美濃客家語寶典-11

美濃客家語寶典-11：

編號	例句	六堆客語拼音	華譯
lbk11_001	佢肚屎痛，痛啊牙研目皺，還才過。	iˇ duˋ siiˋ tung ，tung a ngaˇ ngianˇ mugˋ jiu ，hanˇ coiˇ go 。	他肚子痛，痛得咬牙、皺眉頭，真可憐。
lbk11_002	你今晡日心情蓋好喔！㖸啊牙射射仔。	ngˇ ginˊ buˊ ngidˋ ximˊ qinˇ goi hoˋ oˊ！nagˋ a ngaˇ sa sa eˊ。	你今天心情很好喔！笑容滿面的。
lbk11_003	看你㖸啊牙射鬚射，係毋係又想來借錢吔？	kon ngˇ nagˋ a ngaˇ sa xiˊ sa ，he mˇ he iu xiongˋ loiˇ jia qienˇ eˇ？	看你一副嬉皮笑臉的樣子，是不是又想來借錢了？
lbk11_004	阿弟牯仰恁呢牙生耳齒咿咿喔喔啊？	aˊ di guˋ ngiongˋ anˋ neˊ ngaˇ senˊ ngiˋ ciiˋ iˊ iˊ oˇ oˇ aˇ ？	阿弟怎麼這樣咿咿喔喔不斷呻吟呀？
lbk11_005	該隻狗仔見擺看著有人對佢等屋門前過，就牙狌狌仔愛咬人樣仔。	ge zagˋ gieuˋ eˋ gian baiˋ kon doˋ iuˊ nginˇ dui iˇ denˊ vugˋ munˇ qienˇ go ，qiu ngaˇ senˇ senˇ eˊ oi ngauˊ nginˇ iong eˊ 。	那隻狗每次看到有人從他們家門口過，就露出凶狠牙齒一副要咬人的樣子。
lbk11_006	佢毋知愐著麼个，在該牙哂哂仔緊偷㖸。	iˇ mˇ diˊ menˋ doˋ maˋ ge ，teˊ geˋ ngaˇ xiˊ xiˊ eˊ ginˋ teuˊ nagˋ 。	他不知想到什麼，在那裡牙齒微露著一直偷笑。
lbk11_007	佢這個人根本就係牙渣膦筋，莫去插佢。	iˇ iaˋ ge nginˇ ginˊ bunˋ qiu he ngaˇ zaˊ linˋ ginˊ ，mog hi cabˋ iˇ 。	他這人本來就小氣又不好相處，不要去理他。
lbk11_008	人講：「瓦屋簷前水，點點跌本跡。」大人儕係無好樣，細人仔就跈壞樣哪！	nginˇ gongˋ ：「ngaˋ vugˋ iamˇ qienˇ suiˋ ，diamˋ diamˋ diedˋ bunˋ jiagˋ 。」tai nginˇ saˇ he moˇ hoˋ iong ，se nginˇ eˋ qiu tenˇ faiˋ iong naˊ ！	俗話說：「屋簷滴水位置是不會改變的。」大人如果沒好的榜樣，小孩子就跟著變壞呀！
lbk11_009	該台腳踏車个鍊仔齧緪吔，無解開來鬥好無法度騎。	ge toiˇ giogˋ tab caˊ ge lien eˋ ngad henˇ eˇ，moˇ kieˋ koiˊ loiˇ deu hoˋ moˇ fabˋ tu kiˇ 。	那台腳踏車的齒輪卡死了，不把它鬆開裝好無法再騎。
lbk11_010	你到底在該譴麼个，譴啊齧牙擤齒呢？	ngˇ do daiˋ teˊ geˋ kienˋ maˋ ge， kienˋ a ngad ngaˇ sen ciiˋ noˋ ？	你到底在氣什麼，氣得咬牙切齒呢？
lbk11_011	這門安吔盡久吔，這恁久不時會軋軋滾，愛拁兜油過好。	iaˋ munˇ onˊ eˇ qin giuˋ eˇ，iaˋ anˋ giuˋ budˋ siiˇ voi ngad ngad gunˋ ，oi nga deuˊ iuˇ go hoˋ 。	這扇門已安裝很久了，最近經常會發出摩擦的聲響，要加點潤滑油較好。
lbk11_012	你毋好誤會吔：客家人毋係齧察，係勤儉。	ngˇ mˇ hoˋ ngu fi eˇ：hagˋ gaˊ nginˇ mˇ he ngadˋ cadˋ ，he kiunˇ kiam 。	你不要誤會了：客家人不是吝嗇，是勤儉。
lbk11_013	佢這人齧察膦毛，愛喚佢拿一息錢來請大家食飯，𠊎看你歸去睡目過著。	iˇ iaˋ nginˇ ngadˋ cadˋ linˋ moˊ ，oi vonˋ iˇ naˊ idˋ xidˋ qienˇ loiˇ qiangˋ tai gaˊ siid fan ，ngaiˇ kon ngˇ guiˊ hi soi mugˋ go cog 。	他這人非常小氣，要他拿出一點錢請大家吃飯，我看你回家睡覺算了。
lbk11_014	佢這人齧啊會孤盲，故所正會分人罵講「齧察四」。	iˇ iaˋ nginˇ ngadˋ a voi goˇ moˊ，gu soˋ nang voi bunˊ nginˇ ma gongˋ 「ngadˋ cadˋ xi 」。	他吝嗇得要命，所以才會被人罵是「小氣鬼」。
lbk11_015	𠊎今晡日食著無堵好，一下無來去上便所，驚怕肚屎會挨毋歇吔喲！	ngaiˇ ginˊ buˊ ngidˋ siid doˋ moˇ duˋ hoˋ ，idˋ ha moˇ loiˇ hi songˊ pien soˋ ，giangˊ pa duˋ siiˋ voi ngai mˇ hed eˇ ioˊ！	我今天吃壞肚子，現在不去上廁所，恐怕肚子會忍耐不住了！
lbk11_016	𠊎个核卵皮比若耳公皮過賁，你在該同𠊎大聲麼个！	ngaiˇ ge hag lonˋ piˇ biˋ ngiaˊ ngiˋ gungˊ piˇ go punˊ ，ngˇ teˊ geˋ tungˇ ngaiˇ tai sangˊ maˋ ge ！	我的福分比你大，你在對我凶什麼！
lbk11_017	𠊎係你肚屎裡个豺蟲，你在該愐麼个𠊎都知。	ngaiˇ he ngˇ duˋ siiˋ liˊ ge saiˇ cungˇ，ngˇ teˊ ge menˋ maˋ ge ngaiˇ duˊ diˊ。	我是你肚子裡的蛔蟲，你在想什麼我都知道。
lbk11_018	你愛帶佢去高雄尞，𠊎乜愛跈。	ngˇ oi dai iˇ hi goˊ hiungˇ liau ，ngaiˇ me oi tenˇ 。	你要帶他去高雄玩，我也要跟。
lbk11_019	兩儕都係清苦人，𠊎莫嫌你一隻目，你莫㖸𠊎穿鑿屋，大家將就啦！	liongˋ saˇ duˇ he qinˊ kuˋ nginˇ ，ngaiˇ mog hiamˇ ngˇ idˋ zagˋ mugˋ，ngˇ mog nagˋ ngaiˇ conˊ cog vugˋ ，tai gaˊ jiongˊ qiu laˋ！	我們都是窮苦人，我不嫌你一隻眼，你莫笑我住穿鑿屋，大家將就吧！
lbk11_020	你毋好想愛騙𠊎啦，𠊎就係你肚屎裡背个豺蟲，仰騙得過呢？	ngˇ mˇ hoˋ xiongˋ oi pien ngaiˇ laˋ，ngaiˇ qiu he ngˇ duˋ siiˋ diˊ boi ge saiˇ cungˇ ，ngiongˋ pien dedˋ go noˋ ？	你不要想騙我，我是你肚子裡的蛔蟲，怎騙得過我？
lbk11_021	佢為著愛趕上班，嗄無注意著頭那去啱著壁，攣吔幾下針。	iˇ vi doˋ oi gonˋ songˊ banˊ ，sa moˇ zu i doˋ teuˇ naˇ hi ngamˊ doˋ biagˋ ， lionˇ eˇ giˋ haˊ ziimˊ 。	他為了趕上班，不小心頭撞到牆壁，縫了好幾針。
lbk11_022	厥爸講無愛分佢去出國尞，佢在該啱生撞死緊抦東西。	iaˊ baˊ gongˋ moˇ oi bunˊ iˇ hi cudˋ guedˋ liau ，iˇ teˊ geˋ ngamˊ sangˊ cong xiˋ ginˋ biangˊ dungˊ xiˊ 。	他爸爸說不讓他出國玩，他在那裡氣呼呼的一直摔東西。
lbk11_023	頭擺个大人儕，每擺堵著細人仔愛註冊个時節，就一哪仔啱上啱下舂錢。	teuˇ baiˋ ge tai nginˇ saˇ ，miˊ baiˋ duˇ doˋ se nginˇ eˋ oi zu cagˋ ge siiˇ jiedˋ ，qiu idˋ naiˋ eˋ ngamˊ songˊ ngamˊ haˊ zungˊ qienˇ 。	以前大人們，每到小孩註冊的時候，就到處奔波借錢。
lbk11_024	這候選人為著選舉，一哪仔同人頷上頷下，盡清苦。	iaˋ heu xienˋ nginˇ vi doˋ xienˋ giˋ ，idˋ naiˋ eˋ tungˇ nginˇ ngamˋ song ngamˋ haˊ ，qin qinˊ kuˋ 。	這位候選人為了選舉，到處向人鞠躬敬禮，真辛苦。
lbk11_025	過年過節大家都愛頷頭唱喏。	go ngianˇ go jiedˋ tai gaˊ duˊ oi ngamˋ teuˇ cong iaˊ 。	逢年過節大家都會敬禮上香祭拜。
lbk11_026	這個老人家蓋毋好參詳，伙房肚个人喊佢「奀孱頭」。	iaˋ ge loˋ nginˇ gaˊ goi mˇ hoˋ camˊ xiongˇ ，foˋ fongˇ duˋ ge nginˇ ham iˇ 「nganˊ zanˊ teuˇ」。	這個老人家很不好商量，家族的人都叫他「長不大的老頑童」。
lbk11_027	這個細人仔頭擺有發病毋會大，故所到今還奀奀孱孱。	iaˋ ge se nginˇ eˋ teuˇ baiˋ iuˊ bodˋ piang mˇ voi tai ，gu soˋ do ginˊ hanˇ nganˊ nganˊ zanˊ zanˊ 。	這個小孩子以前生過病身體受影響，所以到現在還長不高。
lbk11_028	這個人做人蓋硬程、蓋老實，毋會騙人。	iaˋ ge nginˇ zo nginˇ goi ngang cangˇ 、goi loˋ siid ，mˇ voi pien nginˇ 。	這個人做人忠厚老實，不會騙人。
lbk11_029	田坵晒啊蓋燥，這下去犁，息把仔有過硬斗兜仔！	tienˇ kiuˊ sai a goi zauˊ ，iaˋ ha hi laiˇ ，xidˋ baˋ eˊ iuˊ go ngang deuˋ deuˊ eˊ ！	田晒得很乾燥，現在去翻土，是有點困難些！
lbk11_030	這支蔗仔忒老吔，齧去硬釘釘仔。	iaˋ giˊ za eˋ tedˋ loˋ eˇ，ngadˋ hi ngang diangˇ diangˇ eˊ 。	這支甘蔗過熟了，咬下去硬梆梆的。
lbk11_031	𠊎个手橫著，這下著衫褲毋方便，硬鉸鉸仔。	ngaiˇ ge suˋ vang doˋ ，iaˋ ha zogˋ samˊ fu mˇ fongˊ pien ，ngang gau gau eˊ 。	我的手摔傷，現在穿衣服很不方便，手腳不靈活。
lbk11_032	這個人蓋執蓋毋好參詳，𠊎等講：「硬頸个，先分火車逴死。」	iaˋ ge nginˇ goi ziibˋ goi mˇ hoˋ camˊ xiongˇ ，ngaiˇ nenˊ gongˋ ：「ngang giangˋ ge ，xienˊ bunˊ foˋ caˊ cogˋ xiˋ 。」	這個人很固執也很不好溝通、商量，我們說：「過剛易折，太過固執難成事。」
lbk11_033	這冬瓜煮無熟，食起來硬砉砉仔。	iaˋ dungˊ guaˊ zuˋ moˇ sug ，siid hiˋ loiˇ ngang guag guag eˊ 。	這冬瓜沒煮熟，吃起來還硬硬的難以咬碎。
lbk11_034	隔壁个叔公做人蓋執，大家在後背講佢蓋硬殼。	gagˋ biagˋ ge sugˋ gungˊ zo nginˇ goi ziibˋ ，tai gaˊ tiˊ heu boi gongˋ iˇ goi ngang hogˋ 。	隔壁个叔公做人固執己見，大家都在背後批評他很固執。。
lbk11_035	這下恁熱个天時，喊𠊎去倒樵，這個事頭忒硬門吔。	iaˋ ha anˋ ngiad ge tienˊ siiˇ ，hemˊ ngaiˇ hi doˋ ceuˇ ，iaˋ ge se teuˇ tedˋ ngang munˇ eˇ。	在這炎熱的天氣，叫我去砍柴，這工作實在是太困難了。
lbk11_036	煎木瓜粄，愛攪畀息把硬硬仔正好煎。	jienˊ mugˋ guaˊ banˋ ，oi giauˊ biˋ xidˋ baˋ ngang ngang eˊ nang hoˋ jienˊ 。	要煎木瓜餅，要攪拌到有點硬硬的才好煎。
lbk11_037	做人做事愛看過遠一息，頭那愛𢳆轉來看。	zo nginˇ zo sii oi kon go ianˋ idˋ xidˋ ，teuˇ naˇ oi ngau zonˋ loiˇ kon。	做人做事要看遠一點，凡事要考慮周詳。
lbk11_038	頭擺五六月个時節，天時熱又無東西好食，該兜日仔正式係咬薑啜醋。	teuˇ baiˋ ngˋ liugˋ ngiad ge siiˇ jiedˋ， tienˊ siiˇ ngiad iu moˇ dungˊ xiˊ hoˋ siid ，ge deuˊ ngidˋ eˋ ziin siidˋ he ngauˊ giongˊ codˋ cii 。	以前在五六月的時候，天氣熱又沒東西可吃，真的是生活困苦。
lbk11_039	一個無讀書个人，講話過無底仔，𠊎等美濃人會取笑佢：「咬膦毋咬膦，詩句碌碌。」	idˋ ge moˇ tug suˊ ge nginˇ ，gongˋ fa go moˇ daiˋ eˋ ，ngaiˇ nenˊ miˇ nungˇ nginˇ voi qiˋ seu iˇ ：「ngauˊ linˋ mˇ ngauˊ linˋ，siiˊ gi lugˋ lugˋ 。」	一個沒讀書的人，說話都不經大腦，我們美濃人會取笑他：「虛有其表」。
lbk11_040	做事、做生理愛比人過精一息，故所𠊎等美濃人會講：「咬膦愛咬頭口」，意思係愛比人先出手。	zo sii 、zo senˊ liˊ oi biˋ nginˇ go jinˊ idˋ xidˋ ，gu soˋ ngaiˇ nenˊ miˇ nungˇ nginˇ voi gongˋ ：「ngauˊ linˋ oi ngauˊ teuˇ heuˋ 」，i sii he oi biˋ nginˇ xienˊ cudˋ suˋ 。	做事、做生意要比一般人精明一些，所以我們美濃人會說：「做事或做生意，都要搶先他人一步」，意思是要比其他人先出手。
lbk11_041	𠊎看佢咬牙切齒在該講話，怕蓋譴哦！	ngaiˇ kon iˇ ngauˊ ngaˇ qiedˋ ciiˋ teˊ geˋ gongˋ fa ，pa goi kienˋ oˊ ！	我看他咬牙切齒的在講電話，可能很生氣哦！
lbk11_042	這個瓜仔生著毋正、毋靚，美濃人會講這係「獒梨竵瓜」。	iaˋ ge guaˊ eˋ sangˊ doˋ mˇ zang 、mˇ jiangˊ ，miˇ nungˇ nginˇ voi gongˋ iaˋ he 「ngauˇ liˇ feˋ guaˊ」。	這個瓜長得不正、不漂亮，美濃人會說這是「奇形怪狀的瓜果」。
lbk11_043	獒梨，正柚，駝背楊桃，頭擺這兜水果係生著恁呢會過好食。	ngauˇ liˇ ，zang iu ，toˇ boi iongˇ toˇ ，teuˇ baiˋ iaˋ deuˊ suiˋ goˋ he sangˊ doˋ anˋ neˊ voi go hoˋ siid 。	歪歪的梨，方正的柚子，彎曲的楊桃，以前的水果若長成這樣會比較好吃。
lbk11_044	種著个瓜仔、吊菜仔無淋著肥，彎彎蹺蹺，美濃人講蓋像獒膦竵朘。	zung doˋ ge guaˊ eˋ 、diau coi eˋ moˇ limˇ doˋ piˇ ，vanˊ vanˊ kiauˇ kiauˇ，miˇ nungˇ nginˇ gongˋ goi qiong ngauˇ linˋ feˋ zoiˊ 。	種的小黃瓜、茄子沒有施肥，長得彎彎曲曲，美濃人會說像是奇形怪狀的男性生殖器。
lbk11_045	這個人蓋講毋得，一有麼个毋堵好就獒頭頓頸。	iaˋ ge nginˇ goi gongˋ mˇ dedˋ ，idˋ iuˊ maˋ ge mˇ duˋ hoˋ qiu ngauˇ teuˇ dun giangˋ 。	這個人批評不得，一有什麼差錯就怒眼相向。
lbk11_046	佢兩兄弟從旦裡時常獒門。	iˇ liongˋ hiungˊ ti qiungˇ dan liˊ siiˇ songˇ ngauˇ munˇ 。	他們兄弟倆一直以來感情就都不好。
lbk11_047	你作个牆頭獒獒竵竵，一息都毋好看。	ngˇ zogˋ ge xiongˇ teuˇ ngauˇ ngauˇ feˋ feˋ ，idˋ xidˋ duˊ mˇ hoˋ kon 。	你砌的圍牆歪歪斜斜，一點都不好看。
lbk11_048	騎車仔个時節，車手仔毋好獒上獒下，恁呢蓋會橫倒。	kiˇ caˊ eˋ ge siiˇ jiedˋ ，caˊ suˋ eˋ mˇ hoˋ ngauˇ songˊ ngauˇ haˊ ，anˋ neˊ goi voi vang doˋ 。	騎車的時候，把手不要歪來歪去，這樣很容易跌倒。
lbk11_049	你食東西蓋會揀擇，盡像獒嘴雞。	ngˇ siid dungˊ xiˊ goi voi gianˋ tog ，qin qiong ngauˇ zoi gieˊ 。	你吃東西很愛挑食，很像歪嘴雞。
lbk11_050	你恁毋堪身份，都無好食吔，還在該揀揀擇擇，正式係「獒嘴雞揀骨頭」。	ngˇ anˋ mˇ kamˊ siinˊ fun ，duˊ moˇ hoˋ siid eˇ ，hanˇ teˊ geˋ gianˋ gianˋ tog tog ，ziin siidˋ he 「ngauˇ zoi gieˊ gianˋ gudˋ teuˇ」。	你還不認清現在的處境，都沒得吃了，還在挑三揀四，真是「歪嘴雞還挑骨頭。」
lbk11_051	這個人嘴斗毋好蓋會嫌東嫌西，不時分人罵「獒嘴雞揀穀食」。	iaˋ ge nginˇ zoi deuˋ mˇ hoˋ goi voi hiamˇ dungˊ hiamˇ xiˊ ，budˋ siiˇ bunˊ nginˇ ma 「ngauˇ zoi gieˊ gianˋ gugˋ siid」。	這個人很挑食很會嫌東嫌西，時常被人罵「歪嘴雞挑穀吃」。
lbk11_052	老人家年紀大吔，會耳聾頂碓，毋好同佢計較。	loˋ nginˇ gaˊ ngianˇ gi tai eˇ ，voi ngiˋ nungˊ dangˋ doi ，mˇ hoˋ tungˇ iˇ gie gauˋ 。	老人家年紀大了，會耳朵重聽，不要跟他計較。
lbk11_053	美濃人有講：「耳吊吊無米糶，耳砣砣萬富豪」，𠊎看佢耳公皮蓋賁，怕蓋有福氣哦！	miˇ nungˇ nginˇ iuˊ gongˋ ：「ngiˋ diau diau moˇ miˋ tiau ，ngiˋ toˇ toˇ van fu hoˇ 。」ngaiˇ kon iˇ ngiˋ gungˊ piˇ goi punˊ ，pa goi iuˊ fugˋ hi oˊ ！	美濃人有說：「耳朵吊縮是窮苦相，耳垂長厚會很有錢。」我看他耳朵厚又有肉，應該很有福氣哦！
lbk11_054	𠊎姐丈耳公毋好，見講麼个佢都耳脛脛仔聽毋真。	ngaiˇ jiˋ congˊ ngiˋ gungˊ mˇ hoˋ ，gian gongˋ maˋ ge iˇ duˊ ngiˋ guangˇ guangˇ eˊ tangˊ mˇ ziinˊ。	我姐夫耳朵不好，每次說話他都很耳背聽不清楚。
lbk11_055	這個細人仔蓋毋聽教，講麼个佢都無在該聽，耳閕閕仔蓋得人恨。	iaˋ ge se nginˇ eˋ goi mˇ tangˊ gauˊ ，gongˋ maˋ ge iˇ duˊ moˇ teˊ geˋ tangˊ ，ngiˋ hia hia eˊ goi dedˋ nginˇ hen 。	這個小孩很不受教，跟他說話都沒在聽，讓人很生氣。
lbk11_056	𠊎个倈仔下把仔蓋蠻皮，無認真聽人講話，耳靴靴仔哦！	ngaiˇ ge lai eˋ ha baˋ eˇ goi manˇ piˇ ，moˇ ngin ziinˊ tangˊ nginˇ gongˋ fa ，ngiˋ hio hio eˊ oˊ ！	我的兒子有時很頑皮，沒有認真在聽人說話，馬耳東風、不把他人說的話當一回事。
lbk11_057	你講恁多，佢無認真聽，蓋像耳聾个醫生，無聽病人呻。	ngˇ gongˋ anˋ doˊ ，iˇ moˇ ngin ziinˊ tangˊ ，goi qiong ngiˋ nungˊ ge iˊ senˊ ，moˇ tangˊ piang nginˇ cenˊ 。	你講這麼多，他都沒認真聽，很像是耳聾的醫生，聽不見病人的呻吟。
lbk11_058	這個人放紙炮仔都毋會驚，斷真係耳聾毋驚銃。	iaˋ ge nginˇ biong ziiˋ pau eˋ duˊ mˇ voi giangˊ ，don ziinˊ he ngiˋ nungˊ mˇ giangˊ cung 。	這個人放鞭炮都不怕，真的是聾子聽不到聲音，所以不怕槍響。
lbk11_059	這个老人家耳背背仔，講麼个話都聽毋著。	iaˋ ge loˋ nginˇ gaˊ ngiˋ poi poi eˊ ，gongˋ maˋ ge fa duˊ tangˊ mˇ doˋ 。	這個老人家耳背，說什麼話都沒聽到。
lbk11_060	佢見坐凳仔，腳就惹啊蓋高，實在壞看，𠊎等會罵佢「惹高天，壞樣式」。	iˇ gian coˊ den eˋ， giogˋ qiu ngia a goi goˊ ，siid cai faiˋ kon ，ngaiˇ nenˊ voi ma iˇ 「ngia goˊ tienˊ， faiˋ iong siidˋ」。	他每次坐椅子，腳就翹得很高，實在難看，我們會罵他「腳翹那麼高，沒規矩」。
lbk11_061	𠊎喚你疊樵，你嗄疊到惹惹翹翹，無半息樣式。	ngaiˇ vonˋ ngˇ tiab ceuˇ ，ngˇ sa tiab do ngia ngia hieu hieu ，moˇ ban xidˋ iong siidˋ 。	我叫你堆疊木柴，你卻疊得亂七八糟，很不用心。
lbk11_062	食東西毋好去餳細人仔，惹惹餳餳，細人仔會分你餳啊緊噭。	siid dungˊ xiˊ mˇ hoˋ hi xiangˇ se nginˇ eˋ ，ngiaˊ ngiaˊ xiangˇ xiangˇ ，se nginˇ eˋ voi bunˊ ngˇ xiangˇ a ginˋ gieu 。	吃東西不要去誘惑小孩，一直引誘，小孩會被搞得一直哭。
lbk11_063	這個事頭蓋硬門，𠊎惹毋橫喔！	iaˋ ge se teuˇ goi ngang munˇ ，ngaiˇ ngiaˋ mˇ vang oˊ！	這個工作很困難，我應付不來。
lbk11_064	昨晡日佢兩儕毋知為著麼个事情吵事，吵到惹惹扯扯。	coˊ buˊ ngidˋ iˇ liongˋ saˇ mˇ diˊ vi doˋ maˋ ge sii qinˇ cauˇ sii ，cauˇ do ngiaˋ ngiaˋ caˋ caˋ 。	昨天他們兩人不知為了什麼事情吵架，吵到拉拉扯扯。
lbk11_065	吾姆做田、放水，定著愛攝褲腳正有下田坵。	ngaˊ meˊ zo tienˇ 、biong suiˋ ，tin cog oi ngiabˋ fu giogˋ nang iuˊ haˊ tienˇ kiuˊ 。	我媽媽耕田、引水灌溉，一定要捲起褲管才會下田。
lbk11_066	頭擺吾婆有講過：「𥍉目滴剁个人心術毋好，最好毋好同佢來去。」	teuˇ baiˋ ngaˊ poˇ iuˊ gongˋ go ：「ngiabˋ mugˋ did dog ge nginˇ ximˊ siid mˇ hoˋ ，zuiˋ hoˋ mˇ hoˋ tungˇ iˇ loiˇ hi 。」	以前我奶奶有說過：「眼睛不停的眨動的人心術不正，最好不要跟他交往。」
lbk11_067	𠊎个目珠分虻仔打著，故所緊𥍉目珠。	ngaiˇ ge mugˋ zuˊ bunˊ mangˊ eˋ daˋ doˋ ，gu soˋ ginˋ ngiabˋ mugˋ zuˊ 。	小飛蟲衝撞入我的眼睛裡，所以一直眨眼睛。
lbk11_068	當晝个日頭熱活活仔，你仰還走出去打球仔！	dongˊ zu ge ngidˋ teuˇ ngiad fad fad eˊ ，ngˇ ngiongˋ hanˇ zeuˋ cudˋ hi daˋ kiuˇ eˋ ！	中午的太陽非常炎熱，你怎麼還跑出去打球！
lbk11_069	𠊎个倈仔都倚恃毋得吔，你還喚𠊎去同婿郎歇，人講：「月光都無好望，哪有還想望星仔」，莫想恁多哪！	ngaiˇ ge lai eˋ duˊ iˋ sii mˇ dedˋ eˇ，ngˇ hanˇ vonˋ ngaiˇ hi tungˇ se nongˇ hed ，nginˇ gongˋ ：「ngiad gongˊ duˊ moˇ hoˋ mong ，nai iuˊ hanˇ xiongˋ mong senˊ eˋ 」，mog xiongˋ anˋ doˊ naˊ ！	我自己的兒子都不能依賴了，你還叫我去跟女婿住，俗話說：「月光都期待不了了，哪有還想奢望星星的」，別妄想了！
lbk11_070	阿秋今年升組長吔，看佢做啊熱吱吱仔，一等熱注喔！	aˊ qiuˊ ginˊ ngianˇ siinˊ zuˊ zongˋ eˇ，kon iˇ zo a ngiad ji ji eˊ ，idˋ denˋ ngiad zu oˊ！	阿秋今年升組長了，看她做得那麼投入，真的非常熱中這份工作喔！
lbk11_071	該人壞啊無靈性，大家講啊著佢就會念咒拗訣。	ge nginˇ fai a moˇ linˇ xin ，tai gaˊ gongˋ a doˋ iˇ qiu voi ngiam zu auˋ giadˋ 。	那個人壞透了，大家一提到他就會恨得指指點點並詛咒他。
lbk11_072	你無聽人講過：「拈番薯仔愛拈田角，同學老嫲愛庰山腳」吓？你仰恁呢大大方方帶學老嫲來餐廳食飯呢？	ngˇ moˇ tangˊ nginˇ gongˋ go ：「ngiamˊ fanˊ suˇ eˋ oi ngiamˊ tienˇ gogˋ ，tungˇ ho loˋ maˇ oi biang sanˊ giogˋ 」haˋ ？ngˇ ngiongˋ anˋ neˊ tai tai fongˊ fongˊ dai ho loˋ maˇ loiˇ conˊ tangˊ siid fan noˋ ？	你沒聽人家說過：「撿地瓜要撿田的邊角處，帶小三就要躲到山腳偏僻處」嗎？你怎麼就這麼大大方方的帶著小三到餐廳來吃飯呢？
lbk11_073	大家毋好再吵吔，𠊎等來拈鬮分撥，拈著个人就愛過甘願兜仔。	tai gaˊ mˇ hoˋ zai cauˇ eˇ ，ngaiˇ nenˊ loiˇ ngiamˊ kieuˊ bunˊ badˋ ，ngiamˊ doˋ ge nginˇ qiu oi go gamˊ ngian deuˊ eˊ 。	大家不要再吵了，我們來抽籤分配，抽到的人就要甘願點兒。
lbk11_074	這擺个風搓十分大，風搓過核，家家戶戶都在該拈瓦整屋，無閒洎杈。	iaˋ baiˋ ge fungˊ caiˊ siib funˊ tai ，fungˊ caiˊ go hedˋ ，gaˊ gaˊ fu fu duˊ teˊ geˋ ngiamˊ ngaˋ zangˋ vugˋ ，moˇ hanˇ qi ca 。	這次的颱風非常強，颱風過後，家家戶戶都在檢修瓦片，整理屋頂，忙得不得了。
lbk11_075	厥姆恁久發病毋得好，故所，佢一哪去拈籤卜卦，想同厥姆改運。	iaˊ meˊ anˋ giuˋ bodˋ piang mˇ dedˋ hoˋ ，gu soˋ ，iˇ idˋ naiˋ hi ngiamˊ qiamˊ bugˋ gua ，xiongˋ tungˇ iaˊ meˊ goiˋ iun 。	他媽媽最近生病都沒起色，所以，他到處去求籤卜卦，想幫他媽媽改運。
lbk11_076	你無聽人講：「拈籤卜卦，賭膦造化」吓？毋好緊覺著拈籤卜卦，錢就會對天頂項跌下來，還係自家煞猛兜仔過直。	ngˇ moˇ tangˊ nginˇ gongˋ ：「ngiamˊ qiamˊ bugˋ gua ，duˋ linˋ co fa 」haˋ ？mˇ hoˋ ginˋ gogˋ doˋ ngiamˊ qiamˊ bugˋ gua ，qienˇ qiu voi dui tienˊ dangˋ hong diedˋ haˊ loiˇ ，hanˇ he qid gaˊ sadˋ mangˊ deuˊ eˊ go ciid 。	你沒聽人家說：「求籤卜卦，都是沒有根據的」嗎？不要老以為求籤卜卦之後，錢就會從天上掉下來，還是自己努力勤奮點比較實際。
lbk11_077	該人做事情恁拈燒怕冷，絕對做漦毋好。	ge nginˇ zo sii qinˇ anˋ ngiamˊ seuˊ pa nangˊ ，qied dui zo xiauˇ mˇ hoˋ 。	那個人做事情這麼畏首畏尾，絕對什麼事都做不好。
lbk11_078	這領拈摺裙係吾姆做分𠊎个。	iaˋ liangˊ ngiamˊ zabˋ kiunˇ he ngaˊ meˊ zo bunˊ ngaiˇ ge 。	這件摺裙是我媽媽做給我的。
lbk11_079	做甜粄定著愛緊煮緊攪，係無會黏合加攪毋動喔！	zo tiamˇ banˋ tin cog oi ginˋ zuˋ ginˋ giauˊ ，he moˇ voi ngiamˇ gabˋ gaˊ giauˊ mˇ tungˊ oˊ！	做年糕一定要邊煮邊攪拌，否則全部黏成一團就攪不動了。
lbk11_080	細人仔毋好管啊忒緪豪，管啊忒緪豪就有可能變壞，頭擺人講：「嚴官出惡賊」，就係恁呢个道理。	se nginˇ eˋ mˇ hoˋ gonˋ a tedˋ henˇ hoˇ ，gonˋ a tedˋ henˇ hoˇ qiu iuˊ koˋ nenˇ bien fai ，teuˇ baiˋ nginˇ gongˋ ：「ngiamˇ gonˊ cudˋ ogˋ ced 」，qiu he anˋ neˊ ge to liˊ 。	小孩子不要管得太緊，管得越嚴就有可能變壞，以前的人講：「管得越嚴，盜賊越多、犯案越嚴重」，就是這個道理。
lbk11_081	公婆離核吔愛使堅持細人仔定著愛跈麼人呢？「黏爺也係一日，黏哀也係一日」，你兩儕恁呢緊吵哪係頭路？	gungˊ poˇ liˇ hedˋ eˇ oi siiˋ gianˊ ciiˇ se nginˇ eˋ tin cog oi tenˇ maˋ nginˇ noˋ ？「ngiamˇ iaˇ iaˊ he idˋ ngidˋ ，ngiamˇ oiˊ iaˊ he idˋ ngidˋ 」，ngˇ liongˋ saˇ anˋ neˊ ginˋ cauˇ nai he teuˇ lu ？	夫妻離婚了何必堅持孩子一定要跟誰呢？「子女隨父或隨母，吃飯都一樣」，你們倆這樣一直爭吵哪是辦法？
lbk11_082	你講話黏牙帶齒，講吔一朝晨，𠊎聽無半句。	ngˇ gongˋ fa ngiamˇ ngaˇ dai ciiˋ ，gongˋ eˇ idˋ zeuˊ siinˇ ，ngaiˇ tangˊ moˇ ban gi 。	你說話語音含糊不清楚，說了一整個早上，我一句都沒聽懂。
lbk11_083	你做事歸來，一身黏黏浹浹，共快去洗身過鬆爽。	ngˇ zo se guiˊ loiˇ ，idˋ siinˊ ngiamˇ ngiamˇ giabˋ giabˋ ，kiung kuai hi seˋ siinˊ go sungˊ songˋ 。	你工作回來，一身溼溼黏黏的，趕緊去洗個澡比較舒服。
lbk11_084	你做姐仔个人，每日看啊著老公就唸唸唸唸，毋會煩吓？	ngˇ zo jiaˋ eˋ ge nginˇ ，miˊ ngidˋ kon a doˋ loˋ gungˊ qiu ngiamˇ ngiamˇ ngiam ngiam ，mˇ voi fanˇ haˋ ？	你當太太的人，每天一看到老公就嘮叨個不停，煩不煩哪？
lbk11_085	佢等兩公婆感情十分好，見去哪仔都黏上黏下。	iˇ denˊ liongˋ gungˊ poˇ gamˋ qinˇ siib funˊ hoˋ ，gian hi naiˋ eˋ duˊ ngiamˇ songˊ ngiamˇ haˊ 。	他們夫妻倆感情非常好，不管到哪裡都形影不離。
lbk11_086	佢兩儕蓋好，不時通透講話，閻王詐鬼轉本來就恁呢！	iˇ liongˋ saˇ goi hoˋ ，budˋ siiˇ tungˊ teu gongˋ fa ，ngiamˇ vongˇ za guiˋ zonˋ bunˋ loiˇ qiu anˋ neˊ ！	他們兩人交情很好，私下常常往來，會官官相護是理所當的！
lbk11_087	人到中年日日夜夜愛蓋細義，頭擺人有講：「年怕過中秋，人驚過四九」。	nginˇ do zungˊ ngianˇ ngidˋ ngidˋ ia ia oi goi se ngi ，teuˇ baiˋ nginˇ iuˊ gongˋ ：「ngianˇ pa go zungˊ qiuˊ ，nginˇ giangˊ go xi giuˋ 」。	人過中年後每天要注意健康，以前的人說：「過了中秋就快過年了；人過了四十九歲就進入老年了」。
lbk11_088	過年會到吔，年三夜四，大家蓋無閒。	go ngianˇ voi do eˇ，ngianˇ samˊ ia xi ，tai gaˊ goi moˇ hanˇ 。	過年快到了，歲末年終，大家都很忙。
lbk11_089	美濃人蓋重視祭祖个禮節，蓋注重年宵五節个戲景。	miˇ nungˇ nginˇ goi cung sii ji zuˋ ge liˊ jiedˋ ，goi zu cung ngianˇ seuˊ ngˋ jiedˋ ge hi ginˋ 。	美濃人很重視祭祖的禮俗，很注重五個節慶的活動。
lbk11_090	這個細倈仔生著眼暴暴仔，直在講面相毋係蓋好哦！	iaˋ ge se lai eˋ sangˊ doˋ ngianˋ bau bau eˊ ，ciid cai gongˋ mien xiong mˇ he goi hoˋ oˊ ！	這個男生的眼睛向外凸出，面相實在不是很好哦！
lbk11_091	你做麼个仰眼盯盯仔看等𠊎呢？𠊎哪得失你吔？	ngˇ zo maˋ ge ngiongˋ ngianˋ dangˊ dangˊ eˊ kon nenˋ ngaiˇ noˋ ？ngaiˇ naiˋ dedˋ siidˋ ngˇ eˇ ？	你為什麼盯著我看呢？我哪裡得罪你了？
lbk11_092	佢兩儕有冤仇，見相堵頭就會眼鬥鬥仔。	iˇ liongˋ saˇ iuˊ ianˊ suˇ ，gian xiongˊ duˇ teuˇ qiu voi ngianˋ deu deu eˊ 。	他們兩個人有仇，每次遇到就會睜大兩眼狠狠的瞪著對方。
lbk11_093	𠊎看你做事恁毋認真，看啊𠊎眼火心著。	ngaiˇ kon ngˇ zo sii anˋ mˇ ngin ziinˊ ，kon a ngaiˇ ngianˋ foˋ ximˊ cog 。	我看你做事這麼不認真，看得我氣憤難耐。
lbk11_094	𠊎等頭擺會偷冷飯來食，阿公、阿婆看著會眼金金仔緊看𠊎等。	ngaiˇ nenˊ teuˇ baiˋ voi teuˊ nangˊ fan loiˇ siid ，aˊ gungˊ 、aˊ poˇ kon doˋ voi ngianˋ gimˊ gimˊ eˊ ginˋ kon ngaiˇ nenˊ。	我們以前會偷吃冷飯，爺爺、奶奶會睜大雙眼看著我們。
lbk11_095	昨暗晡釅茶食忒多吔，害𠊎眼桄桄仔睡毋得。	coˊ am buˊ ngiamˇ caˇ siid tedˋ doˊ eˇ，hoi ngaiˇ ngianˋ guangˊ guangˊ eˊ soi mˇ dedˋ 。	昨天晚上喝太多茶，害我瞪著天花板睡不著。
lbk11_096	眼瞎个人蓋才過，下到愛有人牽、有人照顧。	ngianˋ hadˋ ge nginˇ goi coiˇ go ，ha doˋ oi iuˊ nginˇ kianˊ 、iuˊ nginˇ zeu gu 。	盲人很可憐，隨時需要有人牽著、有人照顧。
lbk11_097	酒食忒多个人，看人眼卡卡仔毋知分漿。	jiuˋ siid tedˋ doˊ ge nginˇ ，kon nginˇ ngianˋ kieˇ kieˇ eˊ mˇ diˊ funˊ jiongˊ 。	酒喝多的人，醉醺醺的看人是看不清楚的。
lbk11_098	細人仔還細灌藥仔畀食，愛撚鼻公正有辦法灌。	se nginˇ eˋ hanˇ se gon iog eˋ biˋ siid ，oi ngianˋ pi gungˊ nang iuˊ pan fabˋ gon。	嬰幼兒還小要灌藥給他吃，需要用手指捏鼻子才有辦法灌。
lbk11_099	這個人無修養，堵著看毋過个事情，就會眼刺刺仔緊看人。	iaˋ ge nginˇ moˇ xiuˊ iongˊ ，duˇ doˋ kon mˇ go ge sii qinˇ ，qiu voi ngianˋ qiagˋ qiagˋ eˊ ginˋ kon nginˇ 。	這個人很沒修養，遇到看不慣的事情，就會怒目看人，一付想攻擊人的樣子。
lbk11_100	這個狗仔蓋惡喔！看著毋熟事个人會眼狌狌仔。	iaˋ ge gieuˋ eˋ goi ogˋ oˊ！kon doˋ mˇ sug sii ge nginˇ voi ngianˋ senˇ senˇ eˊ 。	這隻狗很凶喔！看到不熟識的人會怒目瞪著人看。
lbk11_101	家娘係惱心臼，做麼个事情都會眼視眼物。	gaˊ ngiongˇ he nauˊ ximˊ kiuˊ ，zo maˋ ge sii qinˇ duˊ voi ngianˋ sii ngianˋ vud 。	婆婆如果討厭媳婦，無論她做什麼事，都會一直瞪著她看。
lbk11_102	吾叔講，佢還後生時著喇叭褲，吾公就眼視視仔看佢，害佢蓋壞勢。	ngaˊ sugˋ gongˋ，iˇ hanˇ heu sangˊ siiˇ zogˋ lab baˋ fu ，ngaˊ gungˊ qiu ngianˋ sii sii eˊ kon iˇ，hoi iˇ goi faiˋ se 。	我叔叔說，他年輕時穿喇叭褲，我爺爺就會瞪著他看，害他很不好意思。
lbk11_103	𠊎等頭擺係尋東西尋毋著就會喊阿婆，阿婆會罵：「眼大不見山，仰會尋毋著？」	ngaiˇ nenˊ teuˇ baiˋ he qimˇ dungˊ xiˊ qimˇ mˇ doˋ qiu voi hemˊ aˊ poˇ，aˊ poˇ voi ma ：「ngianˋ tai budˋ gian sanˊ ，ngiongˋ voi qimˇ mˇ doˋ ？」	以前我們要找東西找不到就會叫奶奶，奶奶會罵：「不用心找，明明一眼就可看到的東西怎麼會沒看到？」
lbk11_104	還細𠊎等搞走相逐，走啊相擆，一下仔就會眼黃鼻花。	hanˇ se ngaiˇ nenˊ gauˋ zeuˋ xiongˊ giugˋ ，zeuˋ a xiongˊ cogˋ，idˋ ha eˊ qiu voi ngianˋ vongˇ pi faˊ 。	小時候我們玩追逐賽，跑得撞在一起，馬上就眼冒金星、鼻血直流。
lbk11_105	男女一生人愛經過迎親嫁娶，正算得係完整个一生人。	namˇ ngˋ idˋ senˊ nginˇ oi ginˊ go ngiangˇ qinˊ ga qiˋ ，nang son dedˋ he vanˇ ziinˋ ge idˋ senˊ nginˇ 。	男女一生要經過婚嫁，才算是完整的一輩子。
lbk11_106	寒天个時節，登常朝晨頭一䟘起來，去上便所就會尿岔岔仔。	honˇ tienˊ ge siiˇ jiedˋ ，denˊ songˇ zeuˊ siinˇ teuˇ idˋ hong hiˋ loiˇ ，hi songˊ pien soˋ qiu voi ngiau ca ca eˊ。	冬季時，經常早上一起床，去上廁所拉的尿總是又多又急。
lbk11_107	佢年紀大吔，出去尞个時節不時尿汀汀仔。	iˇ ngianˇ giˋ tai eˇ，cudˋ hi liau ge siiˇ jiedˋ budˋ siiˇ ngiau din din eˊ 。	他紀大了，出去旅遊的時候經常會有頻尿的情形。
lbk11_108	平常時係屙尿有問題，就愛共快去分醫生看，人講：「尿臌上臍，神仙難醫」喲！。	pinˇ songˇ siiˇ he oˊ ngiau iuˊ mun tiˇ ，qiu oi kiung kuai hi bunˊ iˊ senˊ kon ，nginˇ gongˋ：「ngiau guˋ songˊ qiˇ ，siinˇ xienˊ nanˇ iˊ 」ioˊ！	平時若發現小便有問題，就要趕快去看醫生，俗話說：「尿路不通所引發的疾病，神仙也難醫治」喲！
lbk11_109	今晡日西瓜食啊忒多吔，一下晝尿漕漕仔緊上便所，實在盡壞勢。	ginˊ buˊ ngidˋ xiˊ guaˊ siid a tedˋ doˊ eˇ，idˋ haˊ zu ngiau zoˇ zoˇ eˊ ginˋ songˊ pien soˋ ，siid cai qin faiˋ se 。	今天西瓜吃得太多，整個下午頻尿一直上廁所，真是不好意思。
lbk11_110	佢前幾日騎引擎橫倒著傷，這下就繞腳行吔。	iˇ qienˇ giˋ ngidˋ kiˇ enˊ jinˋ vang doˋ cog songˊ ，iaˋ ha qiu ngiauˋ giogˋ hangˇ eˇ。	他前幾天騎機車摔倒受傷，現在就一跛一跛的走路了。
lbk11_111	去哪仔尞都愛入莊從俗，係無會分人惱。	hi nai eˋ liau duˊ oi ngib zongˊ qiungˇ xiug ，he moˇ voi bunˊ nginˇ nauˊ 。	到哪裡玩都要入境隨俗，才不會讓人討厭。
lbk11_112	這門𢱤啊去會軋軋軋軋，愛拁兜油吔。	iaˋ munˇ sungˋ a hi voi ngid ngid ngad ngad ，oi nga deuˊ iuˇ eˇ。	這門一推就會發出刺耳的聲音，要加些潤滑油了。
lbk11_113	這屋仔日長月久都無人歇，蝲䗁絲生啊一哪仔都係吔。	iaˋ vugˋ eˋ ngidˋ congˇ ngiad giuˋ duˊ moˇ nginˇ hed ，laˇ kiaˇ xiˊ sangˊ a idˋ naiˋ eˋ duˊ he eˇ。	這房子已經很久沒人住了，蜘蛛網長得到處都是。
lbk11_114	日曆通書係算命先生算命、看日仔用个，一般人過毋曉得愛仰仔用。	ngidˋ lag tungˊ suˊ he son miang xinˊ sangˊ son miang 、kon ngidˋ eˋ iung ge ，idˋ banˊ nginˇ go mˇ hiauˋ dedˋ oi ngiongˋ eˊ iung 。	日曆通書是算命先生算命、看日子使用的書，一般人比較不知道該怎麼使用。
lbk11_115	今个機器盡厲害，做得日日夜夜做事，毋使休息又毋使領月給喔！	ginˊ ge giˊ hi qin li hoi ，zo dedˋ ngidˋ ngidˋ ia ia zo se ，mˇ siiˋ hiuˊ xidˋ iu mˇ siiˋ liangˊ ngiad gibˋ oˊ！	現在的機器很厲害，可以每天從早做到晚，不必休息又不必領薪水喲！
lbk11_116	厥老公去行船吔，佢日日月月都目望望仔等佢歸來。	iaˊ loˋ gungˊ hi hangˇ sonˇ eˇ ，iˇ ngidˋ ngidˋ ngiad ngiad duˊ mugˋ mong mong eˊ denˋ iˇ guiˊ loiˇ 。	她老公去跑船了，她總是日日月月眼巴巴的盼望著他回來。
lbk11_117	佢正講啊著風流个阿棟伯，阿棟伯就行來吔，害佢盡壞勢，這就係人講个：「日時頭毋好講人，暗晡頭毋好講鬼」哪！	iˇ nang gongˋ a doˋ fungˊ liuˇ ge aˊ dung bagˋ ，aˊ dung bagˋ qiu hangˇ loiˇ eˇ，hoi iˇ qin faiˋ se ，iaˋ qiu he nginˇ gongˋ ge ：「ngidˋ siiˇ teuˇ mˇ hoˋ gongˋ nginˇ ，am buˊ teuˇ mˇ hoˋ gongˋ guiˋ 」naˊ ！	他才剛講阿棟伯的風流事，阿棟伯就走過來了，害他非常不好意思，這就是俗話說的：「白天不要說人，夜晚不要提鬼」呀！
lbk11_118	日頭落山吔，東西收揫好勢來，準備來歸吔。	ngidˋ teuˇ log sanˊ eˇ，dungˊ xiˊ suˊ qiuˊ hoˋ se loiˇ ， zunˋ pi loiˇ guiˊeˇ。	太陽下山了，東西收拾好，準備回家了。
lbk11_119	係會落大雨个時節，有兜動物就會先知，就像美濃人講个：「蟻公搬家魚反塘，三日大路變陂塘」，這就係客家民間个經驗。	he voi log tai iˋ ge siiˇ jiedˋ ，iuˊ deuˊ tung vud qiu voi xienˊ diˊ ，qiu qiong miˇ nungˇ nginˇ gongˋ ge ：「ngie gungˊ banˊ gaˊ ngˇ fanˋ tongˇ ，samˊ ngidˋ tai lu bien biˊ tongˇ 」，iaˋ qiu he hagˋ gaˊ minˇ gianˊ ge ginˊ ngiam 。	如果將要下大雨的時候，有些動物就會先知道，像美濃俗諺說的：「螞蟻搬家、池塘中的魚不安的跳躍，都有大雨成災的可能」，這就是客家民間的經驗。
lbk11_120	你這隻殗雞仔，行無兩步腳就喊𤸁吔，做麼个好！	ngˇ iaˋ zagˋ ngiem gieˊ eˋ ，hangˇ moˇ liongˋ pu giogˋ qiu hemˊ kioi eˇ，zo maˋ ge hoˋ ！	你這個病雞，走沒兩步路就喊累了，成得了什麼事！
lbk11_121	佢屋下都苦啊會屌泥，你還愛喚佢拿錢來𢯭保險，𠊎看斯殗雞仔割無血！	iˇ lugˋ kaˊ duˊ kuˋ a voi diauˋ naiˇ ，ngˇ hanˇ oi vonˋ iˇ naˊ qienˇ loiˇ ten boˋ hiamˋ ，ngaiˇ kon siiˇ ngiem gieˊ eˋ godˋ moˇ hiadˋ ！	你看他家都苦成這樣，還要他拿錢出來跟保險，我看他是拿不出錢來的！
lbk11_122	人講：「人不風流只因貧」，毋係佢毋好風流，無錢愛仰仔作怪呢？	nginˇ gongˋ ：「nginˇ budˋ fungˊ liuˇ ziiˋ inˊ pinˇ 」，mˇ he iˇ mˇ hau fungˊ liuˇ ，moˇ qienˇ oi ngiongˋ eˊ jiogˋ guai noˋ ？	俗話說：「人如果不風流是因為他貧窮了」，不是他不想風流，沒有錢要他怎麼作怪呢？
lbk11_123	今下社會「人在人情在，人亡人情亡」，盡現實喔！	ginˊ ha sa fi 「nginˇ cai nginˇ qinˇ cai ，nginˇ mongˇ nginˇ qinˇ mongˇ 」，qin hian siid oˊ！	現代社會「人情的深淺厚薄，會隨著人的存在與否而改變」，很現實呀！
lbk11_124	你無聽過人講「人才無貌」吓？生著毋好看，就代表你可能蓋有才呀！	ngˇ moˇ tangˊ go nginˇ gongˋ 「nginˇ coiˇ moˇ mau 」haˋ ？sangˊ doˋ mˇ hoˋ kon ，qiu toi beuˋ ngˇ koˋ nenˇ goi iuˊ coiˇ iaˊ！	你沒聽人家說過「人才大多沒有姣好的外貌」嗎？長得不怎麼樣，就代表你可能很有才華呀！
lbk11_125	厥公淨降厥爸一個倈仔，厥爸又淨降佢一個，佢等屋下正式係人丁薄弱喔！	iaˊ gungˊ qiang giung iaˊ baˊ idˋ ge lai eˋ ，iaˊ baˊ iu qiang giung iˇ idˋ ge ，iˇ denˊ lugˋ kaˊ ziin siidˋ he nginˇ denˊ pog ngiog oˊ！	他祖父只生他老爸一個男孩，他父親又只生他一個孩子，他們家真是人丁單薄呀！
lbk11_126	細妹仔人毋好去人多个所在出入，頭擺人講「人多閒言」，這一定有道理个。	se moi eˋ nginˇ mˇ hoˋ hi nginˇ doˊ ge soˋ cai cudˋ ngib ，teuˇ baiˋ nginˇ gongˋ 「nginˇ doˊ hanˇ ngianˇ 」，iaˋ idˋ tin iuˊ to liˊ ge 。	女孩子不要在人多複雜的地方出入，以前的人說「人多口雜」，這一定是有道理的。
lbk11_127	美濃人講：「人多好耕田，人少好分錢」，大家都望過少人分錢過好。	miˇ nungˇ nginˇ gongˋ ：「nginˇ doˊ hoˋ gangˊ tienˇ ，nginˇ seuˋ hoˋ bunˊ qienˇ 」，tai gaˊ duˊ mong go seuˋ nginˇ bunˊ qienˇ go hoˋ 。	美濃人說：「耕田的時候人越多越好，分錢時人越少越好」，大家都希望少一點人分錢比較好。
lbk11_128	做好事蓋無閒，無才情去款待特別个人客，故所美濃人講：「人多無大客」，盡有道理哦！	zo hoˋ sii goi moˇ hanˇ ，moˇ coiˇ qinˇ hi kuanˋ tai tid pied ge nginˇ hagˋ ，gu soˋ miˇ nungˇ nginˇ gongˋ ：「nginˇ doˊ moˇ tai hagˋ 」，qin iuˊ to liˊ oˊ ！	家裡辦喜事非常忙，無法一一招待貴賓，所以美濃人說：「客人多場面大，無法一一招呼」，很有道理哦！
lbk11_129	做麼个事情，毋使去問啊恁多人，自家愛有主張，人多嘴多會蓋毋好作主。	zo maˋ ge sii qinˇ ，mˇ siiˋ hi mun a anˋ doˊ nginˇ ，qid gaˊ oi iuˊ zuˋ zongˊ ，nginˇ doˊ zoi doˊ voi goi mˇ hoˋ zogˋ zuˋ 。	無論做什麼事，不用去問這麼多人，自己要有主見，人多意見就多很難決定。
lbk11_130	人家在該無閒賺錢還債，你還㖸佢死愛錢，這蓋像人講个：「人家在該愛䌈頸，覺著在該吊晃槓」，你實在蓋劣拙呢！	nginˇ gaˊ tiˊ ge moˇ hanˇ con qienˇ vanˇ zai ，ngˇ hanˇ nagˋ iˇ xiˋ oi qienˇ ，iaˋ goi qiong nginˇ gongˋ ge ：「nginˇ gaˊ tiˊ ge oi tagˋ giangˋ ，gogˋ doˋ tiˊ ge diau gongˇ gong 」，ngˇ siid cai goi lodˋ zodˋ neˊ ！	人家忙著賺錢還債，你還取笑他死要錢，這就像俗話說的：「別人正在不如意、喪氣時，還被誤認為是在得意、歡樂」，你實在很差勁呢！
lbk11_131	美濃个古語：「人驚分著無，毋驚分著少。」這句話係講，做爺哀个人愛公平公當，正毋會分人講閒話。	miˇ nungˇ ge guˋ ngiˊ ：「nginˇ giangˊ bunˊ doˋ moˇ ，mˇ giangˊ bunˊ doˋ seuˋ 。」iaˋ gi fa he gongˋ ，zo iaˇ oiˊ ge nginˇ oi gungˊ pinˇ gungˊ dong ，nang mˇ voi bunˊ nginˇ gongˋ hanˇ fa 。	美濃諺語：「人只怕沒分到，不怕分得少。」這句話是說，為人父母對子女要公平，才不會被人說閒話。
lbk11_132	這個人出名後，蓋多人來同佢拜託、借錢，正式係人驚出名哦！	iaˋ ge nginˇ cudˋ miangˇ heu ，goi doˊ nginˇ loiˇ tungˇ iˇ bai togˋ 、jia qienˇ ，ziin siidˋ he nginˇ giangˊ cudˋ miangˇ oˊ ！	這個人有名氣之後，很多人來向他拜託幫忙、借錢，真的是人怕出名喔！
lbk11_133	「人驚出名，豬驚肥」，出名後會出現蓋多問題，講个實在有道理哦！	「nginˇ giangˊ cudˋ miangˇ ，zuˊ giangˊ piˇ 」，cudˋ miangˇ heu voi cudˋ hian goi doˊ mun tiˇ ，gongˋ ge siid cai iuˊ to liˊ oˊ ！	「人出了名是非就多，豬肥了就會被宰來吃」，一旦有名氣之後會出現很多問題，說的真的很有道理哦！
lbk11_134	這個細妹仔𢯭毋直，美濃人講：「人驚尷尬，雨驚泲泲」，佢就係恁呢个細妹仔喲！	iaˋ ge se moi eˋ ten mˇ ciid ，miˇ nungˇ nginˇ gongˋ ：「nginˇ giangˊ gamˊ ge ，iˋ giangˊ zeˇ ze」，iˇ qiu he anˋ neˊ ge se moi eˋ io！	這個女孩子不可理喻，美濃人說：「人怕拖拖拉拉不乾脆，雨怕下個不停」，她就是這樣的女孩子。
lbk11_135	社會蓋現實，美濃古語講：「人敬有錢儕，狗敬屙屎儕」，講个嶄然有道理。	sa fi goi hian siid ，miˇ nungˇ guˋ ngiˊ gongˋ ：「nginˇ gin iuˊ qienˇ saˇ ，gieuˋ gin oˊ siiˋ saˇ 」，gongˋ ge zamˋ manˇ iuˊ to liˊ 。	社會很現實，美濃俗話說：「人們多半會向有錢人敬酒，奉承」，講的非常有道理。
lbk11_136	你做麼个事情都無用心，麼个都做毋好，正式蓋人腳。	ngˇ zo maˋ ge sii qinˇ du moˇ iung ximˊ ，maˋ ge duˊ zo mˇ hoˋ ，ziin siidˋ goi nginˇ giogˋ 。	你做事都不用心，什麼事都做不好，真的很差勁。
lbk11_137	人講：「人腳有肥」，故所，做生理个人，定著會想辦法來餳人客入來。	nginˇ gongˋ ：「nginˇ giogˋ iuˊ piˇ 」，gu soˋ ，zo senˊ liˊ ge nginˇ ，tin cog voi xiongˋ pan fabˋ loiˇ xiangˇ nginˇ hagˋ ngib loiˇ 。	俗話說：「人氣能帶來財氣或福氣」，所以，做生意的人，一定會想辦法來吸引人客進來。
lbk11_138	毋好隨便在暗晡頭嚇人，可能真實會嚇死人，故所正會有「人嚇人，嚇死人」个講法。	mˇ hoˋ suiˇ pien teˊ am buˊ teuˇ hagˋ nginˇ，koˋ nenˇ ziinˊ siidˋ voi hagˋ xiˋ nginˇ ，gu soˋ nang voi iuˊ 「nginˇ hagˋ nginˇ ，hagˋ xiˋ nginˇ」 ge gongˋ fabˋ 。	不要隨便在晚上嚇唬人，真的有可能會嚇死人，所以才會有「人嚇人，嚇死人」的說法。
lbk11_139	人愛煞猛增志，頭擺人有講：「人係甘願做牛，毋使驚無犁好拖。」	nginˇ oi sadˋ mangˊ zen zii ，teuˇ baiˋ nginˇ iuˊ gongˋ ：「nginˇ he gamˊ ngian zo ngiuˇ ，mˇ siiˋ giangˊ moˇ laiˇ hoˋ toˊ 。」	人要努力爭氣，前人曾說：「人只要肯吃苦，就不怕沒事可做。」
lbk11_140	做人愛正直，正有好結果，老古人講：「人係正就高三尺，人毋正就膣剷額。」	zo nginˇ oi ziin ciid ，nang iuˊ hoˋ giadˋ goˋ ，loˋ guˋ nginˇ gongˋ ：「nginˇ he zang qiu goˊ samˊ cagˋ ，nginˇ mˇ zang qiu ziiˊ canˋ ngiagˋ 。」	為人要正直，才會有好結局，古人說：「人正或邪，地理師所使用的丁蘭尺、文公尺便不一樣。」
lbk11_141	做人、做事係正直毋使驚人害，老古人講：「人害人肥㑁㑁，天害人一把骨」，這定著有道理个。	zo nginˇ 、zo sii he ziin ciid mˇ siiˋ giangˊ nginˇ hoi ，loˋ guˋ nginˇ gongˋ ：「nginˇ hoi nginˇ piˇ dudˋ dudˋ ，tienˊ hoi nginˇ idˋ baˋ gudˋ 」，iaˋ tin cog iuˊ to liˊ ge 。	正直的人不會擔心有人會害他，古人說：「天理昭彰，壞事做絕會遭天譴」，這絕對是有道理的。
lbk11_142	做麼个事情愛細義，就像頭擺人講：「人有怙杖跌毋倒，事有商量錯毋了。」	zo maˋ ge sii qinˇ oi se ngi ，qiu qiong teuˇ baiˋ nginˇ gongˋ ：「nginˇ iuˊ ku congˋ diedˋ mˇ doˋ ，sii iuˊ songˊ liongˇ co mˇ liauˋ 。」	無論做什麼事情都要小心，就像以前人說的：「做事情要穩當，就要與人商量，不要獨斷獨行。」
lbk11_143	「人靚不如命靚，跛腳嫁先生」，這個細妹仔命蓋好哦，生著毋係蓋登真，嗄嫁著恁好个老公。	「nginˇ jiangˊ budˋ iˇ miang jiangˊ ，baiˊ giogˋ ga xinˊ sangˊ 」，iaˋ ge se moi eˋ miang goi hoˋ oˊ ，sangˊ doˋ mˇ he goi denˊ ziinˊ ，sa ga doˋ anˋ hoˋ ge loˋ gungˊ。	「人長得漂亮，不如八字好」，這個女孩子命很好哦，雖然長得不是很漂亮，卻嫁了好老公。
lbk11_144	你這個人毋聽人講，「人牽人毋行，鬼牽就緊行」，有一日你就會後悔！	ngˇ iaˋ ge nginˇ mˇ tangˊ nginˇ gongˋ ，「nginˇ kianˊ nginˇ mˇ hangˇ ，guiˋ kianˊ qiu ginˋ hangˇ 」，iuˊ idˋ ngidˋ ngˇ qiu voi heu fiˋ ！	你這個人很不聽話，「做事黑白、好壞不分，交友不慎」，有一天你就會後悔！
lbk11_145	做人、做事愛煞猛，老古人講：「人勤地生寶，人懶地生草。」人煞猛自然會有成功个日仔。	zo nginˇ 、zo sii oi sadˋ mangˊ ，loˋ guˋ nginˇ gongˋ ：「nginˇ kiunˇ ti sangˊ boˋ ，nginˇ nanˊ ti sangˊ coˋ 。」nginˇ sadˋ mangˊ cii ianˇ voi iuˊ siinˇ gungˊ ge ngidˋ eˋ 。	做人做事要勤勞努力，俗話說：「人只要勤勞，便能成功；好吃懶做，便一事無成。」人不斷努力，自然會有成功的一天。
lbk11_146	頭擺人講，窮苦人蓋煞猛，「人窮力出」就係恁呢个道理。	teuˇ baiˋ nginˇ gongˋ ，kiungˇ kuˋ nginˇ goi sadˋ mangˊ ，「nginˇ kiungˇ lid cudˋ」 qiu he anˋ neˊ ge to liˊ 。	以前的人說：窮苦的人很勤勞，「人窮要努力」就是這個道理。
lbk11_147	美濃有一句話：「人窮力出，山崩石出。」意思係愛同窮苦个人講，大家愛拶志煞猛。	miˇ nungˇ iuˊ idˋ gi fa ：「nginˇ kiungˇ lid cudˋ ，sanˊ benˊ sag cudˋ 。」i sii he oi tungˇ kiungˇ kuˋ ge nginˇ gongˋ ，tai gaˊ oi zadˋ zii sadˋ mangˊ 。	美濃有句俗話說：「人窮就要努力勞動，才能生存下去。」意思是鼓勵窮困人家，要振作精神努力打拚。
lbk11_148	你屋下雖然苦，但係愛煞猛打拚，係無會分人㖸「人窮無志」。	ngˇ lugˋ kaˊ suiˊ ianˇ kuˋ ，danˋ he oi sadˋ mangˊ daˋ bia ，he moˇ voi bunˊ nginˇ nagˋ 「nginˇ kiungˇ moˇ zii 」。	你家雖然貧困，但是要努力打拚，不然會被人笑「人窮了便無志氣」。
lbk11_149	人窮志不窮，無志就一世窮，𠊎等後生人愛立志煞猛，正毋會一生貧窮。	nginˇ kiungˇ zii budˋ kiungˇ ，moˇ zii qiu idˋ sii kiungˇ ，ngaiˇ nenˊ heu sangˊ nginˇ oi lib zii sadˋ mangˊ ，nang mˇ voi idˋ senˊ pinˇ kiungˇ 。	人要立志，才不會一生窮困，我們年輕人要立志向上，才不會一輩子貧困。
lbk11_150	「人窮志願有，毋驚汗來腌目珠。」這句係美濃蓋古老个金言，𠊎等愛永遠記在心。	「nginˇ kiungˇ zii ngian iuˊ ，mˇ giangˊ hon loiˇ iabˋ mugˋ zuˊ。」iaˋ gi he miˇ nungˇ goi guˋ loˋ ge gimˊ ngianˇ ，ngaiˇ nenˊ oi iunˋ ianˋ gi cai ximˊ 。	「人窮並不可怕，只要立志做事，不怕汗水滴入傷眼睛。」這句諺語是美濃很古老的名言，我們要銘記在心。
lbk11_151	佢屋下蓋苦但係又盡冇頭，故所人會㖸佢：「人窮嘴冇」。	iˇ lugˋ kaˊ goi kuˋ danˋ he iu qin pang teuˇ ，gu soˋ nginˇ voi nagˋ iˇ ：「nginˇ kiungˇ zoi pang 」。	他家很貧窮但是很愛說大話，所以人們會笑他：「人雖窮卻表現出很自大哩！」
lbk11_152	打醮吔！大家愛遶境行路，行到臨尾吔，人困馬渴嶄然𤸁。	daˋ zeu eˇ！tai gaˊ oi lauˊ ginˋ hangˇ lu ，hangˇ do libˋ miˊ eˇ ，nginˇ kun maˊ hodˋ zamˋ manˇ kioi 。	建醮了！大家要遶境走路，走到最後時，全體都已疲憊不堪。
lbk11_153	「人尞久就起懶根，睡久就會發頭慇」，做人定著愛煞猛，毋好眠懶睡𤸁。	「nginˇ liau giuˋ qiu hiˋ nanˊ ginˊ ，soi giuˋ qiu voi bodˋ teuˇ inˊ」，zo nginˇ tin cog oi sadˋ mangˊ，mˇ hoˋ minˇ nanˊ soi kioi 。	「人閒散久了就會變懶，睡太久就會頭暈」，做人一定要勤奮努力，不可以好吃懶做、吃睡度日。
lbk11_154	人係衰吔，就會人撩鬼弄，愛注意哦！	nginˇ he soiˊ eˇ，qiu voi nginˇ liauˇ guiˋ nung ，oi zu i oˊ ！	人如果倒楣了，就會遇上小人，要特別注意哦！
lbk11_155	頭擺人有講：「人老有三歪：行路頭犁犁，屙尿滮著鞋，打屁攞屎拉」，你等後生人毋曾到這時，毋知老人家个痛苦。	teuˇ baiˋ nginˇ iuˊ gongˋ ：「nginˇ loˋ iuˊ samˊ vaiˊ ：hangˇ lu teuˇ laiˇ laiˇ ，oˊ ngiau beuˋ doˋ haiˇ ，daˋ pi loˊ siiˋ laiˇ 」，ngˇ denˊ heu sangˊ nginˇ mˇ qienˇ do iaˋ siiˇ ，mˇ diˊ loˋ nginˇ gaˊ ge tung kuˋ 。	以前的人說：「年紀大了有三項缺點：走路抬不起頭來、小便濺濕鞋子、放屁連大便一起出來」，你們年輕人時候未到，無法體會老人家的痛苦。
lbk11_156	人毋係「生而知之」，係「學而知之」，故所還後生愛煞猛學習。	nginˇ mˇ he 「senˊ iˇ ziiˊ ziiˊ 」，he 「hog iˇ ziiˊ ziiˊ 」，gu soˋ hanˇ heu sangˊ oi sadˋ mangˊ hog xib 。	人不是出生就知道，是因學習而獲得知識的，所以還年輕要努力學習。
lbk11_157	這個人做事無底仔、無認真，看起來人毋成人，鬼毋成鬼。	iaˋ ge nginˇ zo sii moˇ daiˋ eˋ 、moˇ ngin ziinˊ ，kon hiˋ loiˇ nginˇ mˇ sangˇ nginˇ ，guiˋ mˇ sangˇ guiˋ 。	這個人做事很不負責、又不認真，看起來真不像樣。
lbk11_158	「人無自私，同雷公共下睡得。」𠊎相信天下怕蓋難尋著無私心个人呢！	「nginˇ moˇ cii siiˊ ，tungˇ luiˇ gungˊ kiung ha soi dedˋ。」ngaiˇ xiongˊ xin tienˊ ha pa goi nanˇ qimˇ doˋ moˇ siiˊ ximˊ ge nginˇ noˊ！	「人不自私，天誅地滅」，我相信天底下很難找到沒有私心的人喲！
lbk11_159	恁久佢不時發生車禍、又了財，正式係「人無運，狗咬膦棍」。	anˋ giuˋ iˇ budˋ siiˇ fadˋ senˊ caˊ fo 、iu liauˋ coiˇ ，ziin siidˋ he 「nginˇ moˇ iun ，gieuˋ ngauˊ linˋ gun」。	最近他常常發生車禍、又賠錢，真的是「人正在走霉運，處處都不順利」。
lbk11_160	你恁多歲吔，毋使恁苦做，美濃人有一句話：「人無年年十八，再過幾年，就會翻煲缽。」	ngˇ anˋ doˊ se eˇ ，mˇ siiˋ anˋ kuˋ zo ，miˇ nungˇ nginˇ iuˊ idˋ gi fa ：「nginˇ moˇ ngianˇ ngianˇ siib badˋ ，zai go giˋ ngianˇ ，qiu voi panˊ boˊ badˋ 。」	你年紀大了，不需再這麼辛苦工作，美濃俗語說：「人都是會老的，不可能年年都十八歲。」
lbk11_161	𠊎閒時恁關心你，你嗄認為𠊎盡好管你，實在就像人講个：「人望你上天，覺著人望你沒地。」係𠊎毋搭你，你就知死吔哪！	ngaiˇ hanˇ siiˇ anˋ guanˊ ximˊ ngˇ ，ngˇ sa ngin viˇ ngaiˇ qin hau gonˋ ngˇ，siid cai qiu qiong nginˇ gongˋ ge：「nginˇ mong ngˇ songˊ tienˊ ，gogˋ doˋ nginˇ mong ngˇ mud ti。」he ngaiˇ mˇ dabˋ ngˇ ，ngˇ qiu diˊ xiˋ eˇ naˊ ！	我平時很關心你，而你卻認為我很愛管你，實在就像俗話說的：「別人希望你能飛上天空，你以為別人希望你掉到地下。」若我不理你，你就糟糕了！
lbk11_162	人毋好忒戇，乜做毋得忒精，頭擺人有講：「人戇清苦，人精歿肚。」	nginˇ mˇ hoˋ tedˋ ngong ，me zo mˇ dedˋ tedˋ jinˊ ，teuˇ baiˋ nginˇ iuˊ gongˋ ：「nginˇ ngong qinˊ kuˋ ，nginˇ jinˊ mudˋ duˋ 。」	人不要太傻，也不要太過於精明，以前的人有說：「人傻辛苦，小聰明的又一肚子壞水。」
lbk11_163	你蓋毋知人惱惜，人愛唚你，覺著愛咬你，自家愐看啊甚！	ngˇ goi mˇ diˊ nginˇ nauˊ xiagˋ ，nginˇ oi jimˊ ngˇ ，gogˋ doˋ oi ngauˊ ngˇ ，qid gaˊ menˋ kon a siin ！	你身在福中卻不知福，人家有心幫忙，反被誤認為有心害你，你自己想清楚一點哪！
lbk11_164	做人分人看毋起，毋怕；因為頭擺人有講：「人愛人打落，火愛人燒著。」	zo nginˇ bunˊ nginˇ kon mˇ hiˋ ，mˇ pa ；inˊ vi teuˇ baiˋ nginˇ iuˊ gongˋ ：「nginˇ oi nginˇ daˋ log ，foˋ oi nginˇ seuˊ cog 。」	做人若被人看不起，不用擔心；因為前人曾說：「被人輕視、看不起，是勤奮做事、力爭上游的一種推動力。」
lbk11_165	頭擺日本人蓋惡、蓋會打人，大家蓋驚佢等，故所毋敢作怪，美濃人講：「人怕粗魯鬼怕法」，嚴條怕有效哦！	teuˇ baiˋ ngidˋ bunˋ nginˇ goi ogˋ 、goi voi daˋ nginˇ ，tai gaˊ goi giangˊ iˇ denˊ ，gu soˋ mˇ gamˋ jiogˋ guai ，miˇ nungˇ nginˇ gongˋ ：「nginˇ pa cuˊ luˇ guiˋ pa fabˋ 」，ngiamˇ tiauˇ pa iuˊ hauˋ oˊ ！	以前日本人很凶、很會打人，大家都很害怕他們，所以不敢胡鬧、生事，美濃人說：「對付非常人，要用非常的手段才有效」，嚴厲的教條可能很有效哦！
lbk11_166	該細妹仔本成生來蓋得人惜，這恁多年毋知受著麼个打擊變啊癲癲，大家看著就閃啊遠遠，這正式係「人怕肖，字怕吊」。	ge se moi eˋ bunˋ sangˇ sangˊ loiˇ goi dedˋ nginˇ xiagˋ ，iaˋ anˋ doˊ ngianˇ mˇ diˊ su doˋ maˋ ge daˋ gidˋ bien a dienˊ dienˊ ，tai gaˊ kon doˋ qiu samˋ a ianˋ ianˋ ，iaˋ ziin siidˋ he 「nginˇ pa xiau ，sii pa diau」。	那個女孩子本來長得很可愛，這幾年不知受到什麼打擊，現在變得瘋瘋癲癲，真如人們說的：「人怕瘋，字怕吊」。
lbk11_167	人講：「人破樵莫行上前，人相打莫去添言。」佢兩儕都吵啊譴膣命胲吔，你還去講揫著有个無个，毋驚佢等等下翻轉來怨你吓？	nginˇ gongˋ ：「nginˇ po ceuˇ mog hangˇ songˊ qienˇ ，nginˇ xiongˊ daˋ mog hi tiamˊ ngianˇ。」iˇ liongˋ saˇ duˊ cauˇ a kienˋ ziiˊ miang goiˊ eˇ，ngˇ hanˇ hi gongˋ qiuˊ doˋ iuˊ ge moˇ ge ，mˇ giangˊ iˇ denˊ denˋ ha fanˊ zonˋ loiˇ ian ngˇ haˋ ？	俗話說：「有人劈柴不要靠近，有人打架莫添言語。」他們已經吵得面紅耳赤了，你還在那兒講有的沒的，難道不怕他們反過來怨你嗎？
lbk11_168	來到外地人生地不熟，人講：「人親不如土親，親不親故鄉人。」𠊎等都係六堆來个，就係自家人，有麼个困難就講毋怕，𠊎等定著會同你𢯭手。	loiˇ do ngoi ti nginˇ sangˊ ti budˋ sug，nginˇ gongˋ ：「nginˇ qinˊ budˋ iˇ tuˋ qinˊ ，qinˊ budˋ qinˊ gu hiongˊ nginˇ。」ngaiˇ nenˊ duˊ he liudˋ duiˊ loiˇ ge ，qiu he qid gaˊ nginˇ ，iuˊ maˋ ge kun nanˇ qiu gongˋ mˇ pa ，ngaiˇ nenˊ tin cog voi tungˇ ngˇ ten suˋ 。	來到外地人生地不熟，人家說：「人親不如土親，親不親故鄉人。」我們都來自美濃，就是自己人，有什麼困難就要說，沒關係，我們一定會幫你。
lbk11_169	這個社會還係蓋重視「人情面目」，故所，平常同人愛有來去，毋好恁孤老。	iaˋ ge sa fi hanˇ he goi cung sii 「nginˇ qinˇ mien mugˋ 」，gu soˋ ，pinˇ songˇ tungˇ nginˇ oi iuˊ loiˇ hi ，mˇ hoˋ anˋ guˊ loˋ 。	這個社會還是很重視「人際之間的情面」，所以，平常跟人要有來往，不要這麼孤僻。
lbk11_170	𠊎等兩儕雖然交情蓋好，但係錢財來往還係愛分清楚，人講：「人情愛長，事愛短結」，恁呢感情正會長久。	ngaiˇ nenˊ liongˋ saˇ suiˊ ianˇ gauˊ qinˇ goi hoˋ ，danˋ he qienˇ coiˇ loiˇ vongˊ hanˇ he oi funˊ qinˊ cuˋ ，nginˇ gongˋ ：「nginˇ qinˇ oi congˇ ，sii oi donˋ giadˋ 」，anˋ neˊ gamˋ qinˇ nang voi congˇ giuˋ 。	我們倆雖然交情很好，但是錢財來往還是要分清楚，俗話說：「人情要長，事情要清楚」，這樣感情才會長久。
lbk11_171	你事頭毋好搭恁多，人情事故陪啊到，烳鑼鑊頭都會無。	ngˇ se teuˇ mˇ hoˋ dabˋ anˋ doˊ ，nginˇ qinˇ sii gu piˇ a do ，puˇ loˇ vog teuˇ duˊ voi moˇ 。	你工作不要管太多，人情事故如果要全面兼顧，就可能影響家計了。
lbk11_172	做頭路，「人情事務」定著愛顧好來，正毋會做啊會死又得失人。	zo teuˇ lu ，「nginˇ qinˇ sii vu」tin cog oi gu hoˋ loiˇ ，nang mˇ voi zo a voi xiˋ iu dedˋ siidˋ nginˇ 。	做任何事情，「人情事務」一定要拿捏好，才不會做得要死卻還得罪人。
lbk11_173	來到這仔人生路不熟，同鄰舍愛相借問，過多一息來去，做麼个正會過順班。	loiˇ do iaˋ eˊ nginˇ sangˊ lu budˋ sug ，tungˇ linˇ sa oi xiongˊ jia mun ，go doˊ idˋ xidˋ loiˇ hi ，zo maˋ ge nang voi go sun banˊ 。	來到這裡人生地不熟，跟鄰居要打招呼，多一點的往來，做任何事才會比較順利。
lbk11_174	你這細人仔，敢去同大人相打，斷真係「人細膦大」毋堪身分。	ngˇ iaˋ se nginˇ eˋ ，gamˋ hi tungˇ tai nginˇ xiongˊ daˋ ，don ziinˊ he 「nginˇ se linˋ tai 」mˇ kamˊ siinˊ fun 。	你這小孩，竟然敢去跟大人打架，真的是「不知天高地厚」不自量力。
lbk11_175	毋好看佢生著恁細隻，嚇人个聲說斯一等大喲，正經係「人細聲𤊶」，一息都無爭差。	mˇ hoˋ kon iˇ sangˊ doˋ anˋ se zagˋ ，hagˋ nginˇ ge sangˊ sodˋ siiˇ idˋ denˋ tai ioˊ，ziin ginˊ he 「nginˇ se sangˊ lad 」，idˋ xidˋ duˊ moˇ zenˊ caˊ 。	不要看他長得這麼小，罵人的聲音可是非常大喲，真的是「人小聲宏亮」，一點都沒錯。
lbk11_176	佢前一駁仔投資了錢，這下又分人倒會仔，正式係「人衰鬼弄」喔！	iˇ qienˇ idˋ bogˋ eˋ teuˇ ziiˊ liauˋ qienˇ ，iaˋ ha iu bunˊ nginˇ doˋ fi eˋ ，ziin siidˋ he 「nginˇ soiˊ guiˋ nung 」oˊ！	他前一陣子投資賠錢，現在又被人倒會，真的是「人若倒楣鬼也要惹」喔！
lbk11_177	佢恁久正式係「人衰鬼順」，堵著發雞瘟个事情，雞肉賣毋出去還不在，這下厥姆發病歇院又愛用著蓋多錢，實在難耐。	iˇ anˋ giuˋ ziin siidˋ he 「nginˇ soiˊ guiˋ sun 」，duˇ doˋ bodˋ gieˊ vunˊ ge sii qinˇ ，gieˊ ngiugˋ mai mˇ cudˋ hi hanˇ budˋ cai ，iaˋ ha iaˊ meˊ bodˋ piang hed ian iu oi iung doˋ goi doˊ qienˇ ，siid cai nanˇ ngai 。	他最近真的是「人衰鬼順」，遇到雞瘟的事情，雞肉賣不出去還不打緊，現在他媽媽生病住院又需要用到很多錢，實在可憐。
lbk11_178	阿德伯平常好食懶做，故所厥姐仔早早就走核吔，冤冤枉枉畜一個倈仔又一等好賭，同屋下摝啊弄揰鬚絨，人講：「人衰無濫糝衰」，一息都無爭差。	aˊ dedˋ bagˋ pinˇ songˇ hau siid nanˊ zo ，gu soˋ iaˊ jiaˋ eˋ zoˋ zoˋ qiu zeuˋ hedˋ eˇ，ianˊ ianˊ vongˋ vongˋ hiugˋ idˋ ge lai eˋ iu idˋ denˋ hau duˋ ，tungˇ lugˋ kaˊ lugˋ a nungˋ dungˋ xiˊ iungˇ ，nginˇ gongˋ ：「nginˇ soiˊ moˇ namˋ samˋ soiˊ 」，idˋ xidˋ duˊ moˇ zenˊ caˊ 。	阿德伯平常好吃懶做，所以他太太很早就跑掉了，辛辛苦苦把兒子養大，偏偏又好賭，把家裡搞得烏煙瘴氣、人仰馬翻，俗話說：「一個人倒楣不是沒有緣故的」，真的是一點兒都沒錯。
lbk11_179	阿爸講：「人大分家」，細人仔大吔不管有家庭無，定著財產愛分清楚來，正毋會今呢拍桌拍凳，感情打壞淨淨。	aˊ baˊ gongˋ ：「nginˇ tai bunˊ gaˊ」，se nginˇ eˋ tai eˇ budˋ gonˋ iuˊ gaˊ tinˇ moˇ ，tin cog coiˇ sanˋ oi bunˊ qinˊ cuˋ loiˇ ，nang mˇ voi ginˊ ne pogˋ zogˋ pogˋ den ，gamˋ qinˇ daˋ faiˋ qiang qiang 。	爸爸說：「兄弟大了終要分家」，孩子長大了不管有沒有成家，一定要把財產分清楚，才不會將來大家撕破臉，感情都破壞殆盡。
lbk11_180	人講：「人為財死，鳥為食亡」，你留下自家生活、安養个老本，身體顧好來，伸个該愛分細人仔个就分分啊，省使每日一條心掛等吔無安無樂。	nginˇ gongˋ ：「nginˇ vi coiˇ xiˋ ，niauˊ vi siid mongˇ 」，ngˇ liuˇ haˊ qid gaˊ senˊ fad 、onˊ iongˊ ge loˋ bunˋ ，siinˊ tiˋ gu hoˋ loiˇ ，cunˊ ge goiˊ oi bunˊ se nginˇ eˋ ge qiu bunˊ bunˊ aˋ ，sangˋ siiˋ miˊ ngidˋ idˋ tiauˇ ximˊ gua nenˋ eˇ moˇ onˊ moˇ log 。	俗話說：「人為財死，鳥為食亡」，你留下自己生活、安養的老本，把身體顧好，剩下該給孩子的就分一分，省得每天一條心懸掛著都不安穩。
lbk11_181	唉喲！錢了都了核吔，每日恁呢食睡毋得哪係頭路，人講：「人會失手，馬會失蹄」，你就看過開兜，重新再來麼！	aiˋ ioˋ！qienˇ liauˋ duˊ liauˋ hedˋ eˇ，miˊ ngidˋ anˋ neˊ siid soi mˇ dedˋ nai he teuˇ lu ，nginˇ gongˋ ：「nginˇ voi siidˋ suˋ ，maˊ voi siidˋ taiˇ 」，ngˇ qiu kon go koiˊ deuˊ，cungˇ xinˊ zai loiˇ me！	哎喲！錢都已經虧光了，每天這樣吃不下、睡不著哪是辦法，俗話說：「人會失手，馬會失蹄」，你就看開點，東山再起呀！
lbk11_182	厥爸頭擺開當店食三分利，賺啊蓋多錢，結果倈仔全部毋做人，同財產全部了淨淨，這就係人講个「人會算，天會斷」。	iaˊ baˊ teuˇ baiˋ koiˊ dong diam siid samˊ funˊ li ，con a goi doˊ qienˇ ，giadˋ goˋ lai eˋ qionˇ pu mˇ zo nginˇ ，tungˇ coiˇ sanˋ qionˇ pu liauˋ qiang qiang ，iaˋ qiu he nginˇ gongˋ ge 「nginˇ voi son ，tienˊ voi don 」。	他爸爸以前開當舖算三分利，賺了很多錢，結果兒子都不好好做人，將財產全部敗光，這就是俗話說的「人會算，天會斷」。
lbk11_183	頭擺，阿叔過身後，𠊎識聽阿婆勸話阿叔个細妹仔：「人死情滅」，希望佢愛看過開兜仔，再去尋過一個好人家。	teuˇ baiˋ ，aˊ sugˋ go siinˊ heu ，ngaiˇ siidˋ tangˊ aˊ poˇ kian va aˊ sugˋ ge se moi eˋ ：「nginˇ xiˋ qinˇ mied 」，hiˊ mong iˇ oi kon go koiˊ deuˊ eˊ ，zai hi qimˇ go idˋ ge hoˋ nginˇ gaˊ 。	以前，叔叔過世之後，我曾聽奶奶勸叔叔的女朋友：「人死情滅」，希望她看開一點，再去找一個好人家。
lbk11_184	你毋知啊「人死債消」吓？少若錢个係厥爸，人都過身吔，你就毋好再為難這細人仔吔。	ngˇ mˇ diˊ a 「nginˇ xiˋ zai seuˊ 」haˋ ？seuˋ ngiaˊ qienˇ ge he iaˊ baˊ ，nginˇ duˊ go siinˊ eˇ，ngˇ qiu mˇ hoˋ zai viˇ nanˇ iaˋ se nginˇ eˋ eˇ。	你難道不知道「人死債消」嗎？欠你錢的事他爸爸，人都過世了，你就不要再為難這孩子了。
lbk11_185	人講：「人詐人轉，鬼詐鬼轉」，若錢係分厥哥食核个，你還想愛喚厥老弟同你𢯭手討轉來，𠊎看，你就毋使想吔。	nginˇ gongˋ ：「nginˇ za nginˇ zonˋ ，guiˋ za guiˋ zonˋ 」，ngiaˊ qienˇ he bunˊ iaˊ goˊ siid hedˋ ge，ngˇ hanˇ xiongˋ oi vonˋ iaˊ loˋ taiˊ tungˇ ngˇ ten suˋ toˋ zonˋ loiˇ ，ngaiˇ kon ，ngˇ qiu mˇ siiˋ xiongˋ eˇ。	俗話說：「人會維護自己人，鬼也會為鬼說話」，你的錢是被他老哥吃掉的，你還想叫他弟弟幫你要回來，我看，你就別想了。
lbk11_186	人講：「人做初一分𠊎，𠊎就愛做十五還人。」今晡日你恁有心同𠊎𢯭手解決這個問題，另日你係有麼个需要，𠊎定著會同你辦啊盡圓滿。	nginˇ gongˋ ：「nginˇ zo cuˊ idˋ bunˊ ngaiˇ ，ngaiˇ qiu oi zo siib ngˋ vanˇ nginˇ 。」ginˊ buˊ ngidˋ ngˇ anˋ iuˊ ximˊ tungˇ ngaiˇ ten suˋ giaiˋ giadˋ iaˋ ge mun tiˇ ，nang ngidˋ ngˇ he iuˊ maˋ ge xiˊ ieu ，ngaiˇ tin cog voi tungˇ ngˇ pan a qin ianˇ manˊ 。	俗話說：「別人做初一給我，我就要做十五還人。」今天你有心幫我解決了這個問題，以後你如果有什麼需要，我一定會幫你辦得很圓滿。
lbk11_187	鹹菜大出个時節，蓋多細人仔會同大人儕𢯭手揉鹹菜，準備做鹹菜乾。	hamˇ coi tai cudˋ ge siiˇ jiedˋ ，goi doˊ se nginˇ eˋ voi tungˇ tai nginˇ saˇ ten suˋ ngioˊ hamˇ coi ，zunˋ pi zo hamˇ coi gonˊ 。	芥菜盛產時，很多小孩子會幫大人用手搓揉鹹菜，準備做鹹菜乾。
lbk11_188	頭擺阿義哥蓋會去山項搦鳥仔來賣。	teuˇ baiˋ aˊ ngi goˊ goi voi hi sanˊ hong ngiogˋ diauˊ eˋ loiˇ mai 。	早期阿義哥時常去山上捕鳥來賣。
lbk11_189	禾埕項晒个穀毋好去搞，係無會歸圓身虐虐削削，盡清苦！	voˇ tangˇ hong sai ge gugˋ mˇ hoˋ hi gauˋ，he moˇ voi guiˊ ianˇ siinˊ ngiogˋ ngiogˋ xiogˋ xiogˋ ，qin qinˊ kuˋ ！	不要玩稻埕上的稻穀，要不然會全身發癢，很難受！
lbk11_190	這擺个檢定盡軟撿，你一定做得通過。	iaˋ baiˋ ge giamˋ tin qin ngionˊ giamˋ ，ngˇ idˋ tin zo dedˋ tungˊ go 。	這次的檢定很容易，你一定可以通過。
lbk11_191	粢粑仔軟濟濟仔，食个時節愛定哪，毋好哽著吔。	qiˇ baˊ eˋ ngionˊ jiˇ jiˇ doˋ ，siid ge siiˇ jiedˋ oi tin naˋ ，mˇ hoˋ gangˋ doˋ eˇ。	粢粑很軟，吃的時候要小心，不要噎著了。
lbk11_192	這甜粄蒸啊蓋軟入，盡好食。	iaˋ tiamˇ banˋ ziinˊ a goi ngionˊ ngib ，qin hoˋ siid 。	這年糕蒸得很軟靭，真好吃。
lbk11_193	這事頭軟軟仔，兩下手板就做好吔。	iaˋ se teuˇ ngionˊ ngionˊ eˊ ，liongˋ ha suˋ banˋ qiu zo hoˋ eˇ。	這工作很簡單，一下子便完成了。
lbk11_194	大人儕教細人仔愛軟軟硬硬，毋好全用打罵，乜毋好忒縱。	tai nginˇ saˇ gauˊ se nginˇ eˋ oi ngionˊ ngionˊ ngang ngang ，mˇ hoˋ qionˇ iung daˋ ma ，me mˇ hoˋ tedˋ jiungˋ。	大人教小孩要軟硬兼施，不宜全用打罵方式，也不可太寵。
lbk11_195	看佢軟頭扁摺个樣式，怕係又加班超過勞吔喲！	kon iˇ ngionˊ teuˇ bienˋ zabˋ ge iong siidˋ ，pa he iu gaˊ banˊ ceuˊ go loˇ eˇ ioˊ！	看他無精打彩的樣子，恐怕又是加班過勞了！
lbk11_196	佢盡驚一個人孤栖，故所不時尋人讓陣尞。	iˇ qin giangˊ idˋ ge nginˇ guˊ xiˊ ，gu soˋ budˋ siiˇ qimˇ nginˇ ngiong ciin liau 。	他很怕孤單，所以經常找人一起玩。
lbk11_197	你恁大人吔還毋曉得煮飯，今下結婚吔愛仰得結煞？	ngˇ anˋ tai nginˇ eˇ hanˇ mˇ hiauˋ dedˋ zuˋ fan ，ginˊ ha giadˋ funˊ eˇ oi ngiong dedˋ gadˋ sadˋ ？	你這麼大了還不會煮飯，以後結婚了怎麼辦？
lbk11_198	「仰仔个藤就結仰仔个瓜，仰仔个人就講仰仔个話。」這人生成歪格，故所講無好話，你毋使恁譴啦！	「ngiongˋ eˊ ge tenˇ qiu giadˋ ngiongˋeˊ ge guaˊ ，ngiongˋ eˊ ge nginˇ qiu gongˋ ngiongˋ eˊ ge fa 。」iaˋ nginˇ sangˊ sangˇ vaiˊ giedˋ ，gu soˋ gongˋ moˇ hoˋ fa ，ngˇ mˇ siiˋ anˋ kienˋ laˋ！	「什麼藤就結什麼瓜，什麼人就講什麼話。」這個人本來就壞，所以講不出什麼好話，你不用這麼生氣！
lbk11_199	這個人盡扭皺，同佢做生理盡壞屌。	iaˋ ge nginˇ qin ngiuˋ jiu ，tungˇ iˇ zo senˊ liˊ qin faiˋ diauˋ 。	這個人很愛挑剔，和他做生意很難溝通。
lbk11_200	佢見到禮拜，就像牛奮㪐樣仔，一下仔就看毋著人影吔。	iˇ gian do liˊ bai ，qiu qiong ngiuˇ binˋ lodˋ iong eˊ ，idˋ ha eˊ qiu kon mˇ doˋ nginˇ iangˋ eˇ。	他每到周日，就像牛掙脫繮繩一樣，一下子就看不見人影了。
lbk11_201	你牛腸馬肚麼？仰恁會食！	ngˇ ngiuˇ congˇ maˊ duˋ meˇ ？ngiongˋ anˋ voi siid ！	你是牛腸馬肚嗎？怎麼這麼會吃！
lbk11_202	你毋使歡喜，覺著佢對你特別好正毋使繳錢，人講：「牛筋從牛背囊項扯」，佢無賺若錢愛食麼个？	ngˇ mˇ siiˋ fonˊ hiˋ ，gogˋ doˋ iˇ dui ngˇ tid pied hoˋ nang mˇ siiˋ gieuˋ qienˇ ，nginˇ gongˋ ：「ngiuˇ ginˊ qiungˇ ngiuˇ boi nongˇ hong caˋ 」，iˇ moˇ con ngiaˊ qienˇ oi siid maˋ ge ？	你不用太高興，以為他對妳特別好才不用繳錢，俗話說：「牛筋是從牛背上扯下來的」，他不賺你的錢要怎麼過活？
lbk11_203	佢等該陣牛鬼蛇神，平時就盡毋做人，行遠啊過著。	iˇ denˊ ge ciin ngiuˇ guiˋ saˇ siinˇ ，pinˇ siiˇ qiu qin mˇ zo nginˇ ，hangˇ ianˋ aˋ go cog 。	他們那群不務正業的人，平時就很壞、常做壞事，離遠一點較好。
lbk11_204	佢這人硬講都毋聽，正式「牛牽到廣東也還係牛」。	iˇ iaˋ nginˇ ang gongˋ duˊ mˇ tangˊ ，ziin siidˋ 「ngiuˇ kianˊ do gongˋ dungˊ iaˊ hanˇ he ngiuˇ 」。	他這人怎麼講都不聽，真的是牛牽到廣東還是牛。
lbk11_205	阿祥哥牛老車過吔，這擺生理失敗了恁多錢，想愛翻身可能無恁簡單吔！	aˊ xiongˇ goˊ ngiuˇ loˋ caˊ goˊ eˇ ，iaˋ baiˋ senˊ liˊ siidˋ pai liauˋ anˋ doˊ qienˇ ，xiongˋ oi fanˊ siinˊ koˋ nenˇ moˇ anˋ gianˋ danˊ eˇ！	阿祥哥年紀已大了，這次生意失敗賠了這麼多錢，想要翻身恐怕沒那麼容易！
lbk11_206	做人係正就無麼个好驚，人講：「牛毋做、賊毋做，橫打直過」，就係恁呢个道理。	zo nginˇ he zang qiu moˇ maˋ ge hoˋ giangˊ ，nginˇ gongˋ ：「ngiuˇ mˇ zo 、ced mˇ zo ，vangˇ daˋ ciid go 」，qiu he anˋ neˊ ge to liˊ 。	做人若正直就沒什麼好怕的，俗話說：「人只要不做壞事，就可以抬頭挺胸，勇往直前」，就是這個道理。
lbk11_207	頭擺耕田人，屋下定著有牛欄豬寮。	teuˇ baiˋ gangˊ tienˇ nginˇ ，lugˋ kaˊ tin cog iuˊ ngiuˇ lanˇ zuˊ liauˇ 。	以前的農夫，家裡一定有蓋牛欄、豬舍。
lbk11_208	這個人做人毋正，心肝蓋壞，故所分人罵「牛頭馬面」。	iaˋ ge nginˇ zo nginˇ mˇ zang ，ximˊ gonˊ goi fai ，gu soˋ bunˊ nginˇ ma 「ngiuˇ teuˇ maˊ mien 」。	這個人心術不正，心很壞，所以被人罵是「心術不正的人」。
lbk11_209	隔壁个阿富哥不時做差事、心術又毋好，蓋會分人罵「牛膣馬面」。	gagˋ biagˋ ge aˊ fu goˊ budˋ siiˇ zo caˊ sii 、ximˊ siidˋ iu mˇ hoˋ ，goi voi bunˊ nginˇ ma 「ngiuˇ ziiˊ maˊ mien 」。	隔壁的阿富哥時常做錯事，心術不正，很常被人罵是「面目可憎的人」。
lbk11_210	這細妹仔毋聽教，喚佢做一下事情就扭扭皺皺，蓋得人畏。	iaˋ se moi eˋ mˇ tangˊ gauˊ ，vonˋ iˇ zo idˋ ha sii qinˇ qiu ngiuˋ ngiuˋ jiu jiu ，goi dedˋ nginˇ vi 。	這個女孩子很不受教，叫她做一下事情就不高興又挑剔，很讓人不舒服。
lbk11_211	這個撮把戲个阿衡哥，佢蓋會扭屎朏花哦！	iaˋ ge codˋ baˋ hi ge aˊ fenˇ goˊ ，iˇ goi voi ngiuˋ sii fudˋ faˊ oˊ ！	這個會戲曲雜技的阿衡哥，他很會扭屁股哦！
lbk11_212	這個打花鼓个細妹仔，屎朏扭上扭下蓋生趣。	iaˋ ge daˋ faˊ guˋ ge se moi eˋ ，sii fudˋ ngiuˋ songˊ ngiuˋ haˊ goi senˊ qi 。	這個打花鼓的女孩，屁股扭來扭去很有趣。‘
lbk11_213	這個挷啊著个蘿蔔仔，肉脆脆仔𠊎蓋想食囉！	iaˋ ge bangˊ a doˋ ge loˇ ped eˋ ，ngiugˋ coi coi eˊ ngaiˇ goi xiongˋ siid loˊ！	這個剛拔的蘿蔔，脆嫩可口的樣子我很想吃哦！
lbk11_214	𠊎昨晡日騎車仔橫倒，這下肉緊𢶀嶄然痛。	ngaiˇ coˊ buˊ ngidˋ kiˇ caˊ eˋ vang doˋ ，iaˋ ha ngiugˋ ginˋ duiˋ zamˋ manˇ tung 。	我昨天騎車跌倒，現在肌肉在不停的抽動非常痛。
lbk11_215	頭擺人有講：「肉肯分人食，骨毋肯分人㪐。」自家个親戚朋友、宗親孫叔，絕對做毋得分人翕。	teuˇ baiˋ nginˇ iuˊ gongˋ ：「ngiugˋ henˋ bunˊ nginˇ siid ，gudˋ mˇ henˋ bunˊ nginˇ lodˋ 。」qid gaˊ ge qinˊ qidˋ penˇ iuˊ 、zungˊ qinˊ sunˊ sugˋ ，qied dui zo mˇ dedˋ bunˊ nginˇ hibˋ 。	以前人曾說：「人的忍讓是有限度的，豈能任人欺壓、宰割」，自己的親戚朋友、家族宗親，是絕對不能被欺負的。
lbk11_216	這個人恁久怕蓋好過哦！遠遠看啊去肉粽粽仔。	iaˋ ge nginˇ anˋ giuˋ pa goi hoˋ go oˊ ！ianˋ ianˋ kon a hi ngiugˋ zung zung eˊ 。	這個人最近過得不錯哦！遠遠看過去感覺體態豐盈的樣子。
lbk11_217	打魚仔个人掖網，韌韌仔、定定仔拖這個網。	daˋ ngˇ eˋ ge nginˇ ie miongˋ ，ngiun ngiun eˊ、tin tin eˊ toˊ iaˋ ge miongˋ 。	捕魚的人撒網，柔柔的、慢慢的拖這個魚網。
lbk11_218	做生理个人毋好同人多事，愛忍氣留財。	zo senˊ liˊ ge nginˇ mˇ hoˋ tungˇ nginˇ doˊ sii ，oi ngiunˊ hi liuˇ coiˇ 。	做生意的人不要與人吵架，為了錢財要忍氣吞聲。
lbk11_219	這個人𢯭毋直，𠊎等大家忍氣吞聲毋插佢。	iaˋ ge nginˇ ten mˇ ciid ，ngaiˇ nenˊ tai gaˊ ngiunˊ hi tunˊ sangˊ mˇ cabˋ iˇ 。	這個人很不講理，我們大家都忍受他的氣燄而不敢出聲。
lbk11_220	頭擺細妹仔行嫁，定著有銀簪手環好戴。	teuˇ baiˋ se moi eˋ hangˇ ga ，tin cog iuˊ ngiunˇ zamˊ suˋ kuanˇ hoˋ dai 。	以前女孩子出嫁，一定配戴有銀簪手環這些金飾。
lbk11_221	做人、做事愛正當，頭那愛臥起來。	zo nginˇ 、zo sii oi ziin dongˊ ，teuˇ naˇ oi ngo hiˋ loiˇ 。	做人、做事要正正當當，抬頭挺胸。
lbk11_222	你將這兜東西號啊恁多、食啊恁多，正式餓嘍圖㘔哦！	ngˇ jiongˊ iaˋ deuˊ dungˊ xiˊ ho a anˋ doˊ 、siid a anˋ doˊ ，ziin siidˋ ngo loˇ tuˇ saiˊ oˊ ！	你把這些東西佔這麼多，又吃這麼多，真是貪吃哦！
lbk11_223	佢一生人毋讀書又毋煞猛，愕愕琢琢。	iˇ idˋ senˊ nginˇ mˇ tug suˊ iu mˇ sadˋ mangˊ ，ngogˋ ngogˋ dogˋ dogˋ 。	他一輩子既不讀書又不勤勞，就呆呆的過日子。
lbk11_224	這個事情蓋簡單，𠊎愕愕仔去做，就做啊蓋好著。	iaˋ ge sii qinˇ goi gianˋ danˊ ，ngaiˇ ngogˋ ngogˋ eˊ hi zo ，qiu zo a goi hoˋ doˋ 。	這件事情很簡單，我傻傻的去做，就做得很好。
lbk11_225	「外甥㘔母舅，親像鴨嫲吞豆腐。」這句話係講，外甥仔係翕母舅，母舅麼个都講毋得。	「ngoi senˊ saiˊ muˊ kiuˊ ，qinˊ qiong abˋ maˇ tunˊ teu fu 。」iaˋ gi fa he gongˋ ，ngoi senˊ eˋ he hibˋ muˊ kiuˊ ，muˊ kiuˊ maˋ ge duˊ gongˋ mˇ dedˋ 。	「外甥欺負舅舅，就像鴨子吃豆腐一般」，這句話是說，外甥若欺負舅舅，舅舅只能默默承受。
lbk11_226	頭擺人講「外孫指墓墩」這句話，係希望自家个倈仔降子降孫。	teuˇ baiˋ nginˇ gongˋ 「ngoi sunˊ ziiˋ mung dunˊ 」iaˋ gi fa ，he hiˊ mong qid gaˊ ge lai eˋ giung ziiˋ giung sunˊ 。	美濃人講「外孫指墳墓」這句話，是希望自己的兒子能多子多孫而別指望外孫。
lbk11_227	人講：「戇到死，清明毋插穀雨。」穀雨時節，人家个禾仔已經擐胎吔，你清明正開始施禾仔，毋會忒慢吓？	nginˇ gongˋ「ngong do xiˋ ，qiangˊ miangˇ mˇ cabˋ gugˋ iˋ。」gugˋ iˋ siiˇ jiedˋ ，nginˇ gaˊ ge voˇ eˋ iˋ ginˊ kuan toiˊ eˇ，ngˇ qiangˊ miangˇ nang koiˊ siiˋ sii voˇ eˋ ，mˇ voi tedˋ man haˋ ？	俗話說：「笨到死，清明不插穀雨秧」，穀雨時，別人的稻子已經結穗了，你在清明節才正要開始插秧，不會太遲了嗎？
lbk11_228	記得頭擺吾婆盡惜𠊎，見去哪都帶等𠊎，有麼个好食个，定著愛留分𠊎，隔壁鄰舍都㖸佢「戇雞嫲孵鴨春，戇阿婆惜外孫」。	gi dedˋ teuˇ baiˋ ngaˊ poˇ qin xiagˋ ngaiˇ ，gian hi naiˋ duˊ dai nenˋ ngaiˇ ，iuˊ maˋ ge hoˋ siid ge ，tin cog oi liuˇ bunˊ ngaiˇ ，gagˋ biagˋ linˇ sa duˊ nagˋ iˇ 「ngong gieˊ maˇ pu abˋ cunˊ ，ngong aˊ poˇ xiagˋ ngoi sunˊ 」。	記得以前外婆很疼我，不管到哪兒都帶著我，有什麼好吃的，一定要留給我，隔壁鄰居都笑她「笨母雞孵鴨蛋，笨外婆疼外孫」。
lbk11_229	毋好㖸𠊎「戇狗逐飛鳥」，𠊎定著會煞猛讀書考第一名分你等看。	mˇ hoˋ nagˋ ngaiˇ 「ngong gieuˋ giugˋ biˊ diauˊ 」，ngaiˇ tin cog voi sadˋ mangˊ tug suˊ kauˋ ti idˋ miangˇ bunˊ ngˇ denˊ kon 。	不要笑我「笨狗追飛鳥」，我一定會努力讀書考第一名給你們看。
lbk11_230	當初逐細妹仔，大家人都㖸佢「戇狗想食羊核卵」，無想著，厥煞猛同誠心正式感動吔該細妹仔，兩儕結婚吔生活盡幸福。	dongˊ cuˊ giugˋ se moi eˋ ，tai gaˊ nginˇ duˊ nagˋ iˇ 「ngong gieuˋ xiongˋ siid iongˇ hag nonˋ 」，moˇ xiongˋ doˋ ，iaˊ sadˋ mangˊ tungˇ siinˇ ximˊ ziin siidˋ gamˋ tung eˇ geˋ se moi eˋ ，liongˋ saˇ giadˋ funˊ eˇ senˊ fad qin hen fugˋ 。	當初追女朋友，大家都笑他「笨狗想吃羊睪丸」，想不到，他的勤奮與誠心真的感動了那個女孩子，兩人結婚後生活得很幸福。
lbk11_231	大家人都㖸𠊎蓋戇，毋會同人相爭，但係吾婆講𠊎「戇人多福」，將來定著會有福報。	tai gaˊ nginˇ duˊ nagˋ ngaiˇ goi ngong ，mˇ voi tungˇ nginˇ xiongˊ zangˊ ，danˋ he ngaˊ poˇ gongˋ ngaiˇ 「ngong nginˇ doˊ fugˋ 」，jiongˊ loiˇ tin cog voi iuˊ fugˋ bo 。	大家都笑我很笨，不與人爭，但是奶奶說我「傻人多福氣」，將來一定會很有福報。
lbk11_232	佢當初就係因為做好心，將身項伸著愛買便當个二十个銀同身障人士買彩券，正著著三千萬，實在係「戇人有戇福」。	iˇ dongˊ cuˊ qiu he inˊ vi zo hoˋ ximˊ ，jiangˊ siinˊ hong cunˊ doˋ oi maiˊ pien dongˊ ge ngi siib ge ngiunˇ tungˇ siinˊ zong nginˇ sii maiˊ caiˋ kian ，nang cog doˋ samˊ qienˊ van ，siid cai he 「ngong nginˇ iuˊ ngong fugˋ 」。	他當初就是因為好心，把身上僅存要買便當的二十元拿去跟身障人士買彩券，才會中了三千萬，實在是「傻人有傻福」。
lbk11_233	頭擺，戇戇呆呆个人蓋會分人翕。	teuˇ baiˋ ，ngong ngong deˇ deˇ ge nginˇ goi voi bunˊ nginˇ hibˋ 。	以前，傻乎乎的人很容易被人欺負。
lbk11_234	佢雖然戇戇仔，但係煞猛又老實，蓋多人盡好喚佢來做事。	iˇ suiˊ ianˇ ngong ngong eˊ ，danˋ he sadˋ mangˊ iu loˋ siid ，goi doˊ nginˇ qin hau vonˋ iˇ loiˇ zo se 。	他雖然傻傻的，但是勤奮又老實，很多人很喜歡要他來做事。
lbk11_235	頭擺，細妹仔尋對象係毋聽爺哀个勸話，離婚吔就會分鄰鄰舍舍講係「戇膣屄餵野豬哥」，蓋才過。	teuˇ baiˋ ，se moi eˋ qimˇ dui xiong he mˇ tangˊ iaˇ oiˊ ge kian va ，liˇ funˊ eˇ qiu voi bunˊ linˇ linˇ sa sa gongˋ he 「ngong ziiˊ baiˇ vi iaˊ zuˊ goˊ 」，goi coiˇ go 。	以前，女孩子找對象如果不聽父母親的勸告，離婚了就會被左鄰右舍說是「笨女人餵野豬哥」，實在可憐。
lbk11_236	喚你同𠊎𢯭手渡一下阿弟牯，你就呢呢挼挼，有麼个困難斯愛講！	vonˋ ngˇ tungˇ ngaiˇ ten suˋ tu idˋ ha aˊ di guˋ ，ngˇ qiu niˇ niˇ noˇ noˇ ，iuˊ maˋ ge kun nanˇ siiˇ oi gongˋ ！	叫你幫忙照顧一下小弟弟，你就嘀嘀咕咕很不情願的樣子，有什麼困難就要說出來！
lbk11_237	你蓋會使錢，每隻月都做月光族，正式係「老鼠毋留隔夜糧」。	ngˇ goi voi siiˋ qienˇ ，miˊ zagˋ ngiad duˊ zo ngiad gongˊ cug ，ziin siidˋ he 「no cuˋ mˇ liuˇ gagˋ ia liongˇ」。	你很會花錢，每個月的錢都花光光，真的是「老鼠不留隔夜糧」。
lbk11_238	毋怕！硬厲害个裁縫師嘛有剪差尺寸个時節，人講：「老虎恁精也會啄目睡」，𠊎毋會怪你。	mˇ pa ！ang li hoi ge caiˇ fungˇ siiˊ maˇ iuˊ jienˋ caˊ cagˋ cun ge siiˇ jiedˋ ，nginˇ gongˋ ：「no fuˋ anˋ jinˊ iaˊ voi dugˋ mugˋ soi 」，ngaiˇ mˇ voi guai ngˇ 。	沒關係！再厲害的裁縫師也有剪錯尺寸的時候，俗話說：「老虎再精明也會打瞌睡」，我不會怪你。
lbk11_239	無聽人講過：「老虎愛庰爪」吓？像你恁呢一哪仔洩講自家一有錢，實在係蓋危險个事情。	moˇ tangˊ nginˇ gongˋ go ：「no fuˋ oi biang zauˋ 」haˋ ？qiong ngˇ anˋ neˊ idˋ naiˋ eˋ xied gongˋ qid gaˊ idˋ iuˊ qienˇ ，siid cai he goi munˇ hiamˋ ge sii qinˇ 。	沒聽人家說過：「老虎會藏爪子」嗎？像你照樣到處吹噓自己多有錢，實在是很危險的事情。
lbk11_240	你讀書仰淨緊掀緊看，「老虎食蚊仔——有噍無吞」樣仔，哪有效呢？	ngˇ tug suˊ ngiongˋ qiang ginˋ ianˊ ginˋ kon ，「no fuˋ siid munˊ eˋ ——iuˊ ceu moˇ tunˊ 」iong eˊ ，naiˋ iuˊ hauˋ noˋ ？	你讀書怎麼只是一直翻一直看，「老虎吃蚊仔——有嚼沒吞」的樣子，哪會有效果呢？
lbk11_241	你毋使愁啦！細人仔雖然分厥爸帶走吔，定著毋會有危險个啦，人講：「老虎再惡毋食子」。	ngˇ mˇ siiˋ seuˇ laˋ！se nginˇ eˋ suiˊ ianˇ bunˊ iaˊ baˊ dai zeuˋ eˇ，tin cog mˇ voi iuˊ munˇ hiamˋ ge laˋ ，nginˇ gongˋ ：「no fuˋ zai ogˋ mˇ siid ziiˋ 」。	你不用擔心啦！孩子雖然被他爸帶走了，一定不會有危險的，俗話說：「老虎再兇惡，絕不吃自己的孩子」。
lbk11_242	佢下隻月愛參加走相逐比賽，這下正經在該「磨斧洗鋸」，每日臨暗都去操場項練腳力。	iˇ ha zagˋ ngiad oi camˊ gaˊ zeuˋ xiongˊ giugˋ biˋ soi ，iaˋ ha ziin ginˊ teˊ geˋ 「noˇ buˋ seˋ gi 」，miˊ ngidˋ limˇ am duˊ hi cauˊ congˇ hong lien giogˋ lid 。	他下個月要參加賽跑比賽，現在正在「磨斧洗鋸」，每天傍晚都去操場練腳力。
lbk11_243	頭擺，準備上山劈樵杈个前一日，都愛磨刀嫲。	teuˇ baiˋ ，zunˋ pi songˊ sanˊ piagˋ ceuˇ ca ge qienˇ idˋ ngidˋ ，duˊ oi noˇ doˊ maˇ 。	以前，準備上山砍柴的前一天，都要將柴刀磨利。
lbk11_244	頭擺，無塑膠索个年代，家家戶戶都係自家挼麻索來用。	teuˇ baiˋ ，moˇ sogˋ gauˊ sogˋ ge ngianˇ toi ，gaˊ gaˊ fu fu duˊ he qid gaˊ noˇ maˇ sogˋ loiˇ iung 。	以前，沒有塑膠繩的年代，家家戶戶都是自己將麻絲搓成繩索來用。
lbk11_245	雖然𠊎無做壞事，但係見看著警察就會亂筶箭天，尋證件都毋著。	suiˊ ianˇ ngaiˇ moˇ zo faiˋ sii ，danˋ he gian kon doˋ ginˋ cadˋ qiu voi non gau jien tienˊ ，qimˇ ziin kian duˊ mˇ doˋ 。	雖然我沒做壞事，但是只要看到警察就會心急而手腳慌亂，證件都找不到。
lbk11_246	𠊎看著阿輝嫂亂緊緊仔，毋知愛去哪仔。	ngaiˇ kon doˋ aˊ fiˊ soˋ non ginˋ ginˋ eˊ ，mˇ diˊ oi hi naiˋ eˋ 。	我看到阿輝嫂慌慌張張的樣子，不知道要去哪裡。
lbk11_247	𠊎一下在這仔亂稈搥綿吔，你還來摝，愛㘔蔗仔麼？	ngaiˇ idˋ ha teˊ iaˋ eˊ non gonˋ cuiˇ mienˇ eˇ，ngˇ hanˇ loiˇ lugˋ ，oi saiˊ za eˋ meˇ ？	我現在正忙得很，你還來搗亂，是要吃棍子嗎？
lbk11_248	𠊎今朝晨愛開會、愛準備茶水、資料，又愛去車頭接人客，斷真係亂理麻合吔。	ngaiˇ ginˊ zeuˊ siinˇ oi koiˊ fi 、oi zunˋ pi caˇ suiˋ 、ziiˊ liau ，iu oi hi caˊ teuˇ jiabˋ nginˇ hagˋ ，don ziinˊ he lon liˊ maˇ gabˋ eˇ。	我今天早上要開會、要準備茶水、資料，還要到車站接來賓，真的非常忙亂。
lbk11_249	係堵著緊要个事情就愛過冷靜兜仔，毋好雄頭搭腦假會，正毋會亂膦屌壞膣。	he duˇ doˋ ginˋ ieu ge sii qinˇ qiu oi go langˊ qin deuˊ eˊ ，mˇ hoˋ hiungˇ teuˇ dabˋ noˋ gaˋ voi ，nang mˇ voi lon linˋ diauˋ fai ziiˊ 。	若遇到重要的事情就要冷靜些，不要好勇逞強，才不會失敗。
lbk11_250	今暗晡盡寒人，佢無洗身，淨暖龍一下就上眠床吔。	ginˊ am buˊ qin honˇ nginˇ ，iˇ moˇ seˋ siinˊ ，qiang nonˊ liungˇ idˋ ha qiu songˊ minˇ congˇ eˇ。	今晚天氣很冷，他沒洗澡，光擦個身子就上床睡覺了。