下个地球溫度緊來緊高，鋸樹抹莖个事情絕對毋好再做，係無後代人會看毋著將來。	iaˋ ha ge ti kiuˇ vunˊ tu ginˋ loiˇ ginˋ goˊ ， gi su madˋ ginˊ ge sii qinˇ qied dui mˇ hoˋ zai zo ， he moˇ heu toi nginˇ voi kon mˇ doˋ jiongˊ loiˇ 。	現在地球溫度越來越高，破壞樹林的事情絕不能再發生，否則後代會看不見未來在哪裡。
lbk04_138	愛相打時，該男仔人髻鬃一捋就出手吔。	oi xiongˊ daˋ siiˇ ， ge namˇ eˋ nginˇ gi zungˊ idˋ lod qiu cudˋ suˋ eˇ 。	要打架時，那男人把髮髻向後一甩就出手了。
lbk04_139	市場項一哪仔嘰嘰嘎嘎，盡鬧熱。	sii congˇ hong idˋ naiˋ eˋ giˊ giˊ gaˇ gaˇ ， qin nau ngiad 。	菜市場裡到處都人聲鼎沸，很熱鬧。
lbk04_140	𠊎盡肚飢吔，肚屎一下在該嘰嘰膏膏。	ngaiˇ qin duˋ giˊ eˇ ， duˋ siiˋ idˋ ha teˊ geˋ giˊ giˊ goˇ goˇ 。	我很餓了，現在肚子在嘰哩咕嚕叫了。
lbk04_141	這凳仔無緪吔，一坐啊下就嘰嘰咭咭。	iaˋ den eˋ moˇ henˇ eˇ ， idˋ coˊ a haˊ qiu giˇ giˇ gid gid 。	這椅子鬆了，一坐下就發出吱嘎聲響。
lbk04_142	坐下來定定仔愐，想看啊若東西會跌啊在哪，毋使在該挾上挾下。	coˊ haˊ loiˇ tin tin eˊ menˋ ， xiongˋ kon a ngiaˊ dungˊ xiˊ voi diedˋ a tiˊ laiˋ ， mˇ siiˋ teˊ geˋ giab songˊ giab haˊ 。	坐下來慢慢想，看你的東西會掉在哪裡，不用在那裡走來走去。
lbk04_143	你都毋係結舌仔，仰見看著細妹仔，一講話就特特突突。	ngˇ duˊ mˇ he giadˋ sad eˋ ， ngiongˋ gian kon doˋ se moi eˋ ， idˋ gongˋ fa qiu tid tid tud tud 。	你本來就沒有口吃，怎麼每次一看到女孩子，講話就結結巴巴。
lbk04_144	無閒吔歸隻月个事頭，今晡日總算解索脫軛吔！	moˇ hanˇ eˇ guiˊ zagˋ ngiad ge se teuˇ ， ginˊ buˊ ngidˋ zungˋ son giaiˋ sogˋ todˋ agˋ eˇ ！	忙了整個月的事情，今天總算解脫了！
lbk04_145	做麼个事情愛提前詳細計畫，做毋得臨臨時，故所頭擺人會講：「檢漏趁天晴，讀書趕後生。」	zo maˋ ge sii qinˇ oi tiˇ qienˇ xiongˇ se gie vag ， zo mˇ dedˋ limˇ limˇ siiˇ ， gu soˋ teuˇ baiˋ nginˇ voi gongˋ ：「 giamˋ leu ciin tienˊ qiangˇ ， tug suˊ gonˋ heu sangˊ 。」	做事要提早詳細規劃，不要臨時起意急就章，所以古人說：「修房補漏要趁天晴，讀書要趁年輕。」
lbk04_146	人同人來去，本成有息把仔人情面目，故所大家會講「見面三分情」，就係恁呢个道理。	nginˇ tungˇ nginˇ loiˇ hi ， bunˋ sangˇ iuˊ xidˋ baˋ eˊ nginˇ qinˇ mien mugˋ ， gu soˋ tai gaˊ voi gongˋ 「 gian mien samˊ funˊ qinˇ 」， qiu he anˋ neˊ ge to liˊ 。	人與人交往，自然有一些人情世故，所以大家會顧及彼此的情面好溝通，就是這個道理。
lbk04_147	這個人做人毋老實、虛虛假假，𠊎看佢見人講人話，見鬼講鬼話。	iaˋ ge nginˇ zo nginˇ mˇ loˋ siid 、 hiˊ hiˊ gaˋ gaˋ ， ngaiˇ kon iˇ gian nginˇ gongˋ nginˇ fa ， gian guiˋ gongˋ guiˋ fa 。	這個人做人不老實、真真假假，我看他講話心口不一、口是心非。
lbk04_148	𠊎老弟毋老實，見做事情盡會奸雄，會推來推去蓋得人畏。	ngaiˇ loˋ taiˊ mˇ loˋ siid ， gian zo sii qinˇ qin voi gianˊ hiungˇ ， voi toiˊ loiˇ toiˊ hi goi dedˋ nginˇ vi 。	我弟弟不老實，每次做事很會偷懶，推三阻四的很討厭。
lbk04_149	𠊎隔壁个伯姆蓋才過，無老公又愛畜五六個細人仔，生活蓋艱辛。	ngaiˇ gagˋ biagˋ ge bagˋ meˊ goi coiˇ go ， moˇ loˋ gungˊ iu oi hiugˋ ngˋ liugˋ ge se nginˇ eˋ ， senˊ fad goi gianˊ xinˊ 。	我隔壁的伯母很可憐，失去丈夫又要養五六個小孩，生活很辛苦。
lbk04_150	這個豬肚分師傅炒啊蓋好，食起來蓋堅嗒。	iaˋ ge zuˊ duˋ bunˊ siiˊ fu cauˋ a goi hoˋ ， siid hiˋ loiˇ goi gianˊ dag 。	這個豬肚師傅炒得相當好，吃起來很有咬勁。
lbk04_151	做爺哀个人係無田無地，又愛畜細人仔讀書，實在艱艱辛辛嶄然為難。	zo iaˇ oiˊ ge nginˇ he moˇ tienˇ moˇ ti ， iu oi hiugˋ se nginˇ eˋ tug suˊ ， siid cai gianˊ gianˊ xinˊ xinˊ zamˋ manˇ viˇ nanˇ 。	為人父母若沒有田地耕種，又要教養、栽培子女讀書，實在是很艱困辛苦的。
lbk04_152	交朋友愛定定仔擇，毋好擇著奸雄鬼計个人來做朋友。	gauˊ penˇ iuˊ oi tin tin eˊ tog ， mˇ hoˋ tog doˋ gianˊ hiungˇ guiˋ gie ge nginˇ loiˇ zo penˇ iuˊ 。	交朋友要小心選擇，不要選到會使用手段的人來做朋友。
lbk04_153	阿三伯嶄然堅耐，每日愛去山項㧡百過斤樵下去平地賣，正買米歸去分細人仔食，講得生活蓋清苦。	aˊ samˊ bagˋ zamˋ manˇ gianˊ ngai ， miˊ ngidˋ oi hi sanˊ hong kaiˊ bagˋ go ginˊ ceuˇ haˊ hi piangˇ ti mai ， nang maiˊ miˋ guiˊ hi bunˊ se nginˇ eˋ siid ， gongˋ dedˋ senˊ fad goi qinˊ kuˋ 。	阿三伯非常堅忍，每天到山上挑一百多斤的柴去平地賣，才買米回家給小孩子吃，生活很辛苦。
lbk04_154	這下禾仔毋曾大，就無麼个收入，續等又堵著發風搓落大雨，生活越至清苦，頭擺人就安到「堅霜耐雪」。	iaˋ ha voˇ eˋ mˇ qienˇ tai ， qiu moˇ maˋ ge suˊ ngib ， sa denˋ iu duˇ doˋ bodˋ fungˊ caiˊ log tai iˋ ， senˊ fad iad zii qinˊ kuˋ ， teuˇ baiˋ nginˇ qiu onˊ do 「 gianˊ songˊ ngai xiedˋ 」。	現在稻子還沒長大，沒什麼收入，接著又遭到颱風、大雨的摧殘，導致生活更困苦，以前的人就稱為「堅霜耐雪」。
lbk04_155	勤儉个人，生活簡簡單單，鹹菜蘿蔔仔就做得過一餐。	kiunˇ kiam ge nginˇ ， senˊ fad gianˋ gianˋ danˊ danˊ ， hamˇ coi loˇ ped eˋ qiu zo dedˋ go idˋ conˊ 。	勤儉的人，生活非常簡單，酸菜蘿蔔就可以配一餐飯。
lbk04_156	𠊎隔壁个細妹仔眼界蓋高，揀揀擇擇擇到今還毋曾嫁出去。	ngaiˇ gagˋ biagˋ ge se moi eˋ ngianˋ giai goi goˊ ， gianˋ gianˋ tog tog tog do ginˊ hanˇ mˇ qienˇ ga cudˋ hi 。	我隔壁的女孩，眼光很高、精挑細選，選到現在還沒嫁出去。
lbk04_157	做人毋好忒精忒會算，係無到尾會無蓋好个結果；頭擺人有講：「揀揀擇擇，擇著爛瓠杓；千揀萬揀，揀隻爛燈盞。」就係恁呢个道理哪！	zo nginˇ mˇ hoˋ tedˋ jinˊ tedˋ voi son ， he moˇ do miˊ voi moˇ goi hoˋ ge giadˋ goˋ ； teuˇ baiˋ nginˇ iuˊ gongˋ ：「 gianˋ gianˋ tog tog ， tog doˋ lan puˇ sog ； qienˊ gianˋ van gianˋ ， gianˋ zagˋ lan denˊ zanˋ 。」 qiu he anˋ neˊ ge to liˊ naˊ ！	做人不要太過於精打細算，不然到最後不會有好結果的；以前的人說：「千挑萬選，選來選去都沒選到一個好的東西。」就是這個道理呀！
lbk04_158	日頭恁烈去田坵裡做事，晒啊歸身仔捲皮扯𤊶，暗晡頭痛啊睡毋得。	ngidˋ teuˇ anˋ ladˋ hi tienˇ kiuˊ liˊ zo se ， sai a guiˊ siinˊ eˋ gianˋ piˇ caˋ ladˋ ， am buˊ teuˇ tung a soi mˇ dedˋ 。	艷陽高照去田裡工作，晒得全身皮膚刺痛，晚上痛到睡不著。
lbk04_159	這個細人仔蓋無規矩，將把食飯个筷仔揙上揙下，揀肥擇瘦，蓋無樣式。	iaˋ ge se nginˇ eˋ goi moˇ guiˊ giˋ ， jiongˊ baˋ siid fan ge kuai eˋ bienˋ songˊ bienˋ haˊ ， gianˋ piˇ tog ceu ， goi moˇ iong siidˋ 。	這個小孩子很沒禮貌，將筷子在菜盤裡翻來翻去、過分挑選，很沒教養。
lbk04_160	頭擺人愛討心臼或者嫁妹仔，愛尋蓋好个媒人，故所講「揀親不如擇媒」。	teuˇ baiˋ nginˇ oi toˋ ximˊ kiuˊ fed zaˋ ga moi eˋ ， oi qimˇ goi hoˋ ge moiˇ nginˇ ， gu soˋ gongˋ 「 gianˋ qinˊ budˋ iˇ tog moiˇ 」。	以前的人要娶媳婦或嫁女兒，要找好媒婆介紹，所以說「要選個好親家，不如找個好媒婆」。
lbk04_161	一般人做屋、做風水，會揀時擇日，尋良時吉日來起工。	idˋ banˊ nginˇ zo vugˋ 、 zo fungˊ suiˋ ， voi gianˋ siiˇ tog ngidˋ ， qimˇ liongˇ siiˇ gidˋ ngidˋ loiˇ hiˋ gungˊ 。	一般人蓋房子、做祖墳，會選擇良時吉日，挑個好日來開工。
lbk04_162	佢在金門做兵个時節，不時有發生炮戰，斷真係驚驚險險過日仔。	iˇ teˊ gimˊ munˇ zo binˊ ge siiˇ jiedˋ ， budˋ siiˇ iuˊ fadˋ senˊ pau zan ， don ziinˊ he giangˊ giangˊ hiamˋ hiamˋ go ngidˋ eˋ 。	他在金門當兵的時候，常會發生炮戰，日子過的驚險萬分。
lbk04_163	佢去放水，好點點仔竹頭下趖出一尾蛇哥，害佢驚潑潑仔嚇啊面呷青。	iˇ hi biong suiˋ ， hoˋ diamˋ diamˋ eˊ zugˋ teuˇ haˊ soˇ cudˋ idˋ miˊ saˇ goˊ ， hoi iˇ giangˊ pad pad eˊ hagˋ a mien gab qiangˊ 。	他去放水，忽然從竹叢裡跑出一條蛇，害他嚇得臉色發白。
lbk04_164	這個人見做麼个事情啱生撞死、舂上舂下完全毋驚死，膽識蓋好。	iaˋ ge nginˇ gian zo maˋ ge sii qinˇ ngamˊ sangˊ cong xiˋ 、 zungˊ songˊ zungˊ haˊ vanˇ qionˇ mˇ giangˊ xiˋ ， damˋ siidˋ goi hoˋ 。	這個人無論做什麼事都很激進，衝衝撞撞完全不怕死，很有膽識。
lbk04_165	你仰食麵包食啊頸挷挷仔。	ngˇ ngiongˋ siid mien bauˊ siid a giangˋ bangˊ bangˊ eˊ 。	你怎麼吃麵包吃得一直拉脖子。
lbk04_166	這個人生著頸頓頓仔。	iaˋ ge nginˇ sangˊ doˋ giangˋ dun dun eˊ 。	這個人長得身材矮小脖子短。
lbk04_167	你斯昨暗晡睡目偏著頸根麼？仰恁呢頸竵竵仔？	ngˇ siiˇ coˊ am buˊ soi mugˋ pienˊ doˋ giangˋ ginˊ meˇ ？ ngiongˋ anˋ neˊ giangˋ feˋ feˋ eˊ ？	你是昨晚睡覺落枕了嗎？怎麼這樣脖子歪一邊？
lbk04_168	你頸鋸鋸仔在該看麼个？	ngˇ giangˋ gi gi eˊ teˊ geˋ kon maˋ ge ？	你拉長脖子在那裏看什麼？
lbk04_169	寒人个時節，大路項會看著每一個人都頸縮縮仔。	honˇ nginˇ ge siiˇ jiedˋ ， tai lu hong voi kon doˋ miˊ idˋ ge nginˇ duˊ giangˋ sugˋ sugˋ eˊ 。	冷的時候，馬路上會看到每個人都縮著脖子。
lbk04_170	這張凳仔毋多主固吔，一坐啊下就會咭咭滾。	iaˋ zongˊ den eˋ mˇ doˊ zuˋ gu eˇ ， idˋ coˊ a haˊ qiu voi gid gid gunˋ 。	這張椅子不太穩固了，一坐下去就會咭咭叫。
lbk04_171	這張竹椅仔忒細張，坐啊下咭手咭腳毋鬆爽。	iaˋ zongˊ zugˋ iˋ eˋ tedˋ se zongˊ ， coˊ a haˊ gid suˋ gid giogˋ mˇ sungˊ songˋ 。	這張竹椅太小了，坐下去手腳都施展不開，不舒服。
lbk04_172	厥伯姆雞腸鴨肚，行到哪仔就嫌人嫌到哪仔。	iaˊ bagˋ meˊ gieˊ congˇ abˋ duˋ ， hangˇ do naiˋ eˋ qiu hiamˇ nginˇ hiamˇ do naiˋ eˋ 。	他的伯母氣度、器量狹小，到處嫌棄人家。
lbk04_173	你畜揫著雞雞鴨鴨，愛分倈仔、妹仔年下時節進補用个麼？	ngˇ hiugˋ qiuˊ doˋ gieˊ gieˊ abˋ abˋ ， oi bunˊ lai eˋ 、 moi eˋ ngianˇ haˊ siiˇ jiedˋ jin buˋ iung ge meˇ ？	你養了一大群雞鴨，要給兒子、女兒年底進補用的嗎？
lbk04_174	你這個人最無用，淨雞棲下絡㘔會。	ngˇ iaˋ ge nginˇ zuiˋ moˇ iung ， qiang gieˊ ji haˊ logˋ saiˊ voi 。	你這個人最沒用，只會待在家裡欺負自己人。
lbk04_175	這個新來嫂真冤枉，一日到暗分屋下人雞鉗雞啄。	iaˋ ge xinˊ loiˇ soˋ ziinˊ ianˊ vongˋ ， idˋ ngidˋ do am bunˊ lugˋ kaˊ nginˇ gieˊ kiamˇ gieˊ dugˋ 。	這剛嫁過來的媳婦真可憐，一天到晚被家裡人欺負。
lbk04_176	男女感情个事情雞強狗願，每一儕都無共樣。	namˇ ngˋ gamˋ qinˇ ge sii qinˇ gieˊ kiongˇ gieuˋ ngian ， miˊ idˋ saˇ duˊ moˇ kiung iong 。	男女之間的感情不能勉強，每個人的想法都不同。
lbk04_177	佢每日臨暗會帶恁多老弟、老妹去散步，蓋像雞嫲帶子。	iˇ miˊ ngidˋ limˇ am voi dai anˋ doˊ loˋ taiˊ 、 loˋ moi hi san pu ， goi qiong gieˊ maˇ dai ziiˋ 。	他每天傍晚會帶弟弟、妹妹們去散步，就好像母雞帶小雞。
lbk04_178	你想愛同佢倆儕做媒人，係做得成，雞嫲有褲著吔。	ngˇ xiongˋ oi tungˇ iˇ liongˋ saˇ zo moiˇ nginˇ ， he zo eˋ sangˇ ， gieˊ maˇ iuˊ fu zogˋ eˊ 。	你想幫他們兩個牽紅線，要成功是不太可能事啦。
lbk04_179	人講「雞嫲清火，雞公躁火」，愛食補斯愛勘裁自家个體質囉！	nginˇ gongˋ 「 gieˊ maˇ qinˊ foˋ ， gieˊ gungˊ cau foˋ 」， oi siid buˋ siiˇ oi kamˊ caiˇ qid gaˊ ge tiˋ ziidˋ loˊ ！	人家說「母雞清火、公雞上火」，要進補就要考量好自己的體質狀況喔！
lbk04_180	俗諺講：「雞嫲啼愛斬頭。」頭擺个婦人家淨有認做个份。	xiug ngian gongˋ ：「 gieˊ maˇ taiˇ oi zamˋ teuˇ 。」 teuˇ baiˋ ge fu nginˇ gaˊ qiang iuˊ ngin zo ge fun 。	俗話說：「母雞早晨啼叫要砍頭。」以前的婦女沒有地位，只能認份的做事。
lbk04_181	佢頭到嗙胲樣仔罵啊恁大聲，這下嗄分人都啊雞嘴變鴨嘴吔。	iˇ teuˇ do pangˊ goiˊ iong eˊ ma a anˋ tai sangˊ ， iaˋ ha sa bunˊ nginˇ duˊ a gieˊ zoi bien abˋ zoi eˇ 。	他剛剛罵得臉紅脖子粗，現在卻被反駁得一句都不敢吭了。
lbk04_182	你劈草个時節，該溝脣河嘴定著愛劈淨來喲！	ngˇ piagˋ coˋ ge siiˇ jiedˋ ， ge gieuˊ sunˇ hoˇ zoi tin cog oi piagˋ qiang loiˇ ioˊ ！	你除草的時候，溪圳、水溝的邊緣一定要除乾淨喲！
lbk04_183	你毋好在這狗呷烏蠅吔，共快去做事。	ngˇ mˇ hoˋ tiˊ iaˋ gieuˋ gab vuˊ inˇ eˇ ， kiung kuai hi zo se 。	你不要在這裡講一堆廢話了，趕快去做事。
lbk04_184	狗鉗貓逐，你係愛逐細妹仔，就愛了解人家个性仔。	gieuˋ kiamˇ meu giugˋ ， ngˇ he oi giugˋ se moi eˋ ， qiu oi liauˋ giaiˋ nginˇ gaˊ ge xin eˋ 。	狗和貓求偶的方式不同，你如果要追女朋友，就要了解對方的個性。
lbk04_185	你毋知「狗膦毋好比蠟燭」麼？好比个毋比，比啊自家面舐舐仔。	ngˇ mˇ diˊ 「 gieuˋ linˋ mˇ hoˋ biˋ lab zugˋ 」 meˇ ？ hoˋ biˋ ge mˇ biˋ ， biˋ a qid gaˊ mien seˊ seˊ eˊ 。	你不知道「不同的東西不能拿來相比」嗎？好比的不比，比得自己的臉都丟盡了。
lbk04_186	佢恁久行壞運、狗咬膦棍吔，做麼个都毋順。	iˇ anˋ giuˋ hangˇ faiˋ iun 、 gieuˋ ngauˊ linˋ gun eˇ ， zo maˋ ge duˊ mˇ sun 。	他最近走霉運了，做什麼都不順利。
lbk04_187	該人看高無看低，毋使望佢牽成，你無聽過「狗咬著爛褲」這句話吓？	ge nginˇ kon goˊ moˇ kon daiˊ ， mˇ siiˋ mong iˇ kianˊ siinˇ ， ngˇ moˇ tangˊ go 「 gieuˋ ngauˊ zogˋ lan fu 」 iaˋ gi fa haˋ ？	那人看高不看低，別指望他會提拔你，你沒聽過「狗眼看人低」的話嗎？
lbk04_188	佢一生人好食懶做，無半息出息，斷真係「狗肉出桌毋得」。	iˇ idˋ senˊ nginˇ hau siid lanˊ zo ， moˇ ban xidˋ cudˋ xidˋ ， don ziinˊ he 「 gieuˋ ngiugˋ cudˋ zogˋ mˇ dedˋ 」。	他一輩子好吃懶做，沒半點出息，真的是讓人瞧不起（上不了檯面）。
lbk04_189	頭擺有人講：「狗肉滾三滾，神仙坐毋穩。」你敢有食過狗肉？	teuˇ baiˋ iuˊ nginˇ gongˋ ：「 gieuˋ ngiugˋ gunˋ samˊ gunˋ ， siinˇ xienˊ coˊ mˇ vunˋ 。」 ngˇ gamˋ iuˊ siid go gieuˋ ngiugˋ ？	以前有人說：「狗肉一滾燙，它的香氣連神仙都無法抵擋。」你吃過狗肉嗎？
lbk04_190	頭擺鄉下蓋多狗仔，不時看得著狗相孿。	teuˇ baiˋ hiongˊ ha goi doˊ gieuˋ eˋ ， budˋ siiˇ kon dedˋ doˋ gieuˋ xiongˊ langˇ 。	以前鄉下的狗很多，時常可以看到狗隻交配的情形。
lbk04_191	你毋使怨他人恁現實，頭擺人講：「狗相孿，各顧各」，這下个人乜相同。	ngˇ mˇ siiˋ ian taˊ nginˇ anˋ hian siid ， teuˇ baiˋ nginˇ gongˋ ：「 gieuˋ xiongˊ langˇ ， gogˋ gu gogˋ 」， iaˋ ha ge nginˇ me xiongˊ tungˇ 。	你不要埋怨別人現實，以前人說：「狗交配完後，都只顧處理自己」，現代人還不是一樣。
lbk04_192	這隻猴仔盡毋知靈性，不時都做出「狗相孿，行上前」个歪格事，故所分人㖸「戇猴」。	iaˋ zagˋ heuˇ eˋ qin mˇ diˊ linˇ xin ， budˋ siiˇ duˊ zo cudˋ 「 gieuˋ xiongˊ langˇ ， hangˇ songˊ qienˇ 」 ge vaiˊ giedˋ sii ， gu soˋ bunˊ nginˇ nagˋ 「 ngong heuˇ 」。	這人不太懂規矩，經常做出「狗交配時走向前看」的傻事，所以被人譏笑是「傻猴」。
lbk04_193	狗爭屎食，人為財死，這都係不時看得著个事情。	gieuˋ zangˊ siiˋ siid ， nginˇ vi coiˇ xiˋ ， iaˋ duˊ he budˋ siiˇ kon dedˋ doˋ ge sii qinˇ 。	狗搶吃屎，人為財死，這都是經常發生的事情。
lbk04_194	人講就毋聽，鬼牽就蠕蠕行，𠊎看你斯狗舂墓頭，尋死就有。	nginˇ gongˋ qiu mˇ tangˊ ， guiˋ kianˊ qiu nugˋ nugˋ hangˇ ， ngaiˇ kon ngˇ siiˇ gieuˋ zungˊ mung teuˇ ， qimˇ xiˋ qiu iuˊ 。	人勸你就不聽，鬼一牽你就立刻走，我看你是狗撞墳地，自找死路啊！
lbk04_195	你在這偷食東西係麼，仰將把揜仔弇上弇下？	ngˇ tiˊ iaˋ teuˊ siid dungˊ xiˊ he meˇ ， ngiongˋ jiongˊ baˋ kiebˋ eˋ giemˇ songˊ giemˇ haˊ ？	你在這裡偷吃東西嗎，怎麼不斷的將罩子又開又合？
lbk04_196	煮菜愛弇鑊蓋，菜正會過遽熟。	zuˋ coi oi giemˇ vog goi ， coi nang voi go giagˋ sug 。	煮菜要蓋上鍋蓋，菜才會較快熟。
lbk04_197	若冰箱个冷凍項仰無𠗻東西呢？	ngiaˊ benˊ xiongˊ ge langˊ dung hong ngiongˋ moˇ gien dungˊ xiˊ noˋ ？	你的冰箱冷凍庫怎麼沒有冰東西呢？
lbk04_198	這隻細狗仔分該隻大狗牯咬啊哽哽滾。	iaˋ zagˋ se gieuˋ eˋ bunˊ ge zagˋ tai gieuˋ guˋ ngauˊ a gienˇ gienˇ gunˋ 。	這隻小狗被那隻大狼狗咬得哽哽叫。
lbk04_199	這隻細人仔動啊著就噭眵，但係每擺都噭無目汁。	iaˋ zagˋ se nginˇ eˋ tungˊ a doˋ qiu gieu ziiˊ ， danˋ he miˊ baiˋ duˊ gieu moˇ mugˋ ziibˋ 。	這孩子動不動就哭，可是每次都是假哭。
lbk04_200	你恁呢噭上噭下毋會壞勢麼？	ngˇ anˋ neˊ gieu songˊ gieu haˊ mˇ voi faiˋ se meˇ ？	你這樣哭哭啼啼的，不會不好意思嗎？