美濃客家語寶典-09

美濃客家語寶典-09：

編號	例句	六堆客語拼音	華譯
lbk09_001	這事頭涼涼仔，一下氣擺就分𠊎做核吔。	iaˋ se teuˇ liongˇ liongˇ eˊ ，idˋ ha hi baiˋ qiu bunˊ ngaiˇ zo hedˋ eˇ。	這件事情很輕鬆，我一下子就把它做完了。
lbk09_002	人討親、嫁妹仔，都愛擇良時吉日，希望日後都有好日仔。	nginˇ toˋ qinˊ 、ga moi eˋ，duˊ oi tog liongˇ siiˇ gidˋ ngidˋ ，hiˊ mong ngidˋ heu duˊ iuˊ hoˋ ngidˋ eˋ 。	一般人迎娶、出嫁，都要選擇良辰吉日，希望日後都有好日子過。
lbk09_003	你同人打啊恁傷重，淨拿著這一息錢來會失禮，該「兩尖錢，打人个目珠都毋瞎」。	ngˇ tungˇ nginˇ daˋ a anˋ songˊ dong ，qiang naˊ doˋ iaˋ idˋ xidˋ qienˇ loiˇ fi siidˋ liˊ ，ge 「liongˋ jiamˊ qienˇ ，daˋ nginˇ ge mugˋ zuˊ duˊ mˇ hadˋ 」。	你把人打得這麼嚴重，只拿了這一點錢來道歉，簡直是欺人太甚。
lbk09_004	人講：「兩片相打愛人拖，雙方官司愛人和」，佢等兩儕恁逆，看你就出來同佢等兩片勸話、講和好吔！	nginˇ gongˋ ：「liongˋ pienˋ xiongˊ daˋ oi nginˇ toˊ ，sungˊ fongˊ gonˊ siiˊ oi nginˇ foˇ 」，iˇ denˊ liongˋ saˇ anˋ ngiag ，kon ngˇ qiu cudˋ loiˇ tungˇ iˇ denˊ liongˋ pienˋ kian va 、gongˋ foˇ hoˋ eˇ！	俗話說：「兩邊打架要人勸阻，雙方官司要人勸和」，他們兩個鬧得這麼凶，我看你就出來當和事佬，勸他們和好吧！
lbk09_005	佢等个政治立場無相同，見堵著面就惡擎擎仔，正式係「兩儕添鹽毋入味」，還難耐喔！	iˇ denˊ ge ziin zii lib congˇ moˇ xiongˊ tungˇ ，gian duˇ doˋ mien qiu ogˋ kiaˇ kiaˇ eˊ ，ziin siidˋ he 「liongˋ saˇ tiamˊ iamˇ mˇ ngib mi 」，hanˇ nanˇ ngai oˊ！	他們的政治立場不同，每次相遇就凶狠狠的，真如俗話說的：「兩人混不起來」，怎麼溝通都無效，真是麻煩喔。
lbk09_006	這個人蓋會做事，兩頭兩尾顧啊蓋圓滿。	iaˋ ge nginˇ goi voi zo sii ，liongˋ teuˇ liongˋ miˊ gu a goi ianˇ manˊ 。	這個人工作能力很好，能兼顧各個方面，事情處理得很圓滿。
lbk09_007	𠊎昨晡日騎車仔橫著，橫啊溜皮溜骨。	ngaiˇ coˊ buˊ ngidˋ kiˇ caˊ eˋ vang doˋ ，vang a liu piˇ liu gudˋ 。	我昨天騎車跌倒，摔到破皮流血。
lbk09_008	這個後生仔無去尋頭路，遛上遛下毋知想麼个喲！	iaˋ ge heu sangˊ eˋ moˇ hi qimˇ teuˇ lu ，liu songˊ liu haˊ mˇ diˊ xiongˋ maˋ ge ioˊ！	這個年輕人沒去找工作，到處走來走去不知在想什麼呢！
lbk09_009	隔壁个大學生，畢業過後毋尋頭路，溜溜漂漂一哪仔亍上亍下。	gagˋ biagˋ ge tai hog sangˊ ，bidˋ ngiab go heu mˇ qimˇ teuˇ lu ，liuˇ liuˇ piu piu idˋ naiˋ eˋ cogˋ songˊ cogˋ haˊ 。	隔壁的大學生，畢業後還不找工作，遊手好閒，到處閒逛。
lbk09_010	這個人從旦里來蓋會騙人，佢同人講：麼人个細人仔在河壩沉死吔，大家走去看，結果罶死人。	iaˋ ge nginˇ qiungˇ dan liˊ loiˇ goi voi pien nginˇ ，iˇ tungˇ nginˇ gongˋ ：maˋ nginˇ ge se nginˇ eˋ teˊ hoˇ ba ciim xiˋ eˇ，tai gaˊ zeuˋ hi kon ，giadˋ goˋ liuˋ xiˋ nginˇ 。	這個人一直都很會騙人，他跟人說：誰家的孩子在河裡溺水了，大家跑去看，結果是騙人的。
lbk09_011	這兜鴨仔陸陸續續跋上田脣。	iaˋ deuˊ abˋ eˋ liug liug xiug xiug bagˋ songˊ tienˇ siinˇ。	這些鴨子陸陸續續爬上田埂。
lbk09_012	這個人講話無修養，專門講粗話，感覺著佢蓋六畜哦！	iaˋ ge nginˇ gongˋ fa moˇ xiuˊ iongˊ ，zonˊ munˇ gongˋ cuˊ fa ，gamˋ gogˋ doˋ iˇ goi liugˋ hiugˋ oˊ ！	這個人說話沒口德，專門講些粗俗的話，讓人感覺很沒教養。
lbk09_013	農家人有畜豬仔、雞仔、鵝仔、鴨仔，愛過年吔，就會在豬欄下、雞棲下貼六畜興旺个紅紙。	nungˇ gaˊ nginˇ iuˊ hiugˋ zuˊ eˋ 、gieˊ eˋ 、ngoˇ eˋ 、abˋ eˋ ，oi go ngianˇ eˇ，qiu voi teˊ zuˊ nanˇ haˊ 、gieˊ ji haˊ diabˋ liugˋ hiugˋ hinˊ vong ge fungˇ ziiˋ 。	一般農家有養豬、雞、鵝、鴨，要過年了，就會在豬舍、雞舍貼六畜興旺的春聯。
lbk09_014	這個男仔人同婦人家共下做事，蓋好講六六畜畜个話，大家聽啊面紅紅哦！	iaˋ ge namˇ eˋ nginˇ tungˇ fu nginˇ gaˊ kiung ha zo se ，goi hau gongˋ liugˋ liugˋ hiugˋ hiugˋ ge fa ，tai gaˊ tangˊ a mien fungˇ fungˇ oˊ ！	這個男子跟婦人一起工作，喜歡說粗魯的話，大家聽得面紅耳赤哦！
lbk09_015	頭擺美濃有一句話講：「六月个日頭，後哀个拳頭」，就係講後哀過毒，過毋曉得惜前人子。	teuˇ baiˋ miˇ nungˇ iuˊ idˋ gi fa gongˋ ：「liugˋ ngiad ge ngidˋ teuˇ ，heu oiˊ ge kianˇ teuˇ 」，qiu he gongˋ heu oiˊ go tug ，go mˇ hiauˋ dedˋ xiagˋ qienˇ nginˇ ziiˋ 。	以前美濃俗話說：「六月酷熱的太陽，像是壞繼母的拳頭」，也就是說繼母冷漠無情，較不疼愛前妻的小孩。
lbk09_016	頭擺打獵个人，不時愛上山躘竻棚。	teuˇ baiˋ daˋ liab ge nginˇ ，budˋ siiˇ oi songˊ sanˊ liungˊ nedˋ pangˇ 。	以前打獵的人，上山時經常要穿越荊棘叢。
lbk09_017	還細無哪好尞，看著防空壕，大家會在該躘上躘下搞尞。	hanˇ se moˇ naiˋ hoˋ liau ，kon doˋ fongˇ kungˊ hoˇ ，tai gaˊ voi teˊ geˋ liungˊ songˊ liungˊ haˊ gauˋ liau。	小時候沒地方好玩，看到防空洞，大家會在那裡鑽來鑽去玩耍。
lbk09_018	手恁久蓋軟，𠊎會摞藥膏來止痠軟。	suˋ anˋ giuˋ goi ngionˊ ，ngaiˇ voi lo iog gauˊ loiˇ ziiˋ sonˊ ngionˊ 。	最近手很酸，我會擦藥膏來止酸痛。
lbk09_019	𠊎胃腸毋好，落落仔會食胃藥來止痛。	ngaiˇ vi congˇ mˇ hoˋ ，lo lo eˊ voi siid vi iog loiˇ ziiˋ tung 。	我的胃腸不好，偶爾會吃胃藥來止痛。
lbk09_020	頭擺有人生活蓋苦，無飯好食就煠番薯攞鹽食，看起來實在才過。	teuˇ baiˋ iuˊ nginˇ senˊ fad goi kuˋ，moˇ fan hoˋ siid qiu sab fanˊ suˇ loˊ iamˇ siid ，kon hiˋ loiˇ siid cai coiˇ go 。	早期有人生活很困苦，沒飯可吃就蒸地瓜沾鹽吃，看起來真的很可憐。
lbk09_021	這兜愛做種个紅豆仔、綠豆仔，細人仔毋好去搞，搞啊攞攞合合蓋毋好做事。	iaˋ deuˊ oi zo zungˋ ge fungˇ teu eˋ 、liug teu eˋ ，se nginˇ eˋ mˇ hoˋ hi gauˋ ，gauˋ a loˊ loˊ gabˋ gabˋ goi mˇ hoˋ zo se 。	這些要培植的紅豆、綠豆種子，小孩子不要去玩，若玩到混雜了很不好處理。
lbk09_022	這下農家人開始愛落秧種菜吔，菜秧仔毋好攞攞交交，害人蓋毋好做頭路。	iaˋ ha nungˇ gaˊ nginˇ koiˊ siiˋ oi log iongˊ zungˋ coi eˇ，coi iongˊ eˋ mˇ hoˋ loˊ loˊ gau gau ，hoi nginˇ goi mˇ hoˋ zo teuˇ lu 。	現在農夫要開始培苗、種菜了，菜苗不要混在一起，會讓人很不好工作。
lbk09_023	拜託你毋好囉囉嗦嗦話緒恁多好無？蓋得人畏哦！	bai togˋ ngˇ mˇ hoˋ loˊ loˊ soˊ soˊ fa xi anˋ doˊ hoˋ moˇ ？goi dedˋ nginˇ vi oˊ ！	拜託你不要這麼多話好嗎？讓人很受不了。
lbk09_024	𠊎个細人仔，恁久同厥同學攞上攞下毋讀書，蓋得人愁哦！	ngaiˇ ge se nginˇ eˋ ，anˋ giuˋ tungˇ iaˊ tungˇ hog loˊ songˊ loˊ haˊ mˇ tug suˊ ，goi dedˋ nginˇ seuˇ oˊ ！	我的小孩子，最近和他的同學玩在一起不讀書，實在讓人擔心呀！
lbk09_025	籮䈪畚箕還係頭擺人用竹頭、篾仔做个東西，這個時代已經看毋著吔！蓋可惜！	loˇ gagˋ bun giˊ hanˇ he teuˇ baiˋ nginˇ iung zugˋ teuˇ 、med eˋ zo ge dungˊ xiˊ ，iaˋ ge siiˇ toi iˋ ginˊ kon mˇ doˋ eˇ！goi koˋ xidˋ ！	這些籮、箕等盛物的竹製品是以前人用竹子、竹片做成的東西，現在這個時代已經很少見了！很可惜！
lbk09_026	地理師傅拿等羅經八卦，照神針指个方向來辨識方位、擇時、揀日。	ti liˊ siiˊ fu naˊ nenˋ loˇ ginˊ badˋ gua ，zeu siinˇ ziimˊ ziiˋ ge fongˊ hiong loiˇ pien siidˋ fongˊ vi 、tog siiˇ 、gianˋ ngidˋ 。	地理師拿著羅盤，依照神針指向來辨識方位、挑時辰、選日子。
lbk09_027	頭擺人講：「蘿蔔仔挷核吔，空本樣還在」，一般係講來安慰婦人家个話緒。	teuˇ baiˋ nginˇ gongˋ ：「loˇ ped eˋ bangˊ hedˋ eˇ，kangˊ bunˋ iong hanˇ coiˊ 」，idˋ banˊ he gongˋ loiˇ onˊ vi fu nginˇ gaˊ ge fa xi 。	以前人家說：「蘿蔔拔了，洞依舊在」，一般是指安慰婦人的話語。
lbk09_028	頭擺人種菜，大家都知啊「蘿蔔白菜蔥，多用大糞攻」。	teuˇ baiˋ nginˇ zung coi ，tai gaˊ duˊ diˊ a 「loˇ ped pag coi cungˊ ，doˊ iung tai bun gungˊ 」。	以前的人種菜，大家都知道種植蘿蔔、白菜、蔥，要多用糞便施肥。
lbk09_029	唉！做阿姆个就係恁呢勞心擘肚，不管時都愁細人仔著毋燒、食毋飽、過著毋好。	aiˋ ！zo aˊ meˊ ge qiu he anˋ neˊ loˇ ximˊ bagˋ duˋ ，budˋ gonˋ siiˇ duˊ seuˇ se nginˇ eˋ zogˋ mˇ seuˊ 、siid mˇ bauˋ 、go doˋ mˇ hoˋ 。	唉！當媽媽的就是這樣牽腸掛肚，隨時都在擔心孩子穿不暖、吃不飽、過得不好。
lbk09_030	老古人講：「老伯勞會掞弓，師父狗會打倒蹤。」這係講，人生个經驗係蓋寶貴个，做得分人閃核蓋多危險。	loˋ guˋ nginˇ gongˋ ：「loˋ bagˋ loˇ voi iam giungˊ ，siiˊ fu gieuˋ voi daˋ do jiungˊ 。」iaˋ he gongˋ ，nginˇ senˊ ge ginˊ ngiam he goi boˋ gui ge ，zo dedˋ bunˊ nginˇ samˋ hedˋ goi doˊ munˇ hiamˋ 。	俗話說：「有經驗的伯勞鳥能避開陷阱，有經驗的獵狗會包抄。」這個意思是說，人生的經驗是很寶貴的，可以讓人避開很多危險。
lbk09_031	佢恁多兄弟為著財產灂啊醹注，這下總算叔公出面來調解吔，老斧頭下山定著就無問題个啦！	iˇ anˋ doˊ hiungˊ ti vi doˋ coiˇ sanˋ jiog a neuˇ zu ，iaˋ ha zungˋ son sugˋ gungˊ cudˋ mien loiˇ tiauˇ giaiˋ eˇ，loˋ buˋ teuˇ haˊ sanˊ tin cog qiu moˇ mun tiˇ ge laˋ！	他們兄弟為了財產吵得不可開交，現在總算叔公出面來調解了，由家族長輩出面處理，一定就沒問題了。
lbk09_032	你寫个字恁潦草，等下若姆定著會喚你捽核重寫。	ngˇ xiaˋ ge sii anˋ loˋ coˋ ，denˋ ha ngiaˊ meˊ tin cog voi vonˋ ngˇ cud hedˋ cungˇ xiaˋ 。	你寫的字這麼潦草，等一下妳媽媽一定會叫你擦掉重寫。
lbk09_033	阿禮伯不時在該道嘆：「𠊎這老刀嫲無鋼吔！細人仔講毋聽吔！」	aˊ liˊ bagˋ budˋ siiˇ teˊ geˋ to tan ：「ngaiˇ iaˋ loˋ doˊ maˇ moˇ gong eˇ！」se nginˇ eˋ gongˋ mˇ tangˊ eˇ。	阿禮伯常嘆氣說：「我人老力衰了！小孩子都不聽話了！」
lbk09_034	頭擺人講：「老吔正學吹笛，學吔會來頭毛鬚白。」意思係愛鼓勵大家趕後生，頭腦靈活、體力好个時節好好仔學兜東西。	teuˇ baiˋ nginˇ gongˋ ：「loˋ eˇ ngiang hog coiˊ tag ，hog eˇ voi loiˇ teuˇ moˊ xiˊ pag 。」i sii he oi guˋ li tai gaˊ gonˋ heu sangˊ， teuˇ noˋ linˇ fad 、tiˋ lid hoˋ ge siiˇ jiedˋ hoˋ hoˋ eˊ hog deuˊ dungˊ xiˊ 。	以前人說：「年紀大了才要學技藝，一切都稍晚了些。」意思是要鼓勵大家趁年輕頭腦靈活、體力好的時候好好的學些東西。
lbk09_035	這個大樹筒老鋸鋸仔，鋸又毋得斷。	iaˋ ge tai su tungˇ loˋ gi gi eˊ ，gi iu mˇ dedˋ tonˊ 。	這個樹幹是一棵紮實的老樹，很難鋸斷。
lbk09_036	這個菜瓜仔老敲敲仔，食起來全渣，哪吞得落胲？	iaˋ ge coi guaˊ eˋ loˋ kau kau eˊ ，siid hiˋ loiˇ qionˇ zaˊ，nai tunˊ dedˋ log goiˊ ？	這個絲瓜太老了，吃起來都是渣，哪吞得下？
lbk09_037	你做事仰恁呢潦潦草草，𠊎實在蓋看毋下去。	ngˇ zo sii ngiongˋ anˋ neˊ loˋ loˋ coˋ coˋ ，ngaiˇ siid cai goi kon mˇ haˊ hi 。	你做事怎麼這麼隨便，我實在很看不下去。
lbk09_038	頭擺舊曆二月做大戲个時節，歸莊頭家家戶戶老老嫩嫩都會來看戲。	teuˇ baiˋ kiu lag ngi ngiad zo tai hi ge siiˇ jiedˋ ，guiˊ zongˊ teuˇ gaˊ gaˊ fu fu loˋ loˋ nun nun duˊ voi loiˇ kon hi 。	以前農曆二月演平安戲的時候，整個庄頭家家戶戶老老少少都會來看戲。
lbk09_039	這個家族五代同堂人丁蓋旺，老老細細算起來怕有七十零個人。	iaˋ ge gaˊ cug ngˋ toi tungˇ tongˇ nginˇ denˊ goi vong ，loˋ loˋ se se son hiˋ loiˇ pa iuˊ qidˋ siib nangˇ ge nginˇ 。	這個家族五代同堂人丁很旺，老老少少算起來可能有七十多個人。
lbk09_040	人到老吔有時節會像細人仔樣仔蓋𢯭毋直，故所人會講：「老人成細」。	nginˇ do loˋ eˇ iuˊ siiˇ jiedˋ voi qiong se nginˇ eˋ iong eˊ goi ten mˇ ciid ，gu soˋ nginˇ voi gongˋ ：「loˋ nginˇ sangˇ se 」。	人老的時候有時會像小孩子一樣很固執又很拗，所以人家會說「老人成細」。
lbk09_041	佢前一駁仔歇院，這下出院歸來，行路還像老牛下崁樣仔，毋係蓋穩。	iˇ qienˇ idˋ bogˋ eˋ hed ian ，iaˋ ha cudˋ ian guiˊ loiˇ ，hangˇ lu hanˇ qiong loˋ ngiuˇ haˊ kam iong eˊ ，mˇ he goi vunˋ 。	他前一陣子住院，現在出院回來，走路還像老牛要下河岸一樣，不是很穩。
lbk09_042	𠊎測著你還係認份兜仔過好，頭擺人講：「老牛食嫩草，貪青會橫倒，貪嫩會哽著」，無斯有可能會晚節毋保。	ngaiˇ zedˋ doˋ ngˇ hanˇ he ngin fun deuˊ eˊ go hoˋ ，teuˇ baiˋ nginˇ gongˋ ：「loˋ ngiuˇ siid nun coˋ ，tamˊ qiangˊ voi vang doˋ，tamˊ nun voi gangˋ doˋ 」，moˇ siiˇ iuˊ koˋ nenˇ voi vanˋ jiedˋ mˇ boˋ 。	𠊎覺得你還是安分些比較好，以前人說：「老牛吃嫩草，貪青會摔倒，貪嫩會噎到」，若不安分可能會晚節不保。
lbk09_043	𠊎屋下不管老嫩大細都盡好唱歌仔。	ngaiˇ lugˋ kaˊ budˋ gonˋ loˋ nun tai se duˊ qin hau cong goˊ eˋ 。	我家中不管年紀大小都很喜歡唱歌。
lbk09_044	人講：「老成無蝕本」，做事情愛過老成兜仔，愐正來正做還係過穩當。	nginˇ gongˋ ：「loˋ siinˇ moˇ sad bunˋ」，zo sii qinˇ oi go loˋ siinˇ deuˊ eˊ ，menˋ zang loiˇ nang zo hanˇ he go vunˋ dong 。	俗話說：「做事老成不會吃虧」，做事情還是保守點兒比較好，考慮清楚了再做還是比較穩當。
lbk09_045	這頭樹仔生啊老孱孱仔，怕係長年營養不良嘎嘛？	iaˋ teuˇ su eˋ sangˊ a loˋ zanˊ zanˊ eˊ ，pa he congˇ ngianˇ inˇ iongˊ budˋ liongˇ gaˋ maˋ ？	這棵樹很老卻長不大，應該是長年營養不良吧？
lbk09_046	若衫袖攝好勢來，係無不時捋上捋下愛仰仔做事。	ngiaˊ samˊ qiu ngiabˋ hoˋ se loiˇ ，he moˇ budˋ siiˇ lod songˊ lod haˊ oi ngiongˋ eˊ zo se 。	把你的衣袖捲好，否則拉來拉去的要怎麼做事。？
lbk09_047	該騙仔本成想愛騙這老人家，看著巡查行兼來，就共快落瀉。	ge pien eˋ bunˋ sangˇ xiongˋ oi pien iaˋ loˋ nginˇ gaˊ ，kon doˋ siinˇ caˇ hangˇ giamˊ loiˇ ，qiu kiung kuai lod xia 。	那騙子本來想騙這位老人家，看到警察往這邊靠近，便趕快逃開。
lbk09_048	恁簡單个事情，人一氣擺就做好勢吔，你仰會拖吔一禮拜還無好，真還劣拙喔！	anˋ gianˋ danˊ ge sii qinˇ ，nginˇ idˋ hi baiˋ qiu zo hoˋ se eˇ，ngˇ ngiongˋ voi toˊ eˇ idˋ liˊ bai hanˇ moˇ hoˋ ，ziinˊ hanˇ lodˋ zodˋ oˊ！	這麼簡單的事情，別一人下子就完成了，為何你拖了一禮拜還沒好，真是差勁呀！
lbk09_049	木瓜係有息把黃就做得摘吔，莫等佢落蒂脫弓，跌下來就驚綿核吔！	mugˋ guaˊ he iuˊ xidˋ baˋ vongˇ qiu zo dedˋ zagˋ eˇ，mog denˋ iˇ lodˋ di todˋ giungˊ ，diedˋ haˊ loiˇ qiu giangˊ mienˇ hedˋ eˇ！	木瓜如果有一點熟便可以摘了，不要等它果實成熟後掉落，掉下來就怕摔爛了。
lbk09_050	樵杈愛綁緪來，係無落落擐擐毋驚散核麼？	ceuˇ ca oi bongˋ henˇ loiˇ ，he moˇ lodˋ lodˋ kuan kuan mˇ giangˊ san hedˋmeˇ ？	木柴要綑綁好，要不然鬆鬆散散的不怕散掉嗎？
lbk09_051	這個職員劣劣拙拙，做無麼个事頭，故所主管無麼敢用佢。	iaˋ ge ziidˋ ianˇ lodˋ lodˋ zodˋ zodˋ ，zo moˇ maˋ ge se teuˇ ，gu soˋ zuˋ gonˋ moˇ maˋ gamˋ iung iˇ 。	這個職員不能幹，做不了什麼事，所以主管不敢重用他。
lbk09_052	佢平常時就毋動毋𢱤，生成係一個劣拙貨。	iˇ pinˇ songˇ siiˇ qiu mˇ tungˊ mˇ sungˋ，sangˊ sangˇ he idˋ ge lodˋ zodˋ fo 。	他平時就懶惰無比，天生是一位差勁的人。
lbk09_053	佢今退休吔，生活盡樂板。	iˇ ginˊ tui hiuˊ eˇ，senˊ fad qin log banˋ 。	他現在退休了，生活非常逍遙自在。
lbk09_054	懶尸个人不時就想看啊有好尞無，故所正會有老古人講：「落雨落大大，懶人好自在，落雨落細細，懶人想無計。」	nanˊ siiˊ ge nginˇ budˋ siiˇ qiu xiongˋ kon a iuˊ hoˋ liau moˇ ，gu soˋ nang voi iuˊ loˋ guˋ nginˇ gongˋ ：「log iˋ log tai tai ，nanˊ nginˇ hoˋ cii cai ，log iˋ log se se ，nanˊ nginˇ xiongˋ moˇ gie 。」	懶惰的人經常會在想有沒有休息的機會，所以才會有俗話說：「雨下得大，懶人很自在；雨下得小，懶人便無計可施。」
lbk09_055	一般人有一個共同个想法，就係：人老吔，自然愛落葉歸根。	idˋ banˊ nginˇ iuˊ idˋ ge kiung tungˇ ge xiongˋ fabˋ，qiu he ：nginˇ loˋ eˇ，cii ianˇ oi log iab guiˊ ginˊ 。	一般人有一個共同概念，那就是：人老了，自然要落葉歸根。
lbk09_056	該台遊覽車對高速公路橫啊山腳下，實在落力。	ge toiˇ iuˇ nam caˊ dui goˊ sugˋ gungˊ lu vang a sanˊ giogˋ haˊ ，siid cai log lid 。	那部遊覽車從高速公路摔到山腳下，實在嚴重。
lbk09_057	若車仔駛起來落落滾，係毋係有麼个爭差？	ngiaˊ caˊ eˋ siiˋ hiˋ loiˇ log log gunˋ ，he mˇ he iuˊ maˋ ge zenˊ caˊ ？	你的車子開起來聽得到異物的滾動聲，是不是有什麼問題？
lbk09_058	佢這件事情做著毋好，無達著公司个要求，故所分公司處罰落馬吔。	iˇ iaˋ kian sii qinˇ zo doˋ mˇ hoˋ，moˇ tad doˋ gungˊ siiˊ ge ieuˊ kiuˇ ，gu soˋ bunˊ gungˊ siiˊ cuˋ fad log maˊ eˇ。	他這件事情處理得不好，沒達到公司的要求，所以被公司處罰降級了，
lbk09_059	佢這二三禮拜從日到夜無一時閒，搣啊佢落身元洩。	iˇ iaˋ liongˋ samˊ liˊ bai qiungˇ ngidˋ do ia moˇ idˋ siiˇ hanˇ ，miedˋ a iˇ log siinˊ ngianˇ xied 。	他這二三個禮拜從白天到黑夜無一刻得閒，弄得他身體疲勞，失去元氣。
lbk09_060	阿義哥人盡樂線，不時都看得著佢在該歡歡喜喜唱歌仔。	aˊ ngi goˊ nginˇ qin log xien ，budˋ siiˇ duˊ kon dedˋ doˋ iˇ teˊ geˋ fonˊ fonˊ hiˋ hiˋ cong goˊ eˋ 。	阿義哥人很逍遙自在，經常看得到他在高高興興唱歌。
lbk09_061	愛搞政治就愛有這種覺悟：「落選个現死，當選个殗啊死」。	oi gauˋ ziin zii qiu oi iuˊ iaˋ zungˋ gogˋ ngu ：「log xienˋ ge hian xiˋ ，dongˊ xienˋ ge ngiem a xiˋ 」。	想搞政治就要有這種覺悟：「落選的馬上死，當選的慢慢死」。
lbk09_062	今晡日愛開獎吔，還無落注个人共快。	ginˊ buˊ ngidˋ oi koiˊ jiongˋ eˇ，hanˇ moˇ log zu ge nginˇ kiung kuai 。	今天就要開獎了，還沒下注的人動作要快。
lbk09_063	阿土伯買著一張犖确車，騎無兩年就壞核吔！	aˊ tuˋ bagˋ maiˊ doˋ idˋ zongˊ logˋ kogˋ caˊ ，kiˇ moˇ liongˋ ngianˇ qiu faiˋ hedˋ eˇ！	阿土伯買了一部老舊難用的破車，騎不到兩年就壞了，
lbk09_064	這間公司个事頭樂樂仔，毋使麼个特別專長都做得。	iaˋ gianˊ gungˊ siiˊ ge se teuˇ logˋ logˋ eˊ，mˇ siiˋ maˋ ge tid pied zonˊ congˇ duˊ zo dedˋ 。	這間公司的工作很輕鬆，不用什麼特殊專長都可以。
lbk09_065	若這張車仔犖犖确确吔，好換新車仔吔。	ngiaˊ iaˋ zongˊ caˊ eˋ logˋ logˋ kogˋ kogˋ eˇ，hoˋ von xinˊ caˊ eˋ eˇ。	你這部車子已經破爛不堪了，可以換新車了。
lbk09_066	頭擺个人耕田蓋清苦，加減愛絡來食。	teuˇ baiˋ ge nginˇ gangˊ tienˇ goi qinˊ kuˋ ，gaˊ gamˋ oi logˋ loiˇ siid 。	以前的人耕種很辛苦，多多少少都會設法賺錢來糊口。
lbk09_067	美濃个男仔人，每暗晡加減都愛出去絡㘔掇食來添菜傍。	miˇ nungˇ ge namˇ eˋ nginˇ ，miˊ am buˊ gaˊ gamˋ duˊ oi cudˋ hi logˋ saiˊ dodˋ siid loiˇ tiamˊ coi bongˋ 。	美濃的男子，每天晚上要出去獵補一些食物來加菜。
lbk09_068	這個無身分个人，蓋毋知輕重，去分人請又想愛去廳下坐，這正式就係「絡食又想坐大位」。	iaˋ ge moˇ siinˊ fun ge nginˇ ，goi mˇ diˊ kiangˊ cungˊ ，hi bunˊ nginˇ qiangˋ iu xiongˋ oi hi tangˊ haˊ coˊ ，iaˋ ziin siidˋ qiu he 「logˋ siid iu xiongˋ coˊ tai vi 」。	這個遊民很不明事理，去給人請還想去大廳坐大位，真的是「喧賓奪主，不知廉恥的人」。
lbk09_069	頭擺美濃人講究耕田，「絡食宕人工」還係取笑無田耕種个人一哪仔去絡食个話。	teuˇ baiˋ miˇ nungˇ nginˇ gongˋ giu gangˊ tienˇ ，「logˋ siid tong nginˇ gungˊ 」hanˇ he qiˋ seu moˇ tienˇ gangˊ zung ge nginˇ idˋ naiˋ eˋ hi logˋ siid ge fa 。	以前的美濃人很重視耕田，「覓食浪費人力」是取笑沒田耕種的人到處去覓食的話。
lbk09_070	頭擺窮苦人愛一哪仔絡上絡下。	teuˇ baiˋ kiungˇ kuˋ nginˇ oi idˋ naiˋ eˋ logˋ songˊ logˋ haˊ 。	以前的窮苦人家要到處去尋找吃的。
lbk09_071	𠊎隔壁个阿叔去高雄上班，來來去去經過吔三十年。	ngaiˇ gagˋ biagˋ ge aˊ sugˋ hi goˊ hiungˇ songˊ banˊ ，loiˇ loiˇ hi hi ginˊ go eˇ samˊ siib ngianˇ。	我隔壁的叔叔去高雄上班，這樣往返經過了三十年。
lbk09_072	你這個事情毋使急，來日方長，還蓋多日仔啦！	ngˇ iaˋ ge sii qinˇ mˇ siiˋ gibˋ ，loiˇ ngidˋ fongˊ congˇ ，hanˇ goi doˊ ngidˋ eˋ laˋ！	你這件事情不要急，來日方長，未來的日子還很長啦！
lbk09_073	婦人家每隻月來洗，美濃人安到「來月」。	fu nginˇ gaˊ miˊ zagˋ ngiad loiˇ seˋ ，miˇ nungˇ nginˇ onˊ doˊ 「loiˇ ngiad 」。	婦女每個月月經來，美濃人稱為「來月」。
lbk09_074	頭擺美濃無「月經」个名詞，用「來洗」代表月經。	teuˇ baiˋ miˇ nungˇ moˇ 「ngiad ginˊ 」ge miangˇ ciiˇ ，iung 「loiˇ seˋ 」toi beuˋ ngiad ginˊ 。	以前美濃沒有「月經」這個名稱，用「來洗」代表月經。
lbk09_075	𠊎毋知頭橫著，手腳鑪出血吔。	ngaiˇ mˇ diˊ teuˇ vang doˋ ，suˋ giogˋ lu cudˋ hiadˋ eˇ。	我不小心跌倒，手腳擦傷流血了。
lbk09_076	頭擺做阿姆个人蓋才過，渡細人仔露露罅罅，畜毋得到大。	teuˇ baiˋ zo aˊ meˊ ge nginˇ goi coiˇ go ，tu se nginˇ eˋ lu lu la la ，hiugˋ mˇ dedˋ do tai 。	以前為人母是很可憐的，為照顧小孩每天手忙腳亂，非常辛苦。
lbk09_077	「路毋行毋平，人毋學毋成。」這句話係鼓勵後生人愛煞猛、認真做事。	「lu mˇ hangˇ mˇ piangˇ ，nginˇ mˇ hog mˇ sangˇ 。」iaˋ gi fa he guˋ li heu sangˊ nginˇ oi sadˋ mangˊ 、ngin ziinˊ zo sii 。	「路不走不會平坦；人不勤學習就不會成功。」這句話是鼓勵年輕人要努力、認真工作。
lbk09_078	佢兩儕毋好，在路頭路尾堵著無講話。	iˇ liongˋ saˇ mˇ hoˋ ，teˊ lu teuˇ lu miˊ duˇ doˋ moˇ gongˋ fa 。	他們兩個人不相往來，在路上遇到都不打招呼。
lbk09_079	霜降後，係美濃婦人家滷鹹菜个好時節。	songˊ gong heu ，he miˇ nungˇ fu nginˇ gaˊ luˊ hamˇ coi ge hoˋ siiˇ jiedˋ 。	霜降後，是美濃婦女醃酸菜的好時期。
lbk09_080	耕田做穡，定著愛攎褲腳个。	gangˊ tienˇ zo xidˋ ，tin cog oi luˇ fu giogˋ ge 。	耕田做農事，一定要把褲管拉高。
lbk09_081	這個人蓋無修養、蓋粗魯，一吵事就會攎膦綻朘。	iaˋ ge nginˇ goi moˇ xiuˊ iongˊ ，goi cuˊ luˇ ，idˋ cauˇ sii qiu voi luˇ linˋ can zoiˊ 。	這個人很沒修養、很粗魯，一吵架就會故意把性器官露出來侮辱對方。
lbk09_082	細倈仔、細妹仔兩儕相好个時節，不時會攎攎扐扐。	se lai eˋ 、se moi eˋ liongˋ saˇ xiongˊ hoˋ ge siiˇ jiedˋ ，budˋ siiˇ voi luˇ luˇ led led 。	男女兩人相愛的時候，常會互相擁抱、非常親密。
lbk09_083	耕田人去到田項就隨攎手捋腳，準備做事。	gangˊ tienˇ nginˇ hi do tienˇ hong qiu suiˇ luˇ suˋ lod giogˋ ，zunˋ pi zo se 。	農夫一到田裡就立刻捲起衣褲，準備工作。
lbk09_084	這個細人仔蓋毋好渡，會魯死人呢！	iaˋ ge se nginˇ eˋ goi mˇ hoˋ tu ，voi luˋ xiˋ nginˇ noˋ ！	這個小孩子很折磨人，不好照顧！
lbk09_085	這個矮山仔，不時會㪐石屎打著人。	iaˋ ge aiˋ sanˊ eˋ ，budˋ siiˇ voi ludˋ sag siiˋ daˋ doˋ nginˇ 。	這個小山丘，常會有小石震落打到人。
lbk09_086	頭擺，登常會看著有人逐羊仔去屻崗項食草，在半路項羊仔就會緊行緊㪐屎，一粒一粒个羊屎蓋像大粒个豆豉。	teuˇ baiˋ，denˊ songˇ voi kon doˋ iuˊ nginˇ giugˋ iongˇ eˋ hi ngin gongˊ hong siid coˋ，tiˊ ban lu hong iongˇ eˋ qiu voi ginˋ hangˇ ginˋ ludˋ siiˋ ，idˋ liab idˋ liab ge iongˇ siiˋ goi qiong tai liab ge teu sii 。	以前，經常會看到有人趕羊去山上吃青草，在半途羊隻就會邊走邊拉小顆粒狀的大便，一顆一顆的羊大便很像大顆的豆豉。
lbk09_087	當晝𠊎想在屋下自家熝粄仔食。	dongˊ zu ngaiˇ xiongˋ tiˊ lugˋ kaˊ qid gaˊ lug banˋ eˋ siid 。	中午我想在家裡自己燙粄條吃。
lbk09_088	你蓋像來摝博个呢！𠊎等做仔一朝晨个紅粄仔，你一來就分你搣啊變樣仔。	ngˇ goi qiong loiˇ lugˋ bogˋ ge neˊ ！ngaiˇ nenˊ zo eˇ idˋ zeuˊ siinˇ ge fungˇ banˋ eˋ ，ngˇ idˋ loiˇ qiu bunˊ ngˇ miedˋ a bien iong eˇ 。	你好像是來搗亂的呢！我們做了一整個早上的紅龜粿，你一來就被你搞得走樣了。
lbk09_089	奇怪！明明𠊎等早都計畫好个事情，仰會走展吔呢？定著係有人在該摝壞暗當。	kiˇ guai ！minˇ minˇ ngaiˇ nenˊ zoˋ duˊ gie vag hoˋ ge sii qinˇ ，ngiongˋ voi zeuˋ zanˋ eˇ noˋ ？tin cog he iuˊ nginˇ teˊ geˋ lugˋ faiˋ am dong 。	奇怪！明明我們早都計畫好了的事情，怎麼會出紕漏呢？一定是有人暗中在破壞。
lbk09_090	頭擺老人家會講：「屋下無畜半隻貓，老鼠仔會做大竇。」故所，一般人屋下都會畜隻貓仔來打老鼠。	teuˇ baiˋ loˋ nginˇ gaˊ voi gongˋ ：「lugˋ kaˊ moˇ hiugˋ ban zagˋ meu ，no cuˋ eˋ voi zo tai deu 。」gu soˋ ，idˋ banˊ nginˇ lugˋ kaˊ duˊ voi hiugˋ zagˋ meu eˋ loiˇ daˋ no cuˋ 。	以前老人家會說：「家裡沒養半隻貓，老鼠會做大窩。」所以，一般人家裡都會養隻貓來抓老鼠。
lbk09_091	你斯愛過有責任兜仔！「屋下無米煮，還毋願食粥」，屋下恁多大細愛畜，做个頭路又毋穩當，食東西還這揀該揀，像樣吓？	ngˇ siiˇ oi go iuˊ jidˋ im deuˊ eˊ！「lugˋ kaˊ moˇ miˋ zuˋ ，hanˇ mˇ ngian siid zugˋ 」，lugˋ kaˊ anˋ doˊ tai se oi hiugˋ ，zo ge teuˇ lu iu mˇ vunˋ dong ，siid dungˊ xiˊ hanˇ iaˋ gianˋ ge gianˋ ，qiong iong haˋ？
lbk09_092	你等這兜細人仔共快出去外背搞，毋好在這摝上摝下，害人做事毋得。	ngˇ denˊ iaˋ deuˊ se nginˇ eˋ kiung kuai cudˋ hi lo boi gauˋ ，mˇ hoˋ teˊ iaˋ lugˋ songˊ lugˋ haˊ ，hoi nginˇ zo se mˇ dedˋ 。	你們這些小孩趕快出去外面玩，不要在這裡干擾別人，害人家做不了事。
lbk09_093	你學著幾隻月个電子琴就想愛去參加表演，正經係摝水毋汶又好潑。	ngˇ hog doˋ giˋ zagˋ ngiad ge tien ziiˋ kimˇ qiu xiongˋ oi hi camˊ gaˊ beuˋ ianˊ ，ziin ginˊ he lugˋ suiˋ mˇ vunˇ iu hau bad。	你學了幾個月的電子琴就想去參加表演，真的是能力不夠又愛現。
lbk09_094	還細，吾姆會教𠊎用白飯摝糖水來打點心。	hanˇ se，ngaˊ meˊ voi gauˊ ngaiˇ iung pag fan lugˋ tongˇ suiˋ loiˇ daˋ diamˋ ximˊ 。	小時候，我媽媽會教我用白飯拌糖水來當點心。
lbk09_095	𠊎毋好在身項掛金鍊仔、耳環仔、手環仔這兜東西，感覺累累贅贅蓋毋方便。	ngaiˇ mˇ hau teˊ siinˊ hong gua gimˊ lien eˋ 、ngiˋ kuanˇ eˋ 、suˋ kuanˇ eˋ iaˋ deuˊ dungˊ xiˊ ，gamˋ gogˋ lui lui zui zui goi mˇ fongˊ pien 。	我不喜歡在身上掛項鍊、耳環、手環這些東西，感覺很累贅很不方便。
lbk09_096	𠊎每擺跈阿姆去蔗園項斫蔗仔，都係負責錑蔗根。	ngaiˇ miˊ baiˋ tenˇ aˊ meˊ hi za ianˇ hong zogˋ za eˋ ，duˊ he fu jidˋ lui za ginˊ 。	我每次跟媽媽到甘蔗園砍甘蔗，都是負責用刀把甘蔗根削淨。
lbk09_097	阿爸講，每擺水果摘淨過後就愛鐓樹桍，同多出來个、過累贅个鐓核。	aˊ baˊ gongˋ ，miˊ baiˋ suiˋ goˋ zagˋ qiang go heu qiu oi dunˊ su paˋ，tungˇ doˊ cudˋ loiˇ ge 、go lui zui ge dunˊ hedˋ 。	爸爸說，每次水果採完後就要砍掉一些枝椏，把多出來的、沒用的去掉。
lbk09_098	夏秋个時節，不時都係朝晨出日頭，下晝頭就雷公哐天啵大雨吔。	kia qiuˊ ge siiˇ jiedˋ ，budˋ siiˇ duˊ he zeuˊ siinˇ cudˋ ngidˋ teuˇ ，haˊ zu teuˇ qiu luiˇ gungˊ kuang tienˊ boˇ tai iˋ eˇ。	夏秋交替時節，常常都是早上出太陽，下午就雷聲震天下起大雨來。
lbk09_099	佢種个水果雖然瘤瘤錐錐壞看相，但係絕對係安全無毒个喲！	iˇ zung ge suiˋ goˋ suiˊ ianˇ liuˇ liuˇ zuiˊ zuiˊ faiˋ kon xiong，danˋ he qied dui he onˊ qionˇ moˇ tug ge io！	他種的水果雖然表皮很粗糙、看相不好，但是絕對是安全無毒的喲！
lbk09_100	老古人講：「毋挷草頭毋上崁」，人生總會有堵著困難个時節，係做得齧等牙挨過去，定著會有出頭个一日。	loˋ guˋ nginˇ gongˋ ：「mˇ bangˊ coˋ teuˇ mˇ songˊ kam 」，nginˇ senˊ zungˋ voi iuˊ duˇ doˋ kun nanˇ ge siiˇ jiedˋ ，he zo dedˋ ngad nenˋ ngaˇ aiˊ go hi ，tin cog voi iuˊ cudˋ teuˇ ge idˋ ngidˋ 。	客家諺語：「要上駁崁一定要一股作氣、有決心抓緊草根才上得去」，人生總會有遇到困難的時候，如果能夠咬著牙挨過去，一定會出頭天的。
lbk09_101	佢認為自家毋壁，故所毋想去參加這擺个演講比賽。	iˇ ngin viˇ qid gaˊ mˇ biagˋ，gu soˋ mˇ xiongˋ hi camˊ gaˊ iaˋ baiˋ ge ianˊ gongˋ biˋ soi 。	他認為自己不夠強，所以不想去參加這次的演說比賽。
lbk09_102	你做事情係恁呢毋擔輸贏，定著會分人看毋起。	ngˇ zo sii qinˇ he anˋ neˊ mˇ damˊ suˊ iangˇ ，tin cog voi bunˊ nginˇ kon mˇ hiˋ 。	你做事情如果這麼沒擔當，一定會讓人看不起。
lbk09_103	佢兩儕見共下做事情就吵事，實在毋得結煞。	iˇ liongˋ saˇ gian kiung ha zo sii qinˇ qiu cauˇ sii ，siid cai mˇ dedˋ gadˋ sadˋ 。	他們兩個每次一起做事情就吵架，實在是有夠糟糕。
lbk09_104	佢正同厥姐吵事，這下毋得羊仔發鹵，你又來撩佢，畀罵係該死个。	iˇ nang tungˇ iaˊ ze cauˇ sii，iaˋ ha mˇ dedˋ iongˇ eˋ bodˋ luˊ ，ngˇ iu loiˇ liauˇ iˇ ，biˋ ma he goiˊ xiˋ ge 。	他才跟他姐姐吵架，正想要發飆，而你又來惹他，被罵是活該的。。
lbk09_105	佢這擺去跋大山，橫啊山頷下，這下怕毋得生死吔！	iˇ iaˋ baiˋ hi bagˋ tai sanˊ ，vang a sanˊ ngabˋ haˊ ，iaˋ ha pa mˇ dedˋ sangˊ xiˋ eˊ！	他這次去爬大山，跌到山崖下，這下子可能生死未卜了！
lbk09_106	佢這個官司打啊盡醹，看佢這擺斯毋得脫爪吔！	iˇ iaˋ ge gonˊ siiˊ daˋ a qin neuˇ ，kon iˇ iaˋ baiˋ siiˇ mˇ dedˋ todˋ zauˋ eˊ！	他這個官司打得很激烈，我看他這次恐怕無法脫身了。
lbk09_107	老古人講過：「毋知和尚先死，還係袈裟先爛」，因為人生本成就盡壞講，毋係康健个人就定著過耐命。	loˋ guˋ nginˇ gongˋ go ：「mˇ diˊ foˇ song xienˊ xiˋ ，hanˇ he gaˊ saˊ xienˊ nan 」，inˊ vi nginˇ senˊ bunˋ sangˇ qiu qin faiˋ gongˋ ，mˇ he kongˊ kian ge nginˇ qiu tin cog go nai miang 。	俗話說：「不知道和尚先死，還是袈裟先爛」，因為人生本來就很難說，不是健康的人就一定比較長命。
lbk09_108	佢無本事又好膨大空，正式毋知惱惜。	iˇ moˇ bunˋ sii iu hau pong tai kangˊ ，ziin siidˋ mˇ diˊ nauˊ xiagˋ 。	他沒本事又喜歡吹牛，真的是搞不清楚狀況。
lbk09_109	這個後生仔一入公司就撩頭家發譴，正式毋知人个膦仔生上也係生下。	iaˋ ge heu sangˊ eˋ idˋ ngib gungˊ siiˊ qiu liauˇ teuˇ gaˊ fadˋ kienˋ ，ziin siidˋ mˇ diˊ nginˇ ge linˋ eˋ sangˊ songˊ iaˊ he sangˊ haˊ 。	這個年輕人剛入公司便惹得老闆發脾氣，真的是有夠膚淺的。
lbk09_110	恁呢个犖確車你也敢買，你知這個修理費用愛幾多錢無？斷真係毋知牛膦過多錢，還係煲仔過多錢。	anˋ neˊ ge logˋ kogˋ caˊ ngˇ iaˊ gamˋ maiˊ ，ngˇ diˊ iaˋ ge xiuˊ liˊ fi iung oi idˋ doˊ qienˇ moˇ ？don ziinˊ he mˇ diˊ ngiuˇ linˋ go doˊ qienˇ ，hanˇ he boˊ eˋ go doˊ qienˇ 。	這種破車你也敢買，你知道這修理費用要多少錢嗎？真的是不知輕重。
lbk09_111	你敢在加油站項打手機仔，毋驚發生爆炸吓？斷真毋知生死喲！	ngˇ gamˋ teˊ gaˊ iuˇ zam hong daˋ suˋ giˊ eˋ ，mˇ giangˊ fadˋ senˊ bau za haˋ？don ziinˊ mˇ diˊ sangˊ xiˋ ioˊ！	你敢在加油站裡打手機，不怕發生爆炸嗎？真不知死活！
lbk09_112	你仰恁毋知頭天，敢同爺哀應話？	ngˇ ngiongˋ anˋ mˇ diˊ teuˇ tienˊ ，gamˋ tungˇ iaˇ oiˊ in fa ？	你怎麼不知天高地厚，敢和父母親回嘴？
lbk09_113	佢正對監牢項出來，一下又在該食毒吔，正經係毋知轉倒喔！	iˇ nang dui gamˊ loˇ hong cudˋ loiˇ ，idˋ ha iu tiˊ geˋ siid tug eˇ ，ziin ginˊ he mˇ diˊ zonˋ do oˊ！	他剛從監獄出來，現在又在吸毒了，真的不知悔改！
lbk09_114	人毋好無志，因為「毋驚家中貧窮，就怕姐仔無笑容」，肯打拚，人生就會有希望。	nginˇ mˇ hoˋ moˇ zii ，inˊ vi 「mˇ giangˊ gaˊ zungˊ pinˇ kiungˇ ，qiu pa jiaˋ eˋ moˇ seu iungˇ 」，henˋ daˋ bia ，nginˇ senˊ qiu voi iuˊ hiˊ mong 。	人不可無志，因為「不怕家中貧窮，只怕妻子沒笑容」，只要肯努力奮鬥，人生便有希望。
lbk09_115	公婆愛共心，正做得化解各種个問題，因為「毋驚老虎有三個嘴，就怕人有兩樣心。」	gungˊ poˇ oi kiung ximˊ ，nang zo dedˋ fa giaiˋ gogˋ zungˋ ge mun tiˇ ，inˊ vi 「mˇ giangˊ no fuˋ iuˊ samˊ ge zoi ，qiu pa nginˇ iuˊ liongˋ iong ximˊ」。	夫妻要同心，才能化解各種問題，因為「不怕老虎有三張嘴，就怕人們不同心」。
lbk09_116	七月半个天時蓋得人驚，係有風搓來，損失會蓋大，故所老上人有講：「毋驚七月半个鬼，就驚七月半个水。」	qidˋ ngiad ban ge tienˊ siiˇ goi dedˋ nginˇ giangˊ ，he iuˊ fungˊ caiˊ loiˇ ，sunˋ siidˋ voi goi tai ，gu soˋ loˋ song nginˇ iuˊ gongˋ ：「mˇ giangˊ qidˋ ngiad ban ge guiˋ ，qiu giangˊ qidˋ ngiad ban ge suiˋ 。」	盛夏時的天氣很嚇人，如有颱風來，農作損失會很大，所以俗話說：「不怕七月半的鬼，只怕七月半的水。」
lbk09_117	事情堵著吔總愛解決，因為毋係棺材就係草蓆，你走閃毋得。	sii qinˇ duˇ doˋ eˇ zungˋ oi giaiˋ giadˋ ，inˊ vi mˇ he gonˊ coiˇ qiu he coˋ qiag ，ngˇ zeuˋ samˋ mˇ dedˋ 。	遇到事情總要解決，因為情況再壞，總是要選一樣，你無法躲避。
lbk09_118	佢一生人做無半項頭路，還毋嫌自家膦仔歪，淨嫌他人尿桶漏，實在還劣拙。	iˇ idˋ senˊ nginˇ zo moˇ ban hong teuˇ lu ，hanˇ mˇ hiamˇ qidˋ gaˊ linˋ eˋ vaiˊ ，qiang hiamˇ taˊ nginˇ ngiau tungˋ leu ，siid cai hanˇ lodˋ zodˋ 。	他一輩子做不成一件事，還不知自我檢討反省，只會怨天尤人，實在糟糕。
lbk09_119	項項事情都愛學等仔做，毋好淨會喊毋曉得，係無到時堵著事情就知死吔哪！	hong hong sii qinˇ duˊ oi hog nenˋ eˋ zo ，mˇ hoˋ qiang voi hemˊ mˇ hiauˋ dedˋ ，he moˇ do siiˇ duˇ doˋ sii qinˇ qiu diˊ xiˋ eˇ naˊ ！	每樣事都要學著做，不要光喊不會，要不然遇到事情就知道嚴重性了！
lbk09_120	人講：「無用倈仔一間角，毋當老公一隻腳」，故所愛對自家个老公過好兜仔。	nginˇ gongˋ ：「moˇ iung lai eˋ idˋ gianˊ gogˋ ，mˇ dong loˋ gungˊ idˋ zagˋ giogˋ 」，gu soˋ oi dui qid gaˊ ge loˋ gungˊ go hoˋ deuˊ eˊ 。	俗話說：「不肖的兒子再多也沒指望，唯有依賴自己的老伴」，所以對待自己的老公要好一點。
lbk09_121	佢無錢又好逐身裝，斷真係毋堪身份喔！	iˇ moˇ qienˇ iu hau giugˋ siinˊ zongˊ ，don ziinˊ he mˇ kamˊ siinˊ fun oˊ！	他沒錢又愛裝闊，真是不知自己是何等身份！
lbk09_122	該細倈仔毋看家中老，淨顧自家好，嫁毋得！	ge se lai eˋ mˇ kon gaˊ zungˊ loˋ ，qiang gu qid gaˊ hoˋ ，ga mˇ dedˋ ！	那男孩子只顧自己，不顧父母，千萬不要嫁他！
lbk09_123	後生人毋怕苦，毋怕窮，只怕朝朝睡到日頭紅，係想愛有出脫，就愛煞猛打拚。	heu sangˊ nginˇ mˇ pa kuˋ ，mˇ pa kiungˇ ，ziiˋ pa zeuˊ zeuˊ soi do ngidˋ teuˇ fungˇ ，he xiongˋ oi iuˊ cudˋ todˋ ，qiu oi sadˋ mangˊ daˋ bia 。	年輕人不怕苦，不怕窮，只怕偷懶貪睡不勤勞，若想有出息，就要勤奮努力。
lbk09_124	秋天時節盡驚風搓過來同禾穀搣淨淨，故所老古人講：「毋怕白露雨，最驚寒露風」。	qiuˊ tienˊ siiˇ jiedˋ qin giangˊ fungˊ caiˊ go loiˇ tungˇ voˇ gugˋ miedˋqiang qiang ，gu soˋ loˋ guˋ nginˇ gongˋ ：「mˇ pa pag lu iˋ ，zuiˋ giangˊ honˇ lu fungˊ 」。	秋天時最怕颱風來把稻穀破壞光，所以俗話說：「農人不怕白露時下雨，最怕寒露時颳颱風」。
lbk09_125	魔術變硬好也係假个，故所盡驚分人知得厥手法，這就係人講个：「毋怕千人看，就驚一人識」。	moˊ siidˋ bien ang hoˋ iaˇ he gaˋ ge，gu soˋ qin giangˊ bunˊ nginˇ diˊ dedˋ iaˊ suˋ fabˋ ，iaˋ qiu he nginˇ gongˋ ge ：「mˇ pa qienˊ nginˇ kon ，qiu giangˊ idˋ nginˇ siidˋ 」。	魔術變得再好都是假的，所以很怕讓人知道他的手法，這就是所謂的：「不怕千人看，只怕一人懂」的道理。
lbk09_126	老古人講：「毋怕事難，就怕人懶」，做人愛煞猛。	loˋ guˋ nginˇ gongˋ ：「mˇ pa sii nanˇ ，qiu pa nginˇ nanˊ 」，zo nginˇ oi sadˋ mangˊ 。	俗話說：「事情不怕困難，只怕無心、偷懶」，做人就要勤勞。
lbk09_127	「毋怕事情難，就怕人偷懶」，這句話係美濃个老古言語，勸話大家愛煞猛、愛有志氣。	「mˇ pa sii qinˇ nanˇ ，qiu pa nginˇ teuˊ nanˊ 」，iaˋ gi fa he miˇ nungˇ ge loˋ guˋ ngianˇ ngiˊ ，kian va tai gaˊ oi sadˋ mangˊ 、oi iuˊ zii hi 。	「不怕事情難做，只怕自己偷懶」，這句話是美濃的俗諺，奉勸大家要努力、要有志氣。
lbk09_128	「毋病就毋病，一病就無老命。」這頭擺人講个話，蓋有道理哦！這個人原旦好好，昨晡日聽講佢發病就死核吔！	「mˇ piang qiu mˇ piang ，idˋ piang qiu moˇ loˋ miang 。」iaˋ teuˇ baiˋ nginˇ gongˋ ge fa ，goi iuˊ to liˊ oˊ ！iaˋ ge nginˇ ngianˇ danˋ hoˋ hoˋ ，coˊ buˊ ngidˋ tangˊ gongˋ iˇ bodˋ piang qiu xiˋ hedˋ eˇ！	「平常不生病，一病就沒命。」古人說的話很有道理哦！這個人身體一向很好，昨天聽說他一得病就走了！
lbk09_129	「毋曾過五月節，壞襖仔毋好丟核。」這個老古言語勸話人，毋好忒早收寒天个衫褲。	「mˇ qienˇ go ngˋ ngiad jiedˋ ，faiˋ oˋ eˋ mˇ hoˋ tiuˋ hedˋ。」iaˋ ge loˋ guˋ ngianˇ ngiˊ kian va nginˇ ，mˇ hoˋ tedˋ zoˋ suˊ honˇ tienˊ ge samˊ fu 。	「未過端午，天氣還可能變冷，破舊的棉襖不要丟棄。」這句俗話告訴人們，冬天的衣服不要太早收。
lbk09_130	阿貴哥平常恬恬毋講話，一講出來个話會嚇死人，大家都講佢：「毋聲就毋聲，一聲就打爛盎。」	aˊ gui goˊ pinˇ songˇ diamˊ diamˊ mˇ gongˋ fa ，idˋ gongˋ cudˋ loiˇ ge fa voi hagˋ xiˋ nginˇ ，tai gaˊ duˊ gongˋ iˇ：「mˇ sangˊ qiu mˇ sangˊ ，idˋ sangˊ qiu daˋ lan angˊ 。」	阿貴哥平常沉默寡言，但一說出來的話會嚇死人，大家都說他：「不鳴則已，一鳴驚人。」
lbk09_131	美濃有一句老古言語：「毋使愁來毋使愁，一到雲開見日頭；水鮮就會見石頭，就有好日在後頭。」勸話大家人毋好緊愐緊愁，好日仔在後頭。	miˇ nungˇ iuˊ idˋ gi loˋ guˋ ngianˇ ngiˊ ：「mˇ siiˋ seuˇ loiˇ mˇ siiˋ seuˇ ，idˋ do iunˇ koiˊ gian ngidˋ teuˇ ；suiˋ xienˊ qiu voi gian sag teuˇ ，qiu iuˊ hoˋ ngidˋ cai heu teuˇ 。」kian va tai gaˊ nginˇ mˇ hoˋ ginˋ menˋ ginˋ seuˇ ，hoˋ ngidˋ eˋ cai heu teuˇ 。	美濃有一句俗語：「不用煩惱不用愁，時機一到即能撥雲見日；水清能見石，好日接著來。」安慰大家困難總會過去的。
lbk09_132	頭擺人有講：「毋食鹹魚嘴毋腥，毋會做賊心毋驚。」你無做麼个壞事，哪愛使愁他人講呢？	teuˇ baiˋ nginˇ iuˊ gongˋ ：「mˇ siid hamˇ ngˇ zoi mˇ xiangˊ ，mˇ voi zo ced ximˊ mˇ giangˊ 。」ngˇ moˇ zo maˋ ge faiˋ sii ，nai oi siiˋ seuˇ taˊ nginˇ gongˋ noˋ ？	古人說：「不吃鹹魚，嘴巴不會有腥味；不去當賊，就不會膽戰心驚。」你如果沒做壞事，就不用怕別人說閒話。
lbk09_133	做人係無修養，做事就會毋通人情。	zo nginˇ he moˇ xiuˊ iongˊ ，zo sii qiu voi mˇ tungˊ nginˇ qinˇ 。	沒有修養的人，做事較不通人情。
lbk09_134	「毋會嫖毋會賭，死吔會變黃牛牯」，這還係會嫖、會賭个人安慰自家个一句話。	「mˇ voi peuˇ mˇ voi duˋ ，xiˋ eˇ voi bien vongˇ ngiuˇ guˋ 」，iaˋ hanˇ he voi peuˇ 、voi duˋ ge nginˇ onˊ vi qid gaˊ ge idˋ gi fa 。	「不會嫖不會賭，死了會變黃牛」，這是會嫖、會賭的人自我安慰的一句話。
lbk09_135	𠊎看佢蓋好事，又蓋好同人多事，毋死也愛脫一層皮，和毋得囉！	ngaiˇ kon iˇ goi hau sii ，iu goi hau tungˇ nginˇ doˊ sii ，mˇ xiˋ iaˊ oi todˋ idˋ cenˇ piˇ ，foˇ mˇ dedˋ loˊ！	我看他很愛管閒事，又很會跟人吵架，這對他傷害很大，損失慘重。
lbk09_136	「毋信風水毋會發，信吔風水了刮刮」，大家毋好忒信風水，係信吔風水加減會了錢。	「mˇ xin fungˊ suiˋ mˇ voi fadˋ ，xin eˇ fungˊ suiˋ liauˋ guadˋ guadˋ 」，tai gaˊ mˇ hoˋ tedˋ xin fungˊ suiˋ，he xin eˇ fungˊ suiˋ gaˊ gamˋ voi liauˋ qienˇ。	「地理、風水雖可讓人興衰，但可信不可迷」，大家不要太過相信風水，過於迷信會花大錢。
lbk09_137	「罵多毋知聽，打多毋知驚」，細人仔不時罵、不時打，到臨尾會蠻皮。	「ma doˊ mˇ diˊ tangˊ ，daˋ doˊ mˇ diˊ giangˊ 」，se nginˇ eˋ budˋ siiˇ ma 、budˋ siiˇ daˋ ，do liamˋ miˊ voi manˇ piˇ 。	「教養孩子，光靠打、罵是沒用的」，經常打罵的小孩，到後來就什麼都不怕了。
lbk09_138	這個細人仔淨分人𢫦个時節，會噭啊罵罵滾！	iaˋ ge se nginˇ eˋ qiang bunˊ nginˇ mag ge siiˇ jiedˋ，voi gieu a ma ma gunˋ ！	這個小孩子只有被人打的時候，才會大聲哭叫！
lbk09_139	人做差事係免不了个，頭擺人講：「人會失手，馬會失蹄。」	nginˇ zo caiˊ sii he mienˊ budˋ liauˋ ge ，teuˇ baiˋ nginˇ gongˋ ：「nginˇ voi siidˋ suˋ ，maˊ voi siidˋ taiˇ 。」	人免不了會做錯事，以前的人說：「人有失手，馬有失蹄的時候。」
lbk09_140	昨暗晡細人仔睡毋得，𠊎看怕得著麻衣煞哦！	coˊ am buˊ se nginˇ eˋ soi mˇ dedˋ ，ngaiˇ kon pa dedˋ doˋ maˇ iˊ sadˋ oˊ ！	昨晚小孩睡不著，依我看可能因參與喪事而有沖煞哦！
lbk09_141	昨晡日行路踢著腳趾，到今𠊎个腳趾公還麻麻痺痺。	coˊ buˊ ngidˋ hangˇ lu tedˋ doˋ giogˋ ziiˋ ，do ginˊ ngaiˇ ge giogˋ ziiˋ gungˊ hanˇ maˇ maˇ bi bi 。	昨天走路踢到腳趾頭，到現在我的腳趾頭還麻麻的。
lbk09_142	美濃山下怕有人家火燒屋吔，消防車嘛嘛滾去救火。	miˇ nungˇ sanˊ haˊ pa iuˊ nginˇ gaˊ foˋ seuˊ vugˋ eˇ，seuˊ fongˇ caˊ maˇ maˇ gunˋ hi giu foˋ 。	美濃山下可能發生火災了，消防車鳴笛趕著去救火。
lbk09_143	美濃个客家人耕田，蓋注意麻麥米豆个落秧點種。	miˇ nungˇ ge hagˋ gaˊ nginˇ gangˊ tienˇ ，goi zu i maˇ mag miˋ teu ge log iongˊ diam zungˋ 。	美濃的客家人耕田，很注意麻、麥、米、豆的播種。
lbk09_144	這個人蓋大膽，麼个都敢做，淨死毋敢。	iaˋ ge nginˇ goi tai damˋ ，maˋ ge duˊ gamˋ zo ，qiang xiˋ mˇ gamˋ 。	這個人膽子很大，除了死以外，什麼都敢做。
lbk09_145	路項不時會看著「末劫天年」个宣傳單，喊人共下來修行。	lu hong budˋ siiˇ voi kon doˋ 「mad giabˋ tienˊ ngianˇ 」ge xienˊ conˇ danˊ ，ham nginˇ kiung ha loiˇ xiuˊ hangˇ 。	路上時常會看到「世界末日」的宣傳單，呼籲大家一起修行。
lbk09_146	細人仔命係蓋秀幼，毋好去喪家，驚啊喪家个煞氣會抹著人。	se nginˇ eˋ miang he goi xiu iu ，mˇ hoˋ hi songˊ gaˊ ，giangˊ a songˊ gaˊ ge sadˋ hi voi madˋ doˋ nginˇ 。	小孩子若很貴氣，就不要去喪家，怕被喪家穢氣影響到。
lbk09_147	𠊎少你个錢到這下全部抹煞淨吔。	ngaiˇ seuˋ ngˇ ge qienˇ do iaˋ ha qionˇ pu madˋ sadˋ qiang eˇ。	我欠你的錢到現在全部一筆勾消了。
lbk09_148	你做麼个拿等棍仔𢫦上𢫦下？恁呢蓋危險你知無！	ngˇ zo maˋ ge naˊ nenˋ gun eˋ mag songˊ mag haˊ ？anˋ neˊ goi munˇ hiamˋ ngˇ diˊ moˇ ！	你為什麼拿著棍仔打來打去？這樣很危險你知道嗎！
lbk09_149	做人毋好忒過分，像你恁深毒个人，今仔定著會分人𢫦死淋冷水。	zo nginˇ mˇ hoˋ tedˋ go fun ，qiong ngˇ anˋ ciimˊ tug ge nginˇ ，ginˊ e tin cog voi bunˊ nginˇ mag xiˋ limˇ langˊ suiˋ 。	做人不要太過分，像你這麼惡毒的人，以後一定會被人打死後，還要澆冷水來洩恨。
lbk09_150	你做阿爸个人仰做得恁呢𢫦細人仔呢？毋知啊這種𢫦法會𢫦死人吓？	ngˇ zo aˊ baˊ ge nginˇ ngiongˋ zo dedˋ anˋ neˊ mag se nginˇ eˋ noˋ ？mˇ diˊ a iaˋ zungˋ mag fabˋ voi mag xiˋ nginˇ haˋ ？	你這個當爸爸的怎麼可以這樣打小孩呢？你難道不知道這種打法會打死人嗎？
lbk09_151	你見堵著人就將把若倈仔來說，正經係人講个：「賣花个說花香，賣藥个說藥方。」	ngˇ gian duˇ doˋ nginˇ qiu jiongˊ baˋ ngiaˊ lai eˋ loiˇ sodˋ ，ziin ginˊ he nginˇ gongˋ ge ：「mai faˊ ge sodˋ faˊ hiongˊ ，mai iog ge sodˋ iog fongˊ 。」	你每次遇到人就一直稱讚你兒子，就像俗話說的：「賣花的稱讚花很香，賣藥的稱讚藥很靈。」
lbk09_152	你難得煮菜請人食，就緊說自家煮个菜一好食，正經係「賣花說花香」。	ngˇ nanˇ dedˋ zuˋ coi qiangˋ nginˇ siid ，qiu ginˋ sodˋ qid gaˊ zuˋ ge coi idˋ hoˋ siid ，ziin ginˊ he 「mai faˊ sodˋ faˊ hiongˊ 」。	你難得煮菜請人吃，就一直稱讚自己煮的菜有多好吃，真的是「賣花的稱讚花很香」。
lbk09_153	雖然你兩儕係蓋好个朋友，但係「買賣算分」感情正會長久。	suiˊ ianˇ ngˇ liongˋ saˇ he goi hoˋ ge penˇ iuˊ ，danˋ he 「maiˊ mai son funˊ 」gamˋ qinˇ nang voi congˇ giuˋ 。	雖然你們倆是很要好的朋友，但是「買賣計算清楚」感情才會長久。
lbk09_154	今晡日𠊎等係做生理，毋係朋友來往交陪，故所愛「買賣算分，相請無論」。	ginˊ buˊ ngidˋ ngaiˇ nenˊ he zo senˊ liˊ ，mˇ he penˇ iuˊ loiˇ vongˊ gauˊ piˇ，gu soˋ oi 「maiˊ mai son funˊ ，xiongˊ qiangˋ moˇ lun 」。	今天我們是在做生意，不是朋友之間的來往互動，所以要「買賣歸買賣，與交際相請不可混為一談」。
lbk09_155	這擺發風搓，政府補助著這一息錢，正式買墨搽膦都毋烏。	iaˋ baiˋ bodˋ fungˊ caiˊ ，ziin fuˋ buˋ cu doˋ iaˋ idˋ xidˋ qienˇ ，ziin siidˋ maiˊ med caˇ linˋ duˊ mˇ vuˊ 。	這次風災，政府補助這麼一點錢，真的是連買個墨塗黑下體都不夠。
lbk09_156	人講：「買牛看牛嫲」，故所你尋細妹仔个時節定著愛看正來，毋好結婚吔正知啊對方性體恁差，到該時節就來毋掣吔。	nginˇ gongˋ ：「maiˊ ngiuˇ kon ngiuˇ maˇ 」，gu soˋ ngˇ qimˇ se moi eˋ ge siiˇ jiedˋ tin cog oi kon zang loiˇ ，mˇ hoˋ giadˋ funˊ eˇ nang diˊ a dui fongˊ xin tiˋ anˋ caˊ ，do ge siiˇ jiedˋ qiu loiˇ mˇ cadˋ eˇ。	人家說：「買牛要看母牛」，所以你找女朋友的時候一定要先看好，不要等到結婚了才知道對方脾氣這麼差，到那時就來不及了。
lbk09_157	人講：「買衫愛看衫袖，討姐仔愛看母舅」，這句話係講，買衫褲愛看袖仔个長短有合身無；討姐仔就愛看厥兄弟个做人。故所，做任何事情都愛勘裁正來。	nginˇ gongˋ ：「maiˊ samˊ oi kon samˊ qiu ，toˋ jiaˋ eˋ oi kon muˊ kiuˊ 」，iaˋ gi fa he gongˋ ，maiˊ samˊ fu oi kon qiu eˋ ge congˇ donˋ iuˊ hab siinˊ moˇ ；toˋ jiaˋ eˋ qiu oi kon iaˊ hiungˊ ti ge zo nginˇ 。gu soˋ ，zo im hoˇ sii qinˇ duˊ oi kamˊ caiˇ zang loiˇ 。	俗話說：「買衣服要看衣袖，娶老婆要看母舅」，這句話是說，買衣服要看袖子的長短是否合身；娶老婆就要看她兄弟的品行。所以，做任何事情都要考慮清楚才好。
lbk09_158	你等仰買屋仔買啊吵起來吔呢？無聽過「買田起屋係造福，毋係造碌」吓？大家都恁堅持，定著就會擆合。	ngˇ denˊ ngiongˋ maiˊ vugˋ eˋ maiˊ a cauˇ hiˋ loiˇ eˇ noˋ？moˇ tangˊ go 「maiˊ tienˇ hiˋ vugˋ he co fugˋ ，mˇ he co lugˋ」haˋ ？tai gaˊ duˊ anˋ gianˊ ciiˇ，tin cog qiu voi cogˋ gabˋ 。	你們怎麼買房子買得吵起來了呢？沒聽說過「買田建屋是造福的事，不能有太多抱怨，也不要造是非」嗎？大家都這麼堅持，一定就會起衝突。
lbk09_159	後生仔，跋山定著愛定定仔行，毋好恁著急，人講：「慢行快到」，忒急，等下就佇毋著吔。	heu sangˊ eˋ ，bagˋ sanˊ tin cog oi tin tin eˊ hangˇ ，mˇ hoˋ anˋ cog gibˋ ，nginˇ gongˋ ：「man hangˇ kuai do 」，tedˋ gibˋ ，denˋ ha qiu du mˇ diauˇ eˇ。	年輕人，爬山一定要慢慢走，不要這麼急躁，俗話說：「慢行快到」，太急躁，等會兒就受不了了。
lbk09_160	這地泥蓋濕，你牽等阿婆慢慢仔行過來。	iaˋ ti naiˇ goi siibˋ ，ngˇ kianˊ nenˋ aˊ poˇ man man eˊ hangˇ go loiˇ 。	這個地板很溼，你牽著奶奶慢慢走過來。
lbk09_161	你在公家機關食頭路也敢瞞等若主管去詑人家个錢，這種「瞞官歛人」个事，你也敢做，斷真係毋怕生死。	ngˇ tiˊ gungˊ gaˊ giˊ guanˊ siid teuˇ lu iaˊ gamˋ manˇ nenˋ ngiaˊ zuˋ gonˋ hi tadˋ nginˇ gaˊ ge qienˇ ，iaˋ zungˋ 「manˊ gonˊ lien nginˇ 」ge sii ，ngˇ iaˊ gamˋ zo ，don ziinˊ he mˇ pa sangˊ xiˋ 。	你在公家機關工作也敢瞞著主管去拐騙別人的錢，這種「欺騙官員及百姓」的事，你也敢做，真的是不知死活。
lbk09_162	阿姆喲！仰幾日仔無來，果子就跌啊滿天八地呢？	aˊ meˊ ioˊ！ngiongˋ giˋ ngidˋ eˊ moˇ loiˇ ，goˋ ziiˋ qiu diedˋ a manˊ tienˊ badˋ ti noˋ ？	我的媽呀！怎麼幾天沒來，果子就掉得滿地都是呢？
lbk09_163	你知啊恁久阿明牯滿天放火，一哪仔同人講，你這擺得第一名係偷看來个無？	ngˇ diˊ a anˋ giuˋ aˊ minˇ guˋ manˊ tienˊ biong foˋ ，idˋ naiˋ eˋ tungˇ nginˇ gongˋ ，ngˇ iaˋ baiˋ dedˋ ti idˋ miangˇ he teuˊ kon loiˇ ge moˇ？	你知道最近阿明到處傳播謠言，四處跟人家說，你這次得第一名是偷看來的嗎？
lbk09_164	你食東西仰恁揀呢？人講：「滿子滿嬌嬌，無魚無肉毋食朝。」斷真一息都無爭差。	ngˇ siid dungˊ xiˊ ngiongˋ anˋ gianˋ noˋ ？nginˇ gongˋ ：「manˊ ziiˋ manˊ gieuˊ gieuˊ ，moˇ ngˇ moˇ ngiugˋ mˇ siid zeuˊ 。」don ziinˊ idˋ xidˋ duˊ moˇ zenˊ caˊ 。	你吃東西怎麼這麼挑食呢？俗話說：「被寵壞的么兒，早餐沒有大魚大肉就不吃。」真的是一點都沒錯。
lbk09_165	教細人仔愛自家帶頭做樣，堵著問題愛先去了解、溝通，用蠻絞絲个方式只有教壞細人仔會。	gauˊ se nginˇ eˋ oi qid gaˊ dai teuˇ zo iong ，duˇ doˋ mun tiˇ oi xienˊ hi liauˋ giaiˋ 、gieuˊ tungˊ ，iung manˇ gau siiˊ ge fongˊ siidˋ ziiˋ iuˊ gauˊ fai se nginˇ eˋ voi 。	教孩子要自己以身作則，遇到問題要先去了解、溝通，用暴力讓他屈服的方式只會教壞小孩而已。
lbk09_166	初下做生理个收入蠻蠻仔，無賺著有麼个，但係生活無問題啦！	cuˊ ha zo senˊ liˊ ge suˊ ngib manˇ manˇ eˊ ，moˇ con doˋ iuˊ maˋ ge，danˋ he senˊ fad moˇ mun tiˇ laˋ！	剛做生意收入勉強可以，沒賺什麼錢，但是生活不成問題啦！
lbk09_167	老妹分阿姆念吔兩句，就抿嘴脣毋插人。	loˋ moi bunˊ aˊ meˊ ngiam eˇ liongˋ gi ，qiu manˇ zoi siinˇ mˇ cabˋ nginˇ 。	妹妹被媽媽念了兩句，就抿著嘴不理人。
lbk09_168	這個細人仔盡盤擎，毋曾學行先學走，不時橫著。	iaˋ ge se nginˇ eˋ qin panˇ kiaˇ ，mˇ qienˇ hog hangˇ xienˊ hog zeuˋ ，budˋ siiˇ vang doˋ 。	這個小孩很頑皮，還沒學會走路就想學跑步，經常跌倒。
lbk09_169	𠊎走無幾步就氣凹凹仔，斷真係毋曾老，先生白毛呢！	ngaiˇ zeuˋ moˇ giˋ pu qiu hi ngiabˋ ngiabˋ eˊ ，don ziinˊ he mˇ qienˇ loˋ ，xienˊ sangˊ pag moˊ neˊ ！	我走沒幾步就喘噓噓，真的是未老先衰呢！
lbk09_170	𠊎在車頭等吔兩點鐘，阿哥還毋曾來！	ngaiˇ teˊ caˊ teuˇ denˋ eˇ liongˋ diamˋ zungˊ ，aˊ goˊ hanˇ mˇ qienˇ loiˇ ！	我在車站等了兩小時，哥哥還沒來！
lbk09_171	阿叔毋識耕過田，就想先買鐵牛仔吔；阿公話佢：「毋曾買牛先打倈，無效啦！」	aˊ sugˋ mˇ siidˋ gangˊ go tienˇ，qiu xiongˋ xienˊ maiˊ tiedˋ ngiuˇ eˋ eˇ；aˊ gungˊ va iˇ：「mˇ qienˇ maiˊ ngiuˇ xienˊ daˋ lai，moˇ hauˋ laˋ！」	叔叔還沒耕過田，就想先買耕耘機了；爺爺勸他：「事情若不好好規劃，最終是達不到效果的！」
lbk09_172	老弟㖸阿婆行恁慢，阿婆講：「毋曾食到六十六，莫笑人家个腳骨，食到像𠊎恁老吔，你就知愁吔！」	loˋ taiˊ nagˋ aˊ poˇ hangˇ anˋ man ，aˊ poˇ gongˋ ：「mˇ qienˇ siid do liugˋ siib liugˋ ，mog seu nginˇ gaˊ ge giogˋ gudˋ ，siid do qiong ngaiˇ anˋ loˋ eˇ，ngˇ qiu diˊ seuˇ eˇ！」	弟弟笑奶奶走得慢，奶奶說：「還沒活到六十六，不要笑人的腳力，到像我一樣老時，你就有得煩惱了。」
lbk09_173	老古人講：「毋曾註生先註死」，故所對生死大事愛看過開呀！	loˋ guˋ nginˇ gongˋ ：「mˇ qienˇ zu sangˊ xienˊ zu xiˋ 」，gu soˋ dui sangˊ xiˋ tai sii oi kon go koiˊ iaˋ！	古人說：「未出生先註死」，所以對生死大事要看開些。
lbk09_174	阿爸係飯甑肚，每暗晡都貌飯菜食啊淨淨。	aˊ baˊ he fan zen duˋ ，miˊ am buˊ duˊ mau fan coi siid a qiang qiang 。	爸爸胃口好，每晚都把剩下的飯菜全部吃光光。
lbk09_175	這個人好點點仔喊啊恁大聲，毋知係愐著事麼？	iaˋ ge nginˇ hoˋ diamˋ diamˋ eˊ hemˊ a anˋ tai sangˊ ，mˇ diˊ he menˋ doˋ sii meˇ？	這個人忽然大叫一聲，是想到什麼事情嗎？
lbk09_176	這間廟本成係佢創个，結果廟公分人號走吔，正式係「貓抄飯，縱成狗」。	iaˋ gianˊ meu bunˋ sangˇ he iˇ congˋ ge ，giadˋ goˋ meu gungˊ bunˊ nginˇ ho zeuˋ eˇ，ziin siidˋ he 「meu cau fan ，jiungˋ siinˇ gieuˋ 」。	這間廟本來是他創建的，結果主持的位置卻被人佔去了，真的是白做工了。
lbk09_177	喊你毋好去搭他人家个事，你硬硬愛去，這下貓扡粢粑吔呵！	hemˊ ngˇ mˇ hoˋ hi dabˋ taˊ nginˇ gaˊ ge sii ，ngˇ ngang ngang oi hi ，iaˋ ha meu iaˋ qiˇ baˊ eˇ hoˋ ！	叫你不要去管別人的事，你偏偏要去，現在像貓爪沾粘上粢粑，甩不開了呵！
lbk09_178	會落雨个時節，貓仔會爪面，故所，頭擺人會講：「貓洗面，雨出現」。	voi log iˋ ge siiˇ jiedˋ ，meu eˋ voi zauˋ mien ，gu soˋ ，teuˇ baiˋ nginˇ voi gongˋ ：「meu seˋ mien ，iˋ cudˋ hian 」。	快下雨的時候，貓會抓臉，所以，以前人會說：「貓洗臉，會下雨」。
lbk09_179	頭擺人有「貓死吊樹頭，狗死放水漂」个風俗，這下蓋重視環保，恁呢斯做毋得个喲！	teuˇ baiˋ nginˇ iuˊ 「meu xiˋ diau su teuˇ ，gieuˋ xiˋ biong suiˋ peuˇ」ge fungˊ xiug ，iaˋ ha goi cung sii fanˇ boˋ ，anˋ neˊ siiˇ zo mˇ dedˋ ge ioˊ！	以前人有「貓死吊樹上，狗死放河裡讓水流走」的風氣，現在很注重環保，這樣做是行不通的。
lbk09_180	這下頭路壞尋，大學生一畢業渺渺茫茫，毋知愛做麼个。	iaˋ ha teuˇ lu faiˋ qimˇ ，tai hog senˊ idˋ bidˋ ngiab meuˋ meuˋ mongˇ mongˇ ，mˇ diˊ oi zo maˋ ge 。	現在工作不好找，大學生一畢業沒目標，不知道要做什麼。
lbk09_181	頭擺个細人仔，盡好去圳溝覓蜆仔。	teuˇ baiˋ ge se nginˇ eˋ ，qin hau hi zun gieuˊ mi hanˋ eˋ 。	以前的小孩子，很喜歡去溪流撈河蜆。
lbk09_182	姆姆个妹仔嫁分有口人，佢暢啊尾仃仃仔，恁久不時看佢著等旗袍行上行下。	meˋ meˊ ge moi eˋ ga bunˊ iuˊ heuˋ nginˇ ，iˇ tiong a miˊ dangˊ dangˊ eˊ ，anˋ giuˋ budˋ siiˇ kon iˇ zogˋ nenˋ kiˇ pauˇ hangˇ songˊ hangˇ haˊ 。	嬸嬸的女兒嫁給有錢人，她既高興又得意，最近經常看她穿著旗袍到處走。
lbk09_183	市長來个時節，這兜官員就尾拂拂仔跈啊後背服侍佢。	sii zongˋ loiˇ ge siiˇ jiedˋ ，iaˋ deuˊ gonˊ ianˇ qiu miˊ fid fid eˊ tenˇ a heu boi fug sii iˇ 。	市長來的時候，這些官員就會乖乖的跟在他後面服侍他。
lbk09_184	隔壁班走相逐得著第一名，有兜人就尾翹翹仔，蓋會著吔樣仔。	gagˋ biagˋ banˊ zeuˋ xiongˊ giugˋ dedˋ doˋ ti idˋ miangˇ ，iuˊ deuˊ nginˇ qiu miˊ kieu kieu eˊ ，goi voi doˋ eˇ iong eˊ 。	隔壁班接力比賽得到第一名，有些人就得意洋洋，一副了不起的樣子。
lbk09_185	阿婆盡驚凍著，從頭到腳包啊彌彌蒙蒙，淨看著目珠。	aˊ poˇ qin giangˊ dung doˋ ，qiungˇ teuˇ do giogˋ bauˊ a miˊ miˊ mangˊ mangˊ，qiang kon doˋ mugˋ zuˊ 。	奶奶很怕著涼，從頭到腳包得密不透風，只看到眼睛。
lbk09_186	過年到吔，𠊎个阿姆抺抺摸摸，掃啊嶄然淨。	go ngianˇ do eˇ，ngaiˇ ge aˊ meˊ miˇ miˇ mioˊ mioˊ ，so a zamˋ manˇ qiang 。	過年到了，我媽媽東擦西抹，打掃的非常乾淨。
lbk09_187	這個人蓋膦毛，尾毛末節算啊到到。	iaˋ ge nginˇ goi linˋ moˊ， miˊ moˊ mad jiedˋ son a do do 。	這個人很龜毛，一些枝微末節小事都很計較。
lbk09_188	這個人做壞事，偷人東西，一看著人就尾凹凹仔走核吔。	iaˋ ge nginˇ zo faiˋ sii ，teuˊ nginˇ dungˊ xiˊ ，idˋ kon doˋ nginˇ qiu miˊ ngiabˋ ngiabˋ eˊ zeuˋ hedˋ eˇ。	這個人做壞事、偷人的東西，一見到人就頭低低的跑走了。
lbk09_189	「每日食飯三片薑，發病毋使藥方」，這老古言語講，薑片加減食，對身體有好無壞。	「miˊ ngidˋ siid fan samˊ pienˋ giongˊ ，bodˋ piang mˇ siiˋ iog fongˊ 」，iaˋ loˋ guˋ ngianˇ ngiˊ gongˋ ，giongˊ pienˋ gaˊ gamˋ siid ，dui siinˊ tiˋ iuˊ hoˋ moˇ faiˋ 。	「每天吃三片薑，就可以健康強身、不生病」，古人說，薑片吃一些，對身體有幫助。
lbk09_190	愛食飯吔，愛𢯭手撿碗筷、抹桌凳，正係得人惜个細人仔。	oi siid fan eˇ，oi ten suˋ giamˋ vonˋ kuai 、miˇ zogˋ den ，nang he dedˋ nginˇ xiagˋ ge se nginˇ eˋ 。	要吃飯了，要先幫忙排碗筷、擦桌椅，才是可愛乖巧的小孩子。
lbk09_191	頭擺人講，降倈仔毋使暢，故所「摸著核卵也係倈仔」這句話就係取笑他人个。	teuˇ baiˋ nginˇ gongˋ ，giung lai eˋ mˇ siiˋ tiong ，gu soˋ 「miaˊ doˋ hag nonˋ iaˊ he lai eˋ」 iaˋ gi fa qiu he qiˋ seu taˊ nginˇ ge。	以前的人說，生兒子不要高興的太早，所以「不要以為生的男孩就是有用的人」這句話是取笑人的。
lbk09_192	頭擺人耕田愛賺食，摸螺挖蜆都愛做。	teuˇ baiˋ nginˇ gangˊ tienˇ oi con siid ，miaˊ loˇ iadˋ hanˋ duˊ oi zo 。	以前的人耕田養家，也需要到河、溪內尋找蚌、蜆、螺等水產。
lbk09_193	這個人命蓋好，聽講命帶癸光个人，餵豬毋使掞糠毋知有影無？	iaˋ ge nginˇ miang goi hoˋ ，tangˊ gongˋ miang dai gui gongˊ ge nginˇ ，vi zuˊ mˇ siiˋ iam hongˊ mˇ diˊ iuˊ iangˋ moˇ ？	這個人很好命，聽說好命的人，餵豬不需用穀殼真的嗎？
lbk09_194	你再來搣古搞怪做麼个，仰恁多齣頭呢！	ngˇ zai loiˇ miedˋ guˋ gauˋ guai zo maˋ ge ，ngiongˋ anˋ doˊ cudˋ teuˇ noˋ！	你還來搞鬼做什麼，怎麼會有這麼多點子呢！
lbk09_195	你這個細人仔毋好好讀書，恁呢搣古怪，等下添就好好啊修理你。	ngˇ iaˋ ge se nginˇ eˋ mˇ hoˋ hoˋ tug suˊ ，anˋ neˊ miedˋ guˋ guai ，denˋ ha tiamˊ qiu hoˋ hoˋ a xiuˊ liˊ ngˇ。	你這個小孩不好好讀書，淨搞些花樣，等會兒就好好修理你。
lbk09_196	這個東西毋好好仔搞，你做麼个愛搣來搣去呢？	iaˋ ge dungˊ xiˊ mˇ hoˋ hoˋ eˊ gauˋ ，ngˇ zo maˋ ge oi miedˋ loiˇ miedˋ hi noˋ ？	這個東西不好好玩，你為什麼要弄來弄去呢？
lbk09_197	阿富叔蓋無閒个樣式，搣上搣下毋知在該搣麼个東西哦！	aˊ fu sugˋ goi moˇ hanˇ ge iong siidˋ，miedˋ songˊ miedˋ haˊ mˇ diˊ teˊ geˋ miedˋ maˋ ge dungˊ xiˊ ioˊ ！	阿富叔很忙的樣子，忙進忙出卻不知在忙些什麼呢！
lbk09_198	前一駁仔𠊎發生車禍，鑪啊面疤疤仔。	qienˇ idˋ bogˋ eˋ ngaiˇ fadˋ senˊ caˊ fo ，lu a mien baˊ baˊ eˊ 。	前一陣子我發生車禍，臉上疤痕累累。
lbk09_199	隔壁个老阿婆，毋知係譴心臼麼？歸朝晨面臭臭仔。	gagˋ biagˋ ge loˋ aˊ poˇ ，mˇ diˊ he kienˋ ximˊ kiuˊ meˇ ？guiˊ zeuˊ siinˇ mien cu cu eˊ 。	隔壁的老奶奶，不知是否在氣她媳婦？整個早上都擺一張臭臉。
lbk09_200	阿義哥可能發病，面嘔嘔仔毋知麼个原因。	aˊ ngi goˊ koˋ nenˇ bodˋ piang ，mien euˋ euˋ eˊ mˇ diˊ maˋ ge ngianˇ inˊ 。	阿義哥可能生病了，氣色不好不知什麼原因造成。