2021國小朗讀稿：
| 編號 | 例句 | 語音合成 | 六堆客語拼音 | 華譯 |
|---|---|---|---|---|
| prim21_001 | 避暑，葉美伶原作。 | pidˋ cuˋ, iab miˊ linˇ ngianˇ zogˋ. | 無 | |
| prim21_002 | 鳳凰樹榮榮个，細細个花開到鬧熱煎煎，日頭緊來緊烈。 | fung fongˇ su iungˇ iungˇ ge, se se ge faˊ koiˊ do nau ngiad jienˊ jienˊ, ngidˋ teuˇ ginˋ loiˇ ginˋ ladˋ. | 無 | |
| prim21_003 | 分人在樹下向頂項看，晟啊擘毋開目，不時聽得著樹頂个蟬仔，知了，知了。 | bunˊ nginˇ teˊ su haˊ hiong dangˋ hong kon, cangˇ a bagˋ mˇ koiˊ mugˋ, budˋ siiˇ tangˊ dedˋ doˋ su dangˋ ge samˇ eˋ, diˊ liauˋ, diˊ liauˋ. | 無 | |
| prim21_004 | 知了，盡命牯唱等這季節正有个歌曲。 | diˊ liauˋ, qin miang guˋ cong denˋ iaˋ gui jiedˋ nang iuˊ ge goˊ kiugˋ. | 無 | |
| prim21_005 | 每年這下係𠊎最暢樂个時節！ | miˊ ngianˇ iaˋ ha he ngaiˇ zuiˋ tiong log ge siiˇ jiedˋ! | 無 | |
| prim21_006 | 等學期結束，放尞該下，阿爸會送𠊎歸鄉下同講客个阿公阿婆培養感情。 | denˋ hog kiˇ giadˋ sugˋ, biong liau ge ha, aˊ baˊ voi sung ngaiˇ guiˊ hiongˊ ha tungˇ gongˋ hagˋ ge aˊ gungˊ aˊ poˇ piˇ iongˊ gamˋ qinˇ. | 無 | |
| prim21_007 | 歇在鄉下無冷氣，毋過，闊闊个瓦屋蓋涼，係暗晡頭特別熱个時節。 | hed teˊ hiongˊ ha moˇ langˊ hi, mˇ go, fadˋ fadˋ ge ngaˋ vugˋ goi liongˇ, he am buˊ teuˇ tid pied ngiad ge siiˇ jiedˋ. | 無 | |
| prim21_008 | 阿婆就會拿扇仔同𠊎撥涼，撥撥啊毋多知仔𠊎就睡落覺吔。 | aˊ poˇ qiu voi naˊ san eˋ tungˇ ngaiˇ padˋ liongˇ, padˋ padˋ a mˇ doˊ diˊ eˊ ngaiˇ qiu soi log gau eˇ. | 無 | |
| prim21_009 | 老屋面前有一個盡闊个禾埕，阿婆講頭擺係晒穀用个。 | loˋ vugˋ mien qienˇ iuˊ idˋ ge qin fadˋ ge voˇ tangˇ, aˊ poˇ gongˋ teuˇ baiˋ he sai gugˋ iung ge. | 無 | |
| prim21_010 | 這下穀收成直接載去穀倉炕，毋使日頭晒，乜毋驚下晝頭个西北雨。 | iaˋ ha gugˋ suˊ siinˇ ciid jiabˋ zoi hi gugˋ congˊ hangˊ, mˇ siiˋ ngidˋ teuˇ sai, me mˇ giangˊ haˊ zu teuˇ ge xiˊ bedˋ iˋ. | 無 | |
| prim21_011 | 阿婆講著頭擺艱辛个日仔，有時還會偷偷仔捽目汁。 | aˊ poˇ gongˋ doˋ teuˇ baiˋ gianˊ xinˊ ge ngidˋ eˋ, iuˊ siiˇ vanˇ voi teuˊ teuˊ eˊ cud mugˋ ziibˋ. | 無 | |
| prim21_012 | 這下禾埕已經變做停車坪，下把仔係晒蘿蔔乾，晒鹹菜乾个好所在。 | iaˋ ha voˇ tangˇ iˋ ginˊ bien zo tinˇ caˊ piangˇ, ha baˋ eˊ he sai loˇ ped gonˊ, sai hamˇ coi gonˊ ge hoˋ soˋ cai. | 無 | |
| prim21_013 | 乜係𠊎等細人仔搞尞个所在。 | me he ngaiˇ denˊ se nginˇ eˋ gauˋ liau ge soˋ cai. | 無 | |
| prim21_014 | 大門口種有一頭蒜果樹總係打到結結結，歸樹頂纍纍墜墜。 | tai munˇ heuˋ zung iuˊ idˋ teuˇ son goˋ su zungˋ he daˋ do giadˋ giadˋ giadˋ, guiˊ su dangˋ lui lui cui cui. | 無 | |
| prim21_015 | 每年這時節就像同𠊎講，歡迎光臨！ | miˊ ngianˇ iaˋ siiˇ jiedˋ qiu qiong tungˇ ngaiˇ gongˋ, fonˊ ngiangˇ gongˊ limˇ! | 無 | |
| prim21_016 | 𠊎為著你煞猛打子，就像阿公阿婆心肝肚滿滿个愛，望等子孫歸來。 | ngaiˇ vi doˋ ngˇ sadˋ mangˊ daˋ ziiˋ, qiu qiong aˊ gungˊ aˊ poˇ ximˊ gonˊ duˋ manˊ manˊ ge oi, mong denˋ ziiˋ sunˊ guiˊ loiˇ. | 無 | |
| prim21_017 | 屋面前還有一條圳溝，歸日泉水流流流流，這滿還捉得著蝦公。 | vugˋ mien qienˇ vanˇ iuˊ idˋ tiauˇ zun gieuˊ, guiˊ ngidˋ qienˇ suiˋ liuˇ liuˇ liu liu, iaˋ manˊ vanˇ zogˋ dedˋ doˋ haˇ gungˊ. | 無 | |
| prim21_018 | 阿婆講就算天旱乜毋怕，泉水分𠊎等个恩情𠊎等愛珍惜。 | aˊ poˇ gongˋ qiu son tienˊ honˊ me mˇ pa, qienˇ suiˋ bunˊ ngaiˇ denˊ ge enˊ qinˇ ngaiˇ denˊ oi ziinˊ xidˋ. | 無 | |
| prim21_019 | 在烈烈日頭下最清涼个享受係泅水，覓蜆仔，捉蝦公，搞水相戽。 | teˊ ladˋ ladˋ ngidˋ teuˇ haˊ zuiˋ qinˊ liongˇ ge hiongˋ su he qiuˇ suiˋ, mi hanˋ eˋ, zogˋ haˇ gungˊ, gauˋ suiˋ xiongˊ fu. | 無 | |
| prim21_020 | 在割過禾个田肚熰番薯，搞騎馬相戰，搞家啦飯仔。 | teˊ godˋ go voˇ ge tienˇ duˋ eu fanˊ suˇ, gauˋ kiˇ maˊ xiongˊ zan, gauˋ gaˊ laˊ fan eˋ. | 無 | |
| prim21_021 | 這兜全部分細人仔搞到歡喜靂天，乜係𠊎避暑快樂个生活。 | iaˋ deuˊ qionˇ pu bunˊ se nginˇ eˋ gauˋ do fonˊ hiˋ lagˋ tienˊ, me he ngaiˇ pidˋ cuˋ kuai log ge senˊ fad. | 無 | |
| prim21_022 | 一𥍉目，𠊎讀小學三年生吔，阿姆安排在暑假分𠊎去補習。 | idˋ ngiabˋ mugˋ, ngaiˇ tug seuˋ hog samˊ ngianˇ senˊ eˇ, aˊ meˊ onˊ paiˇ teˊ cuˋ gaˋ bunˊ ngaiˇ hi buˋ xib. | 無 | |
| prim21_023 | 每日跼在冷氣間，歸個人像挷緪个弓，身材變啊又高又瘦，乜變啊過白淨。 | miˊ ngidˋ kiug teˊ langˊ hi gianˊ, guiˊ ge nginˇ qiong bangˊ henˇ ge giungˊ, siinˊ coiˇ bien a iu goˊ iu ceu, me bien a go pag qiang. | 無 | |
| prim21_024 | 歸日仔像極樂仔樣仔無閒洎杈。 | guiˊ ngidˋ eˋ qiong kid log eˋ iong eˋ moˇ hanˇ qi ca. | 無 | |
| prim21_025 | 𠊎想阿公阿婆个鄉下，想蒜果還等等𠊎去摘。 | ngaiˇ xiongˋ aˊ gungˊ aˊ poˇ ge hiongˊ ha, xiongˋ son goˋ vanˇ denˋ denˋ ngaiˇ hi zagˋ. | 無 | |
| prim21_026 | 隔壁鄰舍个陣黨等𠊎共下搞庰人尋。 | gagˋ biagˋ linˇ sa ge ciin dongˋ denˋ ngaiˇ kiung ha gauˋ biang nginˇ qimˇ. | 無 | |
| prim21_027 | 阿爸講𠊎等客家人盡重要个兩件事，耕田同讀書。 | aˊ baˊ gongˋ ngaiˇ denˊ hagˋ gaˊ nginˇ qin cung ieu ge liongˋ kian sii, gangˊ tienˇ tungˇ tug suˊ. | 無 | |
| prim21_028 | 晴耕雨讀，故所，愛出頭天讀書第一重要。 | qiangˇ gangˊ iˋ tug, gu soˋ, oi cudˋ teuˇ tienˊ tug suˊ ti idˋ cung ieu. | 無 | |
| prim21_029 | 毋過，阿爸乜會輒常撥時間，載全家大細歸去看阿公，阿婆。 | mˇ go, aˊ baˊ me voi jiab songˇ badˋ siiˇ gianˊ, zoi qionˇ gaˊ tai se guiˊ hi kon aˊ gungˊ, aˊ poˇ. | 無 | |
| prim21_030 | 其實，𠊎盡毋盼得个係無法度每日聽著阿公。 | kiˇ siid, ngaiˇ qin mˇ pan dedˋ ge he moˇ fabˋ tu miˊ ngidˋ tangˊ doˋ aˊ gungˊ. | 無 | |
| prim21_031 | 阿婆講古該下仔好聽个客家話。 | aˊ poˇ gongˋ guˋ ge ha eˋ hoˋ tangˊ ge hagˋ gaˊ fa. | 無 | |
| prim21_032 | 鬧熱个落雨天，曾菁怡原作。 | nau ngiad ge log iˋ tienˊ, zenˊ jiangˊ iˇ ngianˇ zogˋ. | 無 | |
| prim21_033 | 鬧鐘鈴，鈴，鈴響吔！ | nau zungˊ liang, liang, liang hiongˋ eˇ! | 無 | |
| prim21_034 | 大嫲聲喊𠊎共快䟘床，再過忍床就會赴毋掣去學校讀書吔。 | tai maˇ sangˊ hemˊ ngaiˇ kiung kuai hong congˇ, zai go ngiunˊ congˇ qiu voi fu mˇ cadˋ hi hog gauˋ tug suˊ eˇ. | 無 | |
| prim21_035 | 𠊎目絲絲仔伸手撳核鬧鐘，還過眠在鬆爽个眠床，毋盼得同佢分開。 | ngaiˇ mugˋ xiˊ xiˊ eˊ cunˊ suˋ kim hedˋ nau zungˊ, vanˇ go minˇ teˊ sungˊ songˋ ge minˇ congˇ, mˇ pan dedˋ tungˇ iˇ funˊ koiˊ. | 無 | |
| prim21_036 | 咦，毋係天光吔吓？ | iˊ, mˇ he tienˊ gongˊ eˇ ha? | 無 | |
| prim21_037 | 外背仰還會暗摸胥疏？ | no boi ngiongˋ vanˇ voi am moˊ xiˊ soˊ? | 無 | |
| prim21_038 | 探頭看啊出去，原來係天公派烏雲使者來通知𠊎等，愛落雨吔！ | damˊ teuˇ kon a cudˋ hi, ngianˇ loiˇ he tienˊ gungˊ pai vuˊ iunˇ siiˋ zaˋ loiˇ tungˊ diˊ ngaiˇ denˊ, oi log iˋ eˇ! | 無 | |
| prim21_039 | 有人認為落雨天係麻煩天，出門愛著水衣，無就擎遮仔。 | iuˊ nginˇ ngin viˇ log iˋ tienˊ he maˇ fanˇ tienˊ, cudˋ munˇ oi zogˋ suiˋ iˊ, moˇ qiu kiangˇ zaˊ eˋ. | 無 | |
| prim21_040 | 無細義衫褲又會涿到溼溚溚仔，去哪仔都無方便。 | moˇ se ngi samˊ fu iu voi dugˋ do siibˋ dab dab eˊ, hi naiˋ eˊ duˊ moˇ fongˊ pien. | 無 | |
| prim21_041 | 學生仔盡惱無法度出去打球，搞尞，一下課先生就掌等。 | hog sangˊ eˋ qin nauˊ moˇ fabˋ tu cudˋ hi daˋ kiuˇ, gauˋ liau, idˋ ha ko xinˊ sangˊ qiu zongˋ denˋ. | 無 | |
| prim21_042 | 麼人都做毋得出去涿雨，故所一看啊著落雨，大家就唉唉唧唧。 | manˋ nginˇ duˊ zo mˇ dedˋ cudˋ hi dugˋ iˋ, gu soˋ idˋ kon a doˋ log iˋ, tai gaˊ qiu aiˊ aiˊ jid jid. | 無 | |
| prim21_043 | 眼盯盯仔看等雨水號等歸個運動坪，實在還慍悴哦！ | ngianˋ dangˊ dangˊ eˊ kon denˋ iˋ suiˋ ho denˋ guiˊ ge iun tung piangˇ, siid cai vanˇ vudˋ zudˋ oˊ! | 無 | |
| prim21_044 | 毋過，落雨天對𠊎來講嗄係盡鬧熱个日仔。 | mˇ go, log iˋ tienˊ dui ngaiˇ loiˇ gongˋ sa he qin nau ngiad ge ngidˋ eˋ. | 無 | |
| prim21_045 | 朝晨一出門，歸路項一哪仔都係車仔，這片嗶嗶，該片叭叭。 | zeuˊ siinˇ idˋ cudˋ munˇ, guiˊ lu hong idˋ nai eˋ du he caˊ eˋ, iaˋ pienˋ bi bi, ge pienˋ ba ba. | 無 | |
| prim21_046 | 像盡久無見个朋友相借問樣仔，大家尖共下講起恁久無看著个思念。 | qiong qin giuˋ moˇ gian ge penˇ iuˊ xiongˊ jia mun iong eˋ, tai gaˊ jiamˊ kiung ha gongˋ hiˋ anˋ giuˋ moˇ kon doˋ ge siiˊ ngiam. | 無 | |
| prim21_047 | 該兜行路个人，擎等一支支遮仔花，雨水一涿，黏時就開出五彩个花蕊。 | ge deuˊ hangˇ lu ge nginˇ, kiangˇ denˋ idˋ giˊ giˊ zaˊ eˋ faˊ, iˋ suiˋ idˋ dugˋ, liamˇ siiˇ qiu koiˊ cudˋ ngˋ caiˋ ge faˊ luiˊ. | 無 | |
| prim21_048 | 行來行去像比麼人个花過鬧。 | hangˇ loiˇ hangˇ hi qiong biˋ manˋ nginˇ ge faˊ go nau. | 無 | |
| prim21_049 | 你係聽過真兜仔，該雨水打在車仔頂，屋頂。 | ngˇ he tangˊ go ziinˊ deuˊ eˊ, ge iˋ suiˋ daˋ teˊ caˊ eˋ dangˋ, vugˋ dangˋ. | 無 | |
| prim21_050 | 水窟仔還係樹葉仔頂高个聲音全部無共樣，有高，有低，有大聲，有細聲。 | suiˋ fudˋ eˊ vanˇ he su iab eˋ dangˋ goˊ ge sangˊ imˊ qionˇ pu moˇ kiung iong, iuˊ goˊ, iuˊ daiˊ, iuˊ tai sangˊ, iuˊ se sangˊ. | 無 | |
| prim21_051 | 像唱歌仔分你聽樣仔。 | qiong cong goˊ eˋ bunˊ ngˇ tangˊ iong eˊ. | 無 | |
| prim21_052 | 有成時，雷公還會用𥍉爧打燈光，用響雷公來和聲，你講，係毋係盡生趣？ | iuˊ sangˇ siiˇ, luiˇ gungˊ vanˇ voi iung ngiabˋ lang daˋ denˊ gongˊ, iung hiongˋ luiˇ gungˊ loiˇ foˇ sangˊ, ngˇ gongˋ, he mˇ he qin senˊ qi? | 無 | |
| prim21_053 | 𠊎盡好在落雨天打早就去學校，因為該兜平常時庰塞塞个螔螺仔。 | ngaiˇ qin hau teˊ log iˋ tienˊ daˋ zoˋ qiu hi hog gauˋ, inˊ vi ge deuˊ pinˇ songˇ siiˇ biang sedˋ sedˋ ge seˇ loˇ eˋ. | 無 | |
| prim21_054 | 䘆公全部都會趖出來搞水。 | hianˋ gungˊ qionˇ pu duˊ voi soˇ cudˋ loiˇ gauˋ suiˋ. | 無 | |
| prim21_055 | 學校圍牆泥壁項个溜苔青溜溜仔，落雨該下，螔螺仔歸陣仔趖上趖下。 | hog gauˋ viˇ xiongˇ naiˇ biagˋ hong ge liuˊ toiˇ qiangˊ liuˋ liuˋ eˊ, log iˋ ge ha, seˇ loˇ eˋ guiˊ ciin eˋ soˇ songˊ soˇ haˊ. | 無 | |
| prim21_056 | 有兜相爭看麼人趖過遽，有兜斡來斡去做起畫圖个藝術家。 | iuˊ deuˊ xiongˊ zangˊ kon manˋ nginˇ soˇ go giagˋ, iuˊ deuˊ vadˋ loiˇ vadˋ hi zo hiˋ fa tuˇ ge ngi sud gaˊ. | 無 | |
| prim21_057 | 有兜恬在圍牆頂高享受涿雨个清涼，逍遙自在。 | iuˊ deuˊ diamˊ teˊ viˇ xiongˇ dangˋ goˊ hiongˋ su dugˋ iˋ ge qinˊ liongˇ, seuˊ ieuˇ cii cai. | 無 | |
| prim21_058 | 落雨天出來搞尞个䘆公盡好膽，衫褲無著就緊拚拚仔出來搞水。 | log iˋ tienˊ cudˋ loiˇ gauˋ liau ge hianˋ gungˊ qin hoˋ damˋ, samˊ fu moˇ zogˋ qiu ginˋ bia bia eˊ cudˋ loiˇ gauˋ suiˋ. | 無 | |
| prim21_059 | 壢坑裡背朗朗滾个水流盡刺激，幾下尾䘆公分水沖過去還會搖來擺去。 | lagˋ hangˊ diˊ boi long long gunˋ ge suiˋ liuˇ qin qiugˋ gidˋ, giˋ ha miˊ hianˋ gungˊ bunˊ suiˋ cungˊ go hi vanˇ voi ieuˇ loiˇ baiˋ hi. | 無 | |
| prim21_060 | 暢啊無結煞。 | tiong a moˇ gadˋ sadˋ. | 無 | |
| prim21_061 | 有兜䘆公大擘擘仔趖到路項來，過砸身个還做得趖歸去。 | iuˊ deuˊ hianˋ gungˊ tai bagˋ bagˋ eˊ soˇ do lu hong loiˇ, go zabˋ siinˊ ge vanˇ zo dedˋ soˇ guiˊ hi. | 無 | |
| prim21_062 | 過㜮个將就橫在路徑項，分天公做主吔！ | go lamˊ ge jiongˊ qiu vangˇ teˊ lu gang hong, bunˊ tienˊ gungˊ zo zuˋ eˇ! | 無 | |
| prim21_063 | 鬧熱个落雨天，有人懊躁，有人歡喜，天公無法度分每一個人合意。 | nau ngiad ge log iˋ tienˊ, iuˊ nginˇ au zau, iuˊ nginˇ fonˊ hiˋ, tienˊ gungˊ moˇ fabˋ tu bunˊ miˊ idˋ ge nginˇ gagˋ i. | 無 | |
| prim21_064 | 只有𠊎等自家改變想法，毋管麼个天都係盡好个天。 | ziiˋ iuˊ ngaiˇ denˊ qid gaˊ goiˋ bien xiongˋ fabˋ, mˇ gonˋ maˋ ge tienˊ du he qin hoˋ ge tienˊ. | 無 | |
| prim21_065 | 阿姆个鹹粥，黃旭霞原作。 | aˊ meˊ ge hamˇ zugˋ, vongˇ hiugˋ haˇ ngianˇ zogˋ. | 無 | |
| prim21_066 | 起屋个師傅同做小工个姆姆在禾埕項無閒洎杈。 | hiˋ vugˋ ge siiˊ fu tungˇ zo seuˋ gungˊ ge meˊ meˊ teˊ voˇ tangˇ hong moˇ hanˇ qi ca. | 無 | |
| prim21_067 | 師傅交代姆姆愛同磚仔淋濕來起屋時正好用。 | siiˊ fu gauˊ dai meˊ meˊ oi tungˇ zonˊ eˋ limˇ siibˋ loiˇ hiˋ vugˋ siiˇ nang hoˋ iung. | 無 | |
| prim21_068 | 阿姆看姆姆無閒在該攪沙仔，走去牽水管來淋磚仔。 | aˊ meˊ kon meˊ meˊ moˇ hanˇ teˊ ge giauˊ saˊ eˋ, zeuˋ hi kianˊ suiˋ gonˋ loiˇ limˇ zonˊ eˋ. | 無 | |
| prim21_069 | 𠊎就跈等阿姆在脣口搞水。 | ngaiˇ qiu tenˇ denˋ aˊ meˊ teˊ siinˇ heuˋ gauˋ suiˋ. | 無 | |
| prim21_070 | 阿爸在外地上班無法度不時歸屋下。 | aˊ baˊ teˊ ngoi ti songˊ banˊ moˇ fabˋ tu budˋ siiˇ guiˊ lugˋ kaˊ. | 無 | |
| prim21_071 | 屋下大細事情全部係阿姆一個人㧡起來做到兩頭烏。 | lugˋ kaˊ tai se sii qinˇ qionˇ pu he aˊ meˊ idˋ ge nginˇ kaiˊ hiˋ loiˇ zo do liongˋ teuˇ vuˊ. | 無 | |
| prim21_072 | 𠊎等毋知頭天个三姊妹，想著會有新屋好歇，有自家个間房好歇。 | ngaiˇ denˊ mˇ diˊ teuˇ tienˊ ge samˊ jiˋ moi, xiongˋ doˋ voi iuˊ xinˊ vugˋ hoˋ hed, iuˊ qid gaˊ ge gianˊ fongˇ hoˋ hed. | 無 | |
| prim21_073 | 心肝肚不時庰等歡喜个心情。 | ximˊ gonˊ duˋ budˋ siiˇ biang denˋ fonˊ hiˋ ge ximˊ qinˇ. | 無 | |
| prim21_074 | 有時阿姆喊來𢯭手扐磚仔，疊磚仔，擐水，擐茶，𠊎同兩個阿哥定著會𢯭手。 | iuˊ siiˇ aˊ meˊ hemˊ loiˇ ten suˋ led zonˊ eˋ, tiab zonˊ eˋ, kuan suiˋ, kuan caˇ, ngaiˇ tungˇ liongˋ ge aˊ goˊ tin cog voi ten suˋ. | 無 | |
| prim21_075 | 下晝兩點零仔，阿姆在灶下無閒，耳公聽著阿姆拿菜刀，切豬肉，香菇，芹菜。 | haˊ zu liongˋ diamˋ langˇ eˊ, aˊ meˊ teˊ zo haˊ moˇ hanˇ, ngiˋ gungˊ tangˊ doˋ aˊ meˊ naˊ coi doˊ, qiedˋ zuˊ ngiugˋ, hiongˊ guˊ, kiunˇ coi. | 無 | |
| prim21_076 | 洗鑊頭，開瓦斯，哇！ | seˋ vog teuˇ, koiˊ ngaˋ siiˊ, va! | 無 | |
| prim21_077 | 阿姆愛開始煮點心吔！ | aˊ meˊ oi koiˊ siiˋ zuˋ diamˋ ximˊ eˇ! | 無 | |
| prim21_078 | 𠊎恬恬趖去灶下看阿姆煮點心。 | ngaiˇ diamˊ diamˊ soˇ hi zo haˊ kon aˊ meˊ zuˋ diamˋ ximˊ. | 無 | |
| prim21_079 | 阿姆對豬油缽挖兜仔豬油放落鑊，接等就放浸過水个蝦米同香菇來。 | aˊ meˊ dui zuˊ iuˇ badˋ iadˋ deuˊ eˊ zuˊ iuˇ biong log vog, jiabˋ denˋ qiu biong jim go suiˋ ge haˇ miˋ tungˇ hiongˊ guˊ loiˇ. | 無 | |
| prim21_080 | 𤐙香，𤐙出香味後就放落切好个竹筍，炒一下仔就放洗淨个米共下炒。 | biag hiongˊ, biag cudˋ hiongˊ mi heu qiu biong log qiedˋ hoˋ ge zugˋ sunˋ, cauˋ idˋ ha eˊ qiu biong seˋ qiang ge miˋ kiung ha cauˋ. | 無 | |
| prim21_081 | 浸過蝦米同香菇个水做毋得打爽，倒兜仔豆油後就倒滾水開始煮粥吔！ | jim go haˇ miˋ tungˇ hiongˊ guˊ ge suiˋ zo mˇ dedˋ daˋ songˋ, doˋ deuˊ eˊ teu iuˇ heu qiu doˋ gunˋ suiˋ koiˊ siiˋ zuˋ zugˋ eˇ! | 無 | |
| prim21_082 | 差毋多半點零鐘粥就煮好，毋過粥燒熝熝仔。 | caˊ mˇ doˊ ban diamˋ langˇ zungˊ zugˋ qiu zuˋ hoˋ, mˇ go zugˋ seuˊ lug lug eˊ. | 無 | |
| prim21_083 | 阿姆又同歸鑊个粥沾啊大面盆裡背，分粥過遽冷。 | aˊ meˊ iu tungˇ guiˊ vog ge zugˋ demˊ a tai mien punˇ diˊ boi, bunˊ zugˋ go giagˋ langˊ. | 無 | |
| prim21_084 | 阿霞！ | aˊ haˇ! | 無 | |
| prim21_085 | 𢯭手來撿碗筷，放到禾埕个矮桌仔項。 | ten suˋ loiˇ giamˋ vonˋ kuai, biong do voˇ tangˇ ge aiˋ zogˋ eˋ hong. | 無 | |
| prim21_086 | 撿好碗筷，阿姆就喊𠊎等三姊妹去脣口个矮屋仔搞。 | giamˋ hoˋ vonˋ kuai, aˊ meˊ qiu hemˊ ngaiˇ denˊ samˊ jiˋ moi hi siinˇ heuˋ ge aiˋ vugˋ eˋ gauˋ. | 無 | |
| prim21_087 | 阿姆講，師傅食點心，細人仔毋好坐在脣口看人食，恁仔無規矩。 | aˊ meˊ gongˋ, siiˊ fu siid diamˋ ximˊ, se nginˇ eˋ mˇ hoˋ coˊ teˊ siinˇ heuˋ kon nginˇ siid, anˋ eˊ moˇ guiˊ giˋ. | 無 | |
| prim21_088 | 走入屋肚𠊎拿細楯頭仔來墊腳，對細窗仔偷看師傅佢等食點心。 | zeuˋ ngib vugˋ duˋ ngaiˇ naˊ se dunˋ teuˇ eˋ loiˇ tiabˋ giogˋ, dui se cungˊ eˋ teuˊ kon siiˊ fu iˇ denˊ siid diamˋ ximˊ. | 無 | |
| prim21_089 | 老師傅添第三碗，做小工个姆姆乜添第二碗，𠊎心肝肚蓋急。 | loˋ siiˊ fu tiamˊ ti samˊ vonˋ, zo seuˋ gungˊ ge meˊ meˊ me tiamˊ ti ngi vonˋ, ngaiˇ ximˊ gonˊ duˋ goi gibˋ. | 無 | |
| prim21_090 | 肚屎咕嚕咕嚕个聲也毋會輸人。 | duˋ siiˋ gu lu gu lu ge sangˊ ia mˇ voi suˊ nginˇ. | 無 | |
| prim21_091 | 阿姆煮吔恁大鑊个鹹粥就會無吔！ | aˊ meˊ zuˋ eˇ anˋ tai vog ge hamˇ zugˋ qiu voi moˇ eˇ! | 無 | |
| prim21_092 | 𠊎个嘴毋知幾時嗄翹到半天高。 | ngaiˇ ge zoi mˇ diˊ giˋ siiˇ sa kieu do ban tienˊ goˊ. | 無 | |
| prim21_093 | 𠊎共快走去灶下，該下仔阿姆去收該伸無兩碗个鹹粥。 | ngaiˇ kiung kuai zeuˋ hi zo haˊ, ge ha eˋ aˊ meˊ hi suˊ ge cunˊ moˇ liongˋ vonˋ ge hamˇ zugˋ. | 無 | |
| prim21_094 | 阿姆喊𠊎去𢯭手收碗筷，𠊎毋甘願慢慢仔行慢慢仔做。 | aˊ meˊ hemˊ ngaiˇ hi ten suˋ suˊ vonˋ kuai, ngaiˇ mˇ gamˊ ngian man man eˊ hangˇ man man eˊ zo. | 無 | |
| prim21_095 | 碗筷放到灶下就愛走吔！ | vonˋ kuai biong do zo haˊ qiu oi zeuˋ eˇ! | 無 | |
| prim21_096 | 阿姆講，去拿碗來裝。 | aˊ meˊ gongˋ, hi naˊ vonˋ loiˇ zongˊ. | 無 | |
| prim21_097 | 原來阿姆煮好鹹粥，早就有留兜仔分三個細人仔食。 | ngianˇ loiˇ aˊ meˊ zuˋ hoˋ hamˇ zugˋ, zoˋ qiu iuˊ liuˇ deuˊ eˊ bunˊ samˊ ge se nginˇ eˋ siid. | 無 | |
| prim21_098 | 𠊎共快拿碗去裝粥，這下就顧毋著該時節个投面吔！ | ngaiˇ kiung kuai naˊ vonˋ hi zongˊ zugˋ, iaˋ ha qiu gu mˇ doˋ ge siiˇ jiedˋ ge teuˇ mien eˇ! | 無 | |
| prim21_099 | 鼻公同嘴愛開始無閒吔喲！ | pi gungˊ tungˇ zoi oi koiˊ siiˋ moˇ hanˇ eˇ io! | 無 | |
| prim21_100 | 一碗好食个鹹粥，有香菇，蝦米，竹筍，靚肉，芹菜。 | idˋ vonˋ hoˋ siid ge hamˇ zugˋ, iuˊ hiongˊ guˊ, haˇ miˋ, zugˋ sunˋ, jiangˊ ngiugˋ, kiunˇ coi. | 無 | |
| prim21_101 | 最重要个係有阿姆惜子女个心。 | zuiˋ cung ieu ge he iuˊ aˊ meˊ xiagˋ ziiˋ ngˋ ge ximˊ. | 無 | |
| prim21_102 | 還細時節𠊎食毋出來，這下自家做阿姆吔！ | vanˇ se siiˇ jiedˋ ngaiˇ siid mˇ cudˋ loiˇ, iaˋ ha qid gaˊ zo aˊ meˊ eˇ! | 無 | |
| prim21_103 | 正感受得著這一碗鹹粥个好味緒！ | nang gamˋ su dedˋ doˋ iaˋ idˋ vonˋ hamˇ zugˋ ge hoˋ mi xi! | 無 | |
| prim21_104 | 阿公个杭菊，黃麗芬原作。 | aˊ gungˊ ge hongˇ kiugˋ, vongˇ li funˊ ngianˇ zogˋ. | 無 | |
| prim21_105 | 毋知對哪久開始，阿公就每日在該等天光。 | mˇ diˊ dui nai giuˋ koiˊ siiˋ, aˊ gungˊ qiu miˊ ngidˋ teˊ ge denˋ tienˊ gongˊ. | 無 | |
| prim21_106 | 一天光，阿公緊拚拚仔就想愛出去，像愛赴等去約會樣仔恁歡喜。 | idˋ tienˊ gongˊ, aˊ gungˊ ginˋ bia bia eˊ qiu xiongˋ oi cudˋ hi, qiong oi fu denˋ hi iogˋ fi iong eˊ anˋ fonˊ hiˋ. | 無 | |
| prim21_107 | 佢下把仔用行个，下把仔騎自行車，就好一哪仔緊行。 | iˇ ha baˋ eˊ iung hangˇ ge, ha baˋ eˊ kiˇ cii hangˇ caˊ, qiu hau idˋ nai eˋ ginˋ hangˇ. | 無 | |
| prim21_108 | 佢毋會像別人每朝晨在/LINE/群組傳貼圖問早，淨去廟項唱喏。 | iˇ mˇ voi qiong ped nginˇ miˊ zeuˊ siinˇ teˊ /lai enˋ/ kiunˇ zuˊ conˇ diabˋ tuˇ mun zoˋ, qiang hi meu hong cong iaˊ. | 無 | |
| prim21_109 | 在廟前个大樹下看人作棋仔就算有打卡報到吔。 | teˊ meu qienˇ ge tai su haˊ kon nginˇ zogˋ kiˇ eˋ qiu son iuˊ daˋ kaˇ bo do eˇ. | 無 | |
| prim21_110 | 厥最尾一站係在阿婆最好去个菊花田項坐等看花，看樹，看人，看鳥仔。 | giaˊ zuiˋ miˊ idˋ zam he teˊ aˊ poˇ zuiˋ hau hi ge kiugˋ faˊ tienˇ hong coˊ denˋ kon faˊ, kon su, kon nginˇ, kon diauˊ eˋ. | 無 | |
| prim21_111 | 恬恬仔做無聲个交流，看過願吔自然就會歸屋，這係佢簡單生活个快樂。 | diamˊ diamˊ eˊ zo moˇ sangˊ ge gauˊ liuˇ, kon go ngian eˇ cii ianˇ qiu voi guiˊ vugˋ, iaˋ he iˇ gianˋ danˊ senˊ fad ge kuai log. | 無 | |
| prim21_112 | 有一日到臨暗仔阿公還無歸屋，這係從來都毋識恁仔。 | iuˊ idˋ ngidˋ do limˇ am eˇ aˊ gungˊ vanˇ moˇ guiˊ vugˋ, iaˋ he qiungˇ loiˇ duˊ mˇ siidˋ anˋ eˊ. | 無 | |
| prim21_113 | 歸屋下人緊張到無結無煞歸莊頭去尋，落尾嗄在菊花田項尋著。 | guiˊ lugˋ kaˊ nginˇ ginˋ zongˊ do moˇ gadˋ moˇ sadˋ guiˊ zongˊ teuˇ hi qimˇ, liabˋ miˊ sa teˊ kiugˋ faˊ tienˇ hong qimˇ doˋ. | 無 | |
| prim21_114 | 阿公哪知𠊎等有幾愁慮，嗄毛蟹吊頸，尋無頭䌈緊問，菊花仰做下無吔？ | aˊ gungˊ nai diˊ ngaiˇ denˊ iuˊ giˋ seuˇ li, sa no haiˋ diau giangˋ, qimˇ moˇ teuˇ tagˋ ginˋ mun, kiugˋ faˊ ngiongˋ zo ha moˇ eˇ? | 無 | |
| prim21_115 | 毋管𠊎等仰仔應佢，佢就係毋信，淨會譴孜孜仔緊罵講，恁古怪！ | mˇ gonˋ ngaiˇ denˊ ngiongˋ eˇ in iˇ, iˇ qiu he mˇ xin, qiang voi kienˋ ziiˊ ziiˊ eˊ ginˋ ma gongˋ, anˋ guˋ guai! | 無 | |
| prim21_116 | 恁古怪！ | anˋ guˋ guai! | 無 | |
| prim21_117 | 原來，心愛个東西毋見核時，理智線乜會斷核。 | ngianˇ loiˇ, ximˊ oi ge dungˊ xiˊ mˇ gian hedˋ siiˇ, liˊ zii xien me voi tonˊ hedˋ. | 無 | |
| prim21_118 | 阿公，你看！ | aˊ gungˊ, ngˇ kon! | 無 | |
| prim21_119 | 阿婆同菊花，兩蕊花。 | aˊ poˇ tungˇ kiugˋ faˊ, liongˋ luiˊ faˊ. | 無 | |
| prim21_120 | 一歸到屋下，𠊎共快去阿公个間房拿出佢放在拖箱仔个相片。 | idˋ guiˊ do lugˋ kaˊ, ngaiˇ kiung kuai hi aˊ gungˊ ge gianˊ fongˇ naˊ cudˋ iˇ biong teˊ toˊ xiongˊ eˋ ge xiong pienˋ. | 無 | |
| prim21_121 | 這係佢同阿婆兩儕在銅鑼九湖个菊花田項翕个。 | iaˋ he iˇ tungˇ aˊ poˇ liongˋ saˇ teˊ tungˇ loˇ giuˋ fuˇ ge kiugˋ faˊ tienˇ hong hibˋ ge. | 無 | |
| prim21_122 | 乜係𠊎兩子阿公个祕密。 | me he ngaiˇ liongˋ ziiˋ aˊ gungˊ ge bi med. | 無 | |
| prim21_123 | 這張相片雖然有兜仔褪色，還係看得清楚滿田坵个菊花一蕊一蕊。 | iaˋ zongˊ xiong pienˋ suiˊ ianˇ iuˊ deuˊ eˊ tui sedˋ, vanˇ he kon dedˋ qinˊ cuˋ manˊ tienˇ kiuˊ ge kiugˋ faˊ idˋ luiˊ idˋ luiˊ. | 無 | |
| prim21_124 | 有白乜有黃，佢等个笑容同大自然个鬧各有餳人个所在。 | iuˊ pag me iuˊ vongˇ, iˇ denˊ ge seu iungˇ tungˇ tai cii ianˇ ge nau gogˋ iuˊ xiangˇ nginˇ ge soˋ cai. | 無 | |
| prim21_125 | 無愐著這嗄係阿婆過身後阿公唯一个回憶同紀念。 | moˇ menˋ doˋ iaˋ sa he aˊ poˇ go siinˊ heu aˊ gungˊ viˇ idˋ ge fiˇ i tungˇ gi ngiam. | 無 | |
| prim21_126 | 𠊎心肝肚知，情字這條路，个歌仔，阿公係仰仔唱都唱毋會煞吔。 | ngaiˇ ximˊ gonˊ duˋ diˊ, qinˇ sii iaˋ tiauˇ lu, ge goˊ eˋ, aˊ gungˊ he ngiongˋ eˊ cong duˊ cong mˇ voi sod eˇ. | 無 | |
| prim21_127 | 對該日起勢，𠊎等愐想阿公交吔一個新朋友，安到，阿茲海默先生。 | dui ge ngidˋ hiˋ sii, ngaiˇ denˊ menˋ xiongˋ aˊ gungˊ gauˊ eˇ idˋ ge xinˊ penˇ iuˊ, onˊ doˊ, aˊ ziiˊ hoiˋ med xinˊ sangˊ. | 無 | |
| prim21_128 | 佢毋知係對哪位來个，三不時會來尋阿公。 | iˇ mˇ diˊ he dui nai vi loiˇ ge, samˊ budˋ siiˇ voi loiˇ qimˇ aˊ gungˊ. | 無 | |
| prim21_129 | 來个時節都會帶等記憶个捽仔做等路送分阿公，大塊，細塊。 | loiˇ ge siiˇ jiedˋ duˊ voi dai denˋ gi i ge cud eˋ zo denˋ lu sung bunˊ aˊ gungˊ, tai kuai, se kuai. | 無 | |
| prim21_130 | 麼个形仔都有。 | magˋ ge hinˇ eˋ duˊ iuˊ. | 無 | |
| prim21_131 | 佢兩儕共下个時間漸漸仔緊長，緊來緊鬥搭，阿公毋係尞到毋知好歸屋。 | iˇ liongˋ saˇ kiung ha ge siiˇ gianˊ qiam qiam eˊ ginˋ congˇ, ginˋ loiˇ ginˋ deu dabˋ, aˊ gungˊ mˇ he liau do mˇ diˊ hoˋ guiˊ vugˋ. | 無 | |
| prim21_132 | 就係買吔一千擔又還共樣共樣个東西歸來，還過來來去去緊尋，阿婆呢？ | qiu he maiˊ eˇ idˋ qienˊ damˊ iu vanˇ kiung iong kiung iong ge dungˊ xiˊ guiˊ loiˇ, vanˇ go loiˇ loiˇ hi hi ginˋ qimˇ, aˊ poˇ noˋ? | 無 | |
| prim21_133 | 恁仔个情況實在分人愁慮。 | anˋ eˊ ge qinˇ kongˋ siid cai bunˊ nginˇ seuˇ li. | 無 | |
| prim21_134 | 故所𠊎等準備吔一個胸章結在阿公个面衫項。 | gu soˋ ngaiˇ denˊ zunˋ pi eˇ idˋ ge hiungˊ zongˊ giadˋ teˊ aˊ gungˊ ge mien samˊ hong. | 無 | |
| prim21_135 | 胸章頂高寫等阿公个名仔同屋下个電話號碼，續等詐勢同阿公講，恁仔。 | hiungˊ zongˊ dangˋ goˊ xiaˋ denˋ aˊ gungˊ ge miangˇ eˋ tungˇ lugˋ kaˊ ge tien fa ho maˊ, sa denˋ za sii tungˇ aˊ gungˊ gongˋ, anˋ eˊ. | 無 | |
| prim21_136 | 阿婆就會同你共下去看花吔！ | aˊ poˇ qiu voi tungˇ ngˇ kiung ha hi kon faˊ eˇ! | 無 | |
| prim21_137 | 真真假假，有夢最靚，希望相隨。 | ziinˊ ziinˊ gaˋ gaˋ, iuˊ mung zuiˋ jiangˊ, hiˊ mong xiongˊ suiˇ. | 無 | |
| prim21_138 | 總會天光个！ | zungˋ voi tienˊ gongˊ ge! | 無 | |
| prim21_139 | 𠊎愛同盡遠个距離，想念，挷兼來，同盡靚个記憶，阿婆，好好囥在心肝肚。 | ngaiˇ oi tungˇ qin ianˋ ge kiˊ liˇ, xiongˋ ngiam, bangˊ giamˊ loiˇ, tungˇ qin jiangˊ ge gi i, aˊ poˇ, hoˋ hoˋ kong teˊ ximˊ gonˊ duˋ. | 無 | |
| prim21_140 | 蘋果，徐姿華原作。 | lin goˋ, qiˇ ziiˊ faˇ ngianˇ zogˋ. | 無 | |
| prim21_141 | 在臺灣，蘋果毋係盡罕得見个水果。 | teˊ toiˇ vanˊ, lin goˋ mˇ he qin honˋ dedˋ gian ge suiˋ goˋ. | 無 | |
| prim21_142 | 一年四季儘採哪個水果攤仔都看得著，毋過，蘋果个魔力。 | idˋ ngianˇ xi gui qin caiˊ nai ge suiˋ goˋ damˊ eˋ duˊ kon dedˋ doˋ, mˇ go, lin goˋ ge moˇ lid. | 無 | |
| prim21_143 | 係從細就深深種在𠊎心肝肚，囥入𠊎腦膈肚个。 | he qiungˇ se qiu ciimˊ ciimˊ zung teˊ ngaiˇ ximˊ gonˊ duˋ, kong ngib ngaiˇ noˋ gagˋ duˋ ge. | 無 | |
| prim21_144 | 𠊎等三姊妹一個接等一個出世過後，屋下个開銷日見日增加。 | ngaiˇ denˊ samˊ jiˋ moi idˋ ge jiabˋ denˋ idˋ ge cudˋ se go heu, lugˋ kaˊ ge koiˊ seuˊ ngidˋ gian ngidˋ zenˊ gaˊ. | 無 | |
| prim21_145 | 阿爸同阿姆參詳過後，決定放核屋下該坵出息無多个薄田，出外食頭路。 | aˊ baˊ tungˇ aˊ meˊ camˊ xiongˇ go heu, giadˋ tin biong hedˋ lugˋ kaˊ ge kiuˊ cudˋ xidˋ moˇ doˊ ge pog tienˇ, cudˋ ngoi siid teuˇ lu. | 無 | |
| prim21_146 | 為著賺過多兜仔錢，阿爸去應著水壩工程个十輪牯運轉手。 | vi doˋ con go doˊ deuˊ eˊ qienˇ, aˊ baˊ hi in doˋ suiˋ ba gungˊ cangˇ ge siib lien guˋ iun zonˋ suˋ. | 無 | |
| prim21_147 | 愛配合工地時間出車，一個月正有好尞兩日仔定定。 | oi pi hab gungˊ ti siiˇ gianˊ cudˋ caˊ, idˋ ge ngiad nang iuˊ hoˋ liau liongˋ ngidˋ eˊ tin tin. | 無 | |
| prim21_148 | 阿爸盡珍惜同屋下人共下个時間，放尞前一日下班吔。 | aˊ baˊ qin ziinˊ xidˋ tungˇ lugˋ kaˊ nginˇ kiung ha ge siiˇ gianˊ, biong liau qienˇ idˋ ngidˋ haˊ banˊ eˇ. | 無 | |
| prim21_149 | 阿爸就透夜趕歸來，歸到屋下已經轉點吔，𠊎等早都睡到屎朏翹翹。 | aˊ baˊ qiu teu ia gonˋ guiˊ loiˇ, guiˊ do lugˋ kaˊ iˋ ginˊ zonˋ diamˋ eˇ, ngaiˇ denˊ zoˋ duˊ soi do sii fudˋ kieu kieu. | 無 | |
| prim21_150 | 阿爸會輕手輕腳來間肚巡𠊎等，看啊有睡好無？ | aˊ baˊ voi kiangˊ suˋ kiangˊ giogˋ loiˇ gianˊ duˋ sunˇ ngaiˇ denˊ, kon a iuˊ soi hoˋ moˇ? | 無 | |
| prim21_151 | 有踢被無？ | iuˊ tedˋ piˊ moˇ? | 無 | |
| prim21_152 | 佢會同睡啊橫架直架个𠊎等扐起來睡正，過同𠊎等蓋被。 | iˇ voi tungˇ soi a vangˇ ga ciid ga ge ngaiˇ denˊ led hiˋ loiˇ soi zang, go tungˇ ngaiˇ denˊ goi piˊ. | 無 | |
| prim21_153 | 還會唚𠊎等个面頰卵，分阿爸短短个鬍鬚刺著，又癢又痛又虐削。 | vanˇ voi jimˊ ngaiˇ denˊ ge mien gabˋ lonˋ, bunˊ aˊ baˊ donˋ donˋ ge fuˇ xiˊ qiugˋ doˋ, iu iongˊ iu tung iu ngiogˋ xiogˋ. | 無 | |
| prim21_154 | 睡等目分阿爸吵醒現起雷追，目絲絲嚶嚶滾噭眵，阿姆就會嘐嘐滾。 | soi denˋ mugˋ bunˊ aˊ baˊ cauˇ xiangˋ hian hiˋ luiˇ zuiˊ, mugˋ xiˊ xiˊ inˊ inˊ gunˋ gieu ziiˊ, aˊ meˊ qiu voi giau giau gunˋ. | 無 | |
| prim21_155 | 喊佢莫搣射人，阿爸會牙牙射射講，恁久無看著吔，𠊎蓋想𠊎心肝妹啊！ | hemˊ iˇ mog miedˋ sa nginˇ, aˊ baˊ voi ngaˇ ngaˇ sa sa gongˋ, anˋ giuˋ moˇ kon doˋ eˇ, ngaiˇ goi xiongˋ ngaiˇ ximˊ gonˊ moi a! | 無 | |
| prim21_156 | 還蓋想睡个𠊎，一下仔又目陰目陽睡核。 | vanˇ goi xiongˋ soi ge ngaiˇ, idˋ ha eˊ iu mugˋ imˊ mugˋ iongˊ soi hedˋ. | 無 | |
| prim21_157 | 毋過睡夢中仰鼻著香香甜甜蓋好鼻个味緒呢？ | mˇ go soi mung zungˊ ngiongˋ pi doˋ hiongˊ hiongˊ tiamˇ tiamˇ goi hoˋ pi ge mi xi noˋ? | 無 | |
| prim21_158 | 第二日朝晨䟘床，枕頭脣有一粒又紅又大粒个蘋果。 | ti ngi ngidˋ zeuˊ siinˇ hong congˇ, ziimˋ teuˇ sunˇ iuˊ idˋ liab iu fungˇ iu tai liab ge lin goˋ. | 無 | |
| prim21_159 | 該香香个味緒就係昨暗晡睡目該下鼻著个，該大蘋果還餳人哪！ | ge hiongˊ hiongˊ ge mi xi qiu he coˊ am buˊ soi mugˋ ge ha pi doˋ ge, ge tai lin goˋ vanˇ xiangˇ nginˇ a! | 無 | |
| prim21_160 | 係阿爸歸來吔！ | he aˊ baˊ guiˊ loiˇ eˇ! | 無 | |
| prim21_161 | 𠊎一愐真，共快跳落眠床，還無著著鞋就飆等出去。 | ngaiˇ idˋ menˋ ziinˊ, kiung kuai tiau log minˇ congˇ, vanˇ moˇ zogˋ doˋ haiˇ qiu beuˊ denˋ cudˋ hi. | 無 | |
| prim21_162 | 阿爸坐在飯桌前牙噦噦仔看𠊎，𠊎一下就跳啊阿爸个大腳髀項坐等。 | aˊ baˊ coˊ teˊ fan zogˋ qienˇ ngaˇ ve ve eˊ kon ngaiˇ, ngaiˇ idˋ ha qiu tiauˇ a aˊ baˊ ge tai giogˋ biˋ hong coˊ denˋ. | 無 | |
| prim21_163 | 兩隻手纏等阿爸个頸根，同阿爸使妮。 | liongˋ zagˋ suˋ canˇ denˋ aˊ baˊ ge giangˋ ginˊ, tungˇ aˊ baˊ saiˊ naiˊ. | 無 | |
| prim21_164 | 阿姆捧等一鑊燒熝熝仔个粥行過來，看著𠊎恁仔㖸㖸仔講，還使妮哦！ | aˊ meˊ bungˋ denˋ idˋ vog seuˊ lug lug eˊ ge zugˋ hangˇ go loiˇ, kon doˋ ngaiˇ anˋ eˊ nagˋ nagˋ eˊ gongˋ, vanˇ saiˊ naiˊ oˊ! | 無 | |
| prim21_165 | 遽啊去搓牙齒洗面好食朝吔！ | giagˋ aˋ hi co ngaˇ ciiˋ seˋ mien hoˋ siid zeuˊ eˇ! | 無 | |
| prim21_166 | 𠊎還係毋肯下來，拑等阿爸像一隻無尾熊，阿爸㖸到哈哈滾。 | ngaiˇ vanˇ he mˇ henˋ haˊ loiˇ, kiamˇ denˋ aˊ baˊ qiong idˋ zagˋ moˇ miˊ iungˇ, aˊ baˊ nagˋ do had had gunˋ. | 無 | |
| prim21_167 | 企䟘起來同𠊎揇去洗身間搓牙齒洗面。 | kiˊ hong hiˋ loiˇ tungˇ ngaiˇ namˋ hi seˋ siinˊ gianˊ co ngaˇ ciiˋ seˋ mien. | 無 | |
| prim21_168 | 阿爸知𠊎好食蘋果，每擺做事歸來，總會買蘋果放在𠊎枕頭脣。 | aˊ baˊ diˊ ngaiˇ hau siid lin goˋ, miˊ baiˋ zo se guiˊ loiˇ, zungˋ voi maiˊ lin goˋ biong teˊ ngaiˇ ziimˋ teuˇ sunˇ. | 無 | |
| prim21_169 | 分𠊎做得發一個香香甜甜个夢。 | bunˊ ngaiˇ zo dedˋ bodˋ idˋ ge hiongˊ hiongˊ tiamˇ tiamˇ ge mung. | 無 | |
| prim21_170 | 𠊎知阿爸惜𠊎，𠊎乜知𠊎盡愛阿爸。 | ngaiˇ diˊ aˊ baˊ xiagˋ ngaiˇ, ngaiˇ me diˊ ngaiˇ qin oi aˊ baˊ. | 無 | |
| prim21_171 | 該蘋果个香氣，靚靚个外型同脆脆甜甜个好味緒。 | ge lin goˋ ge hiongˊ hi, jiangˊ jiangˊ ge ngoi hinˇ tungˇ coi coi tiamˇ tiamˇ ge hoˋ mi xi. | 無 | |
| prim21_172 | 毋知對哪時已經刻入𠊎个心肝肚，該蘋果就係阿爸愛𠊎，惜𠊎个印記。 | mˇ diˊ dui nai siiˇ iˋ ginˊ kadˋ ngib ngaiˇ ge ximˊ gonˊ duˋ, ge lin goˋ qiu he aˊ baˊ oi ngaiˇ, xiagˋ ngaiˇ ge in gi. | 無 | |
| prim21_173 | 賣菜，謝惠如原作。 | mai coi, qia fi iˇ ngianˇ zogˋ. | 無 | |
| prim21_174 | 記得讀三年生該下，屋下人多食用乜多。 | gi dedˋ tug samˊ ngianˇ senˊ ge ha, lugˋ kaˊ nginˇ doˊ siid iung me doˊ. | 無 | |
| prim21_175 | 阿姆除了田事還愛打理屋下人个三餐。 | aˊ meˊ cuˇ liauˋ tienˇ se vanˇ oi daˋ liˊ lugˋ kaˊ nginˇ ge samˊ conˊ. | 無 | |
| prim21_176 | 故所利用屋側角該塊空地來種菜，種啊種仔，菜嗄多啊食毋去。 | gu soˋ li iung vugˋ zedˋ gogˋ ge kuai kung ti loiˇ zung coi, zung a zung eˊ, coi sa doˊ a siid mˇ hi. | 無 | |
| prim21_177 | 將就載去街項賣。 | jiongˊ qiu zoi hi giaiˊ hong mai. | 無 | |
| prim21_178 | 九冬十月禾仔割核後，一個尞日阿姆愛𠊎跈佢去𢯭賣菜。 | giuˋ dungˊ siib ngiad voˇ eˋ godˋ hedˋ heu, idˋ ge liau ngidˋ aˊ meˊ oi ngaiˇ tenˇ iˇ hi ten mai coi. | 無 | |
| prim21_179 | 去到菜市場个路脣，阿姆頓好腳踏車，同後盤疊到尖起來个角菜仔。 | hi do coi sii congˇ ge lu sunˇ, aˊ meˊ dunˋ hoˋ giogˋ tab caˊ, tungˇ heu panˇ tiab do jiamˊ hiˋ loiˇ ge gogˋ coi eˋ. | 無 | |
| prim21_180 | 下十過抓下來喚𠊎在該掌等賣。 | haˋ siib go zaˊ haˊ loiˇ vonˋ ngaiˇ teˊ ge zongˋ denˋ mai. | 無 | |
| prim21_181 | 無講橫無講直佢自家又隨載去街項等來賣吔，丟𠊎一個人在該呆呆。 | moˇ gongˋ vangˇ moˇ gongˋ ciid iˇ qid gaˊ iu suiˇ zoi hi giaiˊ hong dinˊ denˋ loiˇ mai eˇ, tiuˋ ngaiˇ idˋ ge nginˇ teˊ ge ngoiˇ ngoiˇ. | 無 | |
| prim21_182 | 毋知愛仰結煞正好。 | mˇ diˊ oi ngiong gadˋ sadˋ nang hoˋ. | 無 | |
| prim21_183 | 本成就面皮薄，見看著毋識个人就會面紅濟炸，莫講愛喊人買菜。 | bunˋ sangˇ qiu mien piˇ pog, gian kon doˋ mˇ siidˋ ge nginˇ qiu voi mien fungˇ ji za, mog gongˋ oi hemˊ nginˇ maiˊ coi. | 無 | |
| prim21_184 | 無結無煞个𠊎，壞勢到頭犁犁仔，全毋敢臥起來看人。 | moˇ gadˋ moˇ sadˋ ge ngaiˇ, faiˋ se do teuˇ laiˇ laiˇ eˊ, qionˇ mˇ gamˋ ngo hiˋ loiˇ kon nginˇ. | 無 | |
| prim21_185 | 好得隔壁賣番薯个老伯姆看𠊎恁恬又畏相，㖸㖸仔講，細阿妹仔，毋使驚。 | hoˋ dedˋ gagˋ biagˋ mai fanˊ suˇ ge loˋ bagˋ meˊ kon ngaiˇ anˋ diamˊ iu vi xiong, nagˋ nagˋ eˊ gongˋ, se aˊ moi eˋ, mˇ siiˋ giangˊ. | 無 | |
| prim21_186 | 你做你大聲喊賣菜，人家聽著就會𢳆轉來看你賣麼个。 | ngˇ zo ngˇ tai sangˊ hemˊ mai coi, nginˇ gaˊ tangˊ doˋ qiu voi ngau zonˋ loiˇ kon ngˇ mai maˋ ge. | 無 | |
| prim21_187 | 無定著有佢想愛買个菜，鴨嫲嘴乜罔吮正有好食，來！ | moˇ tin cog iuˊ iˇ xiongˋ oi maiˊ ge coi, abˋ maˇ zoi me mongˋ qionˋ nang iuˊ hoˋ siid, loiˇ! | 無 | |
| prim21_188 | 𠊎喊分你聽，來唷！ | ngaiˇ hemˊ bunˊ ngˇ tangˊ, loiˇ ioˊ! | 無 | |
| prim21_189 | 來買番薯唷！ | loiˇ maiˊ fanˊ suˇ ioˊ! | 無 | |
| prim21_190 | 好食个番薯仔，粉又甜哦！ | hoˋ siid ge fanˊ suˇ eˋ, funˋ iu tiamˇ o! | 無 | |
| prim21_191 | 包你食吔還會倒轉來買唷！ | bauˊ ngˇ siid eˇ vanˇ voi do zonˋ loiˇ maiˊ ioˊ! | 無 | |
| prim21_192 | 聽著老伯姆个喝賣後，𠊎就膽膽仔試喊啊，來唷！ | tangˊ doˋ loˋ bagˋ meˊ ge hodˋ mai heu, ngaiˇ qiu damˋ damˋ eˊ cii hemˊ a, loiˇ ioˊ! | 無 | |
| prim21_193 | 來買菜哦！ | loiˇ maiˊ coi oˊ! | 無 | |
| prim21_194 | 一抓十個銀定定。 | idˋ zaˊ siib ge ngiunˇ tin tin. | 無 | |
| prim21_195 | 正喊啊煞，一個阿姨聽著隨停下來買，還說𠊎恁乖恁曉得。 | nang hemˊ a sadˋ, idˋ ge aˊ iˇ tangˊ doˋ suiˇ tinˇ haˊ loiˇ maiˊ, vanˇ sodˋ ngaiˇ anˋ guaiˊ anˋ hiauˋ dedˋ. | 無 | |
| prim21_196 | 聽著佢个褒說，𠊎暢到緊喊緊大聲，行過𠊎面前个人。 | tangˊ doˋ iˇ ge boˊ sodˋ, ngaiˇ tiong do ginˋ hemˊ ginˋ tai sangˊ, hangˇ go ngaiˇ mien qienˇ ge nginˇ. | 無 | |
| prim21_197 | 十個有八個大概會恬下來同𠊎買菜，無幾久就賣核。 | siib ge iuˊ badˋ ge tai koiˋ voi diamˊ haˊ loiˇ tungˇ ngaiˇ maiˊ coi, moˇ idˋ giuˋ qiu mai hedˋ. | 無 | |
| prim21_198 | 分𠊎試著賣菜一息都毋會難。 | bunˊ ngaiˇ cii doˋ mai coi idˋ xidˋ duˊ mˇ voi nanˇ. | 無 | |
| prim21_199 | 冬下頭日仔短，臨暗放學歸到屋下，鞋一脫衫一換。 | dungˊ haˊ teuˇ ngidˋ eˋ donˋ, limˇ am biong hog guiˊ do lugˋ kaˊ, haiˇ idˋ todˋ samˊ idˋ von. | 無 | |
| prim21_200 | 隨走去菜園同阿姆𢯭摘菜。 | suiˇ zeuˋ hi coi ianˇ tungˇ aˊ meˊ ten zagˋ coi. | 無 | |
| prim21_201 | 暗晡頭食飽夜後，同阿哥兩個人開始擇菜，秤菜，𠊎等負責个事頭。 | am buˊ teuˇ siid bauˋ ia heu, tungˇ aˊ goˊ liongˋ ge nginˇ koiˊ siiˋ tog coi, ciin coi, ngaiˇ denˊ fu jidˋ ge se teuˇ. | 無 | |
| prim21_202 | 除了愛同一頭一頭有黃葉同燥葉个蓋擘核以外。 | cuˇ liauˋ oi tungˇ idˋ teuˇ idˋ teuˇ iuˊ vongˇ iab tungˇ zauˊ iab ge habˋ bagˋ hedˋ iˊ ngoi. | 無 | |
| prim21_203 | 還愛同有泥个菜蓋搐淨來，整理清淨好勢吔。 | vanˇ oi tungˇ iuˊ naiˇ ge coi habˋ cug qiang loiˇ, ziinˋ liˊ qinˊ qiang hoˋ se eˇ. | 無 | |
| prim21_204 | 正一抓一抓秤畀平重䌈起來。 | nang idˋ zaˊ idˋ zaˊ ciin biˋ piangˇ cungˊ tagˋ hiˋ loiˇ. | 無 | |
| prim21_205 | 阿姆不時吩咐𠊎等，有東西好賣，斤兩定著愛罅擺。 | aˊ meˊ budˋ siiˇ funˊ fu ngaiˇ denˊ, iuˊ dungˊ xiˊ hoˋ mai, ginˊ liongˊ tin cog oi la baiˋ. | 無 | |
| prim21_206 | 雖然正十銀八角又乜係錢，秤頭就係路頭，毋好去梟人。 | suiˊ ianˇ nang siib ngiunˇ badˋ gogˋ iu me he qienˇ, ciin teuˇ qiu he lu teuˇ, mˇ hoˋ hi hieuˊ nginˇ. | 無 | |
| prim21_207 | 還有賣食个東西，自家愛敢食个正好拿去賣人。 | vanˇ iuˊ mai siid ge dungˊ xiˊ, qid gaˊ oi gamˋ siid ge nang hoˋ naˊ hi mai nginˇ. | 無 | |
| prim21_208 | 這兜話𠊎全記在心。 | iaˋ deuˊ fa ngaiˇ qionˇ gi teˊ ximˊ. | 無 | |
| prim21_209 | 賣菜雖然係一種細生理賺無麼錢，也無麼个大學問，毋過對這擇菜。 | mai coi suiˊ ianˇ he idˋ zungˋ se senˊ liˊ con moˇ maˋ qienˇ, ia moˇ maˋ ge tai hog mun, mˇ go dui iaˋ tog coi. | 無 | |
| prim21_210 | 賣菜个過程中，分𠊎學著蓋多做人做事个道理。 | mai coi ge go cangˇ zungˊ, bunˊ ngaiˇ hog doˋ goi doˊ zo nginˇ zo sii ge to liˊ. | 無 | |
| prim21_211 | 像戇仔个天才，葉秋菊原作。 | qiong ngong eˋ ge tienˊ coiˇ, iab qiuˊ kiugˋ ngianˇ zogˋ. | 無 | |
| prim21_212 | 人不可貌相，海水不可斗量，這句話來講阿明牯，一息都無爭差。 | nginˇ budˋ koˋ mau xiong, hoiˋ suiˋ budˋ koˋ deuˋ liongˇ, iaˋ gi fa loiˇ gongˋ aˊ minˇ guˋ, idˋ xidˋ duˊ moˇ zenˊ caˊ. | 無 | |
| prim21_213 | 𠊎乜相信天公爺同你關核一扇門，定著會同你打開另外一扇窗。 | ngaiˇ me xiongˊ xin tienˊ gungˊ iaˇ tungˇ ngˇ guanˊ hedˋ idˋ san munˇ, tin cog voi tungˇ ngˇ daˋ koiˊ nang ngoi idˋ san cungˊ. | 無 | |
| prim21_214 | 見擺𠊎等愛重新分班該下，心情就像老鼠仔跌落米缸肚，又歡喜又愁慮。 | gian baiˋ ngaiˇ denˊ oi qiungˇ xinˊ funˊ banˊ ge ha, ximˊ qinˇ qiu qiong no cuˋ eˊ diedˋ log miˋ gongˊ duˋ, iu fonˊ hiˋ iu seuˇ li. | 無 | |
| prim21_215 | 歡喜个係做得熟事新朋友，愁个係毋知會有仰仔个人同𠊎共班？ | fonˊ hiˋ ge he zo dedˋ sug sii xinˊ penˇ iuˊ, seuˇ ge he mˇ diˊ voi iuˊ ngiongˋ eˇ ge nginˇ tungˇ ngaiˇ kiung banˊ? | 無 | |
| prim21_216 | 蓋記得開學該日，遠遠看著一個手瘸瘸腳跛跛个細倈仔行入教室。 | goi gi dedˋ koiˊ hog ge ngidˋ, ianˋ ianˋ kon doˋ idˋ ge suˋ kioˇ kioˇ giogˋ baiˊ baiˊ ge se lai eˋ hangˇ ngib gau siidˋ. | 無 | |
| prim21_217 | 該個人頭臥臥仔，嘴弛弛仔緊行緊㖸，看起來戇戇。 | ge ge nginˇ teuˇ ngo ngo eˊ, zoi ieˇ ieˇ eˊ ginˋ hangˇ ginˋ nagˋ, kon hiˋ loiˇ ngong ngong. | 無 | |
| prim21_218 | 𠊎愐佢怕係行毋著教室吔，愛去隔壁个資源班正著啊。 | ngaiˇ menˋ iˇ pa he hangˇ mˇ cog gau siidˋ eˇ, oi hi gagˋ biagˋ ge ziiˊ ngianˇ banˊ nang zogˋ a. | 無 | |
| prim21_219 | 該細倈仔的對坐在𠊎隔壁。 | ge se lai eˋ dag dui coˊ teˊ ngaiˇ gagˋ biagˋ. | 無 | |
| prim21_220 | 先生特別同大家紹介這細倈仔，講佢安到張忠明，手腳過毋方便。 | xinˊ sangˊ tid pied tungˇ tai gaˊ seu giai iaˋ se lai eˋ, gongˋ iˇ onˊ doˊ zongˊ zungˊ minˇ, suˋ giogˋ go mˇ fongˊ pien. | 無 | |
| prim21_221 | 愛打幫坐佢脣口个人，發揮同學愛，𢯭手照顧。 | oi daˋ bongˊ coˊ iˇ sunˇ heuˋ ge nginˇ, fadˋ fiˊ tungˇ hog oi, ten suˋ zeu gu. | 無 | |
| prim21_222 | 張忠明？ | zongˊ zungˊ minˇ? | 無 | |
| prim21_223 | 𠊎話著係當聰明，險險㖸出聲來，一愐著新个一年愛同佢比比坐。 | ngaiˇ va doˋ he dongˊ cungˊ minˇ, hiamˋ hiamˋ nagˋ cudˋ sangˊ loiˇ, idˋ menˋ doˋ xinˊ ge idˋ ngianˇ oi tungˇ iˇ beˇ beˇ coˊ. | 無 | |
| prim21_224 | 面就竵核一半。 | mien qiu feˋ hedˋ idˋ ban. | 無 | |
| prim21_225 | 𠊎頭側側仔偷看佢，唉！ | ngaiˇ teuˇ zedˋ zedˋ eˊ teuˊ kon iˇ, aiˊ! | 無 | |
| prim21_226 | 係生到白淨白淨盡清秀个細倈仔呢，但係透日仔口涎水澢澢汀汀。 | he sangˊ do pag qiang pag qiang qin qinˊ xiu ge se lai eˋ neˋ, tan he teu ngidˋ eˋ heuˋ lanˊ suiˋ dongˊ dongˊ dinˇ dinˇ. | 無 | |
| prim21_227 | 同頸根圍等該條涎丫仔，汀到溼溚溚仔，分人看著目汁就會跌出來。 | tungˇ giangˋ ginˊ viˇ denˋ ge tiauˇ lanˊ aˊ eˋ, dinˇ do siibˋ dab dab eˊ, bunˊ nginˇ kon doˋ mugˋ ziibˋ qiu voi diedˋ cudˋ loiˇ. | 無 | |
| prim21_228 | 同情心在𠊎心肝肚慢慢仔翻轉，佢慢慢仔斡轉頭同𠊎㖸一下。 | tungˇ qinˇ ximˊ teˊ ngaiˇ ximˊ gonˊ duˋ man man eˊ fanˊ zonˋ, iˇ man man eˊ vadˋ zonˋ teuˇ tungˇ ngaiˇ nagˋ idˋ ha. | 無 | |
| prim21_229 | 𠊎試著佢蓋得人惜喔！ | ngaiˇ cii doˋ iˇ goi dedˋ nginˇ xiagˋ oˊ! | 無 | |
| prim21_230 | 𠊎該班个撩鳥牯總係撩撩刁刁，奈冬瓜毋何，捉瓠仔來捋毛。 | ngaiˇ ge banˊ ge liauˇ diauˊ guˋ zungˋ he liauˇ liauˇ diauˊ diauˊ, nai dungˊ guaˊ mˇ hoˇ, zogˋ puˇ eˋ loiˇ lod moˊ. | 無 | |
| prim21_231 | 看忠明好欺負，就學佢行路孔孔翹翹个樣仔，無就去撚厥屎朏。 | kon zungˊ minˇ hoˋ kiˊ fu, qiu hog iˇ hangˇ lu kungˋ kungˋ kieu kieu ge iong eˋ, moˇ qiu hi ngianˋ giaˊ sii fudˋ. | 無 | |
| prim21_232 | 好性个阿明就目𥍉𥍉仔任人搣射，𠊎一肚屎个懊躁。 | hoˋ xin ge aˊ minˇ qiu mugˋ ngiabˋ ngiabˋ eˊ im nginˇ miedˋ sa, ngaiˇ idˋ duˋ siiˋ ge au zau. | 無 | |
| prim21_233 | 盡想行前去代佢出頭。 | qin xiongˋ hangˇ qienˇ hi toi iˇ cudˋ teuˇ. | 無 | |
| prim21_234 | 阿明牯盡有志氣，同𠊎等共樣上課，共樣寫作業，淨寫字過食力。 | aˊ minˇ guˋ qin iuˊ zii hi, tungˇ ngaiˇ denˊ kiung iong song ko, kiung iong xiaˋ zogˋ ngiab, qiang xiaˋ sii go siid lid. | 無 | |
| prim21_235 | 過慢板定定，學生仔該該愛做个本分，佢毋識懈怠過。 | go man banˋ tin tin, hog sangˊ eˋ ge goiˊ oi zo ge bunˋ fun, iˇ mˇ siidˋ hai tai go. | 無 | |
| prim21_236 | 有一日上數學，先生出著一個題難過上天，𠊎頭那想到必析乜想毋出來。 | iuˊ idˋ ngidˋ song su hog, xinˊ sangˊ cudˋ doˋ idˋ ge tiˇ nanˇ go songˊ tienˊ, ngaiˇ teuˇ naˇ xiongˋ do bidˋ sagˋ me xiongˋ mˇ cudˋ loiˇ. | 無 | |
| prim21_237 | 大家都額結結仔無人曉得，哪會愐著阿明牯嗄毋使兩分鐘就算出來吔。 | tai gaˊ duˊ ngiagˋ giadˋ giadˋ eˋ moˇ nginˇ hiauˋ dedˋ, nai voi menˋ doˋ aˊ minˇ guˋ sa mˇ siiˋ liongˋ funˊ zungˊ qiu son cudˋ loiˇ eˇ. | 無 | |
| prim21_238 | 大家目珠擘到恁大粒，盆頭講到缽乜無人愛信，戇仔仰會變精吔呢？ | tai gaˊ mugˋ zuˊ bagˋ do anˋ tai liab, punˇ teuˇ gongˋ do badˋ me moˇ nginˇ oi xin, ngong eˋ ngiongˋ voi bien jinˊ eˇ noˋ? | 無 | |
| prim21_239 | 原來佢係一個天才啊，起先話著佢係戇仔个𠊎壞勢到面紅濟炸。 | ngianˇ loiˇ iˇ he idˋ ge tienˊ coiˇ a, hiˋ xienˊ va doˋ iˇ he ngong eˋ ge ngaiˇ faiˋ se do mien fungˇ ji za. | 無 | |
| prim21_240 | 還想尋一個空鑽入去唷！ | vanˇ xiongˋ qimˇ idˋ ge kangˊ zon ngib hi ioˊ! | 無 | |
| prim21_241 | 見擺看著搞到昏天暗地毋知頭天个𠊎等，同拿等隨身聽恬恬聽英文。 | gian baiˋ kon doˋ gauˋ do funˊ tienˊ am ti mˇ diˊ teuˇ tienˊ ge ngaiˇ denˊ, tungˇ naˊ denˋ suiˇ siinˊ tangˊ diamˊ diamˊ tangˊ inˊ vunˇ. | 無 | |
| prim21_242 | 嘴項迪迪凸凸背出一大串英文个佢，就會面紅，實在爭天差地啊！ | zoi hong tid tid tud tud poi cudˋ idˋ tai con inˊ vunˇ ge iˇ, qiu voi mien fungˇ, siid cai zangˊ tienˊ caˊ ti a! | 無 | |
| prim21_243 | 人講，一枝草一點露，天公爺係公當个，雖然無分佢健全个圓身。 | nginˇ gongˋ, idˋ giˊ coˋ idˋ diamˋ lu, tienˊ gungˊ iaˇ he gungˊ dong ge, suiˊ ianˇ moˇ bunˊ iˇ kian qionˇ ge ianˇ siinˊ. | 無 | |
| prim21_244 | 毋過有分佢聰明个頭腦，上進个心，在未來个路項。 | mˇ go iuˊ bunˊ iˇ cungˊ minˇ ge teuˇ noˋ, song jin ge ximˊ, teˊ vi loiˇ ge lu hong. | 無 | |
| prim21_245 | 大家都毋使為佢煩惱為佢愁吔。 | tai gaˊ duˊ mˇ siiˋ vi iˇ fanˇ noˋ vi iˇ seuˇ eˇ. | 無 | |
| prim21_246 | 祕密森林，林貴珠原作。 | bi med semˊ limˇ, limˇ gui zuˊ ngianˇ zogˋ. | 無 | |
| prim21_247 | 𠊎從細盡好在山林裡背，河壩脣搞尞。 | ngaiˇ qiungˇ se qin hau teˊ sanˊ naˇ diˊ boi, hoˇ ba sunˇ gauˋ liau. | 無 | |
| prim21_248 | 一到放尞日就一哪仔野上野下搞到斷烏正歸屋。 | idˋ do biong liau ngidˋ qiu idˋ nai eˋ iaˊ songˊ iaˊ haˊ gauˋ do tonˊ vuˊ nang guiˊ vugˋ. | 無 | |
| prim21_249 | 記得讀小學該下，總係好跈阿娥厥姆去美濃山下拈樵。 | gi dedˋ tug seuˋ hog ge ha, zungˋ he hau tenˇ aˊ ngoˇ giaˊ meˊ hi miˊ nungˇ sanˊ haˊ ngiamˊ ceuˇ. | 無 | |
| prim21_250 | 阿娥厥爸盡早就過身吔，單淨倚恃厥姆做小工來畜一屋仔大細。 | aˊ ngoˇ giaˊ baˊ qin zoˋ qiu go siinˊ eˇ, danˊ qiang iˋ sii giaˊ meˊ zo seuˋ gungˊ loiˇ hiugˋ idˋ vugˋ eˋ tai se. | 無 | |
| prim21_251 | 阿娥盡知事，放尞日都會跈厥姆去山項拈樵相添，𠊎輒常跈衫尾。 | aˊ ngoˇ qin diˊ sii, biong liau ngidˋ duˊ voi tenˇ giaˊ meˊ hi sanˊ hong ngiamˊ ceuˇ xiongˊ tiamˊ, ngaiˇ jiab songˇ tenˇ samˊ miˊ. | 無 | |
| prim21_252 | 同佢等共下去山林裡背遶尞，對𠊎來講這座山林裡背全全寶。 | tungˇ iˇ denˊ kiung ha hi sanˊ naˇ diˊ boi lauˊ liau, dui ngaiˇ loiˇ gongˋ iaˋ co sanˊ naˇ diˊ boi qionˇ qionˇ boˋ. | 無 | |
| prim21_253 | 打早𠊎就背等飯包同佢等共下去，在山林裡背𠊎等搞庰人尋。 | daˋ zoˋ ngaiˇ qiu baˇ denˋ fan bauˊ tungˇ iˇ denˊ kiung ha hi, teˊ sanˊ naˇ diˊ boi ngaiˇ denˊ gauˋ biang nginˇ qimˇ. | 無 | |
| prim21_254 | 同這一大片个山林變做𠊎等个運動坪躘上躘下。 | tungˇ iaˋ idˋ tai pienˋ ge sanˊ naˇ bien zo ngaiˇ denˊ ge iun tung piangˇ liungˊ songˊ liungˊ haˊ. | 無 | |
| prim21_255 | 在樹頂跋上跋下無輸山猴仔，麼个愁慮早就飛走吔，飛到天恁高。 | teˊ su dangˋ bagˋ songˊ bagˋ haˊ moˇ suˊ sanˊ heuˇ eˋ, magˋ ge seuˇ li zoˋ qiu biˊ zeuˋ eˇ, biˊ do tienˊ anˋ goˊ. | 無 | |
| prim21_256 | 𠊎个心情就像著等靚靚花裙在該跳舞个揚蝶仔，飛上飛下恁自在。 | ngaiˇ ge ximˊ qinˇ qiu qiong zogˋ denˋ jiangˊ jiangˊ faˊ kiunˇ teˊ ge tiau vuˋ ge iongˇ iab eˋ, biˊ songˊ biˊ haˊ anˋ cii cai. | 無 | |
| prim21_257 | 恁快樂。 | anˋ kuai log. | 無 | |
| prim21_258 | 走到大汗被身就去山坑脣搞水，山坑水清又清，啉一口透心涼。 | zeuˋ do tai hon piˊ siinˊ qiu hi sanˊ hangˊ sunˇ gauˋ suiˋ, sanˊ hangˊ suiˋ qinˊ iu qinˊ, limˊ idˋ heuˋ teu ximˊ liongˇ. | 無 | |
| prim21_259 | 坑水涼又甜，過贏雜貨店个枝仔冰。 | hangˊ suiˋ liongˇ iu tiamˇ, go iangˇ cab fo diam ge giˊ eˋ benˊ. | 無 | |
| prim21_260 | 續等揙石頭捉蝦公，捉毛蟹，捉魚仔，唱等𠊎自家个山歌。 | sa denˋ bienˋ sag teuˇ zogˋ haˇ gungˊ, zogˋ no haiˋ, zogˋ ngˇ eˋ, cong denˋ ngaiˇ qid gaˊ ge sanˊ goˊ. | 無 | |
| prim21_261 | 快樂个歌聲跈等坑水傳遍歸個山林壁角，流過莊頭，流到闊野野个天際。 | kuai log ge goˊ sangˊ tenˇ denˋ hangˊ suiˋ conˇ bien guiˊ ge sanˊ naˇ biagˋ gogˋ, liuˇ go zongˊ teuˇ, liuˇ do fadˋ iaˊ iaˊ ge tienˊ ji. | 無 | |
| prim21_262 | 有時會有膨尾鼠來讓陣，厥面頰卵蠕蠕動看等𠊎等手項个零嗒。 | iuˊ siiˇ voi iuˊ pong miˊ cuˋ loiˇ ngiong ciin, giaˊ mien gabˋ lonˋ nugˋ nugˋ tungˊ kon denˋ ngaiˇ denˊ suˋ hong ge langˇ dab. | 無 | |
| prim21_263 | 餳到厥口涎水就會跌下來吔，盡得人惜，還有頷頷拜个山狗太，𠊎看你。 | xiangˇ do giaˊ heuˋ lanˊ suiˋ qiu voi diedˋ haˊ loiˇ eˇ, qin dedˋ nginˇ xiagˋ, vanˇ iuˊ ngamˋ ngamˋ bai ge sanˊ gieuˋ tai, ngaiˇ kon ngˇ. | 無 | |
| prim21_264 | 你看𠊎，有時又自家搞到四腳惹天，盡生趣。 | ngˇ kon ngaiˇ, iuˊ siiˇ iu qid gaˊ gauˋ do xi giogˋ ngia tienˊ, qin senˊ qi. | 無 | |
| prim21_265 | 行到竻竹頭下聽著唧唧唧个聲音。 | hangˇ do nedˋ zugˋ teuˇ haˊ tangˊ doˋ jid jid jid ge sangˊ imˊ. | 無 | |
| prim21_266 | 𠊎就同手項銅罐仔裝滿个水灌入地泥个空。 | ngaiˇ qiu tungˇ suˋ hong tungˇ gon eˋ zongˊ manˊ ge suiˋ gon ngib ti naiˇ ge kangˊ. | 無 | |
| prim21_267 | 無幾久就看著另外一個空趖出土狗仔來，一隻，兩隻下擺仔做得透著三。 | moˇ idˋ giuˋ qiu kon doˋ nang ngoi idˋ ge kangˊ soˇ cudˋ tuˋ gieuˋ eˋ loiˇ, idˋ zagˋ, liongˋ zagˋ ha baiˋ eˊ zo dedˋ teu doˋ samˊ. | 無 | |
| prim21_268 | 四隻个土狗仔。 | xi zagˋ ge tuˋ gieuˋ eˋ. | 無 | |
| prim21_269 | 搞啊𤸁吔坐在香絲樹下，山風柔柔吹過樹林，聽等土狗仔唧唧滾鋸弦仔。 | gauˋ a kioi eˇ coˊ teˊ hiongˊ xiˊ su haˊ, sanˊ fungˊ iuˇ iuˇ coiˊ go su naˇ, tangˊ denˋ tuˋ gieuˋ eˋ jid jid gunˋ gi hianˇ eˋ. | 無 | |
| prim21_270 | 山坑水同竻竹和出大自然个音符，這係最餳人聽个樂曲。 | sanˊ hangˊ suiˋ tungˇ nedˋ zugˋ foˇ cudˋ tai cii ianˇ ge imˊ puˇ, iaˋ he zuiˋ xiangˇ nginˇ tangˊ ge ngog kiugˋ. | 無 | |
| prim21_271 | 暢樂个時間總係恬恬仔溜啊過，一𥍉目就到斷烏吔愛歸屋吔。 | tiong log ge siiˇ gianˊ zungˋ he diamˊ diamˊ eˊ liu a go, idˋ ngiabˋ mugˋ qiu do tonˊ vuˊ eˇ oi guiˊ vugˋ eˇ. | 無 | |
| prim21_272 | 猴嫲背等細猴仔攀籬吊壁愛轉竇，𠊎等就踏等紅霞下山。 | heuˇ maˇ baˇ denˋ se heuˇ eˋ panˊ liˇ diau biagˋ oi zonˋ deu, ngaiˇ denˊ qiu tab denˋ fungˇ haˇ haˊ sanˊ. | 無 | |
| prim21_273 | 貓頭鳥咕咕滾同𠊎等講，正來尞，伯姆㧡等滿滿个幸福。 | meu teuˇ diauˊ gu gu gunˋ tungˇ ngaiˇ denˊ gongˋ, nang loiˇ liau, bagˋ meˊ kaiˊ denˋ manˊ manˊ ge hen fugˋ. | 無 | |
| prim21_274 | 𠊎乜袋等滿滿个快樂歸來。 | ngaiˇ me toi denˋ manˊ manˊ ge kuai log guiˊ loiˇ. | 無 | |
| prim21_275 | 感謝這座山林加添𠊎生趣又無共樣个童年生活。 | gamˋ qia iaˋ co sanˊ naˇ gaˊ tiamˊ ngaiˇ senˊ qi iu moˇ kiung iong ge tungˇ ngianˇ senˊ fad. | 無 | |
| prim21_276 | 感謝一路里來陪等𠊎成長个好山好水。 | gamˋ qia idˋ lu liˊ loiˇ piˇ denˋ ngaiˇ siinˇ zongˋ ge hoˋ sanˊ hoˋ suiˋ. | 無 | |
| prim21_277 | 對𠊎來講搞上搞下毋當美濃山下，這係𠊎心肝肚最靚个祕密森林。 | dui ngaiˇ loiˇ gongˋ gauˋ songˊ gauˋ haˊ mˇ dong miˊ nungˇ sanˊ haˊ, iaˋ he ngaiˇ ximˊ gonˊ duˋ zuiˋ jiangˊ ge bi med semˊ limˇ. | 無 |