六堆計劃首頁

六堆語料總覽表

美濃客家語寶典-14：

編號 例句 語音合成 六堆客語拼音 華譯
lbk14_001 「樹大分桍，人大分家」，佢兩兄弟今晡日分家，這本成就係家常个，毋會分人㖸。 「su tai bunˊ paˋ ，nginˇ tai bunˊ gaˊ 」，iˇ liongˋ hiungˊ ti ginˊ buˊ ngidˋ bunˊ gaˊ ，iaˋ bunˋ sangˇ qiu he gaˊ songˇ ge ，mˇ voi bunˊ nginˇ nagˋ 。 「樹長大自然會分枝，兄弟長大自然也會分家」，他們兄弟倆今天分家，這是家常便飯的事，不會被人笑的。
lbk14_002 頭擺人生活蓋清苦，會拈樹頭木矻來燒火。 teuˇ baiˋ nginˇ senˊ fad goi qinˊ kuˋ ，voi ngiamˊ su teuˇ mugˋ kid loiˇ seuˊ foˋ 。 以前的人生活很艱辛，會撿樹根和木塊來當柴燒。
lbk14_003 山頂項生啊蓋多藤仔，蓋多樹仔分佢纏等，自然看得著「樹死藤燥」个現象。 sanˊ dangˋ hong sangˊ a goi doˊ tenˇ eˋ ，goi doˊ su eˋ bunˊ iˇ canˇ nenˋ ，cii ianˇ kon dedˋ doˋ 「su xiˋ tenˇ zauˊ 」ge hien xiong 。 山上長了很多藤蔓，很多樹木被它纏繞著，自然看得到「樹死藤蔓也跟著枯死」的現象。
lbk14_004 買啊著个東西，毋曾用著就分細人仔收𠎷核吔，盡無樣式！ maiˊ a doˋ ge dungˊ xiˊ，mˇ qienˇ iung doˋ qiu bunˊ se nginˇ eˋ suˊ sabˋ hedˋ eˇ，qin moˇ iong siidˋ ！ 才剛買的新東西，還沒用到就被小孩子毀壞了，很不像話！
lbk14_005 賭博个人哪賺得著食，輸輸贏贏無人知得。 duˋ bogˋ ge nginˇ lai con dedˋ doˋ siid ，suˊ suˊ iangˇ iangˇ moˇ nginˇ diˊ dedˋ 。 賭博的人哪可能賺到錢，輸贏多少是沒人知道的。
lbk14_006 做人愛忍耐、愛有修養，頭擺人講：「仇人面前深唱喏」，大家愛忍哪！ zo nginˇ oi ngiunˊ nai 、oi iuˊ xiuˊ iongˊ ，teuˇ baiˋ nginˇ gongˋ ：「suˇ nginˇ mien qienˇ ciimˊ cong iaˊ 」，tai gaˊ oi ngiunˊ naˋ ！ 為人就要忍耐、要有修養，俗話說：「好漢不吃眼前虧」，大家要多忍耐呀！
lbk14_007 這個人修養毋好，一發譴就手剷剷仔緊罵人。 iaˋ ge nginˇ xiuˊ iongˊ mˇ hoˋ ，idˋ fadˋ kienˋ qiu suˋ canˋ canˋ eˊ ginˋ ma nginˇ 。 這個人修養不好，一生氣就手指著人罵。
lbk14_008 這個老人家蓋壞樣式，動啊著手蹉蹉仔，愛同人討東西食。 iaˋ ge loˋ nginˇ gaˊ goi faiˋ iong siidˋ ，tungˊ a doˋ suˋ coˊ coˊ eˊ ，oi tungˇ nginˇ toˋ dungˊ xiˊ siid 。 這個老人家有個壞毛病，動不動就伸手向人乞討，跟人要東西吃。
lbk14_009 人哪！愛守分認命，毋好強求自家。 nginˇ naˇ ！oi suˋ funˊ ngin miang ，mˇ hoˋ kiongˇ kiuˇ qid gaˊ 。 人哪！要認命守本分，凡事不強求。
lbk14_010 你借个東西到今無還𠊎，害𠊎愛用吔嗄手扡扡仔，蓋得人恨呢！ ngˇ jia ge dungˊ xiˊ do ginˊ moˇ vanˇ ngaiˇ ，hoi ngaiˇ oi iung eˇ sa suˋ iaˋ iaˋ eˊ ，goi dedˋ nginˇ hen neˊ ！ 你借的東西到現在還沒還我，害我要用了卻沒得用，很令人討厭呢！
lbk14_011 這個後生仔討吔姐仔，厥爺哀還揢等權，害佢手枷腳揢，做麼个頭路都毋得。 iaˋ ge heu sangˊ eˋ toˋ eˇ jiaˋ eˋ ，iaˊ iaˇ oiˊ hanˇ kag nenˋ kianˇ，hoi iˇ suˋ kaˇ giogˋ kag ，zo maˋ ge teuˇ lu duˊ mˇ dedˋ 。 這個年輕人娶了老婆，他的父母仍然掌控經濟大權，害他綁手綁腳，做什麼工作都不方便。
lbk14_012 佢舊年仔分車仔擆著過後，到今還手瘸腳跛喲！ iˇ kiu ngianˇ eˋ bunˊ caˊ eˋ cogˋ doˋ go heu ，do ginˊ hanˇ suˋ kioˇ giogˋ baiˊ ioˊ！ 他去年被車子撞到後，至今還手腳殘廢喲！
lbk14_013 這個後生仔好食懶做，這下麼个都無吔，看起來手屈屈仔，大家人都毋搭佢。 iaˋ ge heu sangˊ eˋ hau siid nanˊ zo ，iaˋ ha maˋ ge duˊ moˇ eˇ，kon hiˋ loiˇ suˋ kud kud eˊ ，tai gaˊ nginˇ duˊ mˇ dabˋ iˇ 。 這個年輕人好吃懶做，現在什麼都沒了，看起來經濟拮据，大家都不理他。
lbk14_014 隔壁个阿昌仔手罅蓋開，硬多財產都分佢絲核吔！ gagˋ biagˋ ge aˊ congˊ eˋ suˋ la goi koiˊ ，ang doˊ coiˇ sanˋ duˊ bunˊ iˇ xiˊ hedˋ eˇ！ 隔壁的阿昌好客豪爽、花錢大方，再多的財產都被他花光了！
lbk14_015 做人毋好手罅開，到尾會害著自家。 zo nginˇ mˇ hoˋ suˋ la koiˊ ，do miˊ voi hoi doˋ qid gaˊ 。 為人不要太浪費，最後會害到自己。
lbk14_016 這個人嶄然無意思哦，人在該煞猛做事，佢手歛歛仔在該看，蓋不受教。 iaˋ ge nginˇ zamˋ manˇ moˇ i sii oˊ ，nginˇ teˊ geˋ sadˋ mangˊ zo se ，iˇ suˋ liamˊ liamˊ eˊ tiˊ geˋ kon ，goi budˋ su gau 。 這個人很不夠意思哦，別人在努力工作，他雙手放在背後看著，一付漠不關心的樣子，很不像話。
lbk14_017 這個男仔人蓋豬狗，看著婦人家就手捻手扡，無半息修養。 iaˋ ge namˇ eˋ nginˇ goi zuˊ gieuˋ ，kon doˋ fu nginˇ gaˊ qiu suˋ nemˇ suˋ iaˋ ，moˇ ban xid xiuˊ iongˊ 。 這個男人很色，看到婦人就動手動腳，一點修養都沒有。
lbk14_018 你仰去貨運公司正上班著一日，歸來就手軟腳癩吔？ ngˇ ngiongˋ hi fo iun gungˊ siiˊ nang songˊ banˊ doˋ idˋ ngidˋ ，guiˊ loiˇ qiu suˋ ngionˊ giogˋ laiˋ eˇ？ 你怎麼去貨運公司才上了一天班，回來就手腳發軟沒力了？
lbk14_019 𠊎這下無閒啊手爬腳蹶吔，無閒聽你講話喔！ ngaiˇ iaˋ ha moˇ hanˇ a suˋ paˇ giogˋ kiad eˇ，moˇ hanˇ tangˊ ngˇ gongˋ fa oˊ！ 我現在忙得手忙腳亂了，沒空聽你說話喔！
lbk14_020 該人生來就手煨腳竵，但係佢蓋拶志，麼个都做得自家來，毋使倚恃人。 ge nginˇ sangˊ loiˇ qiu suˋ voiˊ giogˋ feˋ ，danˋ he iˇ goi zadˋ zii ，maˋ ge duˊ zo dedˋ qid gaˊ loiˇ ，mˇ siiˋ iˋ sii nginˇ 。 那個人生來就手腳殘疾，但是他很有志氣，什麼都可以自己來，不需要依賴他人。
lbk14_021 今晡日蓋寒人，手揋揋仔蓋毋好做事。 ginˊ buˊ ngidˋ goi honˇ nginˇ ，suˋ voiˊ voiˊ eˊ goi mˇ hoˋ zo se 。 今天冷得不得了，雙手動作不靈活，很不好做事。
lbk14_022 人講：「手指拗入無拗出」，故所，這場官司雖然係厥倈仔毋著，佢定著還係會同厥倈仔𢯭手个。 nginˇ gongˋ ：「suˋ ziiˋ auˋ ngib moˇ auˋ cudˋ 」，gu soˋ ，iaˋ congˇ gonˊ siiˊ suiˊ ianˇ he iaˊ lai eˋ mˇ cog ，iˇ tin cog hanˇ he voi tungˇ iaˊ lai eˋ ten suˋ ge 。 人家說：「手指彎進不彎出」，所以，這場官司雖然是他兒子不對，他一定還是會替他兒子撐腰的。
lbk14_023 你莫恁好同人比較，天下毋會有麼个公平个事啦！自家毋係共樣「手指伸出來無平長」吓？ ngˇ mog anˋ hau tungˇ nginˇ biˋ gauˋ ，tienˊ ha mˇ voi iuˊ maˋ ge gungˊ pinˇ ge sii laˋ！qid gaˊ mˇ he kiung iong 「suˋ ziiˋ cunˊ cudˋ loiˇ moˇ piangˇ congˇ 」haˋ ？ 你不要這麼愛比較，天底下不會有什麼公平事的啦！自己還不是一樣「手指伸出來不一樣長」嗎？
lbk14_024 你準備吔恁久，資料又恁豐富，仰到愛面試个時節嗄縮腳吔？實在可惜。 ngˇ zunˋ pi eˇ anˋ giuˋ ，ziiˊ liau iu anˋ fungˊ fu ，ngiongˋ do oi mien sii ge siiˇ jiedˋ sa sugˋ giogˋ eˇ？siid cai koˋ xidˋ 。 你準備了這麼久，資料又這麼豐富，怎麼到要面試的時候卻臨陣抽腿了？
lbk14_025 你見做事情都縮手縮腳，斯愛仰仔做大事呢？ ngˇ gian zo sii qinˇ duˊ sugˋ suˋ sugˋ giogˋ ，siiˇ oi ngiongˋ eˊ zo tai sii noˋ ？ 你每次做事情都畏首畏尾，是要如何做大事呢？
lbk14_026 佢等个家族盡大，人丁蓋旺，故所，厥叔叔伯伯一等多。 iˇ denˊ ge gaˊ cug qin tai ，nginˇ denˊ goi vong ，gu soˋ ，iaˊ sugˋ sugˋ bagˋ bagˋ idˋ denˋ doˊ 。 他們的家族很大，人丁很旺，所以，他的叔叔伯伯非常多。
lbk14_027 你做事情仰恁呢隨隨便便呢？有做等於無做嘛！ ngˇ zo sii qinˇ ngiongˋ anˋ neˊ suiˇ suiˇ pien pien noˋ ？iuˊ zo denˋ iˇ moˇ zo maˇ！ 你做事情怎麼這麼馬虎、不用心呢？有做等於沒做嘛！
lbk14_028 大水過後，歸个莊頭水打沙壅，家家戶戶都無閒洎杈在該清泥沙。 tai suiˋ go heu ，guiˊ ge zongˊ teuˇ suiˋ daˋ saˊ iungˊ ，gaˊ gaˊ fu fu duˊ moˇ hanˇ qi ca teˊ geˋ qinˊ naiˇ saˊ 。 水災過後，整個村莊泥沙淤積，家家戶戶都忙著在那裏清淤泥。
lbk14_029 這兩日个圳仔水掖掖仔，好放水。 iaˋ liongˋ ngidˋ ge zun eˋ suiˋ ie ie eˊ ，hoˋ biong suiˋ 。 這兩天水圳的水量很豐沛，引水很好。
lbk14_030 這擺个風搓雨十分大，河壩水潽啊歸个山下水洋洋仔，這下禾仔怕會浸死淨吔。 iaˋ baiˋ ge fungˊ caiˊ iˋ siib funˊ tai ，hoˇ ba suiˋ puˊ a guiˊ ge sanˊ haˊ suiˋ iongˇ iongˇ eˊ ，iaˋ ha voˇ eˋ pa voi jim xiˋ qiang eˇ。 這次的颱風雨勢非常大，河水淹沒了整個山下的土地，這下子稻子恐怕會泡死了。
lbk14_031 頭擺阿爸不時會講：「水流下下，人看上上，做人做事定著愛比上，毋好比下。」 teuˇ baiˋ aˊ baˊ budˋ siiˇ voi gongˋ ：「suiˋ liuˇ haˊ haˊ ，nginˇ kon songˊ songˊ ，zo nginˇ zo sii tin cog oi biˋ songˊ ，mˇ hoˋ biˋ haˊ 。」 以前爸爸常說：「水往下流，人往上看，做人做事一定要往上比，不要往下比。」」
lbk14_032 這河壩水生絲吔，石頭滑滑，行過去愛定啊哩！ iaˋ hoˇ ba suiˋ sangˊ seˊ eˇ，sag teuˇ vad vad ，hangˇ go hi oi tin a leˊ！ 這條河流長出水苔了，石頭很滑，走過去要小心啊！
lbk14_033 這兜木瓜有水傷，故所賣毋出去。 iaˋ deuˊ mugˋ guaˊ iuˊ suiˋ songˊ ，gu soˋ mai mˇ cudˋ hi 。 這些木瓜因雨水過多而受傷，所以賣不出去。
lbk14_034 這下一哪仔缺水吔，淨該管水水漕漕著，大家都搶等用。 iaˋ ha idˋ naiˋ eˋ kiadˋ suiˋ eˇ ，qiang ge gonˋ suiˋ suiˋ zoˇ zoˇ eˊ ，tai gaˊ duˊ qiongˋ nenˋ iung 。 現在到處缺水了，只有那管水出水量很大，大家都搶著用。
lbk14_035 𠊎係答應你，佢定著就會發譴，斷真係「順吔哥情，逆吔嫂意」，盡壞做人喲！ ngaiˇ he dabˋ in ngˇ ，iˇ tin cog qiu voi fadˋ kienˋ ，don ziinˊ he 「sun eˇ goˊ qinˇ ，ngiag eˇ soˋ i」，qin faiˋ zo nginˇ ioˊ！ 我如果答應你，他一定就會生氣，真的是「順了哥情，逆了嫂意」，很難做人喲！
lbk14_036 感謝大家恁熱心來𢯭手，故所，今晡日个母親節活動進行啊順順班班。 gamˋ qia tai gaˊ anˋ ngiad ximˊ loiˇ ten suˋ ，gu soˋ ，ginˊ buˊ ngidˋ ge muˊ qinˊ jiedˋ fad tung jin hangˇ a sun sun banˊ banˊ 。 感謝大家這麼熱心來幫忙，所以，今天的母親節活動進行得圓滿順遂。
lbk14_037 有兜人个個性過保守，認為人生毋使忒多變竅，順順仔就好。 iuˊ deuˊ nginˇ ge ge xin go boˋ suˋ ，ngin viˇ nginˇ senˊ mˇ siiˋ tedˋ doˊ bien kieu ，sun sun eˊ qiu hoˋ 。 有些人的個性比較保守，認為人生不必有太多的變化，平平順順就好。
lbk14_038 這擺个表演，大家順順利利，盡圓滿。 iaˋ baiˋ ge beuˋ ianˊ ，tai gaˊ sun sun li li ，qin ianˇ manˊ 。 這次的表演，大家順利演出，很圓滿。
lbk14_039 佢去廟項唱喏，拜託神明保佑厥倈仔考試做得順順序序，考著好學校。 iˇ hi meu hong cong iaˊ ，bai togˋ siinˇ minˇ boˋ iu iaˊ lai eˋ kauˋ sii zo dedˋ sun sun xi xi ，kauˋ doˋ hoˋ hog gauˋ 。 他去廟裡拜拜，祈求神明保佑他的兒子考試能順順利利，考取理想的學校。
lbk14_040 榫頭壁角盡壞做，連師傅都驚。 sunˋ teuˇ biagˋ gogˋ qin faiˋ zo ，lienˇ siiˊ fu duˊ giangˊ 。 榫頭與牆角是木匠及水泥匠最難處理的地方，連老師傅都害怕。
lbk14_041 這榫頭空恁細仔，敢食力得得？愛鑽畀過大兜仔無？ iaˋ sunˋ teuˇ kangˊ anˋ se eˇ，gamˋ siid lid dedˋ dedˋ ？oi zon biˋ go tai deuˊ eˊ moˇ ？ 這榫頭的小洞這麼小，能撐得住嗎？要鑽大一點嗎？
lbk14_042 佢前兩隻月正同貸款拆啊核，故所這下有過鬆環兜仔吔。 iˇ qienˇ liongˋ zagˋ ngiad nang tungˇ toi kuanˋ cagˋ a hedˋ ，gu soˋ iaˋ ha iuˊ go sungˊ fanˇ deuˊ eˊ eˇ。 他兩個月前才繳完貨款，所以現在手頭寬鬆了許多。
lbk14_043 佢這人盡狡猾，登常這頭做人，該頭做鬼，斷真係「雙面多鬼」，盡得人畏。 iˇ iaˋ nginˇ qin gauˋ vad ，denˊ songˇ iaˋ teuˇ zo nginˇ ，ge teuˇ zo guiˋ ，don ziinˊ he 「sungˊ mien doˊ guiˋ 」，qin dedˋ nginˇ vi 。 他這個人很狡猾，時常在這邊是一個面孔，在那邊又是另一個面孔，真的是「雙面人」，很討人厭。
lbk14_044 這公園盡靚，不時看得著雙雙對對个細倈仔、細妹仔來翕相、欣賞風景。 iaˋ gungˊ ianˇ qin jiangˊ ，budˋ siiˇ kon dedˋ doˋ sungˊ sungˊ dui dui ge se lai eˋ 、se moi eˋ loiˇ hibˋ xiong 、himˊ songˋ fungˊ ginˋ 。 這座公園很漂亮，時常看見成雙成對的男女朋友來照相、欣賞風景。
lbk14_045 這褲頭鬆鬆吔，愛繫緪來正毋會溜下去。 iaˋ fu teuˇ sungˊ sungˊ eˇ ，oi gieˊ henˇ loiˇ nang mˇ voi liu haˊ hi 。 這個褲頭鬆鬆了，要繫緊才不會滑下去。
lbk14_046 佢見食著毋合味个東西，就會𢱤分人食，實在難耐。 iˇ gian siid doˋ mˇ gagˋ mi ge dungˊ xiˊ ，qiu voi sungˋ bunˊ nginˇ siid ，siid cai nanˇ ngai 。 他每次吃到不對味的東西，就會推給別人吃，實在受不了。
lbk14_047 這一息事頭也𢱤上𢱤下，敢好看？ iaˋ idˋ xidˋ se teuˇ iaˊ sungˋ songˊ sungˋ haˊ，gamˋ hoˋ kon ？ 這一點工作也推來推去，能看嗎？
lbk14_048 這紅毛泥正粉啊好，你等莫在這頂項踏上踏下啊！ iaˋ fungˇ moˊ naiˇ nang funˋ a hoˋ ，ngˇ denˊ mog teˊ iaˋ dangˋ hong tab songˊ tab haˊ aˇ。 這水泥地才剛粉刷好，你們別在這踏來踏去呀！
lbk14_049 這後生仔做事情就恁呢踏踏實實，盡得人惜！ iaˋ heu sangˊ eˋ zo sii qinˇ qiu anˋ neˊ tab tab siid siid ，qin dedˋ nginˇ xiagˋ ！ 這個年輕人做事很實在，令人很喜歡。
lbk14_050 佢屋下蓋苦，不時無錢糴米煮，只好食兜番薯簽過日仔。 iˇ lugˋ kaˊ goi kuˋ ，budˋ siiˇ moˇ qienˇ tag miˋ zuˋ ，ziiˋ hoˋ siid deuˊ fanˊ suˇ qiamˊ go ngidˋ eˋ 。 他家裡很窮，時常沒錢買米煮飯，只好吃些地瓜絲過日子。
lbk14_051 頭擺个細人仔係蓋毋乖，大人儕會嚇講愛同佢䌈牛索。 teuˇ baiˋ ge se nginˇ eˋ he goi mˇ guaiˊ ，tai nginˇ saˇ voi hagˋ gongˋ oi tungˇ iˇ tagˋ ngiuˇ sogˋ 。 以前的小孩子如果很不乖，長輩會嚇唬他說要將他繫牛繩。
lbk14_052 佢屋下畜著幾下隻狗仔，又惜命命仔，見愛出國尞就感覺著䌈手䌈腳，盡毋盼得佢等無人照顧，正式係「狗奴才」呢！ iˇ lugˋ kaˊ hiugˋ doˋ giˋ haˊ zagˋ gieuˋ eˋ ，iu xiagˋ miang miang eˊ ，gian oi cudˋ guedˋ liau qiu gamˋ gogˋ doˋ tagˋ suˋ tagˋ giogˋ ，qin mˇ pan dedˋ iˇ denˊ moˇ nginˇ zeu gu ，ziin siidˋ he 「gieuˋ nuˇ coiˇ 」neˊ ！ 他家裡養了好幾隻狗，他非常疼愛牠們，每次要出國旅遊就感到很掙扎，很捨不得他們沒有人可以照顧，真的是「狗奴才」呢！
lbk14_053 大丈夫財上分明，自然就無人會尋若麻煩。 tai cong fuˊ coiˇ song funˊ minˇ ，cii ianˇ qiu moˇ nginˇ voi qimˇ ngiaˊ maˊ fanˇ 。 做人在錢財上應該清楚分明，不可拆爛汙，自然就沒有人會找你的麻煩。
lbk14_054 阿文牯恁久食啊忒好，大肚肚仔，盡像擐人樣仔。 aˊ vunˇ guˋ anˋ giuˋ siid a tedˋ hoˋ ，tai duˋ duˋ eˊ ，qin qiong kuan nginˇ iong eˊ 。 阿文近來食量不錯，肚子很大、變胖，很像懷孕一樣。
lbk14_055 人毋好失志，係一失志就「大雞鉗，細雞啄」，麼人都翕得。 nginˇ mˇ hoˋ siidˋ zii ，he idˋ siidˋ zii qiu 「tai gieˊ kiamˇ ，se gieˊ dugˋ 」，maˋ nginˇ duˊ hibˋ dedˋ 。 人不要失志，一旦失志就「只能任人欺侮、無法反擊」，誰都會欺負。
lbk14_056 這世界就恁現實，「大𧊅食細𧊅，蛤蟆食老蟹」，你毋使怨嘆。 iaˋ sii giai qiu anˋ hian siid ，「tai guaiˋ siid se guaiˋ ，haˇ maˇ siid no haiˋ 」，ngˇ mˇ siiˋ ian tan 。 這個世界就是這麼現實，「大蛙吃小蛙，蛤蟆吃螃蟹」，你不要埋怨。
lbk14_057 佢等兩兄弟為著爭家產，鬧啊相打、上法院，正經係「大核个老鼠仔—自家人咬自家人」哦！ iˇ denˊ liongˋ hiungˊ ti vi doˋ zangˊ gaˊ sanˋ ，nau a xiongˊ daˋ 、songˊ fabˋ ian ，ziin ginˊ he 「tai hag ge no cuˋ eˋ —qid gaˊ nginˇ ngauˊ qid gaˊ nginˇ 」 oˊ ！ 他們兄弟倆為了爭家產，打架又鬧上法院，真的是「自家人咬自家人」哦！
lbk14_058 你走恁遽做麼个，大氣轟天會嚇死人哦！ ngˇ zeuˋ anˋ giagˋ zo maˋ ge ，tai hi pang tienˊ voi hagˋ xiˋ nginˇ noˊ ！ 你跑這麼快做什麼，喘氣的聲音這麼大會嚇死人哦！
lbk14_059 美濃个老人家講：「大學博士一綱車，毋當戇戇个在屋下。」佢等感覺著讀越多書个人越無用，這實在愛分做倈仔个人好好反省哦！ miˇ nungˇ ge loˋ nginˇ gaˊ gongˋ ：「tai hog bogˋ sii idˋ gongˊ caˊ ，mˇ dong ngong ngong ge tiˊ lugˋ kaˊ 。」iˇ denˊ gamˋ gogˋ doˋ tug iad doˊ suˊ ge nginˇ iad moˇ iung ，iaˋ siid cai oi bunˊ zo lai eˋ ge nginˇ hoˋ hoˋ fanˋ xiangˋ oˊ ！ 美濃的老人家說：「培養到高學歷的，遠走他鄉、不回國；留在家侍親的，是憨傻的兒子。」他們覺得讀越多書的人越沒用，為人子的確實要好好反省哦！
lbk14_060 在恁烈个日頭下做事，做啊大汗圍身，黏黏浹浹。 teˊ anˋ ladˋ ge ngidˋ teuˇ haˊ zo se ，zo a tai hon viˇ siinˊ ，ngiamˇ ngiamˇ giabˋ giabˋ 。 在炎熱的太陽底下工作，做到滿身大汗，全身黏黏的。
lbk14_061 做壞事个人，太陽白日照樣做壞事，也毋驚人看著。 zo faiˋ sii ge nginˇ ，tai iongˇ pag ngidˋ zeu iong zo faiˋ sii ，iaˊ mˇ giangˊ nginˇ kon doˋ 。 做壞事的人，大日天照樣會做壞事，也不怕別人看到。
lbk14_062 這個人頭那大确确仔，但係看佢又毋係蓋精鳥。 iaˋ ge nginˇ teuˇ naˇ tai kog kog eˊ ，danˋ he kon iˇ iu mˇ he goi jinˊ diauˊ 。 這個人的頭長得很大，但是看他又不怎麼聰明。
lbk14_063 頭擺吾叔蓋大慨，不時會發糖仔分𠊎等食。 teuˇ baiˋ ngaˊ sugˋ goi tai koiˋ ，budˋ siiˇ voi fadˋ tongˇ eˋ bunˊ ngaiˇ nenˊ siid 。 以前我叔叔很大方，時常會發糖果給我們吃。
lbk14_064 你講話恁大聲，蓋惡个樣式，盡像大膦嚇細膣喲！ ngˇ gongˋ fa anˋ tai sangˊ ，goi ogˋ ge iong siidˋ，qin qiong tai linˋ hagˋ se ziiˊ oˊ！ 你說話這麼大聲，很凶的樣子，很像以大欺小、以強凌弱喲！
lbk14_065 細人仔做毋得同爺哀大嫲牯聲講話，恁仔係無修養个。 se nginˇ eˋ zo mˇ dedˋ tungˇ iaˇ oiˊ tai maˇ guˋ sangˊ gongˋ fa ，anˋ eˊ he moˇ xiuˊ iongˊ ge 。 為人子女不能跟父母大聲說話，這樣是很沒修養的。
lbk14_066 昨晡日騎車仔同人相擆，隔壁个人講：「大難小劫，人無仰仔就好。」 coˊ buˊ ngidˋ kiˇ caˊ eˋ tungˇ nginˇ xiongˊ cogˋ，gagˋ biagˋ ge nginˇ gongˋ ：「tai nan seuˋ giabˋ ，nginˇ moˇ ngiongˋ eˊ qiu hoˋ 。」 昨天騎車和人相撞，隔壁的人說：「大災難、小劫數，人沒怎樣就好。」
lbk14_067 這兜後生仔毋聽人講，大傲傲仔蓋會著樣仔。 iaˋ deuˊ heu sangˊ eˋ mˇ tangˊ nginˇ gongˋ ，tai ngau ngau eˊ goi voi doˋ iong eˊ 。 這些年輕人不聽話，一副自以為是、很驕傲的樣子。
lbk14_068 細人仔愛有規矩，做毋得「大人䟘凳，細人落凳」，這係壞樣式。 se nginˇ eˋ oi iuˊ guiˊ giˋ ，zo mˇ dedˋ 「tai nginˇ hong den ，se nginˇ labˋ den 」，iaˋ he faiˋ iong siidˋ 。 小孩子要有規矩，不可以「大人離座，小孩立刻入座」，這樣是沒教養的。
lbk14_069 做爺哀个人愛知得，「大人用講，細人用強」个道理，這係老時代人个教法。 zo iaˇ oiˊ ge nginˇ oi diˊ dedˋ ，「tai nginˇ iung gongˋ ，se nginˇ iung kiongˇ 」ge to liˊ ，iaˋ he loˋ siiˇ toi nginˇ ge gauˊ fabˋ 。 為人父母要知道，「勸大人可以用講道理的，但對小孩要用強迫性的」道理，這是古人教育小孩的方法。
lbk14_070 大人吵事个時節，細人仔毋好行前，美濃人講：「大牛相鬥，細牛食草」，就係恁呢个道理。 tai nginˇ cauˇ sii ge siiˇ jiedˋ ，se nginˇ eˋ mˇ hoˋ hangˇ qienˇ ，miˇ nungˇ nginˇ gongˋ：「tai ngiuˇ xiongˊ deu ，se ngiuˇ siid coˋ 」，qiu he anˋ neˊ ge to liˊ 。 大人吵架的時候，小孩子不要靠近，美濃人說：「大人之間的紛爭與小孩子無關」，就是這個道理。
lbk14_071 這個男仔人蓋風流，從旦裡有大婆細姨。 iaˋ ge namˇ eˋ nginˇ goi fungˊ liuˇ ，qiungˇ dan liˊ iuˊ tai poˇ se iˇ 。 這個男人很風流，一直以來都有妻、有妾。
lbk14_072 隔壁个阿叔討大婆細姐，佢等蓋和氣、蓋煞猛，盡難得哦！ gagˋ biagˋ ge aˊ sugˋ toˋ tai poˇ se jiaˋ ，iˇ denˊ goi foˇ hi 、goi sadˋ mangˊ ，qin nanˇ dedˋ oˊ ！ 隔壁的叔叔有妻又有妾，他們很和諧、很勤勞，十分難得哦！
lbk14_073 你見講話就大聲挷頸，蓋無教養，蓋得人恨呢！ ngˇ gian gongˋ fa qiu tai sangˊ bangˊ giangˋ ，goi moˇ gau iongˊ ，goi dedˋ nginˇ hen neˊ ！ 你每次說話都很粗野、態度不好，很沒修養，很討人厭呢！
lbk14_074 頭擺吾婆做大生日，大細姑姊都會歸來分𠊎等請。 teuˇ baiˋ ngaˊ poˇ zo tai sangˊ ngidˋ ，tai se guˊ jiˋ duˊ voi guiˊ loiˇ bunˊ ngaiˇ nenˊ qiangˋ 。 以前我奶奶做大壽，姑姑、姨媽等親戚都會回來給我們請。
lbk14_075 「大食大啉眼前香，細水長流防災荒」，這係美濃一句蓋有名个俗語，係警告𠊎等大家，毋好淨看眼前，有麼个事情愛防後日。 「tai siid tai limˊ ngianˋ qienˇ hiongˊ ，se suiˋ congˇ liuˇ fongˇ zaiˊ fongˊ 」，iaˋ he miˇ nungˇ idˋ gi goi iuˊ miangˇ ge xiug ngiˊ ，he ginˋ go ngaiˇ nenˊ tai gaˊ ，mˇ hoˋ qiang kon ngianˋ qienˇ ，iuˊ maˋ ge sii qinˇ oi fongˇ heu ngidˋ 。 「大吃大喝只有眼前享樂，細水長流才能防災荒」，這是美濃地區很有名的一句俗語，是警告我們大家不要只看眼前，要防範日後有什麼事情。
lbk14_076 佢手罅蓋開，係大食大𪘒个後生仔，𠊎看斯無用。 iˇ suˋ la goi koiˊ ，he tai siid tai ngamˊ ge heu sangˊ eˋ ，ngaiˇ kon siiˇ moˇ iung 。 他很會花錢，是食量很大的年輕人，我看一點用處都沒有。
lbk14_077 頭擺美濃七、八月會做大水，大水抨河个時節，蓋多人會拈大水樵。 teuˇ baiˋ miˇ nungˇ qidˋ 、badˋ ngiad voi zo tai suiˋ ，tai suiˋ pongˊ hoˇ ge siiˇ jiedˋ ，goi doˊ nginˇ voi ngiamˊ tai suiˋ ceuˇ 。 早期美濃七、八月常會淹水，河水高漲、湍急的時候，很多人會去撿漂流木。
lbk14_078 你裹个粽仔仰大大細細呢？盡壞煠呢！ ngˇ goˋ ge zung eˋ ngiongˋ tai tai se se noˋ ？qin faiˋ sab neˊ ！ 你包的粽子怎麼有的大有的小呢？很難煮呢！
lbk14_079 該婦人家見講話就大膣嫲聲，蓋得人驚。 ge fu nginˇ gaˊ gian gongˋ fa qiu tai ziiˊ maˇ sangˊ ，goi dedˋ nginˇ giangˊ 。 那婦人每次說話都很大聲，很嚇人。
lbk14_080 人講：「大做樣，教壞樣。」你東西食啊核，地圾就一擳，教壞細人仔就有。 nginˇ gongˋ ：「tai zo iong ，gauˊ fai iong 。」ngˇ dungˊ xiˊ siid a hedˋ ，ti sebˋ qiu idˋ jied ，gauˊ fai se nginˇ eˋ qiu iuˊ 。 人家說：「大做樣，教壞樣。」你東西一吃完，垃圾就一丟，給小孩很壞的榜樣。
lbk14_081 這袋仔大做細用乜毋會差。 iaˋ toi eˋ tai zo se iung me mˇ voi caˊ 。 這個袋子大做小用也不錯。
lbk14_082 你見做事情都恁呢大主大意，難怪大家都蓋畏你。 ngˇ gian zo sii qinˇ duˊ anˋ neˊ tai zuˋ tai i ，nanˇ guai tai gaˊ duˊ goi vi ngˇ 。 你每次做事情都這樣自作主張，難怪大家都很不喜歡你。
lbk14_083 打醮係大眾大馬个事情，應該大家來𢯭手正好。 daˋ zeu he tai zung tai maˊ ge sii qinˇ ，in goiˊ tai gaˊ loiˇ ten suˋ nang hoˋ。 打醮活動是公眾的事，應該由大家來幫忙才對。
lbk14_084 愛種递藤瓜就愛先搭瓜棚仔。 oi zung taiˊ tenˇ guaˊ qiu oi xienˊ dabˋ guaˊ pangˇ eˋ 。 要種爬藤的瓜類就要先搭攀爬架。
lbk14_085 這個廚師刣魚生个技術一等好。 iaˋ ge cuˇ siiˊ taiˋ ngˇ sangˊ ge giˊ siidˋ idˋ denˋ hoˋ 。 這個廚師切生魚片的技術非常好。
lbk14_086 你愛考廚師个證照，刣生个功夫愛練好來。 ngˇ oi kauˋ cuˇ siiˊ ge ziin zeu ，taiˋ sangˊ ge gungˊ fuˊ oi lien hoˋ loiˇ 。 你要考廚師的證照，取下魚片或肉片的功夫要練好來。
lbk14_087 頭擺人探橋行个功夫一等好。 teuˇ baiˋ nginˇ tam kieuˇ hangˇ ge gungˊ fuˊ idˋ denˋ hoˋ 。 以前的人在河上架橋行走的功夫好得不得了。
lbk14_088 你在社會項混，絕對毋好學著貪財受賄个壞樣式。 ngˇ teˊ sa fi hong fun，qied dui mˇ hoˋ hog doˋ tamˊ coiˇ su fi ge faiˋ iong siidˋ 。 你在社會上混，絕對不要學到貪婪、收人好處的壞習慣。
lbk14_089 該人從旦裡就貪花好色，你絕對毋好紹介若姊同佢相識。 ge nginˇ qiungˇ dan liˊ qiu tamˊ faˊ hau sedˋ ，ngˇ qied dui mˇ hoˋ seu giai ngiaˊ ze tungˇ iˇ xiongˊ siidˋ 。 那個人一直以來都風流好色，你絕對不要介紹你姊姊給他認識。
lbk14_090 好恬恬仔有人講你著著一百萬，喚你先納稅金，這種話你也信，人講：「貪人一斗米，了核半年糧」，正式一息都無爭差。 hoˋ diamˋ diamˋ eˊ iuˊ nginˇ gongˋ ngˇ cog doˋ idˋ bagˋ van ，vonˋ ngˇ xienˊ nab soi gimˊ ，iaˋ zungˋ fa ngˇ iaˇ xin ，nginˇ gongˋ ：「tamˊ nginˇ idˋ deuˋ miˋ ，liauˋ hedˋ ban ngianˇ liongˇ 」，ziin siidˋ idˋ xidˋ duˊ moˇ zenˊ caˊ 。 無緣無故說你中了一百萬，要你先繳稅金，這種話你也信，人家說：「貪人一斗米，虧掉半年糧」，真的一點兒都沒錯。
lbk14_091 你去分人請，將把大塊个來挾，人家會講你「貪㘔狗膣屄」。 ngˇ hi bunˊ nginˇ qiangˋ，jiong baˋ tai kuai ge loiˇ giabˋ ，nginˇ gaˊ voi gongˋ ngˇ 「tamˊ saiˊ gieuˋ ziiˊ baiˇ」。 你去給人請，都挾大塊的肉，人家會說你是「貪吃鬼」。
lbk14_092 頭擺阿爸不時會同𠊎等講：「貪字頭，貧字腳，故所，絕對做毋得去貪人。」 teuˇ baiˋ aˊ baˊ budˋ siiˇ voi tungˇ ngaiˇ nenˊ gongˋ ：「tamˊ sii teuˇ ，pinˇ sii giogˋ ，gu soˋ ，qied dui zo mˇ dedˋ hi tamˊ nginˇ 。」 以前爸爸常常會跟我們說：「貪字頭，貧字腳，所以，絕對不可以貪取別人的錢財。」
lbk14_093 人講：「貪食貪睡，添病減歲」，你再毋過拶志兜仔，身體定著會搣壞。 nginˇ gongˋ ：「tamˊ siid tamˊ soi ，tiamˊ piang gamˋ se 」，ngˇ zai mˇ go zad zii deuˊ eˊ ，siinˊ tiˋ tin cog voi miedˋ faiˋ 。 人家說：「貪吃貪睡，添加病痛減了歲數」，你再不振作點兒，身體一定會搞壞。
lbk14_094 該隻痰火膦蓋難耐，厥兄弟姊妹無半個愛搭佢。 ge zagˋ tamˇ foˋ linˋ goi nanˇ ngai，iaˊ hiungˊ ti jiˋ moi moˇ ban ge oi dabˋ iˇ 。 那個得病又好色的人真是糟糕，他的兄弟姊妹沒半個人要理他。
lbk14_095 做人做事愛實在，「聽過毋當自家做過，看過又毋當親身做。」做過个正得得著經驗。 zo nginˇ zo sii oi siid cai ，「tangˊ go mˇ dong qid gaˊ zo go ，kon go iu mˇ dong qinˊ siinˊ zo 。」zo go ge nang dedˋ leˋ doˋ ginˊ ngiam 。 做人做事要實在，「聽過不如自己做過，看過又不如親身去做。」唯有親身做過才能學到經驗。
lbk14_096 喂！你上便所仰廳下門無關就出來吔！ veˋ！ngˇ song pien soˋ ngiongˋ tangˊ haˊ munˇ moˇ guanˊ qiu cudˋ loiˇ eˇ！ 喂！你上廁所怎麼褲襠拉鍊沒拉好就出來了！
lbk14_097 你恁呢做正式忒超過喔！ ngˇ anˋ neˊ zo ziin siidˋ tedˋ ceuˊ go oˊ！ 你這樣做真的是太過份了喲！
lbk14_098 佢盡好踢足球，歸日仔同球仔踢上踢下。 iˇ qin hau tedˋ zugˋ kiuˇ ，guiˊ ngidˋ eˋ tungˇ kiuˇ eˋ tedˋ songˊ tedˋ haˊ 。 他很喜歡踢足球，整天把球踢上踢下的。
lbk14_099 佢盡雞婆，一哪仔同人𢯭上𢯭下。 iˇ qin gieˇ boˇ ，idˋ naiˋ eˋ tungˇ nginˇ ten songˊ ten haˊ 。 他很熱心，到處幫助他人。
lbk14_100 你愛行過遽兜仔，係無會跈陣毋著。 ngˇ oi hangˇ go giagˋ deuˊ eˊ ，he moˇ voi tenˇ ciin mˇ doˋ 。 你要走快些，要不然會跟不上隊伍。
lbk14_101 聽講厥妹仔上隻月跈人走吔，害佢這恁久食睡毋落。 tangˊ gongˋ iaˊ moi eˋ song zagˋ ngiad tenˇ nginˇ zeuˋ eˇ，hoi iˇ iaˋ anˋ giuˋ siid soi mˇ log。 聽說她女兒上個月跟別人走了，害她最近寢食難安。
lbk14_102 佢從細到大都黏等厥公，一哪仔跈上跈下，故所全美濃分佢遶交吔。 iˇ qiungˇ se do tai duˊ ngiamˇ nenˋ iaˊ gungˊ ，idˋ naiˋ eˋ tenˇ songˊ tenˇ haˊ ，gu soˋ qionˇ miˇ nungˇ bunˊ iˇ lauˊ gauˊ eˇ。 他從小到大都黏著爺爺，到處跟上跟下，所以全美濃都被他走遍了。
lbk14_103 你毋使恁多愁，人講：「藤斷自有篾來駁，船到灘頭水路開」，到時節自然就會有解決个辦法。 ngˇ mˇ siiˋ anˋ doˊ seuˇ ，nginˇ gongˋ ：「tenˇ tonˊ cii iuˊ med loiˇ bogˋ ，sonˇ do tanˊ teuˇ suiˋ lu koiˊ 」，do siiˇ jiedˋ cii ianˇ qiu voi iuˊ giaiˋ giadˋ ge pan fabˋ 。 你不用太過憂慮，俗話說：「藤蔓斷了可用竹篾接續，船到灘頭水路自然會開」，到時自然就會有解決的辦法。
lbk14_104 這兜憲兵企啊挺挺仔，看起來盡緣投。 iaˋ deuˊ hianˋ binˊ kiˊ a tenˋ tenˋ eˊ，kon hiˋ loiˇ qin ianˇ dauˇ 。 這些憲兵站得直挺挺的，看起來很帥。
lbk14_105 這人實在無信用，斷真係「挺挺高一條膦，掩掩覆一個屎胐」。 iaˋ nginˇ siid cai moˇ xin iung ，don ziinˊ he 「tenˋ tenˋ goˊ idˋ tiauˇ linˋ ，amˋ amˋ pugˋ idˋ ge sii fudˋ 」。 這人實在沒信用，真的是「仰躺是一根生殖器，趴著是一個屁股」（只剩一個軀殼）。
lbk14_106 人講：「豆腐倒核吔，豆腐架還在」，你後生人驚麼个，煞猛同佢拚，一定會成功。 nginˇ gongˋ ：「teu fu doˋ hedˋ eˇ，teu fu ga hanˇ coiˊ 」，ngˇ heu sangˊ nginˇ giangˊ maˋ ge ，sadˋ mangˊ tungˇ iˇ bia ，idˋ tin voi siinˇ gungˊ 。 俗話說：「豆腐摔掉了，還有豆腐架」，你年輕人怕什麼，努力打拼，一定會成功。
lbk14_107 這年下大家都無閒啊會死，你還想愛尋人𢯭手，你無聽過「豆腐各人磨，生理各人做」吓？ iaˋ ngianˇ haˊ tai gaˊ duˊ moˇ hanˇ a voi xiˋ ，ngˇ hanˇ xiongˋ oi qimˇ nginˇ ten suˋ ，ngˇ moˇ tangˊ go 「teu fu gogˋ nginˇ mo ，senˊ liˊ gogˋ nginˇ zo 」haˋ ？ 年終時大家都忙得要命，你還想找人幫你忙，你沒聽過「豆腐各自磨，生意各自做」的道理嗎？
lbk14_108 阿宏哥去農會領老鼠藥，準備拿來毒老鼠。 aˊ fenˇ goˊ hi nungˇ fi liangˊ no cuˋ iog ，zunˋ pi naˊ loiˇ teu no cuˋ 。 阿宏哥到農會領老鼠藥，準備拿來毒死老鼠。
lbk14_109 人講：「偷拈食愛看秤星」，就係講做事情目珠愛放過利兜仔！厥爸做會長，你也敢翕佢，毋愛命吔麼？ nginˇ gongˋ ：「teuˊ ngiamˊ siid oi kon ciin senˊ」，qiu he gongˋ zo sii qinˇ mugˋ zuˊ oi biong go li deuˊ eˊ ！iaˊ baˊ zo fi zongˋ ，ngˇ iaˊ gamˋ hibˋ iˇ ，mˇ oiˊ miang eˇ meˇ ？ 俗話說：「做事要看場合」，就是說做事情眼睛要放亮點！他爸爸當會長，你也敢欺負他，不要命了嗎？
lbk14_110 你這個人專門偷㘔扡貓，同𠊎个餅仔偷食淨淨，看你愛仰仔賠𠊎。 ngˇ iaˋ ge nginˇ zonˊ munˇ teuˊ saiˊ iaˋ meu ，tungˇ ngaiˇ ge biangˋ eˋ teuˊ siid qiang qiang ，kon ngˇ oi ngiongˋ eˊ poiˇ ngaiˇ 。 你這個人專門偷吃，把我的餅乾偷吃光了，看你要怎麼賠我。
lbk14_111 這後生仔毋做人，歸日仔食毒，無錢吔就一哪仔偷上偷下，分爺哀盡傷腦筋。 iaˋ heu sangˊ eˋ mˇ zo nginˇ ，guiˊ ngidˋ eˋ siid tug，moˇ qienˇ eˇ qiu idˋ naiˋ eˋ teuˊ songˊ teuˊ haˊ ，bunˊ iaˇ oiˊ qin songˊ noˋ ginˊ 。 這年輕人不學好，整天吸毒，沒錢就到處偷東西，讓父母親傷透腦筋。
lbk14_112 佢等兩兄弟在這仔偷偷㘝㘝，毋知搣麼个漦？ iˇ denˊ liongˋ hiungˊ ti tiˊ iaˋ eˊ teuˊ teuˊ liabˋ liabˋ ，mˇ diˊ miedˋ maˋ ge xiauˇ ？ 他們兩兄弟在這裡偷偷摸摸，不知道在做什麼？
lbk14_113 佢昨暗晡啉啊頭掩目醉，仰仔歸到屋下都毋知。 iˇ coˊ am buˊ limˊ a teuˇ amˊ mugˋ zui ，ngiongˋ eˊ guiˊ do lugˋ kaˊ duˊ mˇ diˊ 。 他昨晚喝得醉醺醺的，怎樣回到家都不知道。
lbk14_114 佢做差事吔，分厥爸念啊頭沉沉仔毋敢臥起來。 iˇ zo caˊ sii eˇ，bunˊ iaˊ baˊ ngiam a teuˇ ciim ciim eˊ mˇ gamˋ ngo hiˋ loiˇ 。 他做錯事了，被他爸爸念得頭低低不敢抬起來。
lbk14_115 𠊎這恁久感冒，到今還頭昏昏仔，人無麼鬆爽。 ngaiˇ iaˋ anˋ giuˋ gamˋ mo ，do ginˊ hanˇ teuˇ funˇ funˇ eˊ ，nginˇ moˇ maˋ sungˊ songˋ 。 我最近感冒，到現在還頭昏腦脹，人不是很舒服。
lbk14_116 人就係恁呢：頭家貪工人个力，工人想頭家个錢；係準著兩儕做得為對方想，毋係盡好吓？ nginˇ qiu he anˋ neˊ ：teuˇ gaˊ tamˊ gungˊ nginˇ ge lid ，gungˊ nginˇ xiongˋ teuˇ gaˊ ge qienˇ ；he zunˋ doˋ liongˋ saˇ zo dedˋ vi dui fongˊ xiongˋ ，mˇ he qin hoˋ haˋ ？ 人就是這樣：資方想勞方的力，勞方想方的錢；如果雙方都能為對方著想，這不是很好嗎？
lbk14_117 頭過酒，二泡茶，係最登真个，啉過个人就知。 teuˇ go jiuˋ ，ngi pau caˇ ，he zuiˋ denˊ ziinˊ ge ，limˊ go ge nginˇ qiu diˊ 。 第一次蒸餾的酒，第二泡的茶是最好的，喝過的人便知道。
lbk14_118 佢今晡日看起來頭光面淨，可能有好事哦！ iˇ ginˊ buˊ ngidˋ kon hiˋ loiˇ teuˇ gongˊ mien qiang ，koˋ nenˇ iuˊ hoˋ sii oˊ ！ 他今天看起來容光煥發，可能有喜事哦！
lbk14_119 這個人外表生來蓋好看，但係不時去醫院看病，這真實係「頭光面淨，一身全病」！ iaˋ ge nginˇ ngoi beuˋ sangˊ loiˇ goi hoˋ kon ，danˋ he budˋ siiˇ hi iˊ ian kon piang ，iaˋ ziinˊ siid he 「teuˇ gongˊ mien qiang ，idˋ siinˊ qionˇ piang」！ 這個人外表長得很壯，但卻常去醫院看病，這真的是「外強中乾、虛有其表」。
lbk14_120 頭擺人講：「頭醫生，二賣冰」，這兩項頭路都蓋好賺。 teuˇ baiˋ nginˇ gongˋ ：「teuˇ iˊ senˊ ，ngi mai benˊ 」，iaˋ liongˋ hong teuˇ lu duˊ goi hoˋ con 。 以前的人說：「第一當醫生，其次是賣冰」，這兩種工作都能賺大錢。
lbk14_121 昨暗晡食忒多酒吔，這下頭慇腦疺嶄然清苦。 coˊ am buˊ siid tedˋ doˊ jiuˋ eˇ，iaˋ ha teuˇ inˊ noˋ bienˋ zamˋ manˇ qinˊ kuˋ 。 昨天晚上喝太多酒了，到現在還頭昏腦漲很痛苦。
lbk14_122 這個人生啊頭尖面劣，蓋無人緣。 iaˋ ge nginˇ sangˊ a teuˇ jiamˊ mien lodˋ ，goi moˇ nginˇ ianˇ 。 這個人五官長得不正，很不得人緣。
lbk14_123 頭擺老人家講：「頭皺毛，二𥍉目」，這兩種人最好毋好交，心計特別多。 teuˇ baiˋ loˋ nginˇ gaˊ gongˋ ：「teuˇ jiu moˊ ，ngi ngiabˋ mugˋ 」，iaˋ liongˋ zungˋ nginˇ zuiˋ hoˋ mˇ hoˋ gauˊ ，ximˊ gi tid pied doˊ 。 以前的老人家說：「有捲髮或眨眼特徵的人」，這兩種人最好不要深交，計謀特別多。
lbk14_124 隔壁个阿三哥耕田盡煞猛，每日頭犁犁仔認真做事。 gagˋ biagˋ ge aˊ samˊ goˊ gangˊ tienˇ qin sadˋ mangˊ ，miˊ ngidˋ teuˇ laiˇ laiˇ eˊ ngin ziinˊ zo se 。 隔壁的阿三哥勤勞耕種，每天低著頭認真工作。
lbk14_125 這個後生仔淨三十零歲就頭毛鬚白，看起來蓋老相。 iaˋ ge heu sangˊ eˋ qiang samˊ siib langˇ se qiu teuˇ moˊ xiˊ pag ，kon hiˋ loiˇ goi loˋ xiong 。 這個年輕人僅三十多歲就頭髮變白，看起來年紀很大。
lbk14_126 頭擺个老人家會講：「頭那慇慇，屙屎打踜蹭」，這就係身體毋好个時節會出現个現象。 teuˇ baiˋ ge loˋ nginˇ gaˊ voi gongˋ ：「teuˇ naˇ inˊ inˊ ，oˊ siiˋ daˋ linˇ qinˊ 」，iaˋ qiu he siinˊ tiˋ mˇ hoˋ ge siiˇ jiedˋ voi cudˋ hian ge hian xiong 。 以前的老人家會說：「頭昏昏的，連上完廁所出來都站不穩」，這就是身體欠安的時候會出現的現象。
lbk14_127 阿義嫂見看著人就頭頷尾鑿，修養蓋好。 aˊ ngi soˋ gian kon doˋ nginˇ qiu teuˇ ngamˋ miˊ cog，xiuˊ iongˊ goi hoˋ 。 阿義嫂一看到人就頻頻向人點頭、問候，很有修養。
lbk14_128 這個後生仔無教著，講話頭獒獒仔蓋會著樣仔。 iaˋ ge heu sangˊ eˋ moˇ gau doˋ ，gongˋ fa teuˇ ngauˇ ngauˇ eˊ goi voi doˋ iong eˊ。 這個年輕人不受教，講話頭都會歪向一邊，一副很厲害的樣子。
lbk14_129 這個人蓋驕傲，看人頭臥臥仔，蓋不受教。 iaˋ ge nginˇ goi gieuˊ ngau ，kon nginˇ teuˇ ngo ngo eˊ ，goi budˋ su gau 。 這個人很驕傲，看人頭都往上望，很沒禮貌。
lbk14_130 好多事个人，動啊著就頭偏偏仔，蓋像愛打人樣仔。 hau doˊ sii ge nginˇ ，tungˊ a doˋ qiu teuˇ pienˊ pienˊ eˊ，goi qiong oi daˋ nginˇ iong eˊ 。 愛鬧事的人，動不動脖子就歪向一邊，很像要打人的樣子。
lbk14_131 佢昨晡日騎車仔騎啊嶄然遽，橫啊頭破耳滑。 iˇ coˊ buˊ ngidˋ kiˇ caˊ eˋ kiˇ a zamˋ manˇ giagˋ ，vang a teuˇ po ngiˋ vad 。 他昨天騎車騎得非常快，跌倒傷到頭和耳朵都破裂了。
lbk14_132 過年个時節，大家人會去廟堂拜佛拈籤，希望做得拈著頭籤頭號，看啊有好運無？ go ngianˇ ge siiˇ jiedˋ ，tai gaˊ nginˇ voi hi meu tongˇ bai fud ngiamˊ qiamˊ ，hiˊ mong zo dedˋ ngiamˊ doˋ teuˇ qiamˊ teuˇ ho ，kon a iuˊ hoˋ iun moˇ ？ 過年的時候，大家都會去廟裡拜佛抽籤，希望能夠抽到上上籤，看看是否有好運？
lbk14_133 頭擺客家婦人家蓋才過，食飯都頭磬磬仔毋敢看桌面。 teuˇ baiˋ hagˋ gaˊ fu nginˇ gaˊ goi coiˇ go ，siid fan duˊ teuˇ qinˋ qinˋ eˊ mˇ gamˋ kon zogˋ mien 。 以前的客家婦女很可憐，吃飯都要低著頭不敢抬頭看桌面。
lbk14_134 頭擺个細妹仔行嫁，定著會搭頭梳腳襪做嫁妝。 teuˇ baiˋ ge se moi eˋ hangˇ ga ，tin cog voi dabˋ teuˇ siiˊ giogˋ madˋ zo ga zongˊ 。 以前的女孩子結婚，一定會準備梳子和襪子當嫁妝。
lbk14_135 這個人生著頭大面四方，下二擺怕蓋有成就哦！ iaˋ ge nginˇ sangˊ doˋ teuˇ tai mien xi fongˊ ，ha ngi baiˋ pa goi iuˊ siinˇ qiu oˊ ！ 這個人長得很有福相，以後可能很有成就哦！
lbk14_136 阿叔頭大耳長，大家講佢係蓋有福相个人！ aˊ sugˋ teuˇ tai ngiˋ congˇ ，tai gaˊ gongˋ iˇ he goi iuˊ fugˋ xiong ge nginˇ ！ 叔叔頭大、耳垂長，大家都說他是很有福相的人。
lbk14_137 這個細人仔頭探探仔，緊看人屋肚个東西，係毋係想偷啊？ iaˋ ge se nginˇ eˋ teuˇ tam tam eˊ ，ginˋ kon nginˇ vugˋ duˋ ge dungˊ xiˊ ，he mˇ he xiongˋ teuˊ aˇ ？ 這個小孩子探頭探腦的，看著人家房子裡的東西，是不是想偷啊？
lbk14_138 𠊎昨暗晡睡目睡啊頸根偏著，故所這下頭歪歪仔停動毋得吔。 ngaiˇ coˊ am buˊ soi mugˋ soi a giangˋ ginˊ pienˊ doˋ ，gu soˋ iaˋ ha teuˇ vaiˊ vaiˊ eˊ tinˊ tungˊ mˇ dedˋ eˇ。 我昨晚睡覺睡得脖子扭到，所以現在頭歪歪的動彈不得了。
lbk14_139 聽講廣東个客家人食狗肉蓋講究，定著係「頭黃二烏三白四花拉」。 tangˊ gongˋ gongˋ dungˊ ge hagˋ gaˊ nginˇ siid gieuˋ ngiugˋ goi gongˋ giu ，tin cog he「 teuˇ vongˇ ngi vuˊ samˊ pag xi faˊ laˊ 」。 聽說廣東的客家人吃狗肉很講究，一定是「一黃二黑三白四花」的順序。
lbk14_140 你這幾下日斯去做賊麼呢？搣啊頭烏面暗像鬼樣仔。 ngˇ iaˋ giˋ haˊ ngidˋ siiˇ hi zo ced meˇ noˋ？miedˋ a teuˇ vuˊ mien am qiong guiˋ iong eˊ 。 你這幾天是去當小偷了嗎？搞得臉色烏黑像鬼一樣。
lbk14_141 你頭側側仔緊看人屋下，係毋係想愛做麼个？ ngˇ teuˇ zedˋ zedˋ eˊ ginˋ kon nginˇ lugˋ kaˊ ，he mˇ he xiongˋ oi zo maˋ ge ？ 你側著頭一直看人家家裡，是不是想做什麼？
lbk14_142 毋好覺得你頭捉捉仔，𠊎就會驚你喔！ mˇ hoˋ gogˋ doˋ ngˇ teuˇ zogˋ zogˋ eˊ ，ngaiˇ qiu voi giangˊ ngˇ o ！ 不要以為你一副氣勢凌人的樣子，我就會怕你喔！
lbk14_143 蓋久無看著吔，你斯身體毋好係麼，仰頭腫腳醉呢？ goi giuˋ moˇ kon doˋ eˇ，ngˇ siiˇ siinˊ tiˋ mˇ hoˋ he meˇ，ngiongˋ teuˇ zungˋ giogˋ zui noˋ ？ 很久沒看到了，你是身體不好嗎，怎麼頭腳水腫成這樣呢？
lbk14_144 阿新伯姆毋知發麼个病，看去頭腫面冇，蓋得人驚哦！ aˊ xinˊ bagˋ meˊ mˇ diˊ bodˋ maˋ ge piang ，kon hi teuˇ zungˋ mien pang ，goi dedˋ nginˇ giangˊ oˊ ！ 阿新伯母不知道生什麼病，看起來頭腫臉腫，很嚇人哦！
lbk14_145 阿叔文學素養盡高，尤其盡好詩詞，故所，見堵著人就挷等人題詩作對，一等生趣。 aˊ sugˋ vunˇ hog su iongˊ qin goˊ ，iuˇ kiˇ qin hau siiˊ ciiˇ ，gu soˋ，gian duˇ doˋ nginˇ qiu bangˊ denˋ nginˇ tiˇ siiˊ zogˋ dui ，idˋ denˋ senˊ qi 。 叔叔文學素養很高，尤其特別喜歡詩詞，所以，逢人就拉著人家題詩作對，很好玩。
lbk14_146 你覺得𠊎恁戇吓？你這種「墊鴨仔上田脣」个把戲，𠊎早都看出來吔。 ngˇ gogˋ doˋ ngaiˇ anˋ ngong haˋ？ngˇ iaˋ zungˋ 「tiabˋ abˋ eˋ songˊ tienˇ siinˇ 」ge baˋ hi ，ngaiˇ zoˋ duˊ kon cudˋ loiˇ eˇ。 你以為我有這麼笨嗎？你這種「利用他人做犧牲品，來成就自己」的把戲，我早就看出來了。
lbk14_147 雖然佢這個位仔係貼人額个，但係佢盡煞猛做。 suiˊ ianˇ iˇ iaˋ ge vi eˋ he tiabˋ nginˇ ngiagˋ ge ，danˋ he iˇ qin sadˋ mangˊ zo 。 雖然他這個職位是補位的，但他還是很努力的做。
lbk14_148 頭擺，婦人家係降著細妹仔，就會分屋下怨嘆講降著墊錢貨，實在冤枉。 teuˇ baiˋ ，fu nginˇ gaˊ he giung doˋ se moi eˋ ，qiu voi bunˊ lugˋ kaˊ ian tan gongˋ giung doˋ tiabˋ qienˇ fo ，siid cai ianˊ vongˋ 。 以前，婦女如果生了女兒，就會被家裡人埋怨說生了個賠錢貨，實在冤枉。
lbk14_149 一般年節拜喏，都有一個長輩代表會說好話，祈求保佑家族添丁進財、萬年富貴。 idˋ banˊ ngianˇ jiedˋ bai iaˊ，duˊ iuˊ idˋ ge zongˋ pi toi beuˋ voi sodˋ hoˋ fa ，kiˇ kiuˇ boˋ iu gaˊ cug tiamˊ denˊ jin coiˇ 、van ngianˇ fu gui 。 一般年節拜拜時，都有一個長輩的代表會說好話，祈求保佑家族添丁進財、萬年富貴。
lbk14_150 既然來吔就留下來食夜怕麼个，添人無添雞，毋使恁仔細。 gi ianˇ loiˇ eˇ qiu liuˇ haˊ loiˇ siid ia pa maˋ ge ，tiamˊ nginˇ moˇ tiamˊ gieˊ ，mˇ siiˋ anˋ ziiˋ se 。 既然來了就留下來吃晚餐有什麼關係，添人不添雞，不用那麼客氣。
lbk14_151 今晡日去同阿姊𢯭手搬家，搬吔歸日仔，斷真悿死人。 ginˊ buˊ ngidˋ hi tungˇ aˊ ze ten suˋ banˊ gaˊ ，banˊ eˇ guiˊ ngidˋ eˋ ，don ziinˊ tiamˋ xiˋ nginˇ 。 今天去幫姊姊搬家，搬了一整天，真的累死人了。
lbk14_152 毋好在膨凳項跳上跳下，兩下手扳就會分你等蹬漯。 mˇ hoˋ tiˊ pong den hong tiauˇ songˊ tiauˇ haˊ，liongˋ ha suˋ banˋ qiu voi bunˊ ngˇ denˊ demˋ labˋ 。 不要在沙發上跳上跳下，很快就會被你們跳垮了。
lbk14_153 該細人仔一等蠻皮，下下跳上跌落，做爺哀个正式清苦。 ge se nginˇ eˋ idˋ denˋ manˇ piˇ ，ha ha tiauˇ songˊ diedˋ log ，zo iaˇ oiˊ ge ziin siidˋ qinˊ kuˋ 。 那個小孩非常頑皮，一直不停的跳上跳下，做父母的真的很辛苦。
lbk14_154 你仰不時出去外背尞，歸來衫褲就丟核吔。 ngˇ ngiongˋ budˋ siiˇ cudˋ hi lo boi liau ，guiˊ loiˇ samˊ fu qiu tiauˋ hedˋ eˇ。 你怎麼常常出去外面玩，回來衣服就丟掉了。
lbk14_155 該人雖然講話特特突突講毋正，但係做事蓋煞猛。 ge nginˇ suiˊ ianˇ gongˋ fa tid tid tud tud gongˋ mˇ zang ，danˋ he zo sii goi sadˋ mangˊ 。 那個人雖然說話結結巴巴不清楚，但是做事非常認真。
lbk14_156 你已經盡力吔，就毋使再緊愁他人會有麼个話緒，你無聽人講過：「天恁好都有人嫌」吓？ ngˇ iˋ ginˊ qin lid eˇ，qiu mˇ siiˋ zai ginˋ seuˇ taˊ nginˇ voi iuˊ maˋ ge fa xi ，ngˇ moˇ tangˊ nginˇ gongˋ go：「tienˊ anˋ hoˋ duˊ iuˊ nginˇ hiamˇ 」haˋ？ 你已經盡力了，就不要再一直擔心別人會說什麼，你沒聽人家說過：「老天爺這麼好都有人嫌棄」嗎？
lbk14_157 這對新人郎才女貌又蓋鬥搭，正式係天造地設个一對。 iaˋ dui xinˊ nginˇ nongˇ coiˇ ngˋ mau iu goi deu dabˋ，ziin siidˋ he tienˊ co ti sadˋ ge idˋ dui 。 這對新人郎才女貌又很有默契，真是天造地設的一對。
lbk14_158 佢這個天銃，根本都毋知麼个漦濞，就濫糝緊講，害大家緊張啊發脹。 iˇ iaˋ ge tienˊ cung ，ginˊ bunˋ duˊ mˇ diˊ maˋ ge xiauˇ pi，qiu namˋ samˋ ginˋ gongˋ ，hoi tai gaˊ ginˋ zongˊ a bodˋ zong 。 他這個天兵，根本都搞不清楚狀況，就隨便亂說，害大家緊張得要命。
lbk14_159 你毋使驚佢，天仔五里，佢管毋到這仔。 ngˇ mˇ siiˋ giangˊ iˇ ，tienˊ eˋ ngˋ liˊ ，iˇ gonˋ mˇ do iaˋ eˊ 。 你別怕他，天高皇帝遠，他管不到這裡。
lbk14_160 佢盡齧察，罕得請人，這擺佢講愛請你，天狗食月正一擺，你就共快同佢答應。 iˇ qin ngadˋ cadˋ ，honˋ dedˋ qiangˋ nginˇ ，iaˋ baiˋ iˇ gongˋ oi qiangˋ ngˇ ，tienˊ gieuˋ siid ngiad nang idˋ baiˋ ，ngˇ qiu kiung kuai tungˇ iˇ dabˋ in 。 他很吝嗇，難得請客，這次他說要請你，機會難得，你就趕快答應他。
lbk14_161 來這公司上班吔恁多年，第一擺聽著頭家講愛請大家出國遊覽，斷真係天狗食日呢！ loiˇ iaˋ gungˊ siiˊ songˊ banˊ eˇ anˋ doˊ ngianˇ，ti idˋ baiˋ tangˊ doˋ teuˇ gaˊ gongˋ oi qiangˋ tai gaˊ cudˋ guedˋ iuˇ nam，don ziinˊ he tienˊ gieuˋ siid ngidˋ neˊ ！ 來這公司上班了好幾年，第一次聽到老闆說要請大家出國旅遊，真的是機會難得呢！
lbk14_162 𠊎做生理從旦里來就天公地斷，故所人客正會緊來緊多。 ngaiˇ zo senˊ liˊ qiungˇ dan liˊ loiˇ qiu tienˊ gungˊ ti don ，gu soˋ nginˇ hagˋ nang voi ginˋ loiˇ ginˋ doˊ 。 我做生意一向就很公平，所以客人才會越來越多。
lbk14_163 日本時代个台灣農民生活盡苦，種个蔗仔全部都愛繳分會社去做糖，故所會有人講：「天下第一戇，種甘蔗分會社磅。」 ngidˋ bunˋ siiˇ toi ge toiˇ vanˊ nungˇ minˇ senˊ fad qin kuˋ ，zung ge za eˋ qionˇ pu duˊ oi gieuˋ bunˊ fi sa hi zo tongˇ ，gu soˋ voi iuˊ nginˇ gongˋ ：「tienˊ haˊ ti idˋ ngong ，zung gamˊ za bunˊ fi sa bongˇ 。」 日據時代的台灣農民生活困苦，所種的甘蔗都要繳到會社去製糖，所以有人說：「天下最儍的，莫過於種甘蔗讓會社稱重。」
lbk14_164 阿福哥盡樂線，雖然下把會堵著毋順序，毋過佢會㖸㖸仔講：「天爛核都還補得，這小可事情無麼个要緊啦！」 aˊ fugˋ goˊ qin log xien ，suiˊ ianˇ ha baˋ voi duˇ doˋ mˇ sun xi ，mˇ go iˇ voi nagˋ nagˋ eˊ gongˋ ：「tienˊ lan hedˋ duˊ hanˇ buˋ dedˋ ，iaˋ seuˋ koˋ sii qinˇ moˇ maˋ ge ieu ginˋ laˋ！」 阿福哥很樂觀，雖然偶爾會遇到不順利，不過他還是會笑笑的說：「即使天爛了都可以補，這一點小事情不要緊啦！」
lbk14_165 做事情愛先計畫清楚來，知得先做麼个，後做麼个，堵著問題正毋會交手亂錯，人講：「天晴愛防落雨」，就係恁呢个意思。 zo sii qinˇ oi xienˊ gie vag qinˊ cuˋ loiˇ ，diˊ dedˋ xienˊ zo maˋ ge ，heu zo maˋ ge ，duˇ doˋ mun tiˇ nang mˇ voi gauˊ suˋ non co ，nginˇ gongˋ ：「tienˊ qiangˇ oi fongˇ log iˋ 」，qiu he anˋ neˊ ge i sii 。 做事情要先計畫清楚，知道該先做什麼，後做什麼，遇到問題時才不會手忙腳亂，俗話說：「天晴時就要預防下雨」，就是這個意思。
lbk14_166 今晡日天晴黌黌，大家共下出來去行行啊！ ginˊ buˊ ngidˋ tienˊ qiangˇ vangˋ vangˋ，tai gaˊ kiung ha cudˋ loiˇ hi hangˇ hangˇ aˋ ！ 今天天氣晴朗，大家一起出去走走！
lbk14_167 頭擺个農家人為著生活盡清苦又蓋無閒，故所細人仔大部份都係天生天養，無恁閒去渡。 teuˇ baiˋ ge nungˇ gaˊ nginˇ vi doˋ senˊ fad qin qinˊ kuˋ iu goi moˇ hanˇ ，gu soˋ se nginˇ eˋ tai pu fun duˊ he tienˊ senˊ tienˊ iongˊ ，moˇ anˋ hanˇ hi tu 。 早期的農人為了生活非常辛苦忙碌，所以小孩子大多無暇照顧，生死由天。
lbk14_168 今都天烏地暗吔，你還無打算愛收工麼？ ginˊ duˊ tienˊ vuˊ ti am eˇ，ngˇ hanˇ moˇ daˋ son oi suˊ gungˊ meˇ ？ 現在天色已暗，你還不打算收工休息嗎？
lbk14_169 頭擺不時會聽著老人家講：「人不自私，天誅地滅。」毋知有影無？ teuˇ baiˋ budˋ siiˇ voi tangˊ doˋ loˋ nginˇ gaˊ gongˋ ：「nginˇ budˋ cii siiˊ ，tienˊ zuˊ ti mied 。」mˇ diˊ iuˊ iangˋ moˇ ？ 以前經常聽到老人家講：「人若不自私，會遭天地滅殺。」不知道是否真的？
lbk14_170 這猴哥聽著講做得出國尞又有錢賺，就舂等去，毋知這係賣毒集團个計謀，分人扭著就猴吔，斷真係「田螺取肚飽，毋知背囊生溜苔」！ iaˋ heuˇ goˊ tangˊ doˋ gongˋ zo dedˋ cudˋ guedˋ liau iu iuˊ qienˇ con ，qiu zungˊ nenˋ hi ，mˇ diˊ iaˋ he mai tug xib tonˇ ge gie meuˇ ，bunˊ nginˇ neuˋ doˋ qiu heuˇ eˇ，don ziinˊ he 「tienˇ loˇ qiˋ duˋ bauˋ ，mˇ diˊ boi nongˇ sangˊ liuˊ toiˇ 」！ 這傢伙聽到可以出國玩又有錢賺，就搶著去，不知道這是販毒集團的計謀，若被捉到就完蛋了，真的是「只顧吃而不知危險將至、性命堪憂」啊！
lbk14_171 頭擺美濃人無麼个魚、肉，田螺湯、蜆仔味就係最好食个野味。 teuˇ baiˋ miˇ nungˇ nginˇ moˇ maˋ ge ngˇ 、ngiugˋ ，tienˇ loˇ tongˊ 、hanˋ eˋ mi qiu he zuiˋ hoˋ siid ge iaˊ mi 。 早期的美濃人沒什麼魚、肉，田螺湯和蜆的滋味就是最好吃的野味。
lbk14_172 老古人講：「田愛自家耕種，子愛親身來降。」想愛他人𢯭手，毋當自家煞猛過贏。 loˋ guˋ nginˇ gongˋ ：「tienˇ oi qid gaˊ gangˊ zung ，ziiˋ oi qinˊ siinˊ loiˇ giung 。」xiongˋ oi taˊ nginˇ ten suˋ ，mˇ dong qid gaˊ sadˋ mangˊ go iangˇ 。 俗話說：「田要自己努力耕種，兒子要自己親生的才有用。」想要別人幫忙，不如自己努力更好。
lbk14_173 佢盡煞猛，每日愛田頭田尾都巡交吔正肯歸去食飯。 iˇ qin sadˋ mangˊ，miˊ ngidˋ oi tienˇ teuˇ tienˇ miˊ duˊ sunˇ gauˊ eˇ nang henˋ guiˊ hi siid fan 。 他很勤勞，每天要把整個田園都巡視完畢才肯回家吃飯。
lbk14_174 佢盡認真，每擺表演之前，絕對愛同大大細細个事情檢查啊定定著著吔，正肯轉擺。 iˇ qin ngin ziinˊ ，miˊ baiˋ beuˋ ianˊ ziiˊ qienˇ ，qied dui oi tungˇ tai tai se se ge sii qinˇ giamˋ caˇ a tin tin cog cog eˇ，nang henˋ zonˋ baiˋ 。 他很認真，每次表演之前，一定要把大大小小的事情檢查得一切都確定好後，才肯休息。
lbk14_175 天有息把暗吔，你駛車仔愛定定仔吓！ tienˊ iuˊ xidˋ baˋ am eˇ，ngˇ siiˋ caˊ eˋ oi tin tin eˊ haˇ ！ 天色有點暗了，你開車子要小心些唷！
lbk14_176 前幾日正想講用年終獎金來換張新引擎，無愐著今年公司景氣毋好講愛裁員，斷真係「暢吂過，愁就到」喔！ qienˇ giˋ ngidˋ nang xiongˋ gongˋ iung ngianˇ zungˊ jiongˋ gimˊ loiˇ von zongˊ xinˊ enˊ jinˋ ，moˇ menˋ doˋ ginˊ ngianˇ gungˊ siiˊ ginˋ hi mˇ hoˋ gongˋ oi caiˇ ianˇ ，don ziinˊ he 「tiong mangˇ go ，seuˇ qiu do 」oˊ！ 前幾天剛在想用年終獎金換部新機車，沒料到今年公司不景氣說要裁員，真的是「快樂未過，憂愁便到」呀！
lbk14_177 佢歸日仔暢暢瀉瀉，毋知去哪仔做猴。 iˇ guiˊ ngidˋ eˋ tiong tiong xia xia ，mˇ diˊ hi naiˋ eˋ zo heuˇ 。 他整天遊手好閒，不知道去哪裡鬼混。
lbk14_178 恁久做事做到嶄然𤸁，行路拖腳毋贏。 anˋ giuˋ zo se zo do zamˋ manˇ kioi ，hangˇ lu toˊ giogˋ mˇ iangˇ 。 最近做事做得非常累，走路腳步沉重。
lbk14_179 這個人做生理無實在、又無資金，不時拖來掩去，𠊎看怕做毋久。 iaˋ ge nginˇ zo senˊ liˊ moˇ siid cai 、iu moˇ ziiˊ gimˊ ，budˋ siiˇ toˊ loiˇ amˊ hi ，ngaiˇ kon pa zo mˇ giuˋ 。 這個人做生意不實在，又沒本錢，時常以多補少，依我看應該做不久。
lbk14_180 這隻狗嫲仔拖細狗仔，拖上拖下，毋知愛拖去哪庰哦！ iaˋ zagˋ gieuˋ maˇ eˋ toˊ se gieuˋ eˋ ，toˊ songˊ toˊ haˊ ，mˇ diˊ oi toˊ hi naiˋ biang oˊ ！ 這隻母狗拖著小狗，拖來拖去，不知要拖去哪裡隱藏。
lbk14_181 佢等兩儕無緣，動啊著就拖拖扯扯。 iˇ denˊ liongˋ saˇ moˇ ianˇ ，tungˊ a doˋ qiu toˊ toˊ caˋ caˋ 。 他們兩人沒有緣份，動不動就爭執拉扯。
lbk14_182 佢兩姐妹毋鬥搭，不時拖拖𢱤𢱤奸來奸去。 iˇ liongˋ jiˋ moi mˇ deu dabˋ ，budˋ siiˇ toˊ toˊ sungˋ sungˋ gianˊ loiˇ gianˊ hi 。 她們兩姐妹沒默契，時常拉扯互相推諉。
lbk14_183 綯東西愛綯緪來，正毋會㪐核。 toˇ dungˊ xiˊ oi toˇ henˇ loiˇ ，nang mˇ voi lodˋ hedˋ 。 綁東西要綁緊，才不會鬆脫。
lbk14_184 這個人蓋雞婆，淨做著息把事就愛討功望償。 iaˋ ge nginˇ goi gieˇ boˇ ，qiang zo doˋ xidˋ baˋ sii qiu oi toˋ gungˊ mong songˇ 。 這個人很愛管閒事，只做了點事就要邀功討賞。
lbk14_185 阿滿叔雖然戇戇，但係乜有討姐仔。 aˊ manˊ sugˋ suiˊ ianˇ ngong ngong ，danˋ he me iuˊ toˋ jiaˋ eˋ 。 阿滿叔雖然傻傻的，但是也有娶老婆。
lbk14_186 美濃人講：「討食仔也有草鞋親」，做毋得看人毋起喲！ miˇ nungˇ nginˇ gongˋ ：「toˋ siid eˋ iaˊ iuˊ coˋ haiˇ qinˊ 」，zo mˇ dedˋ kon nginˇ mˇ hiˋ ioˊ ！ 美濃人說：「乞丐也有三五個好朋友」，不可以看不起人哦！
lbk14_187 做討食个人也係出家人，愛學討食化緣，係無會餓死喲！ zo toˋ siid ge nginˇ iaˊ he cudˋ gaˊ nginˇ ，oi hog toˋ siid fa ianˇ ，he moˇ voi ngo xiˋ ioˊ！ 當乞丐或是出家人，要學習乞討化緣，不然會餓死哦！
lbk14_188 頭擺个細人仔硬清苦，討食教化也愛跈爺哀。 teuˇ baiˋ ge se nginˇ eˋ ang qinˊ kuˋ ，toˋ siid gau fa iaˊ oi tenˇ iaˇ oiˊ 。 以前的小孩再怎麼貧困，當乞丐也要跟著父母。
lbk14_189 「討食毋得三日過，三日過吔有皇帝都毋做」，這係老古人取笑討食仔个俗語。 「toˋ siid mˇ dedˋ samˊ ngidˋ go ，samˊ ngidˋ go eˇ iuˊ fongˇ ti duˊ mˇ zo 」，iaˋ he loˋ guˋ nginˇ qiˋ seu toˋ siid eˋ ge xiug ngiˊ 。 「一開始要飯前三天很難熬，熬過三天後，有皇帝寶座都不肯坐」，這是老祖宗取笑乞丐的俗語。
lbk14_190 「討食毋使分恁多，分吔多來會唱歌」，這句話表示看毋起討食仔。 「toˋ siid mˇ siiˋ bunˊ anˋ doˊ ，bunˊ eˇ doˊ loiˇ voi cong goˊ 」，iaˋ gi fa beuˋ sii kon mˇ hiˋ toˋ siid eˋ 。 「施給乞丐的財物不能太多，給多了他會不知足」，這句話表示看不起乞丐。。
lbk14_191 「討食乜有三年个好運」，意思係雖然討食，也可能會有出頭个日仔。 「toˋ siid me iuˊ samˊ ngianˇ ge hoˋ iun 」，i sii he suiˊ ianˇ toˋ siid，iaˊ koˋ nenˇ voi iuˊ cudˋ teuˇ ge ngidˋ eˋ 。 「風水輪流轉，乞丐也可能會有三年的好運」，意思是雖然是乞丐，也可能會有出人頭地的一天。
lbk14_192 這個人好食懶做、命底又毋好，人會㖸佢「討食命，皇帝嘴」。 iaˋ ge nginˇ hau siid nanˊ zo 、miang daiˋ iu mˇ hoˋ ，nginˇ voi nagˋ iˇ 「toˋ siid miang ，fongˇ ti zoi 」。 這個人好吃懶做，命又不好，人們會笑他「不自量力、不懂自愛」。
lbk14_193 若事情交分𠊎辦，絕對辦啊妥妥當當，你做你放心。 ngiaˊ sii qinˇ gauˊ bunˊ ngaiˇ pan ，qied dui pan a toˋ toˋ dong dong ，ngˇ zo ngˇ fong ximˊ 。 你的事情交給我辦，絕對辦得妥善穩當，你儘管放心。
lbk14_194 老上人有講：「討心臼毋使暢，降倈仔毋使歡喜。」這係講討心臼同降倈仔，毋使望忒多。 loˋ song nginˇ iuˊ gongˋ ：「toˋ ximˊ kiuˊ mˇ siiˋ tiong ，giung lai eˋ mˇ siiˋ fonˊ hiˋ 。」iaˋ he gongˋ toˋ ximˊ kiuˊ tungˇ giung lai eˋ ，mˇ siiˋ mong tedˋ doˊ 。 古人有說：「娶媳婦、生兒子都不要高興得太早，以後好壞還未知。」這表示對於娶媳婦、生兒子，不要期望太高。
lbk14_195 這個人打官司打吔盡久，恁久聽講無罪吔，正式脫軛吔喲！ iaˋ ge nginˇ daˋ gonˊ siiˊ daˋ eˇ qin giuˋ ，anˋ giuˋ tangˊ gongˋ moˇ cui eˇ ，ziin siidˋ todˋ agˋ eˇ ioˊ ！ 這個人打官司打了很久，最近聽說判無罪了，真的脫出困局了喲！
lbk14_196 你做事情不時脫孿，會分人看毋起呢！ ngˇ zo sii qinˇ budˋ siiˇ todˋ langˇ ，voi bunˊ nginˇ kon mˇ hiˋ neˊ ！ 你做事情時常脫節，會讓人看不起呢？
lbk14_197 你賣个東西仰恁愕，不時脫孿㪐圈呢？ ngˇ mai ge dungˊ xiˊ ngiongˋ anˋ ngogˋ ，budˋ siiˇ todˋ langˇ lodˋ kianˊ noˋ ？ 你賣的東西怎麼這麼差，常常零件鬆脫呢？
lbk14_198 這個人公仔都脫孿絲散吔，仰還毋盼得丟核？ iaˋ ge nginˇ gungˊ eˋ duˊ todˋ langˇ xiˊ san eˇ ，ngiongˋ hanˇ mˇ pan dedˋ tiuˋ hedˋ ？ 這個玩偶已經都解體了，怎麼還捨不得丟掉？
lbk14_199 厥婆這下病啊蓋嚴重，故所身邊脫人毋得。 iaˊ poˇ iaˋ ha piang a goi ngiamˇ cung ，gu soˋ siinˊ bienˊ todˋ nginˇ mˇ dedˋ 。 他外婆現在病得很嚴重，所以隨時要有人在旁邊照顧。
lbk14_200 佢這擺同人鬥股做生理了啊脫皮，實在才過。 iˇ iaˋ baiˋ tungˇ nginˇ deu guˋ zo senˊ liˊ liauˋ a todˋ piˇ ，siid cai coiˇ go 。 他這次跟人家合夥做生意，損失嚴重，實在可憐。
lbk14_201 你毋聽話，交著這兜毋像樣个朋友，這下想愛脫鍋就難吔。 ngˇ mˇ tangˊ fa ，gauˊ doˋ iaˋ deuˊ mˇ qiong iong ge penˇ iuˊ ，iaˋ ha xiongˋ oi todˋ vog qiu nanˇ eˇ。 你不聽話，結交了這些不像樣的朋友，現在想脫離麻煩就難了。
lbk14_202 你交著恁黏人个細妹仔，這下斯怕脫爪毋得吔。 ngˇ gauˊ doˋ anˋ ngiamˇ nginˇ ge se moi eˋ ，iaˋ ha siiˇ pa todˋ zauˋ mˇ dedˋ eˇ。 你交了這麼黏人的女朋友，這下子恐怕很難脫身了。
lbk14_203 阿輝嫂下禮拜愛討心臼吔，恁多日看佢托盤𣛮䈪都搬出來清吔。 aˊ fiˊ soˋ ha liˊ bai oi toˋ ximˊ kiuˊ eˇ，anˋ doˊ ngidˋ kon iˇ togˋ panˇ cang gagˋ duˊ banˊ cudˋ loiˇ qinˊ eˇ。 阿輝嫂下周要娶媳婦了，這幾天看她盤子、禮籃都搬出來清理了。
lbk14_204 這下个經濟分政治搣啊鬍鬚麻加，𠊎看斯「台灣無三日个好光景」吔。 iaˋ ha ge ginˊ ji bunˊ ziin zii miedˋ a fuˇ xiˊ maˇ gaˊ ，ngaiˇ kon siiˇ 「toiˇ vanˊ moˇ samˊ ngidˋ ge hoˋ gongˊ ginˋ 」eˇ。 現在的經濟被政治搞得亂七八糟，我看「台灣即使有好光景，也是曇花一現」了。
lbk14_205 斷烏目麻吔，阿明牯仰還毋曾歸來？ tonˊ vuˊ mugˋ maˇ eˇ ，aˊ minˇ guˋ ngiongˋ hanˇ mˇ qienˇ guiˊ loiˇ ？ 天色都已經暗了，阿明怎麼還沒回來？
lbk14_206 這兜草恁長，割下來摶草結起火毋會差。 iaˋ deuˊ coˋ anˋ congˇ ，godˋ haˊ loiˇ tonˇ coˋ giedˋ hiˋ foˋ mˇ voi caˊ 。 這些草這麼長，割下來紮草團起火不錯。
lbk14_207 你揣看啊，𠊎今晡日買吔麼个東西歸來分你。 ngˇ tonˇ kon a ，ngaiˇ ginˊ buˊ ngidˋ maiˊ eˇ maˋ ge dungˊ xiˊ guiˊ loiˇ bunˊ ngˇ 。 你猜猜看，我今天買了什麼東西回來給你。
lbk14_208 頭擺，客家个婦人家一有閒就在該湯湯洗洗，實在煞猛。 teuˇ baiˋ ，hagˋ gaˊ ge fu nginˇ gaˊ idˋ iuˊ hanˇ qiu teˊ geˋ tongˊ tongˊ seˋ seˋ ，siid cai sadˋ mangˊ 。 以前，客家婦女一有空就在那裡清清洗洗，實在勤勞。
lbk14_209 這間店个麵食起來湯湯水水，實在蓋壞食。 iaˋ gianˊ diam ge mien siid hiˋ loiˇ tongˊ tongˊ suiˋ suiˋ ，siid cai goi faiˋ siid 。 這間店的麵吃起來湯水太多沒什麼料，實在很難吃。
lbk14_210 該人毋老實，不管做麼个都係度度搏搏想愛批人。 ge nginˇ mˇ loˋ siid ，budˋ gonˋ zo maˋ ge duˊ he tu tu bogˋ bogˋ xiongˋ oi piˊ nginˇ 。 那個人不老實，不管做什麼都用計暗中佔人便宜。
lbk14_211 頭擺，農家人都會同塗鴨春拈起來煎吔食。 teuˇ baiˋ ，nungˇ gaˊ nginˇ duˊ voi tungˇ tuˇ abˋ cunˊ ngiamˊ hiˋ loiˇ jienˊ eˇ siid 。 以前，農家人都會把未孵化的鴨蛋撿起來煎了吃。
lbk14_212 你講啊口涎波潑，全部都係塗塞膣話，哪有效呢？ ngˇ gongˋ a heuˋ lanˊ boˊ bad ，qionˇ pu duˊ he tuˇ sedˋ ziiˊ fa ，nai iuˊ hauˋ noˋ ？ 你講得口沫橫飛，全部都是敷衍的話，哪有什麼意義呢？
lbk14_213 下背个枋仔凸走吔，電視正會阿下去个。 haˊ boi ge biongˊ eˋ tud zeuˋ eˇ，tien sii nang voi oˊ haˊ hi ge 。 下面的木板滑掉了，電視才會倒下去的。
lbk14_214 「讀書惜紙，做田惜屎」个意思係講，做麼个頭路就愛知得愛惜麼个東西。 「tug suˊ xiagˋ ziiˋ ，zo tienˇ xiagˋ siiˋ 」ge i sii he gongˋ ，zo maˋ ge teuˇ lu qiu oi diˊ dedˋ oi xiagˋ maˋ ge dungˊ xiˊ 。 「讀書要愛惜紙張，耕田要珍惜糞便」的意思是說，做什麼事就要懂得愛惜什麼東西。
lbk14_215 青果係退冬吔，就無恁好食吔。 qiangˊ goˋ he tui dungˊ eˇ，qiu moˇ anˋ hoˋ siid eˇ。 蔬果如果超過時令了，就沒那麼好吃了。
lbk14_216 水果係毋對時就會退甘。 suiˋ goˋ he mˇ dui siiˇ qiu voi tui gamˊ 。 水果如過時就會失去原本的甘甜。
lbk14_217 該向恁多人推車駕馬毋知愛去哪仔？ ge hiong anˋ doˊ nginˇ tuiˊ caˊ ga maˊ mˇ diˊ oi hi naiˋ eˋ ？ 那邊這麼多人推著車，駕著馬，不知道要去哪裡？
lbk14_218 佢盡畏人多个地方，擺擺邀佢出去尞，都推三阻四。 iˇ qin vi nginˇ doˊ ge ti fongˊ ，baiˋ baiˋ ieuˊ iˇ cudˋ hi liau ，duˊ tuiˊ samˊ zuˋ xi 。 他很討厭到人多的地方，每次邀他出去玩，總是一直推辭。
lbk14_219 佢等兩儕關係盡好，不時通通透透，你毋好分佢等騙吔。 iˇ denˊ liongˋ saˇ guanˊ he qin hoˋ ，budˋ siiˇ tungˊ tungˊ teu teu ，ngˇ mˇ hoˋ bunˊ iˇ denˊ pien eˇ。 他們兩個關係非比平常，不時秘密往來，你不要被他們騙了。
lbk14_220 頭擺人講：「同壞人共陣，毋當同好人㧡糞。」就係勸話人：交朋友个時節，目珠愛放過利啊！ teuˇ baiˋ nginˇ gongˋ ：「tungˇ faiˋ nginˇ kiung ciin ，mˇ dong tungˇ hoˋ nginˇ kaiˊ bun 。」qiu he kian va nginˇ ：gauˊ penˇ iuˊ ge siiˇ jiedˋ ，mugˋ zuˊ oi biong go li iaˋ ！ 古人說：「寧願替好人挑糞，也不與壞人同行。」就是勸人：交朋友時，眼睛要放亮些！
lbk14_221 佢人蓋直，毋會想攞黨派，不時講：「同壞人共下行，毋當同好人㧡擔。」正式稱說得得。 iˇ nginˇ goi ciid ，mˇ voi xiongˋ loˊ dongˋ pai ，budˋ siiˇ gongˋ ：「tungˇ faiˋ nginˇ kiung ha hangˇ ，mˇ dong tungˇ hoˋ nginˇ kaiˊ damˊ 。」ziin siidˋ ciinˊ sodˋ dedˋ dedˋ 。 他人很正直，不會想參加黨派，經常說：「和壞人一起走，不如替好人挑擔。」真是值得讚許。
lbk14_222 頭擺人講：「同學老嫲頭愛閒，二愛纏，三愛敢（膽），四愛揇。」你今想愛同人个細妹仔，到底有一多本事呢？ teuˇ baiˋ nginˇ gongˋ ：「tungˇ ho loˋ maˇ teuˇ oi hanˇ ，ngi oi canˇ ，samˊ oi gamˋ （damˋ ），xi oi namˋ 。」ngˇ ginˊ xiongˋ oi tungˇ nginˇ ge se moi eˋ ，do daiˋ iuˊ idˋ doˊ bunˋ sii noˋ ？ 俗話說：「要偷腥玩女人，需要很多條件：有閒、敢纏、有膽、敢抱。」現在你想和別的女人玩，到底有多少本事？
lbk14_223 佢盡懶，不管調到哪個單位都毋肯認真學，故所不時分人嫌啊臭核，真實係「桐油盎仔裝桐油」，毋會變喔！ iˇ qin nanˊ ，budˋ gonˋ tiau do nai ge danˊ vi duˊ mˇ henˋ ngin ziinˊ hog ，gu soˋ budˋ siiˇ bunˊ nginˇ hiamˇ a cu hedˋ ，ziinˊ siidˋ he 「tungˇ iuˇ angˊ eˋ zongˊ tungˇ iuˇ 」，mˇ voi bien oˊ！ 他很懶，不管調到哪個單位都不肯認真學習，所以經常被人嫌到不行，真的是「桐油瓶子裝桐油」，本性難移啊！
lbk14_224 你係銅皮鐵骨麼？仰恁寒人个天還淨著一領內衫呢？ ngˇ he tungˇ piˇ tiedˋ gudˋ meˇ ？ngiongˋ anˋ honˇ nginˇ ge tienˊ hanˇ qiang zogˋ idˋ liangˊ nui samˊ noˋ ？ 你是身體很強壯嗎？為什麼這麼冷的天氣還只穿一件內衣呢？
lbk14_225 細人仔毋好拿等棍仔一哪仔捅上捅下，係捅著人个目珠愛仰結煞？ se nginˇ eˋ mˇ hoˋ naˊ nenˋ gun eˋ idˋ naiˋ eˋ tungˋ songˊ tungˋ haˊ ，he tungˋ doˋ nginˇ ge mugˋ zuˊ oi ngiong gadˋ sadˋ？ 小孩子不要拿著棍子到處亂戳，要是不小心戳到別人的眼睛該怎麼辦？
lbk14_226 你愛食就食，毋使恁多話霸。 ngˇ oi siid qiu siid ，mˇ siiˋ anˋ doˊ va ba 。 你要吃就吃，不要那麼多意見。
lbk14_227 該牧師盡有愛心同耐心，不時講聖經故事話人聽。 ge mug siiˊ qin iuˊ oi ximˊ tungˇ nai ximˊ ，budˋ siiˇ gongˋ siin ginˊ gu sii va nginˇ tangˊ 。 那位牧師很有愛心和耐心，經常講聖經故事勸導人。
lbk14_228 佢見開會就話話霸霸，講毋會煞，盡得人畏。 iˇ gian koiˊ fi qiu va va ba ba ，gongˋ mˇ voi sodˋ ，qin dedˋ nginˇ vi 。 他每次開會就意見很多，講個不停，真討人厭。
lbk14_229 該細人仔上樓梯無注意著，對梯排項橫啊下，痛啊哇哇滾。 ge se nginˇ eˋ songˊ leuˇ toiˊ moˇ zu i doˋ，dui toiˊ paiˇ hong vang a haˊ，tung a va va gunˋ 。 那小孩走樓梯不小心，從樓梯上摔下來，痛得哇哇大哭。
lbk14_230 𠊎个紙鷂仔卡啊在該頭牛眼樹个椏桍項，毋知愛仰仔同佢拿下來。 ngaiˇ ge ziiˋ ieu eˋ kaˇ a teˊ ge teuˇ ngiuˇ ngianˋ su ge vaˊ paˋ hong ，mˇ diˊ oi ngiongˋ eˊ tungˇ iˇ naˊ haˊ loiˇ 。 我的風箏卡在那棵龍眼樹的樹枝上，不知道要怎樣把它拿下來。
lbk14_231 人斯毋係請你來做顧問个，你就莫恁呢哇哇斡斡哪！ nginˇ siiˇ mˇ he qiangˋ ngˇ loiˇ zo gu mun ge ，ngˇ qiu mog anˋ neˊ vaˇ vaˇ vadˋ vadˋ naˊ ！ 別人又不是請你來當顧問的，你就不要那麼多意見了！
lbk14_232 該人盡會洩，見講都滑腸滑肚，莫信佢！ ge nginˇ qin voi xied ，gian gongˋ duˊ vad congˇ vad duˋ ，mog xin iˇ ！ 那人很會吹牛，每次說的都不是事實，不要相信他！
lbk14_233 若客話講啊盡滑溜呢！同麼人學个呀？ ngiaˊ hagˋ fa gongˋ a qin vad liuˋ neˊ ！tungˇ maˋ nginˇ hog ge iaˇ？ 你的客家話說得很流暢呢！向誰學的？
lbk14_234 地泥滑餒餒仔，行路愛過細義兜仔喲！ ti naiˇ vad neˊ neˊ eˊ ，hangˇ lu oi go se ngi deuˊ eˊ ioˊ！ 地面很滑，走路要小心些！
lbk14_235 你這襖仔滑線縫吔，仰毋攣攣啊？ ngˇ iaˋ oˋ eˋ vad xien pung eˇ ，ngiongˋ mˇ lionˇ lionˇ aˋ？ 你這外套有裂縫了，怎不縫一縫呢？
lbk14_236 該細人仔鑪溜皮吔，厥姆共快挖藥膏同佢膏膏啊哩。 ge se nginˇ eˋ lu liu piˇ eˇ，iaˊ meˊ kiung kuai vadˋ iog gauˊ tungˇ iˇ goˇ goˇ a leˊ。 那小孩擦破皮了，他媽媽趕快挖藥膏幫他塗傷口。
lbk14_237 駛車仔愛定啊，毋好斡上斡下，驚怕會擆著人，係無就分人撞著。 siiˋ caˊ eˋ oi tin aˋ ，mˇ hoˋ vadˋ songˊ vadˋ haˊ ，giangˊ pa voi cogˋ doˋ nginˇ ，he moˇ qiu bunˊ nginˇ cong doˋ 。 開車要小心，不可隨便轉向，怕會撞到人，或被他人撞上。
lbk14_238 做人做事下把仔愛斡轉來看。 zo nginˇ zo sii ha baˋ eˊ oi vadˋ zonˋ loiˇ kon 。 做人做事有時候要回頭看看。
lbk14_239 還細時節，𠊎等會挖火屎來煨番薯仔！ hanˇ se siiˇ jiedˋ ，ngaiˇ nenˊ voi vagˋ foˋ siiˋ loiˇ voiˊ fanˊ suˇ eˋ ！ 小時候，我們會用棍子撥開火苗來烤地瓜！
lbk14_240 細人仔人毋好拿樹桍劃上劃下，會剷著人个目珠。 se nginˇ eˋ nginˇ mˇ hoˋ naˊ su paˋ vagˋ songˊ vagˋ haˊ ，voi canˋ doˋ nginˇ ge mugˋ zuˊ 。 小孩子不要拿樹枝隨意揮動，會刺到他人的眼睛。
lbk14_241 阿姆煮菜个時節，老弟不時拈菜食，正式歪格壞樣哦！ aˊ meˊ zuˋ coi ge siiˇ jiedˋ ，loˋ taiˊ budˋ siiˇ ngiamˊ coi siid ，ziin siidˋ vaiˊ giedˋ fai iong oˊ ！ 媽媽煮菜的時候，弟弟一直用手拿菜吃，真的是壞習慣哦！
lbk14_242 這個人講話、做事蓋無底仔，麼个毋會分夥房个人罵「歪貓仔屙無好屎」。 iaˋ ge nginˇ gongˋ fa 、zo sii goi moˇ daiˋ eˋ ，maˋ ge mˇ voi bunˊ foˋ fongˇ ge nginˇ ma 「vaiˊ meu eˋ oˊ moˇ hoˋ siiˋ 」。 這個人說話、做事很沒準則，才會被隔壁鄰居罵「狗嘴吐不出象牙」。
lbk14_243 美濃人有講：「歪命食个係無油無湯，睡个係無腳眠床，著个係粗布衣裳」，這句話講著貧窮人，正式蓋痛腸哦！ miˇ nungˇ nginˇ iuˊ gongˋ ：「vaiˊ miang siid ge he moˇ iuˇ moˇ tongˊ ，soi ge he moˇ giogˋ minˇ congˇ ，zogˋ ge he cuˊ bu iˊ songˇ 」，iaˋ gi fa gongˋ doˋ pinˇ kiungˇ nginˇ ，ziin siidˋ goi tung congˇ oˊ ！ 美濃人有說：「命不好的人吃的、住的、穿的都不好」，這句話講到貧窮人的痛，真的很難過哦！
lbk14_244 人講：「歪人好算命，醜人好照鏡」，𠊎看你啊怕好認命吔！ nginˇ gongˋ ：「vaiˊ nginˇ hau son miang ，cuˋ nginˇ hau zeu giang 」，ngaiˇ kon ngˇ aˇ pa hoˋ ngin miang eˊ！ 俗話說：「命不好的人愛算命，相貌不美的人愛照鏡子」，我看你呀該認命了！
lbk14_245 你這隻歪頭腦，見做麼个都無分寸、無正經。 ngˇ iaˋ zagˋ vaiˊ teuˇ noˋ ，gian zo maˋ ge duˊ moˇ funˊ cun 、moˇ ziin ginˊ 。 你這個有歹念的人，無論做什麼事都沒分寸、不正經。
lbk14_246 做廳下、做廟還係萬古千年个事情，大家愛過認真一息。 zo tangˊ haˊ 、zo meu hanˇ he van guˋ qienˊ ngianˇ ge sii qinˇ ，tai gaˊ oi go ngin ziinˊ idˋ xidˋ 。 建造祖堂、蓋廟是要保存萬古千年的大事，大家要認真一點。
lbk14_247 你這下去做生理打天下，愛記得「萬事起頭難」，愛過忍耐一息囉！ ngˇ iaˋ ha hi zo senˊ liˊ daˋ tienˊ ha ，oi gi dedˋ 「van sii hiˋ teuˇ nanˇ 」，oi go ngiunˊ nai idˋ xidˋ loˊ！ 你現在去外地做生意，要記得「萬事起頭難」，凡事要多忍耐點哦！
lbk14_248 天下間萬物有主，毋好隨便同人拿來用、也係偷歸去，這係做毋得个喲！ tienˊ ha gianˊ van vud iuˊ zuˋ ，mˇ hoˋ suiˇ pien tungˇ nginˇ naˊ loiˇ iung 、iaˊ he teuˊ guiˊ hi ，iaˋ he zo mˇ dedˋ ge ioˊ！ 世上萬物都有主人，不要隨便拿人的東西來用、或者偷回家，這是行不得的喲！
lbk14_249 這個竹頭毋直，愛用火炕畀彎彎仔正過好用。 iaˋ ge zugˋ teuˇ mˇ ciid ，oi iung foˋ hangˊ biˋ vanˊ vanˊ eˊ nang go hoˋ iung 。 這個竹子不直，要用火烤一烤讓它彎彎的才好用。
lbk14_250 這支釣檳彎彎曲曲蓋毋好釣，你有閒炕畀直哪！ iaˋ giˊ diau binˊ vanˊ vanˊ kiugˋ kiugˋ goi mˇ hoˋ diau ，ngˇ iuˊ hanˇ hangˊ biˋ ciid naˊ！ 這支釣竿彎彎曲曲很不好釣，你有空把它烤一烤拉直啦！