美濃客家語寶典-13

美濃客家語寶典-13：

編號	例句	六堆客語拼音	華譯
lbk13_001	這都毋係若事頭，你莫恁搶光哪！	iaˋ duˊ mˇ he ngiaˊ se teuˇ ，ngˇ mog anˋ qiongˋ gongˊ naˊ ！	這些都不是你的工作，請你不要搶人的光采。
lbk13_002	佢就係恁搶光雞婆，大家每擺正會選佢做里長。	iˇ qiu he anˋ qiongˋ gongˊ gieˇ boˇ ，tai gaˊ miˊ baiˋ nang voi xienˋ iˇ zo liˊ zongˋ 。	他就是愛管閒事、很雞婆，大家每次才會選他當里長。
lbk13_003	細倈仔人正會有搶食胲，你看過細妹仔人有吓？	se lai eˋ nginˇ nang voi iuˊ qiongˋ siid goiˊ ，ngˇ kon go se moi eˋ nginˇ iuˊ haˋ ？	男生才會有喉結，你看過女生有嗎？
lbk13_004	這後生仔搶食好㘔，盡得人惱。	iaˋ heu sangˊ eˋ qiongˋ siid hau saiˊ ，qin dedˋ nginˇ nauˊ 。	這年輕人愛搶東西吃，很討人厭。
lbk13_005	這細妹仔盡可取，每日下班前都會同歸間辦公室个東西整理啊就就集集。	iaˋ se moi eˋ qin koˋ qiˋ ，miˊ ngidˋ haˊ banˊ qienˇ duˊ voi tungˇ guiˊ gianˊ pan gungˊ siidˋ ge dungˊ xiˊ ziinˋ liˊ a qiu qiu qib qib 。	這個女孩子很可取，每天下班前都會將辦公室的東西整理的井然有序。
lbk13_006	你就像秋淋夜雨，同𠊎𢯭手盡多。	ngˇ qiu qiong qiuˊ limˇ ia iˋ ，tungˇ ngaiˇ ten suˋ qin doˊ 。	你就像入秋後的夜雨，幫助我很多。
lbk13_007	人講：「秋淋夜雨當過肥」，天公係愛賞你飯食，比你拚啊半條命還過贏呢！	nginˇ gongˋ ：「qiuˊ limˇ ia iˋ dong go piˇ」，tienˊ gungˊ he oi songˋ ngˇ fan siid ，biˋ ngˇ bia a ban tiauˇ miang hanˇ go iangˇ neˊ ！	俗話說：「豐沛的秋雨澆灌作物，比施肥還要好」，老天爺要賞你飯吃，勝過你拚到只剩半條命呢！
lbk13_008	你愛去市場買東西，續手順帶同𠊎買一斤豬肉歸來好無？	ngˇ oi hi sii congˇ maiˊ dungˊ xiˊ ，sa suˋ sun dai tungˇ ngaiˇ maiˊ idˋ ginˊ zuˊ ngiugˋ guiˊ loiˇ hoˋ moˇ ？	你要去市場買東西，順便幫我帶一斤豬肉回來好嗎？
lbk13_009	頭擺人歇在大河壩脣，發大水過後，會去撈沙枯杈準樵燒。	teuˇ baiˋ nginˇ hed teˊ tai hoˇ ba siinˇ ，bodˋ tai suiˋ go heu ，voi hi lau saˊ kuˊ ca zunˋ ceuˇ seuˊ 。	以前住在河邊的人，淹水之後會去撈漂流木來當柴燒。
lbk13_010	你做事恁會趖，蛇過背棍哪有用呢？	ngˇ zo sii anˋ voi soˇ ，saˇ go bi gun nai iuˊ iung noˋ ？	你做事很會拖拖拉拉，蛇跑走了才拿棍子喊打有什麼用呢？
lbk13_011	「蛇過正愛背棍，賊走正愛閂門。」這句話係警告人，做事愛緊板，速度愛遽，正跈得陣著。	「saˇ go nang oi boi gun ，ced zeuˋ nang oi conˊ munˇ 。」iaˋ gi fa he ginˋ go nginˇ ，zo sii oi ginˋ banˋ ，sugˋ tu oi giagˋ ，nang tenˇ dedˋ ciin doˋ 。	「蛇過了才拿棍子，小偷走了才閂門。」這句話是警告人，做事要積極，速度要敏捷，才跟得上團隊。
lbk13_012	這家人行壞運吔，恁久聽講整風水蛇入金盎吔喲！	iaˋ gaˊ nginˇ hangˇ faiˋ iun eˇ，anˋ giuˋ tangˊ gongˋ zangˋ fungˊ suiˋ saˇ ngib gimˊ angˊ eˇ ioˊ ！	這戶人家走霉運了，最近聽說整修風水有蛇爬進納骨罈了呢！
lbk13_013	「蛇入屎胐」係表示這個人毋係行壞運，就係蓋懶尸，正會有蛇哥入去屎朏个講法，實在蓋趣妙哦！	「saˇ ngib sii fudˋ 」he beuˋ sii iaˋ ge nginˇ mˇ he hangˇ faiˋ iun ，qiu he goi nanˊ siiˊ ，nang voi iuˊ saˇ goˊ ngib hi sii fudˋ ge gongˋ fabˋ ，siid cai goi qi meu oˊ ！	「蛇爬進肛門」是表示這個人不是倒楣，就是很懶惰，才會有蛇進入肛門的說法，實在很有趣哦！
lbk13_014	你這個人仰會恁哀哉，「蛇入屎朏都懶挷」，自家愛愐正來。	ngˇ iaˋ ge nginˇ ngiongˋ voi anˋ oiˊ zoiˇ ，「saˇ ngib sii fudˋ duˊ nanˊ bangˊ 」，qid gaˊ oi menˋ zang loiˇ 。	你這個人怎麼會這麼糟糕，「蛇爬進肛門都懶得拉」，自己要想清楚。
lbk13_015	田坵裡蛇窿𧊅窟一哪都係，這係自然个現象。	tienˇ kiuˊ liˊ saˇ lungˇ guaiˋ fudˋ idˋ naiˋ duˊ he ，iaˋ he cii ianˇ ge hian xiong 。	田裡到處有蛇和蛙的洞穴，這是自然界現象。
lbk13_016	你等兩儕從旦裡就係「蛇窿透𧊅窟」，今又想愛做麼个暗當啊！	ngˇ denˊ liongˋ saˇ qiungˇ dan liˊ qiu he 「saˇ lungˇ teu guaiˋ fudˋ 」，ginˊ iu xiongˋ oi zo maˋ ge am dong aˊ ！	你們兩人一直以來都是「一丘之貉」，現在又想要做什麼勾當啊！
lbk13_017	這個社會蓋現實，大家各顧各，故所以「蛇愛命，𧊅愛命」。	iaˋ ge sa fi goi hian siid ，tai gaˊ gogˋ gu gogˋ ，gu soˋ iˊ 「saˇ oi miang ，guaiˋ oi miang 」。	這個社會很現實，大家各自努力，所以「大家都為了生存，各顧各的。」
lbk13_018	你蛇聲鬼噭像麼个樣式，毋好好講話，動啊著就大細聲。	ngˇ saˇ sangˊ guiˋ gieu qiong maˋ ge iong siidˋ ，mˇ hoˋ hoˋ gongˋ fa ，tungˊ a doˋ qiu tai se sangˊ 。	你大聲尖叫像什麼樣子，不好好說話，動不動就大呼小叫的。
lbk13_019	𠊎屋下從旦裡有蓋多親戚會來，阿婆看著人客來，就會煠雞鴨來請人。	ngaiˇ lugˋ kaˊ qiungˇ dan liˊ iuˊ goi doˊ qinˊ qidˋ voi loiˇ ，aˊ poˇ kon doˋ nginˇ hagˋ loiˇ ，qiu voi sab gieˊ abˋ loiˇ qiangˋ nginˇ 。	我家裡一直都有很多親戚會來，奶奶一看到客人來，就會燙煮雞鴨請客。
lbk13_020	你蓋好講、蓋好辯，又蓋好灰，舌嫲無打結任在你講。	ngˇ goi hau gongˋ、goi hau bien，iu goi hau foiˊ ，sad maˇ moˇ daˋ giedˋ im cai ngˇ gongˋ 。	你很愛說話、又喜歡爭辯，還很會鬧，任何事都可以狡辯。
lbk13_021	「舌嫲無骨，任人拗屈」，這句俗語係講，無信用个人，講話變來變去蓋會詏，無人會相信佢！	「sad maˇ moˇ gudˋ ，im nginˇ auˋ kud 」，iaˋ gi xiug ngiˊ he gongˋ ，moˇ xin iung ge nginˇ ，gongˋ fa bien loiˇ bien hi goi voi au ，moˇ nginˇ voi xiongˊ xin iˇ ！	「舌頭沒有骨頭，任由人彎曲」，這句俗語是說，沒有信用的人，講話反覆無常，沒有人會相信他！
lbk13_022	「舌嫲同嘴恁好，都會齧著。」你等兩兄弟有麼个毋堵好，愛講開來正好！	「sad maˇ tungˇ zoi anˋ hoˋ ，duˊ voi ngadˋ doˋ。」ngˇ denˊ liongˋ hiungˊ ti iuˊ maˋ ge mˇ duˋ hoˋ ， oi gongˋ koiˊ loiˇ nang hoˋ ！	「人與人之間交情再好，都會有爭執、摩擦的時候。」你們兄弟倆有什麼誤會，要說清楚、講明白才好。
lbk13_023	做人做事愛煞煞猛猛，正會成功。	zo nginˇ zo sii oi sadˋ sadˋ mangˊ mangˊ ，nang voi siinˇ gungˊ。	做人做事要努力，才會成功。
lbk13_024	頭擺人有講：「殺頭生理有人做，了錢生理無人做」，該人做生理緊喊了錢賣，𠊎正毋信呢！	teuˇ baiˋ nginˇ iuˊ gongˋ ：「sadˋ teuˇ senˊ liˊ iuˊ nginˇ zo ，liauˋ qienˇ senˊ liˊ moˇ nginˇ zo 」，ge nginˇ zo senˊ liˊ ginˋ hemˊ liauˋ qienˇ mai ，ngaiˇ nang mˇ xin noˊ ！	俗話說：「殺頭的生意有人做，賠錢的生意沒人做」，那個人做生意一直喊賠錢賣，我才不相信呢！
lbk13_025	你做事無用心，白白了核恁多錢，正式係石灰掞路。	ngˇ zo sii moˇ iung ximˊ ，pag pag liauˋ hedˋ anˋ doˊ qienˇ ，ziin siidˋ he sag foiˊ iam lu 。	你做事很不用心，白白浪費這麼多錢，真的是做白工。
lbk13_026	這條愛去九芎林个路蓋毋好行，石頭髻窖腳印啊蓋痛。	iaˋ tiauˇ oi hi giuˋ giungˊ naˇ ge lu goi mˇ hoˋ hangˇ ，sag teuˇ gi gau giogˋ in a goi tung 。	這條要去九芎林的路很不好走，路上凹凸不平、石頭多，腳踩得很痛。
lbk13_027	頭擺大路無打打馬膠，石頭矻礫，打赤腳㧡樵个人實在盡才過。	teuˇ baiˋ tai lu moˇ daˋ da ma gauˊ ，sag teuˇ kid lid，daˋ cagˋ giogˋ kaiˊ ceuˇ ge nginˇ siid cai qin coiˇ go 。	以前馬路沒有舖柏油，赤腳走在石頭路上，挑柴的人實在很可憐。
lbk13_028	人講：「石頭細細堆成山，羊毛細細織成毯」，每日煞猛賺錢挾錢，今仔做得買田買地。	nginˇ gongˋ ：「sag teuˇ se se doiˊ siinˇ sanˊ ，iongˇ moˊ se se ziidˋ siinˇ tanˋ 」，miˊ ngidˋ sadˋ mangˊ con qienˇ hiabˋ qienˇ ，ginˊ e zo dedˋ maiˊ tienˇ maiˊ ti 。	俗話說：「小小的石頭可以堆成山，細細的羊毛可以織成毯」，每天努力工作賺錢、存錢，幾年後便可以買田買地。
lbk13_029	你做麼个一哪仔㘔上㘔下，蓋像釘孤擺。	ngˇ zo maˋ ge idˋ naiˋ eˋ saiˊ songˊ saiˊ haˊ ，goi qiong dang ˊ guˊ baiˇ。	你為什麼到處吃東西，很像流浪漢般。
lbk13_030	𠊎今晡日無食東西又緊啉茶，這下肚屎豺豺削削蓋清苦。	ngaiˇ ginˊ buˊ ngidˋ moˇ siid dungˊ xiˊ iu ginˋ limˊ caˇ ，iaˋ ha duˋ siiˋ saiˇ saiˇ xiogˋ xiogˋ goi qinˊ kuˋ 。	我今天沒吃東西又一直喝泡的茶，現在肚子餓得像刀刮一樣很辛苦。
lbk13_031	正降啊出个細貓仔係分人發現吔，貓嫲就會徙竇。	nang giung a cudˋ ge se meu eˋ he bunˊ nginˇ fadˋ hian eˇ，meu maˇ qiu voi saiˋ deu 。	才剛出生的小貓如果被人發現了，母貓就會搬家。
lbk13_032	人講：「三年來一到，親像親家到；三日來一到，親像狗上灶。」你恁呢三不時就去尋人尞，人家定著惱死吔。	nginˇ gongˋ ：「samˊ ngianˇ loiˇ idˋ do ，qinˊ qiong qinˊ gaˊ do ；samˊ ngidˋ loiˇ idˋ do ，qinˊ qiong gieuˋ songˊ zo。」ngˇ anˋ neˊ samˊ budˋ siiˇ qiu hi qimˇ nginˇ liau ，nginˇ gaˊ tin cog nauˊ xiˋ eˇ。	俗話說：「三年來一次，就像親家到；三天來一次，就像狗上灶台。」你這樣三天兩頭就去找人家，人家一定很討厭你。
lbk13_033	記得頭擺阿婆煮菜不時會放薑，佢講：「三餐食飯傍薑，餓死路項賣藥郎」，故所佢喚𠊎等愛多食薑。	gi dedˋ teuˇ baiˋ aˊ poˇ zuˋ coi budˋ siiˇ voi biong giongˊ ，iˇ gongˋ ：「samˊ conˊ siid fan bongˋ giongˊ ，ngo xiˋ lu hong mai iog nongˇ 」，gu soˋ iˇ vonˋ ngaiˇ nenˊ oi doˊ siid giongˊ 。	記得以前奶奶煮菜時經常會放薑，他說：「三餐吃飯配薑，餓死路上賣藥郎」，所以他要我們多吃薑。
lbk13_034	該人買東西蓋會計較，登常三除四扣，尾項伸無幾多錢，蓋得人惱。	ge nginˇ maiˊ dungˊ xiˊ goi voi gie gauˋ ，denˊ songˇ samˊ cuˇ xi kieu ，miˊ hong cunˊ moˇ iˋ doˊ qienˇ ，goi dedˋ nginˇ nauˊ 。	那個人買東西很愛計較，常常三除四扣，最後剩沒多少錢，很惹人厭。
lbk13_035	每擺𠊎愛出去尞，阿姆就會三叮四囑，愛注意安全、毋好濫糝食。	miˊ baiˋ ngaiˇ oi cudˋ hi liau ，aˊ meˊ qiu voi samˊ denˊ xi zugˋ ，oi zu i onˊ qionˇ 、mˇ hoˋ lamˋ samˋ siid 。	每次我要出去旅行，媽媽就會一再叮囑，要注意安全、不要亂吃。
lbk13_036	人講：「三虎必有一豹」，每一對爺哀降个細人仔定著會有特別無共樣个。	nginˇ gongˋ ：「samˊ fuˋ bidˋ iuˊ idˋ bau 」，miˊ idˋ dui iaˇ oiˊ giung ge se nginˇ eˋ tin cog voi iuˊ tid pied moˇ kiung iong ge 。	俗話說：「三虎必有一豹」，每一對父母生的孩子一定會有特別不一樣的。
lbk13_037	你同若兄弟姊妹个個性正式差蓋多，頭擺人講：「三虎一豹」，一息都毋會爭差。	ngˇ tungˇ ngiaˊ hiungˊ ti jiˋ moi ge ge xin ziin siidˋ caˊ goi doˊ ，teuˇ baiˋ nginˇ gongˋ ：「samˊ fuˋ idˋ bau 」，idˋ xidˋ duˊ mˇ voi zenˊ caˊ 。	你跟你兄弟姊妹的個性真的差很多，俗話說：「三虎一豹」，一點兒都沒錯。
lbk13_038	人講：「三分个人才，乜要七分个打扮。」像你恁有才能个人，係再打扮一下，定著人緣會加分。	nginˇ gongˋ ：「samˊ funˊ ge nginˇ coiˇ ，me oi qidˋ funˊ ge daˋ ban 。」qiong ngˇ anˋ iuˊ coiˇ nenˇ ge nginˇ ，he zai daˋ ban idˋ ha，tin cog nginˇ ianˇ voi gaˊ funˊ 。	俗話說：「三分的人才，也要七分的打扮。」像你這麼有才能的人，如果再裝扮一下，一定人緣會加分。
lbk13_039	人講：「三分人事七分命」，一個人事業愛成功，除核三分个煞猛，還愛有七分个命底。	nginˇ gongˋ ：「samˊ funˊ nginˇ sii qidˋ funˊ miang 」，idˋ ge nginˇ sii ngiab oi siinˇ gungˊ ，cuˇ hedˋ samˊ funˊ ge sadˋ mangˊ ，hanˇ oi iuˊ qidˋ funˊ ge miang daiˋ 。	俗話說：「三分人事七分命」，一個人事業要成功，除了三分的努力之外，還要有七分天註定。
lbk13_040	你三更半夜毋睡目，在這做麼个？	ngˇ samˊ gangˊ ban ia mˇ soi mugˋ ，teˊ iaˋ zo maˋ ge ？	你半夜不睡覺，在這裡做什麼？
lbk13_041	細妹仔集共下，話就講毋會煞，故所，人會講：「三個婦人家，當過一牛車」，真實毋會爭差。	se moi eˋ xib kiung ha，fa qiu gongˋ mˇ voi sod，gu soˋ，nginˇ voi gongˋ：「samˊ ge fu nginˇ gaˊ ，dong go idˋ ngiuˇ caˊ 」，ziinˊ siidˋ mˇ voi zenˊ caˊ 。	女孩子聚集在一起，總有說不完的話，所以，人家會說：「三個婦人，等於一牛車」，真的一點兒都沒錯。
lbk13_042	斷真係做麼个頭路講麼个話緒，人講：「三句話不離本行」，硬講都離毋開本行个事情。	don ziinˊ he zo maˋ ge teuˇ lu gongˋ maˋ ge fa xi ，nginˇ gongˋ ：「samˊ gi fa budˋ liˇ bunˋ hongˇ 」，ang gongˋ duˊ liˇ mˇ koiˊ bunˋ hongˇ ge sii qinˇ 。	真的是做什麼行業說什麼話，人家說：「三句話不離本行」，不管怎麼說都離不開本行的事情。
lbk13_043	假期都愛煞吔，你等還在這三揀四擇，斯愛仰結煞。	gaˋ kiˇ duˊ oi sod eˇ，ngˇ denˊ hanˇ teˊ iaˋ samˊ gianˋ xi tog ，siiˇ oi ngiong gadˋ sadˋ 。	假期即將要結束了，你們還在這裡東挑西揀拿不定主意，這可怎麼是好。
lbk13_044	這擺高年級个田徑比賽，三國歸一統還係六年孝班得著冠軍。	iaˋ baiˋ goˊ ngianˇ gibˋ ge tienˇ gang biˋ soi ，samˊ guedˋ guiˊ idˋ tungˋ hanˇ he liugˋ ngianˇ hau banˊ dedˋ doˋ gon giunˊ 。	這次高年級的田徑比賽，最後還是六年孝班得著冠軍。
lbk13_045	厥老弟實在毋得結煞，賭博賭啊「衫爛褲爛都毋補，有錢共快拿去賭」，兄弟姊妹畏佢畏啊會死。	iaˊ loˋ taiˊ siid cai mˇ dedˋ gadˋ sadˋ ，duˋ bogˋ duˋ a 「samˊ lan fu lan duˊ mˇ buˋ ，iuˊ qienˇ kiung kuai naˊ hi duˋ 」，hiungˊ ti jiˋ moi vi iˇ vi a voi xiˋ 。	他的弟弟實在很麻煩，賭博賭得「衣破褲破都不補，有錢趕緊拿去賭」，兄弟姊妹對他討厭得要命。
lbk13_046	人講：「三年風水輪流轉」，一時个沒落毋使愁，盡自家个本分煞猛打拚，總會有出頭。	nginˇ gongˋ ：「samˊ ngianˇ fungˊ suiˋ lunˇ liuˇ zonˋ 」，idˋ siiˇ ge mog log mˇ siiˋ seuˇ ，qin qid gaˊ ge bunˋ fun sadˋ mangˊ daˋ bia ，zungˋ voi iuˊ cudˋ teuˇ 。	俗話說：「三年風水輪流轉」，一時的沒落不要煩惱，盡自己的本分努力打拚，總會出頭的。
lbk13_047	你係無能力改變就愛忍，係無，「三日毋食，還愛食該臭餿飯」。	ngˇ he moˇ nenˇ lid goiˋ bien qiu oi ngiunˊ ，he moˇ ，「samˊ ngidˋ mˇ siid ，hanˇ oi siid ge cu seuˊ fan 」。	你如果沒有能力改變就要忍耐，不然，「三日不吃，還是要吃那個餿掉的飯」。
lbk13_048	青菜做得補給身體个營養，老古人講：「三日毋食青，兩眼冒金星」，食菜毋好忒揀。	qiangˊ coi zo dedˋ buˋ gibˋ siinˊ tiˋ ge inˇ iongˊ ，loˋ guˋ nginˇ gongˋ ：「samˊ ngidˋ mˇ siid qiangˊ ，liongˋ ngianˋ mo gimˊ senˊ 」，siid coi mˇ hoˋ tedˋ gianˋ 。	青菜可以補充身體的營養，古人說：三天沒吃青菜，兩眼無光、沒精神。」吃青菜不要挑剔。
lbk13_049	你係煞猛做，行出一條自家个路來，人講：「三人歉過，石頭會破」，認真去做就無毋著。	ngˇ he sadˋ mangˊ zo ，hangˇ cudˋ idˋ tiauˇ qid gaˊ ge lu loiˇ ，nginˇ gongˋ ：「samˊ nginˇ kiam go ，sag teuˇ voi po 」，ngin ziinˊ hi zo qiu moˇ mˇ cog 。	你若能努力打拚，可以打造一條屬於自己的路，俗話說：「路是很多人走出來的」，認真去做就對了。
lbk13_050	佢等兩儕有事情無閒毋曾到，大家就莫等佢等吔，人講：「三人無等兩儕食。」𠊎等就來先食！	iˇ denˊ liongˋ saˇ iuˊ sii qinˇ moˇ hanˇ mˇ qienˇ do ，tai gaˊ qiu mog denˋ iˇ denˊ eˇ，nginˇ gongˋ ：「samˊ nginˇ moˇ denˋ liongˋ saˇ siid 。」ngaiˇ nenˊ qiu loiˇ xienˊ siid ！	他們兩人忙到現在還沒到，大家就別再等他們了，俗話說：「很多人吃飯時，不可能等少數幾個人到齊才吃。」我們就先吃吧！
lbk13_051	你等兩儕仰會恁捨毋得，愛跎啊哪久呢？斷真係「三郎送李郎，送到天大光」，好行吔！毋行會赴毋著尾枋車吔！	ngiˇ denˊ denˊ liongˋ saˇngiongˋ voi anˋ saˋ mˇ dedˋ ，oi doˇ a nai giuˋ noˋ ？don ziinˊ he 「samˊ longˇ sung liˋ longˇ ，sung do tienˊ tai gongˊ 」，hoˋ hangˇ eˇ！mˇ hangˇ voi fu mˇ doˋ miˊ biongˊ caˊ eˇ！	你們兩位這樣依依不捨，要拖到什麼時候呢？真的是「三郎送李郎，難分又難離」，可以出發了！再不走會趕不上最後一班車了！
lbk13_052	這做心臼个毋會差，對厥家官家娘三扶四募，斷真稱說得得。	iaˋ zo ximˊ kiuˊ ge mˇ voi caˊ ，dui iaˊ gaˊ gonˊ gaˊ ngiongˇ samˊ puˇ xi mogˋ ，don ziinˊ ciinˊ sodˋ eˋ dedˋ 。	他這個媳婦很不錯，對她的公公婆婆細心照顧，真是值得稱讚。
lbk13_053	人講：「三十暗晡打鑼鼓，毋係窮人毋知苦。」共樣係過年，有口人同窮苦人就感覺完全無相同。	nginˇ gongˋ ：「samˊ siib am buˊ daˋ loˇ guˋ ，mˇ he kiungˇ nginˇ mˇ diˊ kuˋ 。」kiung iong he go ngianˇ ，iuˊ heuˋ nginˇ tungˇ kiungˇ kuˋ nginˇ qiu gamˋ gogˋ vanˇ qionˇ moˇ xiongˊ tungˇ 。	「除夕夜富裕人家鑼鼓歡慶，卻不知貧窮人家的苦。」一樣是過年，有錢人家跟窮苦人家的感覺是完全不一樣的。
lbk13_054	你有聽過人講：「三十不窮，四十不富，五十尋子助（尋死路）」無？後生時節係毋煞猛打拚，老吔就有好愁吔哪！	ngˇ iuˊ tangˊ go nginˇ gongˋ ：「samˊ siib budˋ kiungˇ ，xi siib budˋ fu ，ngˋ siib qimˇ ziiˋ cu （qimˇ xiˋ lu）」moˇ ？heu sangˊ siiˇ jiedˋ he mˇ sadˋ mangˊ daˋ bia，loˋ eˇ qiu iuˊ hoˋ seuˇ eˇ naˊ ！	你有聽過人說：「三十不窮，四十不富，五十靠兒子養」嗎？年輕時若不努力打拚，老了就有得愁了！
lbk13_055	這事情蓋急，你就毋好恁呢三心兩意吔，過遽啊決裁。	iaˋ sii qinˇ goi gibˋ ，ngˇ qiu mˇ hoˋ anˋ neˊ samˊ ximˊ liongˋ i eˇ，go giagˋ a giadˋ caiˇ 。	這件事情很急，你就不要再三心兩意了，趕緊做個決定。
lbk13_056	這隻猴哥恁久毋知在該搣麼个頭路，三朝兩日就庰啊屋下，歸日仔毋出門。	iaˋ zagˋ heuˇ goˊ anˋ giuˋ mˇ diˊ teˊ geˋ miedˋ maˋ ge teuˇ lu ，samˊ zeuˊ liongˋ ngidˋ qiu biang a lugˋ kaˊ ，guiˊ ngidˋ eˋ mˇ cudˋ munˇ 。	這個傢伙最近不知道在忙些什麼工作，三天兩頭就躲在家裡，整天不出門。
lbk13_057	阿年牯蓋噩琢，見喚佢做事就三做四毋著，自家來過贏。	aˊ ngianˇ guˋ goi ngogˋ dogˋ ，gian vonˋ iˇ zo sii qiu samˊ zo xi mˇ cog ，qid gaˊ loiˇ go iangˇ 。	阿年很無能，每次叫他做事就常出錯，還是自己做較實在。
lbk13_058	佢這人盡奸，見堵著麼个事情就共快閃箱，盡得人畏。	iˇ iaˋ nginˇ qin gianˊ ，gian duˇ doˋ maˋ ge sii qinˇ qiu kiung kuai samˋ xiongˊ ，qin dedˋ nginˇ vi 。	他這個人很奸詐，每次遇到事情就故意推諉，真討人厭。
lbk13_059	這都若事頭，你恁呢閃石敢著？	iaˋ duˊ ngiaˊ se teuˇ ，ngˇ anˋ neˊ samˋ sag gamˋ cog ？	這都是你的工作，你這樣逃避可以嗎？
lbk13_060	阿明牯盡善辦，見交待佢做个事情，都同佢做啊盡圓滿。	aˊ minˇ guˋ qin san pan ，gian gauˊ dai iˇ zo ge sii qinˇ ，duˊ tungˇ iˇ zo a qin ianˇ manˊ 。	阿明很會做事，每次交待他做的事情，他都做得很圓滿。
lbk13_061	頭擺吾公不時會講：「山腳愛琢，城街愛亍；無琢無亍，會做人腳。」就係講人愛過輒啊出去行尞，開眼界，正會有見識。	teuˇ baiˋ ngaˊ gungˊ budˋ siiˇ voi gongˋ ：「sanˊ giogˋ oi dogˋ ，sangˇ giaiˊ oi cogˋ ；moˇ dogˋ moˇ cogˋ ，voi zo nginˇ giogˋ 。」qiu he gongˋ nginˇ oi go jiab a cudˋ hi hangˇ liau ，koiˊ ngianˋ gie ，nang voi iuˊ gian siidˋ 。	以前我爺爺常說：「山間及城街都要去看看，增加眼界及知識。」就是說人要時常出去走走，開拓視野，才能增廣見聞。
lbk13_062	還細時節，𠊎識食過山豬醢，這下就看毋著、食毋著吔！	hanˇ se siiˇ jiedˋ ，ngaiˇ siidˋ siid go sanˊ zuˊ geˇ ，iaˋ ha qiu kon mˇ doˋ 、siid mˇ doˋ eˇ！	小時候，我曾吃過醃漬的山豬肉，現在這道菜已消失，吃不著了。
lbk13_063	你粗手粗腳，根本都毋係學做裁縫个料，來這仔學師仔正經係「山豬學食糠」，行毋著行吔啦！	ngˇ cuˊ suˋ cuˊ giogˋ ，ginˊ bunˋ duˊ mˇ he hog zo caiˇ fungˇ ge liau ，loiˇ iaˋ eˊ　hog siiˊ eˋ ziin ginˊ he 「sanˊ zuˊ hog siid hongˊ」，hangˇ mˇ cog hongˇ eˇ laˋ！	你很粗枝大葉，根本不是學做裁縫的料，來這裡當學徒真的像是「山豬學吃米糠」，入錯行業了。
lbk13_064	𠊎來這練唱學跳舞還係「山豬食糠——頭一擺」呢！請大家多多指教！	ngaiˇ loiˇ iaˋ lien cong hog tiau vuˋ hanˇ he 「sanˊ zuˊ siid hongˊ ——teuˇ idˋ baiˋ 」neˊ ！qiangˋ tai gaˊ doˊ doˊ ziiˋ gau ！	我到這裡練唱學跳舞如同「山豬吃米糠——第一次」呢！請大家多多指教！
lbk13_065	你等這兜細人仔愛反吔麼？仰若爸一無在屋下，就「山中無老虎，猴哥升大王」吔呀？	ngˇ denˊ iaˋ deuˊ se nginˇ eˋ oi fanˋ eˇ meˇ？ngiongˋ ngiaˊ baˊ idˋ moˇ tiˊ lugˋ kaˊ ，qiu 「sanˊ zungˊ moˇ no fuˋ ，heuˇ goˊ siinˊ tai vongˇ 」eˇ iaˇ？	你們這些小孩要造反了嗎？怎麼你爸爸一不在家，就乘機耀武揚威、逞凶欺人了呢？
lbk13_066	佢靠等厥爸做會長、有口，就不時覡覡勢勢緊翕人，盡得人惱。	iˇ ko nenˋ iaˊ baˊ zo fi zongˋ 、iuˊ hieuˋ ，qiu budˋ siiˇ sang sang seˇ seˇginˋ hibˋ nginˇ ，qin dedˋ nginˇ nauˊ 。	他靠著他爸爸做會長、有錢，就常常盛氣凌人，很討人厭。
lbk13_067	阿元頭看去蓋省儆，毋過佢斯「省食省著，省來賭博；飢飢餓餓，餓來嫖貨」，這人思量毋得！	aˊ ngianˇ teuˇ kon hi goi sangˋ kiang ，mˇ go iˇ siiˇ 「sangˋ siid sangˋ zogˋ ，sangˋ loiˇ duˋ bogˋ ；giˊ giˊ ngo ngo ，ngo loiˇ peuˇ fo 」，iaˋ nginˇ siiˊ liongˇ mˇ dedˋ ！	阿元看起來很節省，不過他卻「省吃儉用，把省下的錢拿去嫖賭」，這種人不值得同情。
lbk13_068	錢財生不帶來，死不帶去，做人愛看開、愛了解。	qienˇ coiˇ sangˊ budˋ dai loiˇ ，xiˋ budˋ dai hi ，zo nginˇ oi kon koiˊ 、oi liauˋ giaiˋ 。	錢財乃身外之物生不帶來，死不帶去，做人要要了解、看開點。
lbk13_069	這個人古古怪怪，正式「生計無，死計有」哦！	iaˋ ge nginˇ guˋ guˋ guai guai ，ziin siidˋ 「sangˊ ge moˇ ，xiˋ ge iuˊ」 oˊ ！	這個人很奇怪，真的是「滿腦子都是害人的壞主意」。
lbk13_070	阿別哥講話無準、做事無底，大家人罵佢「生雞春个就無，屙雞屎个就有」。	aˊ pied goˊ gongˋ fa moˇ zunˋ 、zo sii moˇ daiˋ ，tai gaˊ ngaiˇ ma iˇ 「sangˊ gieˊ cunˊ ge qiu moˇ ，oˊ gieˊ siiˋ ge qiu iuˊ 」。	阿別哥講話沒有信用，做事很隨便，大家罵他「不但沒有幫忙協助，還增添一大堆麻煩」。
lbk13_071	恁久𠊎感冒聲凹凹仔，壞勢哦！	anˋ giuˋ ngaiˇ gamˋ mo sangˊ iabˋ iabˋ eˊ ，faiˋ se oˊ ！	我最近感冒聲音沙啞，不好意思哦！
lbk13_072	頭擺个細妹仔嫁人做心臼愛蓋煞猛，係無分老公離核，會分人罵「生離嫲」。	teuˇ baiˋ ge se moi eˋ ga nginˇ zo ximˊ kiuˊ oi goi sadˋ mangˊ ，he moˇ bunˊ loˋ gungˊ liˇ hedˋ ，voi bunˊ nginˇ ma 「sangˊ liˇ maˇ 」。	以前的女孩結婚後為人媳婦要很勤奮，不然被先生離婚，會被人罵是「離婚的婦人」。
lbk13_073	頭擺个細妹仔嫁吔老公，係分人生離脫別，外家會分人講閒話、看毋起。	teuˇ baiˋ ge se moi eˋ ga eˇ loˋ gungˊ ，he bunˊ nginˇ sangˊ liˇ todˋ pied ，ngoi gaˊ voi bunˊ nginˇ gongˋ hanˇ fa 、kon mˇ hiˋ 。	以前的女孩子結了婚，若被先生離婚，娘家會被人說閒話、看不起。
lbk13_074	這個東西仰毋收起來，這下都生鹵打耐吔，你有看著無？	iaˋ ge dungˊ xiˊ ngiongˋ mˇ suˊ hiˋ loiˇ ，iaˋ ha duˊ sangˊ luˊ daˋ ngai eˇ，ngˇ iuˊ kon doˋ moˇ ？	這個東西怎麼不收起來，現在都生鏽了，你有看到嗎？
lbk13_075	聽講該人分人謀殺核吔，有蓋多人少佢錢，但係無證據，正式係生人對死案。	tangˊ gongˋ ge nginˇ bunˊ nginˇ meuˇ sadˋ hedˋ eˇ，iuˊ goi doˊ nginˇ seuˋ iˇ qienˇ ，danˋ he moˇ ziin giˋ ，ziin siidˋ he sangˊ nginˇ dui xiˋ on 。	聽說那個人被人謀殺了，有很多人欠他的錢，但是沒有證據，真的是無從查證。
lbk13_076	這恁久嗽啊會發脹，口嗹徑蓋痛，講話聲央央仔。	iaˋ anˋ giuˋ cug a voi bodˋ zong ，heuˋ lienˇ gang goi tung ，gongˋ fa sangˊ ong ong eˊ。	最近一直咳嗽，喉嚨很痛，說話時帶有鼻音的現象。
lbk13_077	這個細人仔蓋蠻皮毋讀書，淨分厥姆打个時節，會聲聲句句講：「下二擺毋敢吔！」	iaˋ ge se nginˇ eˋ goi manˇ piˇ mˇ tug suˊ ，qiang bunˊ iaˊ meˊ daˋ ge siiˇ jiedˋ ，voi sangˊ sangˊ gi gi gongˋ ：「ha ngi baiˋ mˇ gamˋ eˇ！」	這個小孩很調皮又不愛讀書，只有被他媽媽修理的時候，會口口聲聲的說：「下次不敢了！」
lbk13_078	佢个口嗹徑發炎，這下講話聲失失仔，蓋毋好聽。	iˇ ge heuˋ lienˇ gang fadˋ iamˇ ，iaˋ ha gongˋ fa sangˊ siidˋ siidˋ eˊ ，goi mˇ hoˋ tangˊ 。	他的喉嚨發炎，現在講話聲音沙啞，很不好聽。
lbk13_079	頭擺人講：「生田死屋」，係有錢情願買田莫去起屋，這定著有道理个。	teuˇ baiˋ nginˇ gongˋ ：「sangˊ tienˇ xiˋ vugˋ 」，he iuˊ qienˇ qinˇ ngian maiˊ tienˇ mog hi hiˋ vugˋ ，iaˋ tin cog iuˊ to liˊ ge 。	以前人說：「買田可以生產獲利，買屋則不能生產」，若有錢寧願買田別蓋房子，這一定有道理的。
lbk13_080	這下景氣毋好，賺錢困難，愛省省吔用錢哦！	iaˋ ha ginˋ hi mˇ hoˋ ，con qienˇ kun nanˇ，oi sangˋ sangˋ eˊ iung qienˇ oˊ！	現在景氣不好，賺錢困難，錢要省著用哦！
lbk13_081	這個人蓋煞猛賺錢，但係分人邀去鬥股，聽講恁久賺个錢全部了核吔，正式「省省儉儉，一下就覂淨淨」。	iaˋ ge nginˇ goi sadˋ mangˊ con qienˇ ，danˋ he bunˊ nginˇ ieuˊ hi deu guˋ ，tangˊ gongˋ anˋ giuˋ con ge qienˇ qionˇ pu liauˋ hedˋ eˇ，ziin siidˋ 「sangˋ sangˋ kiang kiang ，idˋ ha qiu fungˋ qiang qiang 」。	這個人認真工作、努力賺錢，近期被人邀去投資，聽說賺的錢全部虧損掉了，真的是「省吃儉用一輩子，一次就把它全流光」。
lbk13_082	頭擺人生活困難，愛上山倒樵，歸來又愛晒燥、捎樵杈，實在清苦。	teuˇ baiˋ nginˇ senˊ fad kun nanˇ ，oi songˊ sanˊ doˋ ceuˇ ，guiˊ loiˇ iu oi sai zauˊ 、sauˊ ceuˇ ca ，siid cai qinˊ kuˋ 。	以前的人生活困難，要上山砍柴，回家後又要晒木柴、鋸樹枝，實在很辛苦。
lbk13_083	這個人無修養，同人講話盡會誚㸐人。	iaˋ ge nginˇ moˇ xiuˊ iongˊ ，tungˇ nginˇ gongˋ fa qin voi sauˊ nadˋ nginˇ 。	這個人沒修養，跟人講話很會嘲諷人家。
lbk13_084	這個婦人家，從旦裡家娘毋惜，不時對佢誚言㸐語，嶄然才過。	iaˋ ge fu nginˇ gaˊ ，qiungˇ dan liˊ gaˊ ngiongˇ mˇ xiagˋ ， budˋ siiˇ dui iˇsauˊ ngianˇ nadˋ ngiˊ，zamˋ manˇ coiˇ go 。	這個婦人，一直得不到婆婆的疼惜，時常用言語嘲諷她，非常可憐。
lbk13_085	你講話仰恁無修養呢？見動啊著就誚誚㸐㸐對待𠊎呢？	ngˇ gongˋ fa ngiongˋ anˋ moˇ xiuˊ iongˊ no ？gian tungˊ a doˋ qiu sauˊsauˊ nadˋ nadˋ dui tai ngaiˇ noˋ ？	你講話怎麼這麼沒修養呢？動不動就冷言冷語並帶譏諷的對待我呢？
lbk13_086	今晡日無煮飯，暗晡夜想愛𤍒麵條來食，簡單一息。	ginˊ buˊ ngidˋ moˇ zuˋ fan ，am buˊ ia xiongˋ oi sauˇ mien tiauˇ loiˇ siid ，gianˋ danˊ idˋ xidˋ 。	今天沒煮飯，晚上想要簡單一點，汆燙麵條來吃一吃。
lbk13_087	人愛認戇、愛堪身分，細鳥做細竇就好，心肝毋好恁大哪！	nginˇ oi ngin ngong 、oi kamˊ siinˊ fun ，se diauˊ zo se deu qiu hoˋ ，ximˊ gonˊ mˇ hoˋ anˋ tai naˊ ！	人要有自覺、要了解自己的能力，小人物做小事情，野心不要這麼大啦！
lbk13_088	佢做事情蓋細到，故所愛花蓋多時間。	iˇ zo sii qinˇ goi se do ，gu soˋ oi faˊ goi doˊ siiˇ gianˊ 。	他做事情非常要求完美，所以要花很多時間。
lbk13_089	不時聽著伯姆道嘆，這个時代變啊毋像樣吔，「細鬼喝閻王，心臼管家娘」，實在難耐。	budˋ siiˇ tangˊ doˋ bagˋ meˊ to tan ，iaˋ ge siiˇ toi bien a mˇ qiong iong eˇ，「se guiˋ hodˋ iamˇ vongˇ ，ximˊ kiuˊ gonˋ gaˊ ngiongˇ 」，siid cai nanˇ ngai 。	常常聽到伯母嘆息說，這個時代變得不像樣了，「小鬼斥罵閻羅王，媳婦指責婆婆」，實在受不了。
lbk13_090	這扇壁見落雨就漏水，愛共快補起來，正毋會「細空毋肯補，大空就呻苦」，到時節頭路就大門吔。	iaˋ san biagˋ gian log iˋ qiu leu suiˋ ，oi kiung kuai buˋ hiˋ loiˇ ，nang mˇ voi 「se kangˊ mˇ henˋ buˋ ，tai kangˊ qiu cenˊ kuˋ」，do siiˇ jiedˋ teuˇ lu qiu tai munˇ eˇ。	這扇牆壁每逢下雨就滲水，要趕快補起來，才不會「小洞不補，大洞就叫苦」，到時候麻煩就大了。
lbk13_091	頭擺个細妹仔經濟無獨立，不時愛倚恃男仔人，故所就會有「細妹貓性」這個講法。	teuˇ baiˋ ge se moi eˋ ginˊ ji moˇ tug lib ，budˋ siiˇ oi iˋ sii namˇ eˋ nginˇ ，gu soˋ qiu voi iuˊ 「se moi meu xin 」iaˋ ge gongˋ fabˋ 。	以前的女性經濟不夠獨立，時常要依靠男性，所以才會有「女生像貓性格」的說法。
lbk13_092	雖然講：「細妹生來鯽魚嘴，十儕看著九個愛」，但係性體係毋好，愛著吔乜毋得結煞。	suiˊ ianˇ gongˋ ：「se moi sangˊ loiˇ jidˋ ngˇ zoi ，siib saˇ kon doˋ giuˋ ge oi 」，danˋ he xin tiˋ he mˇ hoˋ ，oi doˋ eˇ me mˇ dedˋ gadˋ sadˋ 。	雖然說：「女生生來鯽魚嘴，十個看到九個愛」，但是脾氣如果不好，愛到了也麻煩。
lbk13_093	做任何事情都愛蓋細義，絕對做毋得自自義義。	zo im hoˇ sii qinˇ duˊ oi goi se ngi ，qied dui zo mˇ dedˋ cii cii ngi ngi 。	做任何事情都要很小心，絕對不可以隨隨便便。
lbk13_094	吾姊生著細細仔，看起來像𠊎老妹。	ngaˊ ze sangˊ doˋ se se eˊ ，kon hiˋ loiˇ qiong ngaiˇ loˋ moi 。	我姊姊個子長得小小的，看起來像我妹妹。
lbk13_095	阿秋仔人生著細罔細，講話斯盡大聲！大家都講佢「細細胡椒辣過薑」。	aˊ qiuˊ eˋ nginˇ sangˊ doˋ se mongˋ se ，gongˋ fa siiˇ qin tai sangˊ ！tai gaˊ duˊ gongˋ iˇ 「se se fuˇ zeuˊ lad go giongˊ 」。	阿秋個子長得矮小，但說話很大聲！大家都說她「小胡椒比薑還辣」。
lbk13_096	這擺接著个事頭硬，大家愛過艱耐兜仔。	iaˋ baiˋ jiabˋ doˋ ge sii teuˇ ngang ，tai gaˊ oi go gianˊ ngai deuˊ eˊ 。	這次承接到的工作難度高，大家要忍耐點兒。
lbk13_097	佢做事情蓋細心細義，事情交畀做，你絕對做得放心。	iˇ zo sii qinˇ goi se ximˊ se ngi ，sii qinˇ gauˊ biˋ zo ，ngˇ qied dui zo dedˋ fong ximˊ 。	他做事很細心，事情交給他做，你絕對可以放心。
lbk13_098	每擺歸來食著阿姆煮个菜都會食啊舐舌㘝鼻，真實好食啊講毋得。	miˊ baiˋ guiˊ loiˇ siid doˋ aˊ meˊ zuˋ ge coi duˊ voi siid a seˊ sad liabˋ pi ，ziinˊ siidˋ hoˋ siid a gongˋ mˇ dedˋ 。	每次回來吃到媽媽煮的菜都會吃得伸舌頭舔嘴唇，真的好吃得沒話說。
lbk13_099	佢今晡日轉妹家打扮啊盡靚裝，著等一雙新買个高踭鞋，吂知啊一下車徑著窟仔就舐膣一覆，大家嚇啊毋知愛仰結煞。	iˇ ginˊ buˊ ngidˋ zonˋ moi gaˊ daˋ ban a qin jiangˊ zongˊ ，zogˋ nenˋ idˋ sungˊ xinˊ maiˊ ge goˊ zangˊ haiˇ ，mangˇ diˊ a idˋ haˊ caˊ gang doˋ fudˋ eˋ qiu seˊ ziiˊ idˋ pugˋ ，tai gaˊ hagˋ a mˇ diˊ oi ngiong giadˋ sadˋ 。	他今天回娘家打扮得很時髦，穿著一雙新買的高跟鞋，沒想到一下車絆到窟窿摔個狗吃屎，大家嚇得不知道怎麼辦才好。
lbk13_100	你煮个菜實在好食，大家都食啊舐嘴㘝鼻，毋盼得䟘凳。	ngˇ zuˋ ge coi siid cai hoˋ siid ，tai gaˊ duˊ siid a seˊ zoi liabˋ pi ，mˇ pan dedˋ hong den 。	你煮的菜實在好吃，大家都吃得伸舌頭舔嘴唇，捨不得離開椅子。
lbk13_101	你恁扭皺，今呢出去食頭路怕無人會螔搭。	ngˇ anˋ ngiuˋ jiu，ginˊ ne cudˋ hi siid teuˇ lu pa moˇ nginˇ voi seˇ dabˋ 。	你這麼小氣，以後出去工作可能沒有人會搭理你。
lbk13_102	頭擺，阿婆不時會同𠊎講：「做事情愛認真，洗面愛洗耳角，掃地愛掃㘝角。」	teuˇ baiˋ，aˊ poˇ budˋ siiˇ voi tungˇ ngaiˇ gongˋ：「zo sii qinˇ oi ngin ziinˊ ，seˋ mien oi seˋ ngiˋ gogˋ ，so ti oi so liabˋ gogˋ 。」	以前，奶奶常常會跟我說：「做事情要認真，洗臉要洗耳背，掃地要掃角落。」
lbk13_103	屋下淨這兜洗洗湯湯个事頭就做毋核吔。	lugˋ kaˊ qiang iaˋ deuˊ seˋ seˋ tongˊ tongˊ ge se teuˇ qiu zo mˇ hedˋ eˇ。	家裡光這些清清洗的工作就做不完了。
lbk13_104	佢每暗晡洗身搓㿸愛盡久个時間。	iˇ miˊ am buˊ seˋ siinˊ co man oi qin giuˋ ge siiˇ gianˊ 。	他每天晚上洗澡除垢要花很久的時間。
lbk13_105	𠊎恁久盡無閒，間項个東西堆啊行路毋得，這下正經係蝨多懶爪，詐無看著就算吔。	ngaiˇ anˋ giuˋ qin moˇ hanˇ ，gianˊ hong ge dungˊ xiˊ doiˊ a hangˇ lu mˇ dedˋ ，iaˋ ha ziin ginˊ he sedˋ doˊ nanˊ zauˋ ，za moˇ kon doˋ qiu son eˇ。	我最近很忙，房間裡的東西堆得沒辦法走路，現在真的是蝨子太多懶得抓，假裝沒看到就算了。
lbk13_106	厥倈仔偷人个東西，佢譴啊拳頭擎起來就對厥倈仔面項森一拳。	iaˊ lai eˋ teuˊ nginˇ ge dungˊ xiˊ ，iˇ kienˋ a kianˇ teuˇ ngiaˇ hiˋ loiˇ qiu dui iaˊ lai eˋ mien hong sem idˋ kianˇ 。	他兒子偷人家的東西，他氣得拳頭拿起來就往他兒子臉上一拳揮過去。
lbk13_107	今晡日溫度一下仔降下來，𠊎凍啊𠘆𠘆仔顫。	ginˊ buˊ ngidˋ vunˊ tu idˋ ha eˊ gong haˊ loiˇ ，ngaiˇ dung a sem sem eˊ zunˊ 。	今天溫度一下子降了下來，害我凍得一直發抖。
lbk13_108	今晡日恁寒人，佢正著著一領衫出門，故所凍啊𠘆𠘆顫。	ginˊ buˊ ngidˋ anˋ honˇ nginˇ ，iˇ nang zogˋ doˋ idˋ liangˊ samˊ cudˋ munˇ ，gu soˋ dung a sem sem zunˊ 。	今天很冷，他才穿一件衣服就出門，所以凍得直發抖。
lbk13_109	𠊎今晡日無閒啊連狌碗飯都毋得。	ngaiˇ ginˊ buˊ ngidˋ moˇ hanˇ a lienˇ sem vonˋ fan duˊ mˇ dedˋ 。	我今天忙到連吃一碗飯的時間都沒有。
lbk13_110	等下愛敬天公，牲體豬羊準備好勢吔無？	denˋ ha oi gin tienˊ gungˊ ，senˊ tiˋ zuˊ iongˇ zunˋ pi hoˋ se eˇ moˇ ？	待會要祭拜玉皇大帝，祭祀牲醴準備好了嗎？
lbk13_111	佢頭到餵狗仔無注意，嗄分狗仔狌一口，實在冤枉。	iˇ teuˇ do vi gieuˋ eˋ moˇ zu i ，sa bunˊ gieuˋ eˋ senˇ idˋ heuˋ ，siid cai ianˊ vongˋ 。	他剛剛餵狗時沒注意，被狗咬一口，實在很冤枉。
lbk13_112	𠊎毋罅高，拜託你同該窗仔門鞘落去，好無？	ngaiˇ mˇ la goˊ ，bai togˋ ngˇ tungˇ ge cungˊ eˋ munˇ seu log hi ，hoˋ moˇ ？	我長的不夠高，拜託你將窗戶套進去，好嗎？
lbk13_113	這店員盡得人惜，見看著人客來就笑哱哱仔。	iaˋ diam ianˇ qin dedˋ nginˇ xiagˋ，gian kon doˋ nginˇ hagˋ loiˇ qiu seu pudˋ pudˋ eˊ。	這店員很可愛，每次看見客人來就笑容可掬。
lbk13_114	阿福伯見堵著鄰舍就會笑笑仔同人相借問，故所人緣盡好。	aˊ fugˋ bagˋ gian duˇ doˋ linˇ sa qiu voi seu seu eˊ tungˇ nginˇ xiongˊ jia mun ，gu soˋ nginˇ ianˇ qin hoˋ 。	阿福伯每次看見鄰居就會面帶笑容的跟人打招呼，所以人緣很好。
lbk13_115	人講：「笑髒笑破不笑補，笑懶笑豺不笑苦。」堵著窮苦人乜愛同佢尊重，毋好看毋起人。	nginˇ gongˋ ：「seu zongˊ seu po budˋ seu buˋ ，seu lanˊ seu saiˇ budˋ seu kuˋ 。」duˇ doˋ kiungˇ kuˋ nginˇ me oi tungˇ iˇ zunˊ cung ，mˇ hoˋ kon mˇ hiˋ nginˇ 。	俗話說：「不要輕視貧窮的人，懶惰、奸詐才是可恥的。」遇到貧窮的人也要對他尊重，不能輕視他人。
lbk13_116	你過得兜啊哩哪！莫緊在人背後燒壞話。	ngˇ go dedˋ deuˊ a leˊ naˊ ！mog ginˋ teˊ nginˇ boi heu seuˊ faiˋ fa 。	你差不多一點哦！別在背後說人壞話。
lbk13_117	佢不時去廟項燒香點燭，求觀音佛祖保佑厥一家大細平安順序。	iˇ budˋ siiˇ hi meu hong seuˊ hiongˊ diamˋ zugˋ ，kiuˇ gonˊ imˊ fud zuˋ boˋ iu iaˊ idˋ gaˊ tai se pinˇ onˊ sun xi 。	他常去廟裡燒香拜拜，求觀音佛祖保佑他一家大小平安順利。
lbk13_118	這灶下燒炣炣仔，你等細人仔出去尞，莫緊入來。	iaˋ zo haˊ seuˊ hoˇ hoˇ eˊ ，ngˇ denˊ se nginˇ eˋ cudˋ hi liau ，mog ginˋ ngib loiˇ 。	這廚房很熱、溫度很高，你們小孩子去外面玩，別一直進來。
lbk13_119	這菜還息把燒燒仔，你愛煖過來食無？	iaˋ coi hanˇ xidˋ baˋ seuˊ seuˊ eˊ ，ngˇ oi nonˊ go loiˇ siid moˇ ？	這菜還稍微燙，你要加熱再吃嗎？
lbk13_120	這恁久个天時燒燒冷冷，出門盡壞著衫褲。	iaˋ anˋ giuˋ ge tienˊ siiˇ seuˊ seuˊ langˊ langˊ ，cudˋ munˇ qin faiˋ zogˋ samˊ fu 。	最近的天氣忽冷忽熱，出門很難穿衣服。
lbk13_121	寒人時節，手落仔戴等、著過賁兜仔个襪，手腳就會燒燒暖暖，恁呢就毋驚佢吔。	honˇ nginˇ siiˇ jiedˋ ，suˋ labˋ eˋ dai nenˋ 、zogˋ go punˊ deuˊ eˊ ge madˋ，suˋ giogˋ qiu voi seuˊ seuˊ nonˊ nonˊ ，anˋ neˊ qiu mˇ giangˊ iˇ eˇ。	寒冷的時候，戴著手套、穿厚一點的襪子，手腳就會溫暖，這樣就不怕冷了。
lbk13_122	這都燒手熝腳个事頭，你仰敢應呢？	iaˋ duˊ seuˊ suˋ lug giogˋ ge se teuˇ ，ngˇ ngiongˋ gamˋ inˊ noˋ ？	這都是操作棘手的工作，你怎麼敢接呢？
lbk13_123	人係做善事，無一定係求消災解厄，自家心肚仔快樂過重要。	nginˇ he zo san sii ，moˇ idˋ tin he kiuˇ seuˊ zaiˊ giaiˋ agˋ，qid gaˊ ximˊ duˋ eˊ kuai log go cung ieu 。	人做好事，不一定是求消災禍解厄，自己心靈上的喜悅比較重要。
lbk13_124	你屋下恁有口，哪愛使愁食愁著呢？	ngˇ lugˋ kaˊ anˋ iuˊ heuˋ ，nai oi siiˋ seuˇ siid seuˇ zogˋ noˋ ？	你家這麼有錢，哪會憂慮生活所需呢？
lbk13_125	美濃人不時會講：「小學小不孝，大學大不孝」，有倈仔讀啊恁高毋使忒暢，等佢出業、出國毋歸來時，正有好愁哪！	miˇ nungˇ nginˇ budˋ siiˇ voi gongˋ ：「seuˋ hog seuˋ budˋ hau ，tai hog tai budˋ hau 」，iuˊ lai eˋ tug a anˋ goˊ mˇ siiˋ tedˋ tiong ，denˋ iˇ cudˋ ngiab 、cudˋ guedˋ mˇ guiˊ loiˇ siiˇ ，nang iuˊ hoˋ seuˇ naˊ ！	美濃人常說：「小學小不孝，大學大不孝」，有高學歷的兒子不必太高興，等他畢業、出國都不回家時，才有得擔心哦！
lbk13_126	今錢佇啊銀行，利息少少仔，同頭擺差盡多吔。	ginˊ qienˇ duˋ a ngiunˇ hongˇ，li xidˋ seuˋ seuˋ eˊ ，tungˇ teuˇ baiˋ caˊ qin doˊ eˇ。	現在錢存在銀行，利息不多，跟以前比起來差很多了。
lbk13_127	佢等屋下一有口你知無？屎朏變嘴一生人都食毋核呢！	iˇ denˊ lugˋ kaˊ idˋ iuˊ heuˋ ngˇ diˊ moˇ ？sii fudˋ bien zoi idˋ senˊ nginˇ duˊ siid mˇ hedˋ neˊ ！	他們家多富有你知道嗎？家境豐裕一輩子都不虞匱乏呢！
lbk13_128	你這個細人仔蓋好命，毋使做麼个就有好食，正式係屎朏坐著米盎仔。	ngˇ iaˋ ge se nginˇ eˋ goi hoˋ miang ，mˇ siiˋ zo maˋ ge qiu iuˊ hoˋ siid ，ziin siidˋ he sii fudˋ coˊ doˋ miˋ angˊ eˋ 。	你這個小孩命很好，不用做什麼工作就有得吃，真的是生在富貴之家，一生不愁吃穿。
lbk13_129	若屎窟壢恁大，蓋像有福之人呢！	ngiaˊ sii fudˋ lagˋ anˋ tai ，goi qiong iuˊ fugˋ ziiˊ nginˇ neˊ ！	你的屁股溝很大，像是有福氣的人呢！
lbk13_130	人講「事久見人心」，𠊎認識你三十年吔，今晡日正知你个心肝無麼正哦！	nginˇ gongˋ 「sii giuˋ gian nginˇ ximˊ 」，ngaiˇ ngin siidˋ ngˇ samˊ siib ngianˇ eˇ，ginˊ buˊ ngidˋ nang diˊ ngˇ ge ximˊ gonˊ moˇ maˋ zang oˊ ！	俗話說：「日子久了就可以看清人心」，我認識你三十年了，今天才知道你的心術不是很正哦！
lbk13_131	「事怕講出，酒怕斟出」，你講話愛過小心兜仔，毋好麼个事情都講揫出來。	「sii pa gongˋ cudˋ ，jiuˋ pa ziimˊ cudˋ 」，ngˇ gongˋ fa oi go seuˋ ximˊ deuˊ eˊ ，mˇ hoˋ maˋ ge sii qinˇ duˊ gongˋ qiuˊ cudˋ loiˇ 。	「事怕講出，酒怕滿出」，你講話要小心點，不要什麼事情都說出來。
lbk13_132	這個社會恁亂，是是非非蓋多哦！	iaˋ ge sa fi anˋ lon ，sii sii fiˊ fiˊ goi doˊ oˊ ！	這個社會很亂，很多是非分辨不清哦！
lbk13_133	美濃人從旦裡來，做麼个事情都會世世代代看上又看下。	miˇ nungˇ nginˇ qiungˇ dan liˊ loiˇ ，zo maˋ ge sii qinˇ duˊ voi sii sii toi toi kon songˊ iu kon haˊ 。	美濃人一直以來，做事情都會累世累代前後對照。
lbk13_134	「世上一人愁一項，天下無人愁共樣。」這句話係講，做人本成就有蓋多好愁个啊！	「sii song idˋ nginˇ seuˇ idˋ hong ，tienˊ ha moˇ nginˇ seuˇ kiung iong 。」iaˋ gi fa he gongˋ ，zo nginˇ bunˋ sangˇ qiu iuˊ goi doˊ hoˋ seuˇ ge aˇ！	「家家有本難念的經，每個人憂愁的都不一樣。」這句話是說，做人本來就有很多煩惱啊！
lbk13_135	老古人講：「世上無人騙，牛馬無人變」，表示這世上一哪仔都蓋多會騙人个。	loˋ guˋ nginˇ gongˋ ：「sii song moˇ nginˇ pien ，ngiuˇ maˊ moˇ nginˇ bien 」，beuˋ sii iaˋ sii song idˋ naiˋ eˋ duˊ goi doˊ voi pien nginˇ ge 。	古人說：「世上不乏說謊的人，否則就不會輪迴變牛變馬。」表示在這世界上到處都有騙子。
lbk13_136	這下田坵還蓋多人蒔禾仔，但係「蒔田挲草」這事頭在農村已經看毋著吔。	iaˋ ha tienˇ kiuˊ hanˇ goi doˊ nginˇ sii voˇ eˋ， danˋ he 「sii tienˇ soˊ coˋ 」iaˋ se teuˇ teˊ nungˇ cunˊ iˋ ginˊ kon mˇ doˋ eˇ。	現在田裡還有很多人種稻，但是「插秧、除草」這工作在農村已經很難得一見了。
lbk13_137	這個人毋知人惱惜，也思量毋得，東西準備便便嗄毋曉得好好用。	iaˋ ge nginˇ mˇ diˊ nginˇ nauˊ xiagˋ ，iaˊ siiˊ liongˇ mˇ dedˋ ，dungˊ xiˊ zunˋ pi pien pien sa mˇ hiauˋ dedˋ hoˋ hoˋ iung 。	這個人不知人們對他的評價，東西幫他準備妥當卻不懂得好好運用，不值得同情。
lbk13_138	細人仔係去外地食頭路，做阿姆个每日都會思思念念。	se nginˇ eˋ he hi ngoi ti siid teuˇ lu ，zo aˊ meˊ ge miˊ ngidˋ duˊ voi siiˊ siiˊ ngiam ngiam 。	孩子若到外地工作，媽媽每天都會非常想念孩子。
lbk13_139	每一個人都有好壞運，時來運轉吔定著會出頭个。	miˊ idˋ ge nginˇ duˊ iuˊ hoˋ faiˋ iun ，siiˇ loiˇ iun zonˋ eˇ tin cog voi cudˋ teuˇ ge 。	每個人的命運都有好與壞，好運來臨了定能出人頭地的。
lbk13_140	恁久這家人不時出事情，怕時衰運限呢。	anˋ giuˋ iaˋ gaˊ nginˇ budˋ siiˇ cudˋ sii qinˇ ，pa siiˇ soiˊ iun han neˊ。	最近這戶人家時常發生事情，可能運勢不好。
lbk13_141	你做麼个事情都無計畫，等到屎出正來打糞缸，正式係壞樣式。	ngˇ zo maˋ ge sii qinˇ duˊ moˇ gie vag ，denˋ do siiˋ cudˋ ngiang loiˇ daˋ bun gongˊ ，ziin siidˋ he faiˋ iong siidˋ 。	你做事都沒有事先計畫，臨時才來抱佛腳，真的很糟糕。
lbk13_142	隔壁个阿三哥正式屎蟲逩𣛮，一哪仔都去摝人。	gagˋ biagˋ ge aˊ samˊ goˊ ziin siidˋ siiˋ cungˇ bun cang ，idˋ naiˋ eˋ duˊ hi lugˋ nginˇ 。	隔壁的阿三哥專做壞事，到處去叨擾人家。
lbk13_143	今下个細人仔麼个東西都有好食，做得講係「屎多狗飽」，餐餐食飯愛求佢等食囉！	ginˊ ha ge se nginˇ eˋ maˋ ge dungˊ xiˊ duˊ iuˊ hoˋ siid ，zo dedˋ gongˋ he 「siiˋ doˊ gieuˋ bauˋ 」，conˊ conˊ siid fan oi kiuˇ iˇ denˊ siid loˊ！	現在小孩的生活食品應有盡有，可以說是「東西過多無人理睬」，每餐吃飯都要拜託他們吃呢！
lbk13_144	頭擺人講：「屎缸匾做得做佛殿」，這個意思係講每一個人毋好看輕自己，煞猛就會有出頭天个日仔。	teuˇ baiˋ nginˇ gongˋ ：「siiˋ gongˊ bienˋ zo dedˋ zo fud tien 」，iaˋ ge i sii he gongˋ miˊ idˋ ge nginˇ mˇ hoˋ kon kiangˊ cii giˋ ，sadˋ mangˊ qiu voi iuˊ cudˋ teuˇ tienˊ ge ngidˋ eˋ 。	以前的人說：「英雄不怕出身低」，這個意思是說每個人不要看輕自己，好好努力會有成功的一天。
lbk13_145	你毋好恁翕人哦！係無屎缸狗會咬死人。	ngˇ mˇ hoˋ anˋ hibˋ nginˇ oˊ ！he moˇ siiˋ gongˊ gieuˋ voi ngauˊ xiˋ nginˇ 。	你不要太欺人哦！不然狗急跳牆會咬死人的。
lbk13_146	這個人毋做人，專門用壞手段，使梟度做事，蓋得人恨。	iaˋ ge nginˇ mˇ zo nginˇ ，zonˊ munˇ iung faiˋ suˋ ton ，siiˋ hieuˊ tu zo sii ，goi dedˋ nginˇ hen 。	這個人不好好做人，專門使出壞手段、詐術做事，讓人覺得可恨。
lbk13_147	你做人愛過差毋多兜仔，毋好做一個屎毋知臭个人。	ngˇ zo nginˇ oi go caˊ mˇ doˊ deuˊ eˊ ，mˇ hoˋ zo idˋ ge siiˋ mˇ diˊ cu ge nginˇ 。	你為人不要太過份，不要做一個不知進退的人。
lbk13_148	為著天光日个評鑑，大家都無閒到九點零，你這個做頭家个人仰無準備便當、點心分大家食呢？正式係「駛牛就會，放稈就毋會」，難耐喲！	vi doˋ tienˊ gongˊ ngidˋ ge pinˇ gam，tai gaˊ duˊ moˇ hanˇ do giuˋ diamˋ langˇ ，ngˇ iaˋ ge zo teuˇ gaˊ ge nginˇ ngiongˋ moˇ zunˋ pi pien dongˊ 、diamˋ ximˊ bunˊ tai gaˊ siid noˋ ？ziin siidˋ he 「siiˋ ngiuˇ qiu voi ，biong gonˋ qiu mˇ voi 」，nanˇ ngai ioˊ！	為了明天的評鑑，大家都忙到九點多，你這個當老闆的怎麼沒有準備便當、點心給大家吃呢？真的是「只會使喚人，卻不懂得慰勞」，真讓人受不了！
lbk13_149	頭擺，耕田人都知「駛牛放稈」个道理。	teuˇ baiˋ ，gangˊ tienˇ nginˇ duˊ diˊ 「siiˋ ngiuˇ biong gonˋ 」ge to liˊ 。	以前，農人都知道「讓牛隻工作之前，應先餵食」的道理。
lbk13_150	面對經理个刁難，𠊎就會愐著頭擺阿爸講个該句話：「十八灘頭任你走，時衰運限正來尋」，今下等𠊎做頭家吔，你就知死吔！	mien dui ginˊ liˊ ge diauˊ nanˇ ，ngaiˇ qiu voi menˋ doˋ teuˇ baiˋ aˊ baˊ gongˋ ge ge gi fa ：「siib badˋ tanˊ teuˇ im ngˇ zeuˋ ，siiˇ soiˊ iun han nang loiˇ qimˇ 」，ginˊ ha denˋ ngaiˇ zo teuˇ gaˊ eˇ，ngˇ qiu diˊ xiˋ eˇ！	面對經理的刁難，我就會想到以前爸爸說的那句話：「君子報仇三年不晚，要等待良機，謀定而動」，以後等我當老闆，你就有得瞧！
lbk13_151	你無聽人講過：「十賭九輸」吓？還敢跈人去賭博。	ngˇ moˇ tangˊ nginˇ gongˋ go ：「siib duˋ giuˋ suˊ」haˋ ？hanˇ gamˋ tenˇ nginˇ hi duˋ bogˋ 。	你沒聽人家說過：「十賭九輸」嗎？還敢跟著人家去賭博。
lbk13_152	頭擺阿婆會講：「十苦九補」，故所，佢會拐𠊎等多食苦瓜仔、假烏子這兜帶有息把仔苦味个菜。	teuˇ baiˋ aˊ poˇ voi gongˋ ：「siib fuˋ giuˋ buˋ」，gu soˋ ，iˇ voi guaiˋ ngaiˇ nenˊ doˊ siid fuˋ guaˊ eˋ 、gaˋ vuˊ ziiˋ iaˋ deuˊ dai iuˊ xidˋ baˋ eˇ fuˋ mi ge coi 。	以前奶奶會說：「十苦九補」，所以，她會哄我們多吃苦瓜、龍葵這些帶有一點苦味的菜。
lbk13_153	人講：「十個地理九個破，一個毋破都毋做」，故所，地理先生个話聽得一分仔就好。	nginˇ gongˋ ：「siib ge ti liˊ giuˋ ge po ，idˋ ge mˇ po duˊ mˇ zo 」，gu soˋ ，ti liˊ xinˊ sangˊ ge fa tangˊ dedˋ idˋ funˊ eˊ qiu hoˋ 。	俗話說：「十個地理九個破，一個不破就不做」，所以，地理師的話聽一分就好。
lbk13_154	頭擺人會講，師傅教徒弟定著係「十步留一步，免得徒弟打師父」，故所，自家還係愛用心研究正會成長。	teuˇ baiˋ nginˇ voi gongˋ ，siiˊ fu gau tuˇ ti tin cog he 「siib pu liuˇ idˋ pu ，mienˊ dedˋ tuˇ ti daˋ siiˊ fu 」，gu soˋ ，qid gaˊ hanˇ he oi iung ximˊ ngianˊ giu nang voi siinˇ zongˋ 。	以前的人會說，師傅教徒弟一定是「十步留一步，免得徒弟打師父」，所以，自己還是要用心研究才會有成長。
lbk13_155	這枋貨差毋多十頭八日就會到。	iaˋ biongˊ fo caˊ mˇ doˊ siib teuˇ badˋ ngidˋ qiu voi do 。	這批貨大約八天、十天之內就會到。
lbk13_156	你搞水搞啊一身溼溚溚仔，等項定著會分阿姆罵。	ngˇ gauˋ suiˋ gauˋ a idˋ siinˊ siibˋ dab dab eˊ ，denˋ hong tin cog voi bunˊ aˊ meˊ ma 。	你玩水玩得全身溼溚溚的，等會兒一定會被媽媽罵。
lbk13_157	恁久个雨浙浙濟濟落無停，衫褲硬晾都摸起來溼溼仔。	anˋ giuˋ ge iˋ zabˋ zabˋ ze ze log moˇ tinˇ ，samˊ fu ang longˇ duˊ miaˊ hiˋ loiˇ siibˋ siibˋ eˊ 。	最近的雨下個不停，衣服怎麼晾都摸起來溼溼的。
lbk13_158	阿明牯一等會食，喚佢做事就尋蓋多理由，大家就會㖸佢講：「食啊恁多，頭腦本樣全全骨」。	aˊ minˇ guˋ idˋ denˋ voi siid ，vonˋ iˇ zo sii qiu qimˇ goi doˊ liˊ iuˇ ，tai gaˊ qiu voi nagˋ iˇ gongˋ ：「siid a anˋ doˊ ，teuˇ noˋ bunˋ iong qionˇ qionˇ gudˋ 」。	阿明很會吃，要他做事就找很多理由，大家就會笑他說：「吃這麼多，頭上也不會多長一點肉」。
lbk13_159	該人每日毋做事，一哪仔打彳亍，盡像食飽等死樣仔。	ge nginˇ miˊ ngidˋ mˇ zo sii ，idˋ naiˋ eˋ daˋ qidˋ cogˋ ，qin qiong siid bauˋ denˋ xiˋ iong eˊ 。	那個人每天不做事，到處閒晃，很像吃飽等死一樣。
lbk13_160	你毋好恁好事，將把他人个事情來管，自家食飽著燒求壽年就好吔。	ngˇ mˇ hoˋ anˋ hau sii，jiongˊ baˋ taˊ nginˇ ge sii qinˇ loiˇ gonˋ ，qid gaˊ siid bauˋ zogˋ seuˊ kiuˇ su ngianˇ qiu hoˋ eˇ。	你不要那麼愛管閒事，老是管別人的事情，自己吃飽穿暖祈求能夠平安終老就好了。
lbk13_161	頭擺阿公會講：「食茶愛講，食酒愛傍，係人生一大享受。」	teuˇ baiˋ aˊ gungˊ voi gongˋ ：「siid caˇ oi gongˋ ，siid jiuˋ oi bongˋ ，he nginˇ senˊ idˋ tai hiongˋ su 。」	以前爺爺會說：「喝茶聊天，喝酒配菜，是人生一大享受。」
lbk13_162	你恁久行壞運嘎嗎！「食茶食著水，交人交著鬼」，實在衰喲！	ngˇ anˋ giuˋ hangˇ faiˋ iun gaˋ ma！「siid caˇ siid doˋ suiˋ ，gauˊ nginˇ gauˊ doˋ guiˋ 」，siid cai soiˊ ioˊ！	你最近可能是走霉運！「喝茶喝到水，交朋友交到不老實的」，實在倒楣喲！
lbk13_163	人講：「食到六十六，學毋足」，故所，做人定著愛謙虛、多學習，毋好蓋會著仔樣。	nginˇ gongˋ ：「siid do liugˋ siib liugˋ ，hog mˇ jiugˋ 」，gu soˋ ，zo nginˇ tin cog oi kiamˊ hiˊ 、doˊ hog xib ，mˇ hoˋ goi voi doˋ eˊ iong 。	俗話說：「活到六十六，還是學不夠」，所以，做人一定要謙虛、多學習，不要一副自以為是的樣子。
lbk13_164	頭擺，細人仔係毋精鳥，就會分大人儕罵講：「食都知，頓都知，麼个都毋知」。	teuˇ baiˋ ，se nginˇ eˋ he mˇ jinˊ diauˊ ，qiu voi bunˊ tai nginˇ saˇ ma gongˋ ：「siid tu diˊ ，dunˋ tu diˊ ，maˋ ge duˊ mˇ diˊ 」。	以前，小孩子如果不夠機靈，就會被長輩罵說：「只知道吃，什麼都不會做」。
lbk13_165	你這隻猴哥，撿你食啊恁大，無賺錢歸來還不在，又還同屋下个東西爪淨淨，斷真係「食吔稈草，挷壞傢伙」。	ngˇ iaˋ zagˋ heuˇ goˊ ，giamˋ ngˇ siid a anˋ tai ，moˇ con qienˇ guiˊ loiˇ hanˇ budˋ cai ，iu hanˇ tungˇ lugˋ kaˊ ge dungˊ xiˊ iauˋ qiang qiang ，don ziinˊ he 「siid eˇ gonˋ coˋ ，bangˊ faiˋ gaˊ foˋ 」。	你這傢伙，把你養到這麼大，沒賺錢回來不打緊，還將家裡的東西拿光，真的是「我給你好處，你卻只給我帶來傷害」。
lbk13_166	大伯蓋齧察又膦毛，大家都講佢這種人係「食吔他人穀，淨生自家个春」。	tai bagˋ goi ngadˋ cadˋ iu linˋ moˊ ，tai gaˊ duˊ gongˋ iˇ iaˋ zungˋ nginˇ he 「siid eˇ taˊ nginˇ gugˋ ，qiang sangˊ qid gaˊ ge cunˊ 」。	大伯父很吝嗇又小氣，大家都說他這種人是「專吃別人家的穀子，下自己家的蛋」。
lbk13_167	頭擺農家人生活清苦，蓋驚米穀消毛忒遽，傍鹹魚仔會食蓋多飯，故所阿公登常會講：「食飯傍豬肉會買田，傍鹹魚仔會賣田。」	teuˇ baiˋ nungˇ gaˊ nginˇ senˊ fad qinˊ kuˋ ，goi giangˊ miˋ gugˋ seuˊ moˊ tedˋ giagˋ ，bongˋ hamˇ ngˇ eˋ voi siid goi doˊ fan ，gu soˋ aˊ gungˊ denˊ songˇ voi gongˋ ：「siid fan bongˋ zuˊ ngiugˋ voi maiˊ tienˇ ，bongˋ hamˇ ngˇ eˋ voi mai tienˇ 。」	以前農人生活很辛苦，很擔心米飯消耗太快，配鹹魚會吃很多飯，所以爺爺常常會說：「吃飯配豬肉會有能力買田，配鹹魚將來會賣田。」
lbk13_168	這人好食懶做，正經係人講个：「食飯打赤膊，做事尋衫著」，蓋無面皮！	iaˋ nginˇ hau siid lanˊ zo ，ziin ginˊ he nginˇ gongˋ ge ：「siid fan daˋ cagˋ bogˋ ，zo se qimˇ samˊ zogˋ 」，goi moˇ mien piˇ ！	這個人好吃懶做，真的如人所說：「好吃懶做的人，就會找藉口偷懶」，真是厚臉皮。
lbk13_169	這兜猴哥毋像人，食飯一張桌，做事無半隻腳，今下莫撿佢等㘔吔！	iaˋ deuˊ heuˇ goˊ mˇ qiong nginˇ，siid fan idˋ zongˊ zogˋ，zo se moˇ ban zagˋ giogˋ ，ginˊ ha mog giamˋ iˇ denˊ saiˊ eˇ！	這些傢伙真不像話，吃飯時滿滿一桌人，做事時見不到半隻腳，今後不要再給他們吃了！
lbk13_170	佢斷真膦棍，食飯愛揹大碗公，做事毋會三兩重。	iˇ don ziinˊ linˋ gun ，siid fan oi bi tai vonˋ gungˊ ，zo se mˇ voi samˊ liongˋ cungˊ 。	他真的很下三濫，是個好吃懶做的人。
lbk13_171	人講：「食該家个飯，愛念該家个經。」拿人好處，就愛同人講好話。	nginˇ gongˋ ：「siid ge gaˊ ge fan ，oi ngiam ge gaˊ ge ginˊ 。」naˊ nginˇ hoˋ cuˋ ，qiu oi tungˇ nginˇ gongˋ hoˋ fa 。	俗話說：「吃那家飯，便念那家經。」拿人好處，就要幫人說好話。
lbk13_172	佢斯「食慣嘴，屌慣膣」吔个人，你今喚佢恁省，佢敢堪得？	iˇ siiˇ 「siid guan zoi ，diauˋ guan ziiˊ 」eˇ ge nginˇ ，ngˇ ginˊ vonˋ iˇ anˋ sangˋ ，iˇ gamˋ kamˊ dedˋ ？	他可是「生活奢侈習慣了，不能吃苦」的人，你現在叫他省著點，他受得了嗎？
lbk13_173	人講：「食了人半碗，就愛分人喚。」你既然領吔厥錢，就只好聽人使喚吔！	nginˇ gongˋ ：「siid liauˋ nginˇ ban vonˋ ，qiu oi bunˊ nginˇ vonˋ 。」ngˇ gi ianˇ liangˊ eˇ iaˊ qienˇ ，qiu ziiˋ hoˋ tangˊ nginˇ siiˋ fon eˇ！	俗話說：「吃了人家半碗東西，就得聽命於人。」你既然領了他的錢，就只好聽他使喚了！
lbk13_174	莫想講你屋下恁有口，愛知得「食毋窮，使毋窮，無畫無算一世窮」，你係毋曉得打算，毋使一久，金山銀山都會消蝕淨喔！	mog xiongˋ gongˋ ngˇ lugˋ kaˊ anˋ iuˊ heuˋ ，oi diˊ dedˋ 「siid mˇ kiungˇ ，siiˋ mˇ kiungˇ ，moˇ vag moˇ son idˋ sii kiungˇ 」，ngˇ he mˇ hiauˋ dedˋ daˋ son ，mˇ siiˋ idˋ giuˋ ，gimˊ sanˊ ngiunˇ sanˊ duˊ voi seuˊ sad qiang oˊ！	別想說你家裡有錢，要知道「吃不窮，用不窮，沒做好規劃一輩子窮」，你若不懂得規劃，不用多久，金山銀山就坐吃山空了！
lbk13_175	人講：「食毋窮，著毋窮，打算毋著一世窮。」自家無目標、無規劃，人生就會變烏白个喲！	nginˇ gongˋ ：「siid mˇ kiungˇ ，zogˋ mˇ kiungˇ ，daˋ son mˇ cog idˋ sii kiungˇ 。」qid gaˊ moˇ mugˋ peuˊ 、moˇ guiˊ vag ，nginˇ senˊ qiu voi bien vuˊ pag ge ioˊ！	俗話說：「吃不窮，穿不窮，計畫錯誤一輩子窮。」自己若沒目標、沒周全的計畫，人生會變成黑白的（沒希望）哦！
lbk13_176	佢這阿舍公子盡好命，食米毋知米貴喲！	iˇ iaˋ aˊ sa gungˊ ziiˋ qin hoˋ miang ，siid miˋ mˇ diˊ miˋ gui ioˊ！	這紈褲子弟實在好命，飯吃了一輩子卻不知米價哦！
lbk13_177	你正來上班無幾多日就想愛坐橫桌，正經係「食無三日齋，就想愛上西天」！	ngˇ nang loiˇ songˊ banˊ moˇ idˋ doˊ ngidˋ qiu xiongˋ oi coˊ vangˇ zogˋ ，ziin ginˊ he 「siid moˇ samˊ ngidˋ zaiˊ ，qiu xiongˋ oi songˊ xiˊ tienˊ 」！	你才來上班沒幾天就想要坐大位，真的是「吃素不到三天，便想上西天」！
lbk13_178	阿梅平常時三餐有食就好吔，無想愛食零嗒，驚啊忒肥。	aˊ moiˇ pinˇ songˇ siiˇ samˊ conˊ iuˊ siid qiu hoˋ eˇ，moˇ xiongˋ oi siid nangˇ dab ，giangˊ a tedˋ piˇ 。	阿梅平時三餐有得吃就滿足了，不想吃零食，因怕太胖。
lbk13_179	做人愛知感恩，「食人半斤，還人八兩」个道理愛知得。	zo nginˇ oi diˊ gamˋ enˊ ，「siid nginˇ ban ginˊ ，vanˇ nginˇ badˋ liongˊ 」ge to liˊ oi diˊ dedˋ 。	做人要知恩圖報，「受人多少恩惠最少應等量回報」的道理要了解。
lbk13_180	應著這正式毋係頭路，「食人飯，做鬼事」，實在還清苦。	inˊ doˋ iaˋ ziin siidˋ mˇ he teuˇ lu ，「siid nginˇ fan ，zo guiˋ se 」，siid cai hanˇ qinˊ kuˋ 。	承接到什麼工作，「吃的是人的飯，卻做鬼應做的差事」，實在很辛苦。
lbk13_181	佢食人个食到汗出，分人食就流目汁，實在毋知見笑！	iˇ siid nginˇ ge siid do hon cudˋ ，bunˊ nginˇ siid qiu liuˇ mugˋ ziibˋ ，siid cai mˇ diˊ gian seu ！	他吃別人的東西吃到滿頭大汗，給人吃卻心痛得流淚，實在不知羞恥！
lbk13_182	佢生成恁呢食軟毋食硬，將來毋會有出息啦！	iˇ sangˊ sangˇ anˋ neˊ siid ngionˊ mˇ siid ngang ，jiongˊ loiˇ mˇ voi iuˊ cudˋ xidˋ laˋ！	他天生就是吃軟不吃硬，將來不會有出息的啦！
lbk13_183	佢這擺投資了核幾下百萬，恁久愁啊食睡毋得。	iˇ iaˋ baiˋ teuˇ ziiˊ liauˋ hedˋ giˋ haˊ bagˋ van ，anˋ giuˋ seuˇ a siid soi mˇ dedˋ 。	他這次投資損失了好幾百萬，最近擔心到寢食難安。
lbk13_184	人講：「食上食下食著自家，食來食去食到無味。」大家莫去貪人、批人，身心自然健操。	nginˇ gongˋ ：「siid songˊ siid haˊ siid doˋ qid gaˊ ，siid loiˇ siid hi siid do moˇ mi 。」tai gaˊ mog hi tamˊ nginˇ 、piˊ nginˇ ，siinˊ ximˊ cii ianˇ kian cau 。	俗話說：「吃上吃下，吃到自家；吃來吃去，吃到無味。」大家別去貪求、佔人便宜，身體自然會健康。
lbk13_185	𠊎頭擺識跈阿公去食嘗，歸家族个人共下食飯盡鬧熱。	ngaiˇ teuˇ baiˋ siidˋ tenˇ aˊ gungˊ hi siid songˇ ，guiˊ gaˊ cug ge nginˇ kiung ha siid fan qin nau ngiad 。	我以前曾跟著爺爺去嘗會參加宴會，整個家族的人一起吃飯真熱鬧。
lbk13_186	人講：「食水愛念著水源頭，食果子就愛拜樹頭。」做人就愛感恩知報正著。	nginˇ gongˋ ：「siid suiˋ oi ngiam doˋ suiˋ ngianˇ teuˇ ，siid goˋ ziiˋ qiu oi bai su teuˇ 。」zo nginˇ qiu oi gamˋ enˊ diˊ bo nang cog。	俗話說：「飲水要思源，吃果子要拜樹頭。」做人要懂得感恩圖報才對。
lbk13_187	人恁大火氣對佢，佢還笑笑仔像食水歕涼樣仔，修養斷真好！	nginˇ anˋ tai foˋ hi dui iˇ ，iˇ hanˇ seu seu eˊ qiong siid suiˋ punˇ liongˇ iong eˊ ，xiuˊ iongˊ don ziinˊ hoˋ ！	有人對著他發脾氣，他還是面帶笑容靜靜的吹著茶，修養真的很好。
lbk13_188	公家錢做毋得亂使，係無日後會食鐵鉔屙耙。	gungˊ gaˊ qienˇ zo mˇ dedˋ lon siiˋ ，he moˇ ngidˋ heu voi siid tiedˋ zabˋ oˊ paˇ 。	公家單位的錢不可以亂花，不然日後會因小失大。
lbk13_189	食人个頭路愛認真，係無有一日食烏豆屙紅豆屎，嘎就麻煩吔喲！	siid nginˇ ge teuˇ lu oi ngin ziinˊ ，he moˇ iuˊ idˋ ngidˋ siid vuˊ teu oˊ fungˇ teu siiˋ ，ga qiu maˊ fanˇ eˇ ioˊ！	為人工作要認真，不然有一天因小失大，那就麻煩了喲！
lbk13_190	你仰恁會食呢，喊你做事又毋做，正式食死人命哦！	ngˇ ngiongˋ anˋ voi siid noˋ ，hemˊ ngˇ zo se iu mˇ zo ，ziin siidˋ siid xiˋ nginˇ miang oˊ ！	你怎麼這麼會吃呢，叫你做事又不做，真的會吃垮人哦！
lbk13_191	隔壁个叔公蓋有修，平常就食齋行善。	gagˋ biagˋ ge sugˋ gungˊ goi iuˊ xiuˊ ，pinˇ songˇ qiu siid zaiˊ hangˇ san 。	隔壁的叔公很有修養，平常就吃素、做好事。
lbk13_192	做人食齋行善修好死，這係一個大福氣。	zo nginˇ siid zaiˊ hangˇ san xiuˊ hoˋ xiˋ ，iaˋ he idˋ ge tai fugˋ hi 。	做人要吃齋唸佛、多做善事，才能修得善終的福報，這是一大福氣。
lbk13_193	這個後生仔毋做人，食著嫖賭項項會。	iaˋ ge heu sangˊ eˋ mˇ zo nginˇ ，siid zogˋ peuˇ duˋ hong hong voi 。	這個年輕人不好好做人，吃喝嫖賭樣樣精通。
lbk13_194	美濃人講：「食豬前髀，食狗後腿」，這係講食東西个要領。	miˇ nungˇ nginˇ gongˋ ：「siid zuˊ qienˇ biˋ ，siid gieuˋ heu tuiˋ 」，iaˋ he gongˋ siid dungˊ xiˊ ge ieu liangˋ 。	美濃人說：「吃肉要吃豬前腿、狗後腿」，這就是吃東西的要領。
lbk13_195	頭擺人有講：「識吔蔴衣相，揀吔世上人」，人同人共下毋好嫌人，嫌多仔會無人同你尞哦！	teuˇ baiˋ nginˇ iuˊ gongˋ ：「siidˋ eˇ maˇ iˊ xiong ，gianˋ eˇ sii song nginˇ」，nginˇ tungˇ nginˇ kiung ha mˇ hoˋ hiamˇ nginˇ ，hiamˇ doˊ eˇ voi moˇ nginˇ tungˇ ngˇ liau oˊ ！	以前人說：「太精於面相的人，會交不到好朋友」，人和人在一起，不要嫌棄他人，批評多了會沒人敢跟你往來哦！
lbk13_196	這個人蓋好嫖、蓋好賭，身家財產就無核吔！	iaˋ ge nginˇ goi hau peuˇ 、goi hau duˋ ，siinˊ gaˊ coiˇ sanˋ qiu moˇ hedˋ eˇ !	這個人很喜歡嫖妓、很愛賭博，所有財產都花光了！
lbk13_197	𠊎這下麼个都無搭，也無頭路，正式身輕力薄个人吔！	ngaiˇ iaˋ ha maˋ ge duˊ moˇ dabˋ ，ia moˇ teuˇ lu ，ziin siidˋ siinˊ kiangˊ lid pog ge nginˇ neˇ ！	我現在什麼事都不管，也沒有工作，真的是沒有影響力了。
lbk13_198	頭擺人講：「神仙醫假病」，你係得著真病，食藥仔乜食毋著，連神仙都難醫哦！	teuˇ baiˋ nginˇ gongˋ ：「siinˇ xienˊ iˊ gaˋ piang 」，ngˇ he dedˋ doˋ ziinˊ piang ，siid iog eˋ me siid mˇ doˋ ，lienˇ siinˇ xienˊ duˊ nanˇ iˊ oˊ ！	以前的人說：「神仙下凡也只能醫假病」，你如果真的生了病，吃藥也無效，連神仙都很難醫治哦！
lbk13_199	人講：「成家容易守家難」，後生仔結婚過後，相同係愛蓋煞猛、蓋顧家。	nginˇ gongˋ ：「siinˇ gaˊ iungˇ i suˋ gaˊ nanˇ 」，heu sangˊ eˋ giadˋ funˊ go heu ，xiongˊ tungˇ he oi goi sadˋ mangˊ 、goi gu gaˊ 。	俗話說：「男人要成家比較容易，要維持家庭的和樂興旺是比較困難的」，年輕人結婚後，一樣要努力工作、顧家。
lbk13_200	恁久聽人講這個人著大獎吔，看佢神攻攻仔蓋風神。	anˋ giuˋ tangˊ nginˇ gongˋ iaˋ ge nginˇ cog tai jiongˋ eˇ，kon iˇ siinˇ gungˇ gungˇ eˊ goi fungˊ siinˇ 。	最近聽人說這個人中了大獎，看他鋒芒畢露很得意。
lbk13_201	行大路愛行脣脣口口，正毋會分車仔擆著。	hangˇ tai lu oi hangˇ siinˇ siinˇ heuˋ heuˋ，nang mˇ voi bunˊ caˊ eˋ cogˋ doˋ 。	走在大馬路上要走旁邊，才不會被車仔撞傷。
lbk13_202	神壇社廟，後生仔最好莫去，係去吔頭路會做毋成。	siinˇ tanˇ sa meu ，heu sangˊ eˋ zuiˋ hoˋ mog hi ，he hi eˇ teuˇ lu voi zo mˇ sangˇ 。	神壇和寺廟，年輕人最好別去，若常去工作會懈怠。
lbk13_203	「神仙醫假病，真病就愛人个老命。」這句話係表示，人係著著病吔，會蓋毋好救，等到真病个時節，就會無老命。	「siinˇ xienˊ iˊ gaˋ piang ，ziinˊ piang qiu oi nginˇ ge loˋ miang 。」iaˋ gi fa he beuˋ sii ，nginˇ he cog doˋ piang eˇ，voi goi mˇ hoˋ giu ，denˋ do ziinˊ piang ge siiˇ jiedˋ ，qiu voi moˇ loˋ miang 。	「神仙只能醫假病，真病來了人就差不多快死了。」這句話是表示，人生病了，不容易醫治，等到病入膏肓就會沒命。
lbk13_204	頭擺人有講：「神仙毋食隔夜茶」，隔夜茶蓋毒，儘量莫食。	teuˇ baiˋ nginˇ iuˊ gongˋ ：「siinˇ xienˊ mˇ siid gagˋ ia caˇ 」，gagˋ ia caˇ goi tug ，qin liong mog siid 。	古人有說：「神仙不喝隔夜茶」，隔夜茶有茶鹼，儘量別吃。
lbk13_205	老上人个三獻禮，定著有成豬成羊來祭拜天公，恁呢正有誠意。	loˋ song nginˇ ge samˊ hian liˊ ，tin cog iuˊ siinˇ zuˊ siinˇ iongˇ loiˇ ji bai tienˊ gungˊ ，anˋ neˊ nang iuˊ siinˇ i 。	古人的三獻禮，一定有全豬全羊來祭祀天公，這樣才有誠意。
lbk13_206	耕田人定著有簑衣笠嫲，係無就毋像農家人。	gangˊ tienˇ nginˇ tin cog iuˊ soˊ iˊ libˋ maˇ ，he moˇ qiu mˇ qiong nungˇ gaˊ nginˇ 。	農夫一定有簑衣和斗笠，不然就不像農家人。
lbk13_207	粉壁愛挲平來，係無日後相同會漏雨。	funˋ biagˋ oi soˊ piangˇ loiˇ ，he moˇ ngidˋ heu xiongˊ tungˇ voi leu iˋ 。	牆壁要磨平，不然將來還是會漏雨。
lbk13_208	該人蓋會唆是弄非，搣啊一夥房个人吵啊巾晃嘰嘎。	ge nginˇ goi voi soˊ sii nungˋ fiˊ ，miedˋ a idˋ foˋ fongˇ ge nginˇ cauˇ a ginˊ gongˊ giˇ gaˇ 。	那個人很會搬弄是非，搞得一夥房的人吵得不可開交。
lbk13_209	你淨一張嘴，唆唆慫慫就會，做都無半灂。	ngˇ qiang idˋ zongˊ zoi ，soˊ soˊ sungˋ sungˋ qiu voi ，zo tu moˇ ban jiog。	你就剩一張嘴，專門唆使別人做事，自己什麼都不會。
lbk13_210	定著就係你一哪仔唆上唆下，大家个感情正會打壞淨淨。	tin cog qiu he ngˇ idˋ naiˋ eˋ soˊ songˊ soˊ haˊ ，tai gaˊ ge gamˋ qinˇ nang voi daˋ fai qiang qiang 。	一定就是你在到處煽動別人，大家的感情才會都很不好。
lbk13_211	佢一哪仔講自家係市長身邊个紅人，大家就相爭送禮巴結佢，恁久分人報瀉講佢單淨係市政府个清潔人員定定，這下趖鱉腳吔，大家罵啊嘴獒。	iˇ idˋ naiˋ eˋ gongˋ qid gaˊ he sii zongˋ siinˊ bienˊ ge fungˇ nginˇ ，tai gaˊ qiu xiongˊ zangˊ sung liˊ baˊ giadˋ iˇ ，anˋ giuˋ bunˊ nginˇ bo xia gongˋ iˇ danˊ qiang he sii ziin fuˋ ge qinˊ giadˋ nginˇ ianˇ tin tin ，iaˋ ha soˇ biedˋ giogˋ eˇ，tai gaˊ ma a zoi ngauˇ 。	他到處說自己是市長身邊的紅人，大家就爭相送禮巴結他，最近被人識破說，他只是在市政府工作的清潔工而已，這下子露出馬腳了，大家把他罵翻了。
lbk13_212	過年到吔，一家人在該無閒洎杈大清潔，你就閒閒無事在這趖上趖下，恁呢著吓？	go ngianˇ do eˇ，idˋ gaˊ nginˇ teˊ geˋ moˇ hanˇ qi ca tai qinˊ giadˋ ，ngˇ qiu hanˇ hanˇ moˇ sii teˊ iaˋ soˇ songˊ soˇ haˊ ，anˋ neˊ cog haˋ ？	新年到了，全家都在忙著大掃除，你就閒著沒事在這裡遊蕩，這樣對嗎？
lbk13_213	你這個人見做麼个都這毋好、該毋好，蓋瑣屑。	ngˇ iaˋ ge nginˇ gian zo maˋ ge duˊ iaˋ mˇ hoˋ 、geˋ mˇ hoˋ ，goi soˋ sebˋ 。	你這個人不管做什麼都覺得這裡不對、那裡不好，太斤斤計較了。
lbk13_214	戲都煞台吔你正來，斯來𢯭手拆戲棚个麼？	hi duˊ sodˋ toiˇ eˇ ngˇ nang loiˇ ，siiˇ loiˇ ten suˋ cagˋ hi pangˇ ge meˇ ？	戲都演完了你才來，是要來幫忙拆戲台的嗎？
lbk13_215	還細个時節，每日放學吔就愛𢯭刷番薯餵豬仔。	hanˇ se ge siiˇ jiedˋ ，miˊ ngidˋ biong hog eˇ qiu oi ten sodˋ fanˊ suˇ vi zuˊ eˋ 。	小時候，每天放學過後就要幫忙把番薯削成籤來餵豬。
lbk13_216	好好个杓嫲圈，毋知哪個細人仔拿去搞吔。	hoˋ hoˋ ge sog maˇ kianˊ ，mˇ diˊ nai ge se nginˇ eˋ naˊ hi gauˋ eˇ。	好好的勺子架，不知到哪個小孩拿去玩了。
lbk13_217	肉麩愛縮燥來，正囥仔過久著。	ngiugˋ fuˊ oi sogˋ zauˊ loiˇ ，nang kong eˋ go giuˋ doˋ 。	肉鬆要把水份烘乾，才能延長存放期限。
lbk13_218	阿婆不時會念：「這下个後生仔盡無樣式，見到尞日就睡到日頭晒屎朏。」	aˊ poˇ budˋ siiˇ voi ngiam ：「iaˋ ha ge heu sangˊ eˋ qin moˇ iong siidˋ ，gian do liau ngidˋ qiu soi do ngidˋ teuˇ sai sii fudˋ 。」	奶奶常常會數落說：「現在的年輕人習慣真不好，每次到了放假就睡到太陽曬屁股。」
lbk13_219	𠊎蓋毋好整理房間，不時東西堆啊一哪仔有係，故所，阿姆罵𠊎係「睡灰貓」。	ngaiˇ goi mˇ hau ziinˋ liˊ fongˇ gianˊ ，budˋ siiˇ dungˊ xiˊ doiˊ a idˋ naiˋ eˋ iuˊ he ，gu soˋ ，aˊ meˊ ma ngaiˇ he 「soi foiˊ meu 」。	我不喜歡整理房間，常常東西堆得到處都是，所以，媽媽就罵我是「灶口睡覺的懶貓」。
lbk13_220	阿伯講佢恁久衰衰仔，見做麼个都毋順利。	aˊ bagˋ gongˋ iˇ anˋ giuˋ soiˊ soiˊ eˊ ，gian zo maˋ ge duˊ mˇ sun li 。	伯父說他最近運氣不太好，不管做什麼都不順利。
lbk13_221	阿叔恁久為著公司个人事問題，愁啊食睡毋得，阿婆就勸話佢講：「船到灘頭水路開，該做个已經做吔，心情就愛放過開一息。」	aˊ sugˋ anˋ giuˋ vi doˋ gungˊ siiˊ ge nginˇ sii mun tiˇ ，seuˇ a siid soi mˇ dedˋ ，aˊ poˇ qiu kian va iˇ gongˋ ：「sonˇ do tanˊ teuˇ suiˋ lu koiˊ ，goiˊ zo ge iˋ ginˊ zo eˇ，ximˊ qinˇ qiu oi biong go koiˊ idˋ xidˋ 。」	叔叔最近為了公司的人事問題，煩惱得寢食難安，奶奶就勸他說：「船到橋頭自然直，能做的已經做了，心情就要放開一點。」
lbk13_222	恁久景氣毋好，還係算米落鑊過保險。	anˋ giuˋ ginˋ hi mˇ hoˋ ，hanˇ he son miˋ log vog go boˋ hiamˋ 。	最近景氣不好，還是量入為出比較保險。
lbk13_223	你無聽人講過：「算命个毋會褒，連食冷茶都會無」吓？算命先生講个話參考就好，莫恁信。	ngˇ moˇ tangˊ nginˇ gongˋ go ：「son miang ge mˇ voi boˊ ，lienˇ siid nangˊ caˇ duˊ voi moˇ 」haˋ ？son miang xinˊ sangˊ gongˋ ge fa camˊ kauˋ qiu hoˋ ，mog anˋ xin 。	你沒聽人家說過：「算命的不說好話，連冷掉的茶都沒得喝嗎？」算命先生說的話參考就好，不要太相信。
lbk13_224	頭擺阿婆會講：「算命係有靈，世上無窮人。」故所，佢對任何事情都看啊蓋開。	teuˇ baiˋ aˊ poˇ voi gongˋ ：「son miang he iuˊ linˇ ，sii song moˇ kiungˇ nginˇ 。」gu soˋ ，iˇ dui im hoˇ sii qinˇ duˊ kon a goi koiˊ 。	以前奶奶會說：「算命如果真會靈驗，世界上就沒有窮人了。」所以，他凡事都看得很開。
lbk13_225	喔！這兜欖仔酸咚咚仔，食起來會打凊凜呢。	oˊ！iaˋ deuˊ namˋ eˋ sonˊ dungˇ dungˇ eˊ ，siid hiˋ loiˇ voi daˋ qin ngin neˊ 。	喔！這些橄欖實在酸澀，吃起來會打冷顫喔。
lbk13_226	蓋多婦人家擐人个前四個月會盡好食酸酸澀澀个東西。	goi doˊ fu nginˇ gaˊ kuan nginˇ ge qienˇ xi ge ngiad voi qin hau siid sonˊ sonˊ sebˋ sebˋ ge dungˊ xiˊ 。	很多婦女在懷孕的前四個月會很喜歡吃又酸又澀的東西。
lbk13_227	老古人有一句話講：「上等人家貼錢嫁女，中等人家將錢嫁女，下等人家賣子賣女」，可見得頭擺人个生活真實苦啊屙痢肚。	loˋ guˋ nginˇ iuˊ idˋ gi fa gongˋ ：「song denˋ nginˇ gaˊ tiabˋ qienˇ ga ngˋ ，zungˊ denˋ nginˇ gaˊ jiongˊ qienˇ ga ngˋ ，haˊ denˋ nginˇ gaˊ mai ziiˋ mai ngˋ 」，koˋ gian dedˋ teuˇ baiˋ nginˇ ge senˊ fad ziinˊ siidˋ kuˋ a oˊ li duˋ 。	俗諺說：「上等人家貼錢嫁女兒，中等人家是收聘金買嫁妝嫁女兒，下等人家只能賣子女」，可見得以前的人生活真的非常窮苦。
lbk13_228	你等兩姐妹在這仔上𢶀下掣，𠊎斯愛仰仔專心做事呢？	ngˇ denˊ liongˋ jiˋ moi tiˊ iaˋ eˊ song duiˋ haˊ cadˋ ，ngaiˇ siiˇ oi ngiongˋ eˊ zonˊ ximˊ zo se noˋ ？	你們兩姐妹在這裡拉拉扯扯，我要如何專心工作呢？
lbk13_229	人講：「有樣跈樣，無樣自家想。」又講：「上伙房教心臼，下伙房教乖女。」係有心學就會。	nginˇ gongˋ ：「iuˊ iong tenˇ iong ，moˇ iong qid gaˊ xiongˋ 。」iu gongˋ ：「song foˋ fongˇ gauˊ ximˊ kiuˊ ，haˊ foˋ fongˇ gauˊ guaiˊ ngˋ 。」he iuˊ ximˊ hog qiu voi 。	俗話說：「有樣學樣，無樣自己想。」又說：「要教女兒和媳婦，多聽、多看、多學習如何做個好媳婦。」若有心學習就學得會。
lbk13_230	持家愛勤儉，上季莫食新，下季莫食老，省儆就有本。	ciiˇ gaˊ oi kiunˇ kiam ，song gui mog siid xinˊ ，ha gui mog siid loˋ ，sangˋ kiang qiu iuˊ bunˋ 。	做人要節儉，勤儉持家才能存老本。
lbk13_231	有兜人訄洗該兜食齋个人：「上夜南無阿彌陀，下夜齋公揇齋婆。」實在還歪格！	iuˊ deuˊ nginˇ kauˊ seˋ ge deuˊ siid zaiˊ ge nginˇ ：「song ia namˇ moˇ oˊ miˇ toˇ ，ha ia zaiˊ gungˊ namˋ zaiˊ poˇ 。」siid cai hanˇ vaiˊ giedˋ ！	有些人嘲諷那些吃素的人：「出家人上半夜吃齋唸佛，下半夜風流快活。」實在不知廉恥。
lbk13_232	你這人生成「上夜食西瓜，下夜反症」，倚恃毋得半息。	ngˇ iaˋ nginˇ sangˊ sangˇ 「song ia siid xiˊ guaˊ ，ha ia fanˋ ziin 」，iˋ sii mˇ dedˋ ban xidˋ 。	你這個人一直「經常臨時改變主意」，讓人無法信賴。
lbk13_233	佢登常「上夜想个千條路，天光本樣磨豆腐」，斷真哀哉！	iˇ denˊ songˇ 「song ia xiongˋ ge qienˊ tiauˇ lu ，tienˊ gongˊ bunˋ iong mo teu fu 」，don ziinˊ oiˊ zoiˇ ！	他時常「想了一堆計畫，但真正要做時卻都行不通」，真的很可憐！
lbk13_234	你做大人儕个愛做好樣分細人仔學，係無會「上樑毋正下樑歪」喲！	ngˇ zo tai nginˇ saˇ ge oi zo hoˋ iong bunˊ se nginˇ eˋ hog ，he moˇ voi 「song liongˇ mˇ zang ha liongˇ vaiˊ 」ioˊ！	你身為長輩的要做好榜樣讓小孩學習，不然會「上樑不正下樑歪」喲！
lbk13_235	這天時還奇怪，上片落雨滂滂渤，下片日頭晒死禾，農家人毋知愛仰仔來應付正好。	iaˋ tienˊ siiˇ hanˇ kiˇ guai ，song pienˋ log iˋ pongˊ pongˊ boˇ ，haˊ pienˋ ngidˋ teuˇ sai xiˋ voˇ ，nungˇ gaˊ nginˇ mˇ diˊ oi ngiongˋ eˊ loiˇ in fu nang hoˋ 。	這天氣很奇怪，上方大雨滂沱，下方卻出太陽晒死稻禾，農家人不知道要如何來面對才好。
lbk13_236	這東西放定著吔毋會挨著人就好吔，莫過動來動去，人講：「上屋搬下屋，了核一籮穀」，你就莫恁尷尬哪！	iaˋ dungˊ xiˊ biong tin cog eˇ mˇ voi aiˊ doˋ nginˇ qiu hoˋ eˇ，mog go tungˊ loiˇ tungˊ hi ，nginˇ gongˋ ：「song vugˋ banˊ haˊ vugˋ ，liauˋ hedˋ idˋ loˇ gugˋ 」，ngˇ qiu mog anˋ gangˊ gie naˊ！	這東西放定位不會妨礙別人就好了，別再移來移去，俗話說：「搬一次家就要損失一次」，你就不要再搬來搬去了啦！
lbk13_237	屻崗該片天盡烏陰吔，你等共快跋上來，等下河壩係上水吔正想愛跋就來毋掣吔。	in gongˊ ge pienˋ tienˊ qin vuˊ imˊ eˇ，ngˇ denˊ kiung kuai bagˋ songˊ loiˇ ，denˋ ha hoˇ ba he songˊ suiˋ eˇ nang xiongˋ oi bagˋ qiu loiˇ mˇ cadˋ eˇ。	小山丘那邊烏天暗地，你們趕快爬上來，等一下河流的水位漲高了，才想要爬就來不及了。
lbk13_238	買賣之前愛先聘價，係無斯就會像人講个：「上船毋講價，下船牙牙牙牙」喔！	maiˊ mai ziiˊ qienˇ oi xienˊ pinˋ ga ，he moˇ siiˇ qiu voi qiong nginˇ gongˋ ge ：「songˊ sonˇ mˇ gongˋ ga ，haˊ sonˇ ngaˇ ngaˇ nga nga」oˊ！	買賣之前要先講好價錢，不然會像人們說的：「上船不講價，下船就抱怨連連」喔！
lbk13_239	蘿蔔仔同薑雖然俗，毋過對身體盡好，頭擺人講：「上床蘿蔔，下床薑。」多食毋會差啦！	loˇ ped eˋ tungˇ giongˊ suiˊ ianˇ xiog ，mˇ go dui siinˊ tiˋ qin hoˋ ，teuˇ baiˋ nginˇ gongˋ ：「songˊ congˇ loˇ ped ，haˊ congˇ giongˊ 。」doˊ siid mˇ voi caˊ laˋ！	蘿蔔和薑雖然便宜，但對身體健康很有幫助，以前的人說：「晚上吃蘿蔔，早上吃薑，對身體有益。」多吃準沒錯的啦！
lbk13_240	佢前幾日分車仔擆啊蓋傷重，今還在醫院觀察。	iˇ qienˇ giˋ ngidˋ bunˊ caˊ eˋ cogˋ a goi songˊ dong ，ginˊ hanˇ tiˊ iˊ ian gonˊ cadˋ 。	他前幾天被車子撞得傷勢很嚴重，現在還在醫院觀察。
lbk13_241	人生就像跋崎樣仔，上崎容易下崎難，毋想著傷就愛靠智慧喲！	nginˇ senˊ qiu qiong bagˋ gia iong eˊ ，songˊ gia iungˇ i haˊ gia nanˇ ，mˇ xiongˋ cog songˊ qiu oi ko zii fi ioˊ！	人生就像爬坡一樣，上坡比較容易，下坡則較困難，不想受傷就要用點腦筋喔！
lbk13_242	人講：「上屻毋得打橫排」，做人做事就愛知變通，忒過硬直就會害著自家著傷。	nginˇ gongˋ ：「songˊ in mˇ dedˋ daˋ vangˇ paiˇ 」，zo nginˇ zo sii qiu oi diˊ bien tungˊ ，tedˋ go ngang ciid qiu voi hoi doˋ qid gaˊ cog songˊ 。	俗話說：「無法直接上山崗，便走斜坡上去」，做人做事要知道變通，太過固執會傷到自己的 .
lbk13_243	這禮拜美濃辦活動盡鬧熱，每一間店个頭家同店員都企在店門口對來往个人客上迎下請，希望佢等入店交官。	iaˋ liˊ bai miˇ nungˇ pan fad tung qin nau ngiad ，miˊ idˋ gianˊ diam ge teuˇ gaˊ tungˇ diam ianˇ duˊ kiˊ teˊ diam munˇ heuˋ dui loiˇ vongˊ ge nginˇ hagˋ songˊ ngiangˇ haˊ qiangˋ ，hiˊ mong iˇ denˊ ngib diam gauˊ gonˊ 。	這個星期美濃辦活動很熱鬧，每間商店的老闆和店員都站在店門口恭迎客人，希望他們能進來消費。
lbk13_244	老古人講：「上山無帶刀，毋當屋下坐。」你今晡日明明都係愛去考試，仰連筆都無帶，斯愛去同人鬥鬧熱个麼？	loˋ guˋ nginˇ gongˋ ：「songˊ sanˊ moˇ dai doˊ ，mˇ dong lugˋ kaˊ coˊ 。」ngˇ ginˊ buˊ ngidˋ minˇ minˇ duˊ he oi hi kauˋ sii ，ngiongˋ lienˇ bidˋ duˊ moˇ dai ，siiˇ oi hi tungˇ nginˇ deu nau ngiad ge meˇ ？	俗語說：「上山若沒帶把刀，不如家中坐。」你今天明明就是要去考試，怎麼連筆都沒帶，是想要去跟人湊熱鬧的嗎？
lbk13_245	人講：「上山拈無樵，毋當屋下刨鑊頭。」天無絕人之路，總愛自家想辦法來救正好。	nginˇ gongˋ ：「songˊ sanˊ ngiamˊ moˇ ceuˇ ，mˇ dong lugˋ kaˊ pauˇ vog teuˇ 。」tienˊ moˇ qied nginˇ ziiˊ lu ，zungˋ oi qid gaˊ xiongˋ pan fabˋ loiˇ giu nang hoˋ 。	俗話講：「上山撿不到柴火，不如把家中的鍋灰刨乾淨。」天無絕人之路，總是要自己想辦法自救才好。
lbk13_246	佢歸朝晨樓頂樓底上上下下，無閒洎杈，正經有煞猛。	iˇ guiˊ zeuˊ siinˇ leuˇ dangˋ leuˇ daiˋ songˊ songˊ haˊ haˊ ，moˇ hanˇ qi ca ，ziin ginˊ iuˊ sadˋ mangˊ 。	他整個早上一樓、頂樓上上下下，非常忙碌，實在非常賣力。
lbk13_247	佢等兩儕暗肚裡商商眨眨，毋知愛搣麼个古怪。	iˇ denˊ liongˋ saˇ am duˋ liˊ songˊ songˊ sabˋ sabˋ ，mˇ diˊ oi miedˋ maˋ ge guˋ guai 。	他們兩個人暗中計畫，不知道要搞什麼名堂。
lbk13_248	這個人蓋會膨大空，全部都曉得，蓋像會上天沒地樣仔。	iaˋ ge nginˇ goi voi pong tai kangˊ ，qionˇ pu duˊ hiauˋ dedˋ ，goi qiong voi songˊ tienˊ mud ti iong eˊ 。	這個人很會吹牛，什麼都懂，像是會飛天遁地的樣子。
lbk13_249	這個地方𠊎毋識來過，感覺蓋爽朗哦！	iaˋ ge ti fongˊ ngaiˇ mˇ siidˋ loiˇ go，gamˋ gogˋ goi songˋ longˊ oˊ ！	這個地方我不曾來過，感覺很舒適怡人呢！
lbk13_250	頭擺有一句俗語：「樹身企得在，毋驚樹尾發風搓。」這就係講：做人愛老實，毋驚人講閒話。	teuˇ baiˋ iuˊ idˋ gi xiug ngiˊ ：「su siinˊ kiˊ dedˋ cai ，mˇ giangˊ su miˊ bodˋ fungˊ caiˊ 。」iaˋ qiu he gongˋ ：zo nginˇ oi loˋ siid ，mˇ giangˊ nginˇ gongˋ hanˇ fa 。	早期有一句俗話：「樹身站得直，不怕樹梢颳颱風。」這句話是說：做人要實在，不要怕別人的閒言閒語。